Marko 4
4
Vmyø̀ wøn kàshvbóng
Mat. 13:1-23; Luk. 8:4-15
1Yesuí tìnúngmè shvnvng yv́ng rá tiqkvt mvshǿl shvngø:tnòe. Àng vl yv́ng vsv̀ng loksok gvzà kø̀m ráì rvtnø̀, Àng nø tìnúngmè mvdv̀m kùngshí vdòng sv̀ng zv́ngshì nø̀ runge. Vsv̀ng loksok shvngbe nø tìnúngmè vdàm pà tø̀mø runge. 2À:ngí kàshvbóng kèní àngmaq sv̀ng mvme pv̀n shvngø:tnò nø̀ yadø a:lòe. 3“Ètá dánø̀ng! Vmyø̀ wøn vsv̀ng nø, vmyø̀ wøn nv̀ng búngá:mì. 4À:ngí wø:nò dvgvp, tiqmaq nø tvrà mvdv̀m vjáá:mì nø̀, carì dì ráì weí tǿvm bǿà. 5Tiqmaq nø vba gvzà mvtvt we lóngheq mvdv̀m vjáá:mì. Vba gvzà mvtvt rvtnø̀ tiqdvshaqí yó lú:ngì. 6Ínìgø, nv̀m svr ráì nø̀ vkatshì lú:ngì kvt gángkéò weí, àngrø màvl rvtnø̀ shúngá:mì. 7Tiqmaq nø bv̀nghǿ póng vdòng vjáá:mì nø̀, bv̀nghǿrì té lú:ngì weí shø̀rkéò rvt àngshí mvzí long. 8Tiqmaq nø vba shvlá yv́ng vjáá:mì nø̀ yó lú:ngì. Vzashì nø̀ té lú:ngì nìnø, vshø̀mcé dvtv̀ng, vchuqcé dvtv̀ng, tiqyá dvtv̀ng àngshí shóng lú:ngì,” a:lòe. 9Wekvt À:ngí, “Tálv́m vnà vdá vsv̀ng nø laq tashì,” a:lòe.
10Àng wawa vl dvgvp, Àng mèpvng cv̀n rì nv̀ng Tiqcé Vnípèí kàshvbóng welòng dang Àng sv̀ng rø:tnòe. 11Wervt À:ngí àngmaq sv̀ng, “Nàmaq sv̀ng nø Gvray móngdàn mvshǿl vmáshaq kà Gvrayí vzíshaq íe. Ínìgø, Ngaí vtv́nglap vl vsv̀ngrì kaq nø kàshvbóng kàí wa shvngøtnòe. 12Kadø íe wani,
‘Àngmaqí dvjaqò nìgø mvyv̀nglv́m,
táò nìgø mvcínglv́m dvpvt íe.
Mø̀í nìnø, àngmaqí yà:ngò nø̀ cíngràl lú:ngò kvt
àngmaq nøt vwv́ngshì ra nø̀ mvrà chutna we lú:nò ni we íe,’” a:lòe.#Esa. 6:9,10; Yoh. 12:40; Dzr. 28:26
Kàshvbóng lvjøm pǿ:nò we
13Wekvtrá Yesuí àngmaq sv̀ng, “Kàshvbóng yalòng sv̀ng nàmaqí mècíngnø̀ng nìnø, dvgá kàshvbóngrì sv̀ng nø kadøwa lecíngnø̀ngni? 14Vmyø̀ wø:nò gǿ nø Gvray Mòngkà wø:nò gǿ íe. 15Vsv̀ng tiqmaq nø tvrà mvdv̀m wø:nò we vmyø̀ nv̀ng vbónge. Àngmaqí mòngkà tá bǿà kvt, wela:ngí ni Satan dì ráì nø̀ àngmaq nøt vdòng wøn bǿà we mòngkà sv̀ng lùv́m bǿà. 16Tiqmaq nø lóngheq tø̀m mvdv̀m wø:nò we vmyø̀ nv̀ng vbónge. Àngmaq nø mòngkà sv̀ng tá bǿà chàng dvbùnø:tní vtoshìe. 17Íwe àngmaq nøt vdòng taq àngrø mvcaqshì rvt tiqlvngcè wa zá:nòe. Àngmaq nø Gvray mòngkà rvt dvshà we, mø̀íni dvki vrè we vhǿm lú:ngò kvt, zvngwa lángshìvme. 18Tiqmaq nø bv̀nghǿ póng vdòng wøn bǿà we vmyø̀ nv̀ng vbónge. Àngmaqí mòngkà sv̀ng tá bǿà nìgø, 19rvgaq yabàn gónggilv́m rì nv̀ng pø̀í yù:mò we nv̀ng dvgá àngpv̀npv̀n sv̀ng map we nøt gòng ra weí mòngkà sv̀ng shø̀rkéò rvtnø̀, àngshí mvzírì íe. #Mak. 10:23-24 20Tiqmaq nø vba shvlá yv́ng wø:nò we vmyø̀ nv̀ng vbónge. Àngmaq nø mòngkà sv̀ng táò dá:ngí vtoshìrì íe. Yarì nø vshø̀mcé dvtv̀ng, vchuqcé dvtv̀ng, tiqyá dvtv̀ng, àngshí shóng longe,” a:lòe.
Vdèò gálòng dvtan ra we
Luk. 8:16-18
21Yesuí rá àngmaq sv̀ng a:lò we nø, “Svmigwìn lv́nga:tnò nìnø mvgù:rí kuplv́m, mø̀íni yøpgù lv̀ngpvngø shvrúnglv́m í má? Àng shvrúngrà taq lè shvrúng rà we mø̀í má? #Mat. 5:15 22Kadø íe wani vmáshaq pà í nìgø Gvrayí dvtan lú:ngòe. Vwvmshaq pà ínìgø gá yv́ng dvtan lú:ngòe. #Mat. 10:26; Luk. 12:2 23Tálv́m vnà vdá vsv̀ng nø laq tashì,” a:lòe.
24À:ngí vrá, “Nàmaqí ètá bǿshà rì shvla dv̀ng wa dèdvmnø̀ng. Té ètánø̀ng nìnø, cíngrál nøt té èzídaqnø̀nge. Wemvdv̀m gø èlúndaqnø̀nge.#Mat. 7:2 25V́laò gǿ sv̀ng nø rvma daqòe. Màv́laò gǿ kèní nø, vdá lòngcè gø àng yv́ngkèní lù bǿòe,” a:lòe.#Mat. 13:12
Vmyø̀ té lú:ngì we kàshvbóng
26À:ngí vrá, “Gvray móngdàn nø, vsv̀ng tiqgǿí rvmá hv́ng taq vmyø̀ wø:nò we nv̀ng vbónge. 27Wø:nò dá:ngí àng nø yaqdø̀:ngí yøp nø̀ vyá:ngí kungshì nø̀ vl ke, kadøwa vmyø̀ mvkuq nø̀ té lú:ngì we à:ngí mvsháò. 28Vbaí àngwawa shvyó lúngò nø̀, nv̀mlat nø mvdùn cvp, mèpvng nø shírùng, wemèpvng nø rvkøpshì we àngshí vl longe. 29Mvzí dvyø̀ gong ra kvt nø shvrvt dvkøm rvtø̀ høq bǿà rvt, à:ngí shv̀mdvgoq lá:ngò nø̀ shvra:tnòe,” a:lòe. #Yol. 3:13
Mvngashí kàshvbóng
Mat. 13:31-32,34; Luk. 13:18-19
30À:ngí vrá, “Gvray móngdàn nø, nøngmaqí kapà nv̀ng shvbónglv́m í má? Kapà kàshvbóng nv̀ng shvbóng shvla má? 31Gvray móngdàn nø mvngashí tiqchv̀ng nv̀ng vbónge. Mvngashí nø, rvgaq tø̀m taq vl pv̀n dvyø̀ shvngbe taqkèní té zì pv̀n íe. 32Íwe ka:tnò nø̀, yo long kvtnø vyúngkvn shvngbe mvdv̀m te longe. Dvgv̀ngmèrì dvkaq long weí, vháng ram carì àngdv̀ng washì nø̀ dvkøqshì lú:nòe,” a:lòe. #Dan. 4:12,21; Ezk. 17:23; 31:6
33Àngmaqí cíngràllv́m dvpvt À:ngí yalòng dø í we kàshvbóng mvme pv̀n kèní àngmaq sv̀ng mòngkà shvngø:tnòe. 34Kàshvbóng kèní wa mø̀í nìnø, À:ngí àngmaq sv̀ng pàgø mvshø̀:nò. Íwe Àng nv̀ng Àng coqcv́nrì àngmaq wa vl dvgvp nø, À:ngí mvshǿl werì shvngbe pǿnaòe.
Yesuí tima na:rò we
Mat. 8:18,23-27; Luk. 8:22-25
35Weni dørø̀m høqa:tnà dvgvp, Yesuí coqcv́nrì kaq, “Tìnúngmè kupa sv̀ng léshaì,” a:lòe. 36Wervt coqcv́nrì nø vsv̀ng loksokrì là:ngò nø̀, Yesu rung we kùngshí gø̀m sv̀ng zv́ngshì dá:ngí, Àng nv̀ng tiqdø léshìe. Dvgá kùngshírì gø zv̀ne. 37Wekvt nv̀mbø̀ng mvrùmè mut ráì nø̀, tìma pvlòng weí, kùngshí gøm nø tìí zǿng mvnshì lú:ngì. 38Yesu nø kùngshí ni yv́ng vgo mvkøm mvkømshì nø̀ yøpme. Wekvt coqcv́nrìí Àng sv̀ng dvsha:tnò nø̀, “Kàngpèá, vmv́nglv́m dv́nshàì we sv̀ng Nàí mènø:tnò má?” a:lòe.
39Wervt Àng kungshì nø̀ nv̀mbø̀ng sv̀ng nga:nò nø̀, tìma sv̀ng gø, “Shø̀mwa èzø̀lvm,” vl bǿà kvt, wela:ngí nv̀mbø̀ng shø̀má:mì nø̀ vtvngshaq mòngzø̀lá:mì.
40À:ngí àngmaq sv̀ng, “Pàwá wedv́ngte serenø̀nge? Akvt høq kv́mnøt mèv̀lnø̀ng má?” a:lòe.
41Íwe, àngmaq gvzà svreá:mì nø̀, “Nv̀mbø̀ng nv̀ng tìma gø Àng kà ta we nø, yapè kagǿ í má?” wa vrùnge.
Právě zvoleno:
Marko 4: GSM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024, Rvcv́ngcè Kàru Gomidi Kristu Shvngø̀mré. All Rights Reserved.
