Marko 11
11
Yerusalem sv̀ng Yesu gòng we
Mat. 21:1-9; Luk. 19:29-38; Yoh. 12:12-16
1Àngmaq nø Yerusalem wamà sv̀ng níshì ráì nø̀, Zanlún Pung shvnvng Betfaji nv̀ng Betani mvrìng sv̀ng tuq ráì dvgvp, Yesuí Àng coqcv́n vnípè sv̀ng, 2“Vzv̀ng lap rvwá sv̀ng èdìv́mshì. Rvwá sv̀ng ègòngv́mshì weó, vsv̀ng tiqgǿ gø shini mvzúnshì dvr we lòzècè tiqgo vdǿn dáò we sv̀ng, nàníí chàng èyv̀ng bǿshòe. Èpǿnshò nø̀ èshølvtshò. 3Nàní sv̀ng tiqgǿgǿí, ‘Pawá yadø èwàshòe?’ wa ra nìnø, ‘Kàngpè zǿmdv̀nge, tv́n tiqlvng ni vtv̀ngvtnòe wae,’ èvlshò,” a:lò nø̀ dvzá:ròe.
#
Mak. 14:13-15
4Wekvt àngní dìá:mì nìnø, tvrà nvmdøng tiqyv́ng, bv́ngkà vngámlap lòzècè tiqgo vdǿ:nò we sv̀ng yv̀ng bǿà nø̀, wego pǿ:nòe. 5Weyv́ng rip rì tiqmaqí nø àngní sv̀ng, “Lòzècè go pawá èpǿnshòe?” a:lòe. 6Yesuí vl bǿà dø àngníí àngmaq sv̀ng a:lò nìnø, àngmaqí dvzá:ròe. 7Àngníí lòzècè go Yesu yv́ngsv̀ng shøla:tnà nø̀, àngmaq mvdv̀m bèlaqrì wego dv̀ngkùngø pvluaò dá:ngí, Àng zúnshìe. 8Wekvt vsv̀ng mvmeí nø, àngmaq bèlaqrì tvrà yv̀nggùng pvluaòe. Dvgá tiqmaqí nø, weshvnvng rvgaq kèní pènàm ra:tnò nø̀ pvluaòe. 9Àng vzv̀ng di rì gø, mèpvng cà:nò rì gø,
“Hosana!
# 11:9 “Hosana” nø móngdàn sv̀ng chv́nglv́m Gvray kaq vjú røtkà íe. Kàngpè bø̀ng taqkèní di daqì pè
Àng nø ìshøt ìgv̀n vle. #Shz. 118:25,26
10Tuq ra we
nøngmaq vkop vkàng Dawiò móngdàn nø
ìshøt ìgv̀n vle.
Vháng vtvng yv́ng gø
Hosana wa laq shvri:ngò,” wa nø̀ vkiqe.
11Yesu nø Yerusalem wamà sv̀ng tuq ráì nø̀, Noqngø̀m Tø̀ngnø wáng sv̀ng gòngá:mì. Gùrhøm shvngbe sv̀ng À:ngí yà:ngò dá:ngí, dørø̀m høqa:tnà rvt coqcv́n Tiqcé Vnípè nv̀ng tiqdø Àng nø Betani mvrìng sv̀ng dìá:mì.
Nv̀mgwè tø̀ng mvtá:nò we
Mat. 21:18-22; Luk. 13:6-9
12Mèpvng ni àngmaq nø Betani mvrìng kèní dì ráì dvgvp, Yesu svríshì lú:ngì. 13Vrúm yv́ngø àngcvp pǿng we nv̀mgwè tiqtø̀ng sv̀ng yv̀ng bǿà nø̀, wetø̀ng taq àngshí tiqchv̀ngchv̀ng zíe má wa yv́ng nv̀ng die. Weyv́ng tuqá:mì nìnø, nv̀mgwè zí rvtø̀ mø̀í rvt,#11:13 Àngcvp pǿng we nv̀mgwè tø̀ng taq v́m shvla we vwatshí zí sháòe. Àngshí mvgong rvtø̀ vwat zí we àngshí láv́m nv̀ng di we íe. àngcvp wa mø̀íni pà gø mvyà:ngò. #Luk. 3:9 14Wervt À:ngí wetø̀ng sv̀ng, “Akvt kèní kukaq tiqgǿí gø nà yv́ngkèní àngshí v́m laq mvlún dá:rò,” a:lòe. Wekà nø Àng coqcv́nrìí gø táòe. #Mak. 11:20
Noqngø̀m Tø̀ngnø dvshè:rò we
Mat. 21:12-17; Luk. 19:45-48; Yoh. 2:13-16
15Àngmaq Yerusalem yv́ng tuq ráì nìnø, Yesu nø Noqngø̀m Tø̀ngnø wáng vdòng sv̀ng gòng nø̀, weyv́ng nvmshì rì wvnshì rì sv̀ng lù:ngò nø̀, gv̀msùng cheshì rì shvbóy nv̀ng kaø nvmke rì àngmaq rúngdvngrì ngaqaòe. #Yoh. 2:14-16 16Vrá, À:ngí Noqngø̀m Tø̀ngnø wáng vdòngdòng kagǿ sv̀ng gø pà dvrè gø shvle màdvzá:rò. 17À:ngí àngmaq sv̀ng shvngø:tnò nø̀, “‘Ngà chø̀m nø vsv̀ng dvcì í dv́ngte dvpvt júrøt chø̀m, wa tǿ ràe,’ wa nø̀ vru yà:ngà. Íwe nàmaqí nø, yachø̀m sv̀ng ‘ tølv́mshúrì àngdv̀ng’ lè í dèzv́r bǿshà,” a:lòe.#Esa. 56:7; Yer. 7:11
18Vsv̀ng loksokrì nø, Yesu shvngøtkà sv̀ng dádv̀ng wa rvt shvrúngshú vjìrì nv̀ng dvrá svrarì nø Àng sv̀ng svree. Wervt àngmaqí Àng shvngøtkà tá bǿà nìnø, Àng sv̀ng shvtlv́m tvrà láòe. 19Nv̀m dø ráì ke Yesu nv̀ng coqcv́nrì nø wamà kèní búngá:mì.
Kv́mnø:tní wá dá:ngò we
20Mèpvng shá:ngí, àngmaq di dvgvp, nv̀mgwè tø̀ng nø àngrø kèní shúnga:pmì we àngmaqí yv̀ng bǿà. #Mak. 11:14 21Wekvt Piterí dvdvm rǿn daqà nø̀ Àng sv̀ng, “Rabiá, ku! Nàí mètv́napmà nv̀mgwè tø̀ng nø shúnga:pmì,” a:lòe.
22Yesuí àngmaq sv̀ng, “Gvray kaq èkv́mnø̀ng. #Yoh. 14:1 23Ngàí jø̀ngjǿng vla:tnìni, nøt màdvtiqshìshaq, kadø shø̀:nò ni wedøni í rae, wa kv́m we kagǿ í nìgø, ya shigùng sv̀ng, ‘Nàcílshì nø̀, tìnúngmè vdòng sv̀ng dègupshìvm,’ a:lò nìnø à:ngí shø̀n bǿò døni bǿna lú:ngòe. #Mat. 17:20; Luk. 17:6 24Wervtnø̀ Ngàí vla:tnìni, nàmaqí vjú èrøtnø̀ng kvt, èrøtshìnø̀ng dv́ngte pà í nìgø lún bǿngà, wa èkv́mnø̀ng kèní nø èlún daqnø̀nge. #Mat. 7:7; Yoh. 14:13; 16:23
25Nàmaq èripnø̀ng sórí vjú èrøtnø̀ng dvgvp nàmaq nø vsv̀ng tiqgǿgǿ nv̀ng nøt nàyv̀ngkénø̀ng we vl nìnø, èchutnanø̀ng. Wekvt wa muqlàng taqlap vl we nàmaq Nvpèí gø nàmaq mvràrì èchutna daqnø̀nge. #Mat. 5:23-24 26[Íwe, nàmaqí vsv̀ng mvrà mèchutnanø̀ng nìnø, muqlàng taqlap vl we nàmaq Nvpèí gø, nàmaq mvràrì mèchutna daqnø̀ng],”#11:26 Àngké kàru tiqmaq taq yaciq màbá. a:lòe.#Mat. 6:14-15
Yesuò vmíng vkv́ng dang rø:tnò we
Mat. 21:23-27; Luk. 20:1-8
27Wemèpvng àngmaq nø vrá tiqkvt Yerusalem sv̀ng tuq ráì. Yesu nø Noqngø̀m Tø̀ngnø wáng vdòng vriqò dvgvp, shvrúngshú vjìrì, dvrá svrarì nv̀ng shaqré shaqtvngrì Àng yv́ng dì ráì. 28Àngmaqí, “Nàí èwàò we yadv́ng pv̀n nø pà vmíng kèní èwàò we í má? Yarì walv́m kagǿí Nà sv̀ng vmíng èzie má?” a:lòe.
29Yesuí àngmaq sv̀ng, “Ngàí gø nàmaq sv̀ng tiqkà røtna:tnìni, nàtv́nshà. Wekvt wa yadv́ng pv̀n nø kapà vmíng kèní Ngàí wv̀ngò we nàmaq sv̀ng gø dvtádv̀ng íe. 30Yohaní tìløpmaò lòng nø muqlàng kèní í má? Mø̀íni vsv̀ng kèní í má? Nàtv́nshà,” a:lòe.
31Wekvt àngmaq nø àngmaq, “‘Muqlàng kèní íe,’ a:lì nìnø, À:ngí nøngmaq sv̀ng, ‘Wedø íni, àng sv̀ng nàmaq pàwá mèkv́mnø̀ng?’ dvwa rani. 32‘Vsv̀ng kèní íe,’ a:lì nìnø, màdu,” wa vrùnge. Pàwá wani Tìløp Yohan nø kàdvtutshú mvdø̀ng tiqpè í we sv̀ng vsv̀ng shvngbe kv́m rvtnø̀, àngmaq sv̀ng svree.
33Wervt Yesu sv̀ng àngmaqí, “Nøngmaqí mvsháì,” wa vtá:nòe.
Yesuí, “Íni pà vmíng kèní yadv́ng pv̀n wv̀ngò we Ngàí gø màdvtáì,” a:lòe.
Právě zvoleno:
Marko 11: GSM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024, Rvcv́ngcè Kàru Gomidi Kristu Shvngø̀mré. All Rights Reserved.
