Louka 17
17
Ma moukenn t'men o Debleskro dromestar tele te anell!
1Oun o Yezous penas ap peskre malende: “Čačepah, menshe venna, kay kamenn t'men o Debleskro dromestar tele te anell. Bibarht ap koleste, kay kova krella! 2Koleske vals feteder, te vell leske i pharo bar troul i meen pandlo, oun te vell lo an o baro pani vitsedo, te nay anell lo bouder gar yekes kal tiknendar ap o čilačo drom. 3Denn yak ap t'mende! Te krell tiro phraal čilačo koova ap toute, pen leske, kay kova gar mishto hi, hoy yob kras! Te khaytell les ko čilačo koova, hoy yob ap toute kras, yaake ab bouder gar rhoyedo ap leste! 4Te krell lo efta kope ap o dives čilačo koova ap toute, oun te vell lo efta kope pash toute oun penella, kay les kova khaytella, yaake ab bouder gar rhoyedo ap leste!”
O zorelo patsepen
5Oun kol deesh-te-douy bičepangre penan ap o Yezouseste: “Kre maro patsepen zoreles!” 6Koy penas o ray Yezous ap lende: “Te vals t'maro patsepen ninna tikno har i senftikro djob, nay penans t'mer ap ko baro rouk: Vitse tout an o pani! Oun ko rouk shounals ap t'mende.”
Har te boudras mer o Debleske
7“Shounenn, hoy me t'menge penaua: Kek t'mendar penella ap peskro boudepaskro, kay pal peskri boudi ap o kotar them khere vella: Am, besh tout kate tele, rha oun pi! 8Ko krenn t'mer gar. T'mer penenn leske: Rib tout trouyel oun kre mange rhapaske! An ko rhapen pash mande! Palle nay rhah oun piyeh tou ninna.
9Parkrenn t'men pash leste koleske, hoy yob kras? Na-a, ko krenn t'mer gar.
10Yaake hi kova ninna t'mentsa. Te kran t'mer lauter, hoy o Devel t'menge penas, palle penenn: Mer ham tire boudepangre. Mer kram, hoy hounte kram.”
O Yezous krell deesh morshen sasto
11Har o Yezous ap o drom an o foro Yerusalem his, djas lo mank i themma Samaria oun Galilea. 12Oun yob djas an i gab. Oun kote van deesh nassele morsha pash leste. Kolen his i djoungelo nasslepen, kay lengro mass tele merella#17:12 Kava nasslepen kras len pale-čiddo.. Yon his lestar doha dour krik tardo, 13oun dan gole: “Yezous, lačo ray, kre tiro dji menge pre!”
14Oun o Yezous dikas len, oun penas ap lende: “Djan pash o rashayeste, oun sikrenn t'men glan leste!” #17:14 O rashay nay kras len pale erligo.
Oun har yon djan, van yon ap o drom sasto.
15Yek lendar, har yob dikas, te hi lo sasto, djas lo pash o Yezouseste pale pale, oun sharas o Debles o tselo djiyeha. 16Yob vitsras pes glan o Yezouseskre pire tele, oun parkras pes. Kova his i Samaritari#17:16 I Samaritarya hi infam an i biboldengre yaka..
17Koy penas o Yezous: “Deesh van sasto. Kay hi kol vavar enya?
18Hi kek vavar koy, kay vas pale pale, te sharell lo o Debles har kava Samaritari?”
19Oun yob penas ap kol morsheste: “Ste pre, oun dja khere! Tiro patsepen kras tout sasto.”
Kaana vell o Debleskro tsiro?
20Oun i Farisarya poučan o Yezousestar: “Kaana vell ko tsiro, kay dikah, kay o Devel o ray hi pral i tseli phoub?” Koy penas lo: “Ko tsiro vell gar yaake, te nay dikenn kova. 21Ninna nay penell yek gar: Kanna hi ko tsiro kay.” Oun o Yezous penas doureder: “Kote, kay i mensho kamell, te vell o Devel leskro ray, kote vas ko tsiro.”
22Oun yob penas ap peskre malende: “I tsiro vella, kay t'maro dji kamell o Menshengro Čaves yek dives te dikell. Oun t'mer dikenn les gar. 23Oun yon penenn ap t'mende: Dikenn, kote hi lo! Dikenn, kate hi lo! Me penau t'menge: Djan gar kote! Patsenn gar, hoy kol menshe penenna!
24Yaake har i Debleskri yag an o bolepen diklo hi, hoy djal yek rigyatar ap i vavar rig an o bolepen, yaake vell o Mensheskro Čavo ap peskro dives diklo. 25Glan ko tsiro hounte lell lo boud douka ap peste. Oun i menshe, kay kava dives djivenna, čivenn les ap i rig.
26Ap ko tsiro, kay o Mensheskro Čavo pale vella, djivenn i menshe yaake har an ko tsiro, kay o Noah djivas. 27Kol menshe rhan, piyan, oun romedineran, bis ap ko dives, kay o Noah an o panyeskro kheer djas, oun o baro pani vas, oun lauter tassan le.
28O tsiro, kay o Mensheskro Čavo pale vella, hi ninna har o tsiro, kay o Lot djivas. Yon rhan, piyan, yon ginan, bikran, yon boudran ap pengro kotar phoub, oun kran penge khera.
29Ap ko dives, kay o Lot dran o foro Sodom djas, vas yag dran o bolepen, oun lauter van rhačedo.
30Yaake djal kova ninna ap ko dives, kay o Mensheskro Čavo diklo vella. 31Koon ap ko dives ap o kheer hi, oun kones peskro koova an o kheer hi, kova hounte djal gar tele, te lell lo kova. Oun koon ap peskro kotar phoub boudrella, hounte djal gar bouder khere. 32Ma bistrenn o Loteskri romyat! 33Koon kamell peskro djipen te rikrell, kova nashrell les. Koon peskro djipen nashrella, kova lell les pale.
34Me penau t'menge: Te hi an koy rati douy menshe an o čiben čiddo, vell ko yek krik lino, ko vavar ačell koy. 35Douy djouvya krenn dran djob yarro. Koy yek vell krik lino, koy vavar ačell koy. 36Douy boudrenn ap i kotar phoub. Ko yek vell krik lino, ko vavar ačell koy.”
37Leskre mala poučan lestar: “Ray, kay vell kova?” Penas lo: “Kote, kay i moulo mass čiddo hi, kote venn i bare divye čirkle khetne te rhan le.”
Právě zvoleno:
Louka 17: Sint-Man2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
