1 Mose 13
13
1Buna Abalami wukuma tona ku Ngipiti, wuyenda ku tsi yikhatu yi Nengevi, niandi, nketo andi ayi bibio bikavua. Loti phe wuba yandi.
Abalami wuvambana ayi Loti
2Abalami wuba na kimvuama kiphuele ki bibulu, ki phalata ayi ki wola. 3Wuyenda fulu ka fulu tona ku Nengevi nate ku Beteli, kuna ku kateka ba, va khati ka Beteli ayi Ayi, 4va fulu ki kateka tunga ziku, vana Abalami kasambila Yave mu zina diandi.
5Loti, wuba kangalanga ayi Abalami, wuba phe na kimvuama ki bibulu, mameme, zingombi ayi zinzo zingoto. 6Tsi yiba yifioti muingi bazinga va kimosi bila kimvuama kiphuele kiba yawu. 7Nzonza wubua va khati mimvungi mi bibulu mi Abalami ayi mimvungi mi bibulu bi Loti. Ba Kanani ayi ba Pelesi bavua tsi, baba muna. 8Buna Abalami wukamba Loti: «Ndikubombidila, tu bika minzonza va khati ka ngeyo ayi minu voti va khati ka mimvungi miami ayi mimvungi miaku, bila tuidi bakhomba. 9Tsi yoso yisi ko va ntuala aku? Tuvambana: Ti wele ku lumoso, minu ndiele ku lubakala, ti wele ku lubakala, minu ndiele ku lumoso.»
10Buna Loti wuvumbula meso ayi wumona ti ndimba wuwo wu Yodani wuba na nlangu nate ku Soali, mu thangu Yave kakibungidi ko Sodoma ayi Ngomola#13.10 Sodoma ayi Ngomola: Tala bi kapu 18-19. Phaladisu: diambu diadi dilembo tubila ndima Edeni (tala: 2.8-10)., wawu wuba banga lumbu lu Yave ayi banga bubela tsi Ngipiti. 11Landila diodio, Loti wukisodila ndambu yiyo yi Yodani ayi wuyenda ku ndambu yintotukilanga thangu. Bayiza vambana bawu babole. 12Abalami wukala mu tsi Kanana. Loti wukala mu zimbanza ziba mu ndimba Yodani ayi wutunga nzo ziandi zingoto lukufi ayi mbanza Sodoma. 13Vayi babakala ba Sodoma baba na mavanga mambi, bavola masumu mangolo kudi Yave.
14Yave wukamba Abalami bukamana vambana ayi Loti: «Vumbula meso maku va widi ayi tala ku mongo tsi, ku wanda tsi, ku ntotukilanga thangu ayi ku nlekilanga thangu. 15Bila tsi yiyo yi wulembo moni, ndiela kuvana yawu banga mvuilu aku ayi kudi nkuna aku mu thangu zizio#13.15 Tala Mav 7.5. 16Mandiniekisa nkuna aku banga kuandi fundu fundu di ntoto, ti batu balenda tanga fundu fundu di ntoto, buna balenda tanga phe nkuna aku. 17Telama, zieta muamo bila mandikuvana tsi yayo.»
18Abalami wutatamana zingila mu zinzo zingoto. Landila thangu yoyo wuyenda zingila lukufi ayi fulu kiba minti mi kula mi Mamele midi ku Hebeloni Kuna katungila Yave ziku.
Právě zvoleno:
1 Mose 13: YOM-CD
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Seed Company in coordination with Forum Communautaire des Traducteurs de la Bible et Alphabétisation