Fartottit hi Abittot 9
9
Shaa-uul Masiixih yaamine
(Fartottit hi Abittot 22:6-16; 26:12-18)
1Shaa-uul laakin Maddari katattaynit yagdafo eteritak, naba shekhille yedeeyaako, 2Maddari Araxalle tane labha kee sayyo geyemko, ten yurhuweh Yerusaalem ten baaho ciloh Dimaashqalle geytima sunagoogit fanah fiqhaad waraqhut akah yaxaw amaa naba shekh essere. 3Kado usuk ishi araxalle aduuk, Dimaashqah kab-yerhxe gedda gar-heeko kaa lamma-galelle caranko ifi iffowe. 4Baarholle radeyaako lel: “Shaa-uul, Shaa-uul, aymih yi hadanak tanito?” yarhxe dhaw yoobbe. 5Usuk lel: “Miyatto kito, Maddara?” akko yerhxe. Usuk lel: “Tamaa atu hadanak tanito Yeesus kiyo. 6Ugutaaki daafodde orob, ayim abtam lel koh warishoona kinon” akko yerhxe. 7Kaalih kallaaxak tine xiyaw, dhaw yaabbinya kibah walaa inketta able wayenimhi sabbatah, cibra akah yekkeh yarhxiinim sorhen. 8Shaa-uul baarhooko uguteyaako kaa intit fakkiteh yine hanuk walaa inkim yablo mirhiico. Gabadde kaa taatisheenih lel Dimaashqa kaa orbishen. 9Adooxa lellec lel ablekkah, beetekkah kee aacubekkah suge.
10Kado, Dimaashqalle wuli Xananiya akko yarhxin katattayni yine. Maddari lel mablodde: “Xananiya” akko yerhxe. Usuk lel: “Taykiyo, Maddara” akko yerhxe. 11Maddari lel: “Ugutaaki tamaa: ‘Rig-yarhxe’ akko yarhxin araxalle tedeeh, Shaa-uul akko yarhxin xiyawti Tarsusko kinya dhaaco abak yanek, Yahuudaati caredde kaa wagii. 12Mabloh lel Xananiya akko yarhxin xiyawti adde orobayaako malammih yablo ciloh gaba alle hayam yubleh yane” akko yerhxe. 13Xananiya laakin: “Maddara, ta xiyawtih zacabah Yerusaalemille yinqiddise ku marak, ayidhdha umam akko abem mango maraako oobbeh aniyo. 14Amalle lel ku migac deecinnan mara inkoh yarhaw sheekhat manabottitko reeza leya” yerhxeh alle yedebbe. 15Maddari laakin: “Aduu nagaa, ta xiyawti Aki-mara, nuguusa kee Israa-eel cindhamhi nifille yi migac yaaqhaco doorime nuwatta kinnik. 16Amayim lel yi migacah arhxuk ayidhdha waaxelsiito alle tanem kaa ayballaw kiyomhi sabbatah kinni” akko yerhxe. 17Amaymih Xananiya yedeeyaako amaa caredde orobe. Gaba alle hayeh lel: “Shaa-uul yi sacal, tamaa amiitituk araxadde koh yumbulluwe Maddara kin Yeesus, malammih tablo kee Quddus kin Ufayeh tammaago yi fareh yane” akko yerhxe. 18Akkanih lel wuli cingirih iggidam intiiko akko raddeh malammih yablo dhiice. Uguteh lel yinthimmiqhe. 19Folo beeteh lel hiddaye.
Shaa-uul Dimaashqalle warroysha
Dimaashqalle dago max katattaynitlih suge. 20Akkanih lel: “Usuk Yallih Barha kinni” arhxuk sunagoogitidde Yeesus zacabah warroyshe. 21Inkoh kaa yoobbe mari lel: “Ta xiyawto makini Yerusaalemille ta migac deecinnan mara aylawuk yineti? Talle akah yemeetem lel tena yurhuweyaako sheekhat manabottit fanah ten baaho makini kuuk yinem?” yerhxiinih cibrah raben. 22Shaa-uul laakin xaylah asruuk yedeeh amaa rummah Yeesus Masiix kinam caddoyshak amaa Dimaashqalle tine Yahuud yarhxiinim ten wayshishak yine.
Shaa-uul Dimaashqaako kuda
23 #
2 Korintos 11:23-33
Mango max tillaabek sarrah Yahuud kaa yagdafoona zatteyen. 24Shaa-uul laakin ten zate yeerhege. Kaa yagdafoona ciloh lel daafot caruf lellec kee barah macalsiitak yinin. 25Kaa katattaynit laakin bar kaa beyeenih, qaanat xololaako naba jambiilidde kaa oobishen.
Shaa-uul Yerusaalemille
26Shaa-uul Yerusaalemille yemeete gedda, katattaynitidde yangalo yicikkine. Usuk katattayna kinamah maamaninnoonimhi sabbatah inkoh akko mashshiiten. 27Barnabas laakin kaa kabbaateyaako katattaynitille kaa baaheh, Maddari araxadde aaginah akah yumbulluwem kee aalih waanishem, Dimaashqalle lel Yeesus migacalle fidbeelih aaginah warroyshem akah warishe. 28Yerusaalemille lel cadimbililih Maddari migacalle waanishak tenlih awcuk kee orobak yine. 29Giriikih waanishsha Yahuudlih lel waanishak kee ankeexeduk yine, usun laakin kaa yagdafoona farhak yinin. 30Tayim tuble sacul lel Qayseeriyalle kaa oobisheenih, Tarsus fanah kaa dhirhiyen.
31Amaymih lel, umbuka Yahuudiya, Galiila kee Samaariyalle yine kanaayis salaam geyeyaako anabuk yenebe. Yallih mashshidde gerhak kee Quddus kin Ufayedde rufto geyak, ammanguk yemmenge.
Ayniyasti urnan
32Bithroos ummanille hel-arhxuk, amaa Liddalle sigak yine yinqiddise maralle yakkeedo yemeete. 33Amalle lel wuli baxxara iggida caratalle kale kafe tiya Ayniyas akko yarhxinya geye. 34Bithroos: “Ayniyas, Yeesus Masiix ku urusak yanek ugutaaki ishi carat siddishit” akko yerhxe. Usuk lel akkanih ugute. 35Inkoh Lidda kee Sharon xiyaw kayya yubliinih Maddaralle gaxen.
Tabita rabaako ugutta
36Kado, Yobba akko yarhxinille wuli Tabita (macnah Wayrhele) akko yarhxin katattaynä tine. Ishi lel mece abittot abak zaka axawuk tine. 37Amaa maxadde lel laxutteh rabte, tee cakalisheenih lel bukat caredde tee agaagisheenih yinin. 38Lidda, Yobbah dhayi tineyaako, katattaynit Bithroos amalle yanem yoobbiinih: “Caawitekkah nolle amo” yerhxiinih dhaacimtoh wuli lamma xiyawto alle faren. 39Amaymih Bithroos uguteyaako tenlih yedee. Tena gufe gedda lel bukat caredde kaa korishen. Inkoh kaa agaagalle daw-yerhxeh weecak yine gubon, Wayrhele tenlih anuk abte qamiisha kee sartim kaa yuybulluyin. 40Bithroos laakin inkoh irolle ten yeyyeeceh, gululluubuweh dhaaco abeyaako, amaa rashshalle yufkuneh: “Tabita, ugut” yerhxe. Ishi lel intit fakteh Bithroos tubleyaako defeyte. 41Usuk gabadde yibbirheh tee uguse. Amaa yinqiddise mara kee gubonuh akah deecimeh ufayelih akah yoxoye. 42Tayim lel umbuka Yobballe timidhdhigeh, mango mari lel Maddarah yeemenin. 43Wuli qaraabut nakisha Simcoon akko yarhxin tiyaalih lel Yobballe mango max suge.
Právě zvoleno:
Fartottit hi Abittot 9: SCC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia