Yohannis 15
15
Anu rummaahit cinab xarha kiyo
1Anu rummaahit cinab xarha kiyo, Abba lel cinab dhageh baclaysheena kinni. 2Daro baahinnixe yi xakuk inkoh yagriceh asac-isha, daro baaha xakuk lel mango daro baaho ciloh meceetih qarcoysha. 3Atin lel anu sinlih waanishe waanittah sabbatah mece geddaako qarcoyteenih tanin. 4Atin yottadde siga, anu lel sinadde. Xak cinab xarhak anniye wayemko, daro akah baahe wayaaka balih, yottadde sigteenih akke wayemko atin gantah bahtoona mirhictaana. 5Anu cinab xarha kiyo; atin lel xakuk kitin. Yottaako bextih walaa inkim abtoona mirhictaanamhi sabbatah, yottadde sigak anu adde siga tiya kinni, mango daro baahati. 6Yottadde siginnixeti amaa xak balih amulalle cidditah kafa. Amaa xakuk lel yakatteh, giradde cidditah xarara. 7Yottadde sigteenimko, yi waani lel sinadde sigtemko, farhinnannim dhaacittan gedda, amayim sinah takko kinni. 8Mango daro bahteenimko, yi Abba taymih yanabe, atin lel yi katattaynit kitiinim tamidhdhigin. 9Abba akah yi yikxineh yaneekah, anu sin ikxineh aniyo. Yi kaxanodde siga. 10Yi amre dhawudhdheenimko, anu yi Abbah amre dhawrheh kaa kaxanodde akah sigeh aniyookah, yi kaxanodde sigtoona kitin. 11Tayim sinlih waanisheh aniyom, yi xeden sinadde yannaw kee sin xeden kaamil yakko ciloh kinni.
12Yi amri tatiya kinni: anu akah sin ikxineh aniyookah sitta ikxina. 13Xiyawti ishi soxobah arhxuk ishi aniina tillaabisham, tayko naba kaxani miyane. 14Anu sin aamirem abteenimko, atin yi soxoba kitin. 15Garuzzi kaa maddari abam miyaarhigemhi sabbatah, kamboh garuuza sinak maarhxe. Anu inni Abbaako oobbeh aniyom inkoh sin iyshidhdhigeh aniyomhi sabbatah, laakin yi soxoba sinak erhxeh aniyo. 16Atin yi midooritiini. Anu laakin tedeynih tayfarawna, sin fire lel marto kinni, atin yi migacalle Abba dhaacitinnannim lel sinah yaxaw ciloh sin dooreh sin dhirhiyeh aniyo. 17Tayim sin aamiriyuk ane: sittiya ikxina.
Caalamti nacabo
18Caalam sin tincibemko, sinko basolle yotta tincibeh tanem irhiga. 19Atin caalamko takkindo, ta caalam ishim balih sin akxine dhadhdhe; laakin anu ta caalamko sin dooreh, atin lel ta caalamko makitiinimhi sabbatah caalam sin niciba. 20Anu sinak erhxe waanitta izzikkira: ‘Garuzzi ishi maddaraako minaba.’ Yotta hadaneenimko, sina gantah hadanoona kinon. Yi waani dhawrheenimko, sin waani gantah dhawrhoona kinon. 21Yotta fare tiya miyaarhigiinimhi sabbatah, yi migac hi sabbatah ummannim sinak aboona kinon. 22Emeeteh tenlih waanisheh ineh akke wayaado, zambi-wannun akke mirhaarhinnooni, kado laakin sinni zambeh takale akah malooni. 23Yotta ancibinnanti yi Abba gantah niciba. 24Walaa inketti abinnixe ciyyo ten fanadde abeh anniye wayaado, zambe aalle mirhaarhinnooni, kado laakin yubliinih yotta kee yi Abba inkoh yincibiinih yanin. 25Ten sercatalle: ‘Sabab hinnim yi yincibin’ yarhxiinim tunkuttubeya takmalo alle tane.
26Laakin tamaa Xattiimeeni anu Abbaako faro liyo, rummaahit Ufayi, Abbaako yawceya yamiite gedda, yi zacabah yashhado kinni. 27Atin erherhaako yottaalih tiniinimhi sabbatah, atin gantah tashhadoona kitin.
Právě zvoleno:
Yohannis 15: SCC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia
