Louka 16
16
O rhorheno boudepaskro
1O Yezous penas ninna ap peskre malende: “His i bravelo morsh. Koles his i boudepaskro, kay rhorhras les oun das leskro bravlepen vin. Har ko bravelo kova shounas, 2moukas lo les gole te dell, oun penas ap leste: Hoy shounom me pral toute? Sike mande kol lila, hoy dren činlo hi, har boud love tou dren lal! Tou nay deh bouder gar ap miro bravlepen garda! 3Oun ko boudepaskro penas ap peste: Te nay boudrau me bouder gar miro rayeske, hoy te krap me kanna? Me nay boudrau gar vin ap i kotar phoub. Oun te hounte mangap, ladjau man.
4Me djinau kanna, hoy te krap, te lenn yon man pash pende pre ap ko dives, kay hi man bouder kek boudi. 5Oun yob das kolen pash peste gole, kay hi siyaan pash peskro rayeste. Oun yek pal o vavareste vas pash leste. Oun yob poučas hakenestar: Har boud siyaan hi tout pash miro rayeste?
6Oun te penas yek: Sheel khoro djet, palle penas lo ap leste: Le ko liil, kay tiro siyaan dren tardo hi. Čin kanna: paash-sheel!
7Oun te poučas lo i vavarestar: Har boud siyaan hi tout? Oun kova penas: Sheel gone djob. Palle penas lo ap koleste: Le ko liil, kay tiro siyaan dren tardo hi, oun čin kanna: orhta-deesh!
8Oun ko ray sharas ko rhorheno boudepaskres doleske, kay his lo gosevo.”
“Oun kova hi čačo”, penas o Yezous, “kol menshe, kay prindjrenn o Debles gar, djan gosveder trouyel i vavar menshentsa har kolla, kay djan ap o Debleskro drom.
9Me penau t'menge: T'mare love ačenna gar. Denn len i čorvelende, te venn le t'mare mala! Te hi kol love boudeder či moldo, palle lenn le t'men kote an i khera dren, kay t'mer hako tsiro nay ačenna.”
O mensho oun leskre love
10“Koon an i tikno koova lauter mishto krella, kova krell ninna an i baro koova lauter mishto. Koon i tikno koova gar mishto krella, kova krell ninna i baro koova gar mishto. 11Te djan t'mer gar mishto trouyel kol loventsa, hoy gar ačenna, koon dell t'men nay ko bravlepen an o vast, hoy ačella? 12Te djan t'mer vavar menshengro bravlepen gar mishto trouyel, har nay dell t'men o Devel kova an t'mare vasta, hoy kamell lo t'men te dell?
13Kek boudepaskro boudrell nay douy rayenge. Te vals kova yaake, boudrals lo ko yekeske mishto, oun ko vavareske gar mishto. Ko yekes kamals yob gar, ko vavares kamals yob o djiyestar. Tou nay boudreh gar o Debleske oun leh tiro bravlepen khetne!”
14Kol Farisarya shounan kova lauter. Yon his pal i love, oun yon san pral o Yezouseste. 15Koy penas o Yezous ap lende: “Glan i menshengre yaka kamenn t'mer lačo te vell. O Devel prindjrell t'maro dji. Hoy pash i menshende boud molella, hi či moldo an o Debleskre yaka.
16An o phouro tsiro rikran pen i menshe ap kova, hoy o Mose oun i Debleskre rakepangre penan. Har vas o Yohanni, vas o Debleskro nevo tsiro. Kanna vell i menshenge o lačo lab penlo, te dell o Devel i menshen pash peste gole, te djivenn le leha khetne an yek harmenatsyona. Oun hakeno kamell zoryah yaake dren te vell, har yob kamella.
17O bolepen oun i phoub ačenna gar. Kova, hoy o Mose oun kol Debleskre rakepangre penan, ačella. Ninna o tikneder lab vell gar krik lino.
18Koon peskri romyat moukella, oun romedinerell i vavar djouvyat, kova rhorhell peskri ersti romyat oun anell doosh ap peste. Oun kova, kay romedinerell i moukli djouvyat, kova anell doosh ap peste, te las lo i vavareskri romyat.”
O bravelo morsh oun o čorvelo Lazaro
19Oun o Yezous penas pale: Koy his i bravelo morsh. Kova his hako tsiro shoukar oun rayles rido, oun djivas i shoukar djipen.
20Glan leskro voudar his i čorvelo čiddo, kay his nasselo ap peskro mass. Leskro lab hi Lazaro. 21Kova mangas o bravelestar ko rhapen, hoy peras tele ap i phoub, te rhal lo kova. Oun i djoukle van pash leste, oun čaran#16:21 čaran léchent leskro nasselo mass tele.
22O dives vas, kay ko čorvelo meras. Oun i bolepangre anan les an o bolepen, te beshas lo pes pash o Abraham. I tsiro koy pre meras ninna ko bravelo, oun las i shoukar paskepen. 23Har yob kanna an o moulengro them his, van bare douka ap leste. Oun yob dikas pre, oun dikas o Abrahames doural, oun o Lazaro his pash leste beshdo.
24Koy das ko bravelo gole: Tata Abraham, kre tiro dji mange pre, oun biče o Lazares pash mande! Yob hounte čivell peskro goushto an o pani, oun čivell kova ap miri čip, te doukrell man kay yag gar!
25Koy penas o Abraham: Čava, touke djas hako tsiro an tiro djipen mishto. O Lazares his kek shoukar djipen. Kanna hi yob barhtelo oun leske djal mishto. Oun tout hi kanna bare douka. 26Ninna hi mashkral mende i baro telstunepen#16:26 telstunepenkate: abîme , te nay vell kek mendar pash t'mende, oun kek t'mendar nay vell pash mende.
27Koy penas o bravelo: Me mangau tout, tata Abraham, biče les an miro dadeskro kheer! 28Man hi panč phrala. Kolenge hounte penell yob, har mange djala, te venn yon gar koy, kay me hom, oun bare douka lom.
29Koy penas o Abraham: Len hi o Moseskre laba oun kolla lila, hoy o Debleskre rakepangre činan. Ap kolende hounte shounenn yon!
30Penas o bravelo: Na-a! Te vals yek i moulendar pash lende, palle moukans le pengro čilačo drom.
31Penas o Abraham: Te shounenn le gar ap o Mose oun ap kol Debleskre rakepangre, shounenn le vitar gar ap yekeste, kay stas i moulendar pre.
Právě zvoleno:
Louka 16: Sint-Man2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
