APOEM AYANG: 12
12
Mangsoo Abram ri Khe: Khyoo:
1 #
Lgy 7:2,3; Heb 11:8. Aseing gi Abram ri «Re" moug:- re" bidnoem joem yo' re" pho yhoem: ri too" kho' lho: ngoo nang ri toin" shed wa da" moug: khyoo: yhe: loo" we'. 2Ngoo gi nang ri amyed ashen myoo" sho' byid: wa. Nyangnu" gi byumyu" zeing bue" loo wa nghoid. Nang gi mainkaid jeju" yoo" wa shid re" ngoo gi nang ri mainkaid byid: lho: re" myeing ri gyi: sheung: fu" loo" nhang: wa.
3 #
Gal 3:8. Nang ri mainkaid dang: sang: mo, ri ngoo we' mainkaid byid: wa.
Nghoid loug we' nang ri nheing" mo, ri ngoo we' nheing" wa.
Houg: lho: nang yoomo ngoo gi byumyu" dangain" bang: ri mainkaid byid: wa» ga: tid.
4Abram gi nya: apyaid nyhed xe: wim: zain moo nyang: gi Lod yo' dage" Haran mo thu lo" lho: Aseing tid ziyo' dakhyoo" ti" cang yhe: loo" bye:. 5Abram gi nya: yhoem: seing: myhi' Sarai yo' nya: zoonhung" Lod ri we' nya: jonu" dangain" yo' Haran mo yo" yu da" nya: join joem dangain" ri we' shu" ci: lho: nyangnu" gi Khanan meing khyoo: yhe: lo" boem.
Nyangnu" gi Khanan moo yhe: ju" uri 6Abram gi Shekhem mo gyeung" shang: joyoo- Mora mo da" gyeung" shang: seiggam moo ju" yhe: jang" moo ju" sho' so' yhe: lo". (Hau: uri Khanan byumyu" yigi hau: moug: moo nyid nyid lang" bye:.) 7#Lgy 7:5; Gal 3:16. Aseing gi Abram jhang thu myhang shug lho: «He: zigi ngoo re" da" amyed ashen yiri byid: wa ein: da" moug: nghoid bye:» ga: tid. Houg: lang" Abram gi hau: joyoo moo nyang: ri thu myhang da" Aseing shid re" phoin: daloem: ri koid bye:. 8Hau: thang: ri nyang: gi mougpyi: shoid Bethela da" bidthu shoid moo jo, da" boem meing khyoo: thoid yhe: lo" lho: Bethela da" bidthu shoid yo' Ai da" bidvang shoid agyoo: moo zung jang: ri yhe: koid boem. Hau: joyoo moo we' nyang: gi phoin: daloem: ri koid lho: Aseing ri noku da:. 9Hau: thang: nyang: gi joyoo daloem: mo daloem: khyoo: nyid shu" yhe: lo" zigi Khanan mung" da" mougpyi: shoid khyoo: ju" yhe: lo" nyid.
Abram Egutu moo ju" khyoo:
10Hau: uri Khanan mung" moo phang" khoug daloem: bue" lo lho: hau: phang" khoug moo" yoomo Abram gi mougpyi: shoid xo' lho: Egutu khyoo: yhe: lo" wigi houg: moo dayo, zoo: yhe: nyid nyid. 11Nyang: gi Egutu meing khyoo: mougkyoo" lid vang loo" wa uri nya: yhoem: seing: myhi' Sarai ri «Nang gi yung" da" myiyi: dayug nghoid. 12Egutu byumyu" yi nang ri myang lang" nang gi nga" yhoem: seing: myhi' nghoid zi se' lo wigi nyangnu" ngoo ri said pyam lho: nang ri nyhid: too" wa nghoid. 13#Apm 20:2; 26:7. Houg: yoomo nang gi nga" nhammoo" nghoid ein: nyangnu" ri tid shang. Houg: lang" re" gang mo ngoo shoug" dei nyid lho: ngoo ri nyangnu" goolhoo: koid boem wa nghoid» ga: tid. 14Nyang: gi Egutu mung" mougkyoo" khoug: khyoo: lid vang lo" ri Egutu byumyu" yigi nya: yhoem: seing: myhi' yung" ziri lhoem: yu" myang boem bye:. 15Kho" mo moo" zei: mo, gi Sarai da" yu" yung" khyoo: ri myang lho: hau: khyoo: khokham phoo ri lo" zhang: kyo" wigi Sarai ri nya: khokham kho" khoug: khyoo: shu" fang yu. 16Sarai da" gang mo khokham phoo gi Abram ri goo" lhoo: zoem" khoug: lho: yang kyung- coid kyung- nu: kyung"- myang: kyung joem- join joem yo' Gola-ug joem ri byid: da:.
17Nghoid loug we' khokham phoo gi Sarai ri yu yoomo Aseing gi khokham da" atho' moo we' nya: khoo" khoug: mo, byu yi atho' moo we' gyoug pho" noobau: phyoobau: nhang: kaid bye:. 18Houg: lang" khokham gi Abram ri khe: yu lho: myid: zigi «Nang ngoo ri cikoid mhoug lha". Nyang: gi re" yhoem: seing: myhi' nghoid khyoo: ce: gang mo ngoo ri atid kyo" lha". 19Ce: gang mo nyang: ri re" nhammoo" nghoid ein: nang tid lho: nyang: ri nga" yhoem: seing: myhi' khyo" ngoo ri yu nhang: lha". Hid: the' re" yhoem: seing: myhi'- nyang: ri shu" ci: lho: thu loo" re» ga: tid. 20Khokham phoo gi nya: byu yiri amyeing" byid: yoomo nyangnu" gi Abram ri shu" ci: lho: nya: yhoem: seing: myhi' yo' nyang: yoo" mooyoo" dangain" yo' dage" nyang: ri mungdain: khoug: mo thu loo" nhang: pyam bye:.
Právě zvoleno:
APOEM AYANG: 12: LCL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Lacid Bible © Bible Society of Myanmar, 2009.