Yohanni 14
14
Me hom o drom, oun o čačepen oun o djipen
1“T'maro dji hounte trashell gar. Patsenn ap o Debleste oun patsenn ap mande! 2An miro dadeskro kheer hi boud iseme. Te vals kova gar yaake, penoms me kova gar. Me djau koy oun dikau, te venn kol iseme t'menge kerdo. 3Oun te krom halauter yaake, te nay tserdenn dren, vau me pale, oun lau t'men pash mande, te venn t'mer kote, kay me hom. 4T'mer djinenn ko drom, kay me djaua.”
5“Ray,” penas o Thomas ap leste, “mer djinah gar, kay tou djah. Har nay djinah ko drom?”
6“Me hom o drom, oun o čačepen oun o djipen,” penas o Yezous. “Dell kek vavar drom pash o dadeste, har man. 7Te prindjrans man, prindjrans ninna miro dades. Oun kanna prindjrenn les t'mer oun dikan les.”
8“Ray,” penas o Filipo ap leste, “sike mende o dades! Kova hi menge doha.”
9“Yaake rah hom pash t'mende oun tou prindjreh man gar, Filipo?” penas o Yezous. “Koon man dikella, kova dikell o dades. Har nay peneh tou: Sike mende o dades?
10Patseh tou gar, kay me an o dadeste hom oun o dad an mande hi? Hoy me t'menge penau, kova vell gar mandar. Na-a! O dad, kay an mande hi, krell kova halauter.
11Patsenn man, kay me an o dadeste hom, oun kay o dad an mande hi. Te patsenn t'mer kova gar, palle patsenn ap kova, hoy me krau!
12Čačepah, me penau t'menge: Koon ap mande patsella, krell ninna kova, hoy me krau. Oun yob krell bareder koova har me, kanna, kay djau me pash o dadeste. 13Oun hoy t'mer an miro lab mangenna, kova kamau me te krell t'menge. Kova, hoy o čavo krella, sikrell i menshende o Debleskro raylepen oun leskri zoor. 14Kova, hoy t'mer mangenn an miro lab, kamau me t'menge te krell.”
Me bičrau t'menge o Debleskro Dourho
15“Te kamenn t'mer man o djiyestar, krenn t'mer, hoy me t'menge penom.
16Oun me mangau o dadestar, te bičrell yob t'menge i rakepaskres, kay vell ap t'mari rig. Yob djal bouder gar krik t'mendar. 17Kova hi o Debleskro Dourho, kay penell i menshenge o čačepen pral o Debleste. Kolla, kay patsenn gar ap o Debleste, nay lenn les gar. Yon dikenn les gar oun prindjrenn les gar. T'mer prindjrenn les. Yob ačell pash t'mende, oun hi an t'mende. 18Me moukau t'men gar kokres, har te vell t'men kek dad. Me vau pash t'mende. 19An i tikno tsiro dikenn man i menshe ap kay phoub bouder gar. T'mer dikenn man. Me djivau. Doleske djivenn t'mer ninna. 20Ko dives vella, kay t'mer djinenna, kay me an miro dadeste hom, oun t'mer an mande han, oun me an t'mende hom. 21Koon mire laba shounella oun krell, hoy me penau, kova kamell man čačepah o djiyestar. Oun koon man kamella, koles kamell miro dad. Oun me kamau les ninna o djiyestar oun me sikrau leste, koon me hom.”
22“Ray, hoske kameh tou mende te sikrell, koon tou hal, oun gar i vavar menshende?” poučas lestar o Youdas, kova, kay his gar o Youdas Iskariot.
23Koy penas o Yezous ap leste: “Te kamell man yek o djiyestar, kova krell, hoy me penau. Koles kamell miro dad. Oun mer vah pash leste oun ačah pash leste. 24Koon man gar kamella, kova krell vitar gar, hoy me penau. Oun hoy me penau, vell gar mandar. Kova vell miro dadestar, kay bičras man.
25Kava koova penom me t'menge, yaake rah har me pash t'mende homs. 26Me te hom bouder gar pash t'mende, bičrell o dad t'menge o rakepaskres, kay vell ap t'mari rig. Kova hi o Debleskro Dourho. Oun yob penell t'menge halauter yaake, te nay hayvenn kova mishto. Oun yob moukell t'menge halauter an o shero te vell, hoy me t'menge penom. 27Ninna te hom me gar pash t'mende, ačell koy barht, hoy me dom t'men, an t'mare djia. Me dau t'men miri barht. Koy barht nay denn t'men gar i menshe ap kay phoub. Ma trashenn! Ma avenn dareno!
28T'mer shounan, hoy me penom: Me djau mange oun vau pale pash t'mende. Te kamans man o djiyestar, vans t'mer barhtelo, kay me pash o dadeste djau. Miro dad hi bareder har me. 29Me penau t'menge kava kanna, te patsenn t'mer ap ko tsiro, kay kova vella, kay kova čačo hi, hoy me t'menge penom.
30Man hi bouder gar boud tsiro, te rakrap t'mentsa. O beng, kay hi o ray pral kay phoub, vella. Les hi kek zoor pral mande. 31Me krau, hoy miro dad mange penas, te dikenn i menshe ap kay phoub, kay kamau les o djiyestar. Stenn pre, te djas menge!”
Právě zvoleno:
Yohanni 14: Sint-Man2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
