Yohannis 17
17
Yeesus ishi katattaynitih dhaaco aba
1Yeesus tayim yerhxemko sarrah, intit agana caranadde kulux-isheh: “Abba, amaa saaca gufteh tane, ishi Barha eyneb ku Barhi ku yaynabooki. 2Tamaa atu akah toxoyeh tanito marah umman geedit aniina yaxaw ciloh, umbuka xiyawhi bukalle reeza akah toxoyeh tanito. 3Umman geedit aniina tatiya kinni: rummaahit inki Yalla atu bisa kitom kee atu farteh tanito Yeesus Masiix yaarhigiinim. 4Atu abo yolle toxoye ciyyo abaysheyaako, baarholle ku eynebe. 5Abba, kado lel, tamaa caalam anniye waak kottaalih liyuk ine nabentah isheelih yi eyneb.
6Ta caalamko yoh toxoye marah ku migac akah ishrixeh aniyo. Usun ku mara kuuk yinin, atu yottah toxoye, usun lel ku waanitta dhawrhen. 7Kado atu inkoh yoh toxoyeh tanitom, kottaako kinam yaarhigin. 8Atu yoh toxoye waani akah oxoyeh aniyo, usun lel kabbaateenih yanin. Anu kottaako emeetem lel rummah yeerhegiinih yanin. Atu yi fartemih lel yeemeniinih yanin. 9Anu dhaaco akah abak aniyo. Anu dhaaco akah abak aniyom caalam makiiki, ku mara kinoonimhi sabbatah tamaa atu yoh toxoye marah kinni. 10Yim inkoh kum kinni, kum lel yim kinni. Anu lel tenadde enebeh aniyo. 11Anu kamboh caalamalle maaniyo, usun laakin caalamalle yanin. Anu ku fanah amiituk aniyo. Quddus kin Abba, tamaa nanu tiya akah kinookah tiya yakkoona ciloh, tamaa yoh toxoyeh tanito ishi migacalle ten dhawurh. 12Anu tenlih aniyuk, yoh toxoyeh tanito ku migacalle ten dhawrhe. Ten dhawrheh lel Kutuub yakmalo ciloh amaa liyaati barhaako bextih walaa inketti akko maalayinna. 13Kado laakin anu ku fanah amiituk aniyo. Yi xeden tenadde yakmalo ciloh lel tayim caalamalle aniyuk waanishak aniyo. 14Anu ku waanitta akah oxoyeh aniyo. Anu ta caalamko akah makiyooka balih, usun ta caalamko makinoonimhi sabbatah lel caalam ten tincibe. 15Atu uma tiyaako ten dhawudhdho kibah, ta caalamko ten tayyaaco ku mirhaacima. 16Anu ta caalamko akah makiyooka balih, usun ta caalamko makinooni. 17Ku waanitta rumma kinnik, rummah ten iyqiddis. 18Atu caalamalle akah yi farteekah, caalamalle ten fareh aniyo. 19Usun rummadde yanqaddasoona ciloh tenah arhxiyuk inne aqhiddise.
20Taymih bisa makiiki ku dhaacimam, ten waanittah yottah yaamano le marah gantah kinni. 21Amayim lel usun inkoh inketta yakkoona, atu Abbak yottadde akah tanitookah, anu lel kottadde, usun lel nottadde yakkoona, atu yotta farteh tanitom caalam taamano ciloh kinni. 22Nanu gantah tiya akah kinooka balih usun tiya yakkoona ciloh, atu yoh toxoye nabne akah oxoyeh aniyo. 23Tayim lel anu tenadde, atu lel yottadde akah tanitookah, usun meceetih inketta yakkoona kee, atu yi farteh tanitom kee tamaa yotta akah tikxineekah ten tikxineh tanitom ta caalam taarhago ciloh kinni. 24Abba, ta caalam dhishshiimekkah yi tikxineh tanitomhi sabbatah, yoh toxoyeh tanito mari tamaa yoh toxoyeh tanito nabne yabloona ciloh anu alle aniyolle yannawna farhak aniyo. 25Xaqqi-wanna kin Abbaw, caalam ku aarhige waytemih anu ku eerhegeh aniyo. Ta mari lel atu yi fartem yeerhegiinih yanin. 26Tamaa akah yi tikxineh tanito kaxani tenadde yakko, anu lel tenadde akko ciloh, ku migac ten iyshidhdhigeh aniyo, ten ayshadhdhago lel kiyo” yerhxe.
Právě zvoleno:
Yohannis 17: SCC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia
