Matie 14
14
Zaa Batise 'na 'kwiɛ
(Malke 6.14-29; Luke 9.7-9; 3.19-20)
1"Ɛ tenye -wɛ "me, Galile 'na 'kamalenyɔ Elode Atipase 'no- 'awɔ -lɔ Zezu 'na 'de. 2"Ne 'ɔ yi -lɔ 'ɔnɛɛ "kulɔbhɔnya bhulɛle- nɛɛ: «"Ɛ 'nyɔkpɔ -wɛ Zaa Batise yɔ -lɔ, 'ɔɔ 'wlo- -lɔ gluzɔ. 'Ɛza, 'ɔ -kɛ -lɔ 'bhɛloɛ "ne 'ɔ "pɔ -lɔ zɛzɛ.»
3"Naa-, Elode 'nyegbea- 'awɔ Zaa Batise. 'Wa -glɔ 'awɔ 'gɔgɔ "ne 'wa 'pɔ- -jiɛ "me, Elodiade, 'ɔ "nɔwli Filipo 'na 'ŋɔnɔ 'na 'ylime. 4"Naa-, sɛne 'ye Zaa Batise -bhulɛlo nɛ -lɔ nɛɛ: «-E "ne -kɛ 'ŋɔnɔ -wɛ 'na "bhe sɛ -kɛ.» 5'Ɛza, Elode 'tɛle 'awɔ -lɔ Zaa Batise 'siɛ -gbɔ 'ɔ "kɔ 'lɔbhɔ -se 'ɔ "kɛ "ku. -Mɔ, 'ɔ gu 'awɔ -zakpɛ -wa no -gbɔ Zaa Batise "guɔkwɔmenyɔ yɔ -wɛ -gɛ.
6Zaa, -sɔɔdɛku, 'wa no 'awɔ Elode 'na gwɛle-jajo -wɛ, "ne Elodiade 'na 'ŋuyu yi 'awɔ -lɔ 'nyakpa 'yliku 'sibhɔ, "ne 'ɔ yi -lɔ lo ye. 'Ɔ 'namale- nɛ Elode -gɛ. 7'Ɛza, 'ɔ -plolo weli kɔ nɛɛ: -Ye -e -kɛ -ame -zlɛ, 'e 'yi -eyi kɔ 'je. 8'Ɔ "nɔ 'na 'demezoweli kɔ 'ɔ -bhulɛlo nɛɛ: 'Je -dɛme -ame -lɛplɛpɛ "me Zaa Batise 'na 'wli kɔ.
9"Ne "ɛ -klɔgbɔnyɔ -wɛ 'dlebhɛ yu nɛ -lɔ 'lɔbhɔ. -Mɔ, 'ɔ 'ya nɛ -kɛ 'nyakpa -ye 'ɔ la- -wɛ 'yliku weli 'ple- za, 'ɔ "ne nɛ -la -see 'ɔ "kɛ lo -sɛ -yi. "Ne 'ɔ yi 'awɔ -lɔ no -gbɔ 'ɔ yu kɔ 'je. 10"Ne 'ɔ yi -lɔ 'ɔnɛɛ "slojayu 'lebhe- -gbɔ 'ɔ me -jiɛ "me -se 'ɔ 'di Zaa Batise 'wli "ku. 11"Ne 'ɔ yi -lɔ Zaa Batise 'na 'wli -lɛplɛpɛ "me -nɛmele, "ne 'ɔ yu -lɔ "ɛ 'ŋuyu -wɛ kɔ 'je, "ne 'ŋuyu 'yi -lɔ 'ɔ "nɔ kɔme-. 12"Ne Zaa Batise 'na 'gɛlenya yi -lɔ "ɛ -gɛzɛ "ku 'libhi ka me "ne 'wa yu -lɔ zizi, "ne 'wa yi -lɔ Zezu 'de -sɛle -ka me.
Zezu lia 'nyakpa 'na -gɛmɛnɛ -wlulu 'umgbu
(Malke 6.30-44; Luke 9.10-17; Zaa 6.1-15)
13"Ɛ 'desɛweli -wɛ kɔ, 'ye Zezu 'gblɛ- -lɔ gɔlo "me "ne 'ɔ yi -lɔ -dee 'nyakpa "ne -ko -wɛ me, "ne 'nyakpa -kwleyia yi -lɔ "me 'no -gbɔ Zezu -me, "ne 'wa yi -lɔ 'du 'klekle "ku bho 'yli 'bhale- "ne 'wa yi -lɔ Zezu 'gɛle-. 14Zezu 'kwli- gɔlo "me zɔ, 'ɔ 'na 'wolo 'nyakpa -ko moɔ 'klekle, "ne 'nyɛze yu -lɔ 'lɔbhɔ. "Ne 'ɔ yi -lɔ 'wanɛɛ 'glɛme 'na 'gwizinya yamalea-.
15-Mɔ, zle 'wlo- 'awɔ "bhle, "ne Zezu 'na gɛlenya yu -lɔ yɔko 'nyiɔ-, ŋwɛnɛɛ: Zle 'ya -kɛ 'se flale- ɛɛ, "ne "ɛ dɛne tlo -kɛ dɛ, "ne -bɛɛ' "ne -kɛ lɔbhɔ -ko, zaa, 'taloa- 'yi -se 'wa "kɛ 'du -ɛ "ne dɛne dɛ 'tlole- -wɛ 'wanɛɛ lilɛ 'pea -ka "me. 16"Ne Zezu yua -lɔ bhulɛle- nɛɛ: «'Wa te me, -mɔ 'a "nyoa 'ayigɛsɛ lilɛ!» 17"Ne 'wa yi -lɔ Zezu bhulɛle- nɛɛ: -A -su "fɔlɔ -bhi 'umgbu "ne zibhia -yɛ "sɔ. 18Zezu nɛɛ: «'A -nɛme -ame "ɛ "fɔlɔ -nyɛ zibhia -wɛ "bhaa.»
19"Ne Zezu yi -lɔ "ɛ -zakpɛ -wɛ no -gbɔ 'wa 'gli -duku -piti "klo. "Ne 'ɔ yi -lɔ "ɛ "fɔlɔ -bhi 'umgbu -nyɛ zibhia yɛ "sɔ "bhaa "ku 'libhi, "ne 'ɔ yi -lɔ "nɔgɔ "me 'wolo-, "ne 'ɔ yi -lɔ bhubhɔ, "ne 'ɔ yi "ɛ "fɔlɔ -wɛ "me didile-, "ne 'ɔ 'yi -lɔ 'ɔnɛɛ gɛlenya kɔ 'je -se 'wa 'cɛ -zakpɛ 'dlilia. 20'Nyakpa 'klekle -li, 'wa -lo. "Fɔlɔcibhi "ne zibhia -ɛ -to "ku -wɛ -bhli 'awɔ 'gbɛɛ kogbɔ "sɔ. 21'Nyakpa -wa -li 'awɔ -wɛ, -yle 'awɔ -gɛmɛnɛ -wlulu 'umgbu, 'wa "ne 'awɔ -kɛ 'ŋwenea -nyɛ yua "bhaa -zɛle -me.
Zezu nɔŋo- 'ŋu 'klo
(Malke 6.45-52; Zaa 6.16-21)
22Cuu ne, Zezu nɛɛ 'ɔnɛɛ gɛlenya 'gblɛ gɔlo "me -se 'wa 'ple 'yuku jinyɛ keyi, -se 'ɔyi, 'ɔ "kɛ -mlɛ -zakpɛ 'yi 'tale- -se -wa "kɛ me. 23'Ɔ 'sibhoa- lɛ -gwe "ku "bhuɔ ne, "ne 'ɔ yi -lɔ tlo 'vli 'gblɛ -se 'ɔ "kɛ Lagɔ bhubhɔ-. 'Titiɛ "kɛ yi ne, 'ɔyi -bholo -to lɔbhɔ. 24"Ne "ɛ gɔlo -ylɛ nɛ 'ŋu 'na jijɛ "ku, gu -pepe yliloa nɛ lo "ne jinyɛ "pɔ nɛ gbɔkɔle gɔlo "me. 25Zlezedɛku, Zezu 'nɔŋo nɛ 'ŋu "klo, "ne 'ɔ monoa -lɔ lo. 26-Mɔ, 'wa 'ye lɛ 'ɔnɛɛ 'ŋu "klo 'nɔŋonɔ 'ylime ne, 'ɔnɛɛ gɛlenya geji 'bhoa- -lɔ "ku, ŋwɛnɛɛ: «'Kwiɔ yɔ -lɔ#14.26 'Nyakpa 'na -bedia "kɛ 'dleku -gbɔ 'kwia -le, "ne 'ɔ "ku -wɛ yi 'wa yɛ -wɛ 'glɛme "ne 'ɔ labha nyanɔ.» "ne nyanɔ za 'wa yi -lɔ "me 'kpa. 27"Ne Zezu yua -lɔ bhulɛle- cuu nɛɛ: «'A 'piɛ "bhle 'dle! -Ame yɔ -lɔ, -mɔ, 'a te 'gu!»
28"Ne Piɛle yi -lɔ weli "ku 'libhi, "ne 'ɔ yu -lɔ bhulɛle- nɛɛ: «"Bhenyɔ, 'ɛ kɛ 'diɛɛ -eyi yɔ, 'gbɔ -se 'e "kɛ 'ŋu "klo 'nɔŋo, -se 'e "kɛ -eyi lo yili-.» 29"Ne Zezu yu -lɔ bhulɛle- nɛɛ: «yi!» Piɛle 'kwli- gɔlo "me "zo, "ne 'ɔ yi -lɔ Zezu lo mele- 'ŋu "klo. 30-Mɔ, 'ɔ 'ye lɛ "gu pepe 'ylime ne, nyanɔ lɔbhɔ -lɔ, 'ŋu -ko Piɛle mɛnɛ dɛku, "ne 'ɔ yi -lɔ "me 'kpa nɛɛ: «"Bhenyɔ, 'fuɔ -ame!» 31Cuu ne, Zezu yi -lɔ sɔ "me 'glo, "ne 'ɔ yu -lɔ sɔ 'sale, "ne 'ɔ yu -lɔ bhulɛle- nɛɛ: «'Nyɔkpɔ -nyɔ 'na 'dlekukɛleɛ "ne 'kpɔ- 'ye -e -noɔ -lɔ, sɔɔbɛɛza 'e "ne bhɔ 'dleku -kɛle 'a?» 32"Ne Zezu -nyɛ Piɛle "bhaa 'wa yi -lɔ gɔlo "me 'gblɛ, "ne pepe yi -lɔ 'diɔle- 'zɛnyee. 33"Ne 'ɔnɛɛ gɛlenya -wa -ko nɛ "ɛ gɔlo "me -wɛ yu -lɔ -kokomini 'yliku "pɔle "ne 'wa yu -lɔ no nɛɛ: «'Diɛɛ, Lagɔ 'na yu 'ye -e -noɔ -lɔ.»
Zezu -yamalea Zenezalɛte 'na 'gwizinya
(Malke 6.53-56)
34Zezu -nyɛ 'ɔnɛɛ gɛlenya "bhaa 'wa 'to- jinyɛ, "ne 'wa yi -lɔ Zenezalɛte ylɛ. 35"Ne 'nyakpa -wa -ko lɔbhɔ -wɛ yu -lɔ yibhlele-, "ne 'wa yi -lɔ -glɔnya bhulɛle- nɛɛ: Zezu 'ya -kɛ yi, 'ɛza 'nyakpa 'bhale 'awɔ moɔ 'klekle, "ne 'wa nɛme 'awɔ -lɔ 'wanɛɛ 'gwizinya 'klekle Zezu. 36Ŋwɛnɛɛ: -Yaya 'taloa- 'yi -se 'wa "kɛ -neɛ' "koti 'na -yabhɛ -fu -wɛ kɔ ze. "Ne -wa -ze 'awɔ kɔ 'klekle -wɛ yi -lɔ yamale-.
Právě zvoleno:
Matie 14: btg
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 (Active), Wycliffe Bible Translators, Inc. All rights reserved.
