1 Mose 9
9
Tsilulu yi Nzambi kudi Nowa
1Nzambi wusakumuna Nowa ayi bana bandi bababakala ayi wubakamba: «Butaneno, niekeno ayi wesanu ntoto wuwo. 2Tona buabu bulu bibio bi ntoto ayi zinuni zizio ku tsi zulu mabilutinanga wonga ayi tsisi bibio bindiatilanga mu vumu ayi mbizi zizio mu mbu biveno mu mioko mieno. 3Bibio binkibanga ayi bidi moyo biawu mabiba bidia bieno banga kuandi ndiluvanina biti bikhunzu, bobo ndiluvanini bibio. 4Vayi lubika dia nsuni widi moyo, bu dibangululu, widi ayi menga. 5Vayi diaka manditomba menga meno, bu dibangudulu moyo eno. Manditomba wo kudi kioso bulu kimvonda mutu. Kudi woso mutu mandiyuvula moyo wu khomba andi.
6Ti mutu tengudi menga
Ma mutu wunkaka,
Menga ma mutu wowo
Phe mamatengulua kudi
Ndiandi mutu,
Bila Nzambi wuvanga
Mutu mu kifuani kiandi.
7Vayi kudi beno, butaneno, niekeno, tembakaneno va ntoto ayi funeno.»
8Nzambi wukamba Nowa ayi bana bandi ba babakala: 9«Ndieka mvanga nguizani yami ayi beno, ayi nkun'eno wukululanda 10ayi bibio bidi moyo bi luzungididi: zinuni, bulu biyodama voti binsitu, dibangudulu ti bibio bitotuka mu masuwa ayi bibio bimvumunanga bikuiza zinganga va ntoto. 11Phengi nguizani yami ayi beno. Tona buabu, kadi vangu kimosi kidi moyo kilenda buela fukusu mu khuka nlangu ayi khuka nlangu yilendi buela ba ko mu bunga ntoto.» 12Nzambi wubuela kamba: «Tala, thudidi dimbu ki nguizani va khati ka minu ayi beno ayi bibio bidi moyo, thangu zizio nate mbandu zi nkuiza. 13Thudidi mbumba nanga mu matuti, dimbu ki nguizani kudi minu ayi kudi ntoto. Mayiba dimbu kimbambulanga moyo mu nguizani yimphengi va khati minu ayi ntoto. 14Mikutikisa matuti ma mvula va ntoto ayi mbumba nanga yimonikini mu matuti, 15Mandibambukilanga moyo mu nguizani yami yindivanga ayi beno ayi ntindu mimio mi bibulu, kulendi buela ba khuka nlangu ko yilenda bunga batu. 16Thangu zizio mbumba nanga bu yitotukidi mu matuti, bu mbueni yawu, buna mandibambukanga moyo mu nguizani yimvu ka mvu yindivanga va khati ka minu Nzambi ayi bibio bidi moyo va ntoto.» 17Buna Nzambi wukamba Nowa: «Kiokio dimbu ki nguizani yindivanga va khati ka minu ayi bibio bidi moyo va ntoto.»
Bana batatu ba Nowa
18Bana ba babakala ba Nowa batotuka mu masuwa bawu baba: Semi, Hami ayi Yafeti. Hami niandi wuba disa di Kanani. 19Tona mu bana batatu baba ba Nowa, ntoto wuwala mu batu.
20Nowa wuba mutu wuthete mu kuna ndima yi vinu. 21Lumbu kimosi , yandi wunua vinu, wukolo ayi wuvula minlele miandi mimio mu khati nzo andi yi ngoto. 22Buna Hami, se di Kanani, wumona pheni yi se diandi ayi wukamba diawu kudi ba khomba ziandi zole baba ku nganda. 23Buna Semi ayi Yafeti, babonga yunga, batula kiawu va mavembo mawu, bawu babole va kimosi, bakota kimanima manima, bafuka pheni se diawu. Bavengumuna zizi biawu, muingi babika mona pheni se diawu. 24Thangu Nowa kakotuka ayi nkuiti bu wumana, wuwa mamvangila muana andi wutsuka. 25Wunkamba:
«Bika Kanani kaba
Mutu wusingu!
Bika kaba mvika wu
Bavika ba zikhomba ziandi!»
26Wukamba diaka:
«Bika Yave, Nzambi
Yi Semi, kasakumunu!
Bika Kanani kaba mvika Semi!
27Bika Nzambi kayalumuna
Yafeti, Bika kakalanga
Mu zinzo zingoto zi Semi,
Ayi Kanani kaba mvika Yafeti!»
28Nowa wuzinga diaka khama tatu ayi makumi matanu mamvu tona vana vabela khuka nlangu. 29Wuzinga khama vua makumi matanu mamvu ayi wufua.
Právě zvoleno:
1 Mose 9: YOM-CD
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Seed Company in coordination with Forum Communautaire des Traducteurs de la Bible et Alphabétisation