Matius 13
13
“Ap mesik eʼgen owi hwik ʼbelabil laga,” oluk ebam elitsogo moʼgulentesi wene
(Markus 4:1-9; Lukas 8:4-8)
1Agauwa ai erlige re, at Yesus olema en liplau wagarik e, ik Galilea omugwe ano esaʼgoma hweriogo oruakma, 2ap ʼgerelak lok mesik Yesus eʼbek wegesema re, is enebe ik esaʼgoma edik oruakhwe onoboluk e, at ebe ik so pam hutlau ʼgwegei. 3Hutlau ʼgwegeirik, di pam yu pam elit hasulat wene aʼbigat moʼgulentasu laga. Moʼgulentasulat e, mesik disogo moʼgulentesi,
“Ap mesik yabuk wokho owi yeriso aʼge owi peligoluk libaga. 4Libagarik, owi hwik ʼbelabil lasumu re, owi mesik e, ebelema ʼbelabegei. ʼBelabegeimu, sue wagarik ʼberlek perlengsogo neʼgesa. 5Ye, eʼgen owi mesik e, helep pam ʼgwiang weiyatma ʼbelabegei aʼge re, ʼgwiang weiyatma oluk e, perleneat ʼbaktegei. 6Aʼgeat de, o mo waga ʼgal e, emeʼgen yoru erlakma oluk e, sawet sawet e, ʼbugat aga. 7Ye, owi mesik e, molip salma ʼbelabegei aʼge re, molip ano lok agalat e, owi op aʼge yogo ano obuk hesimu re, ʼgen-ʼgen agarik e, weiyat aga. 8Ye, owi mesik e, ʼgwiang mulimu ʼbelabegei aʼge re, ʼbaktegeirik ebe logat agarik e, eʼgen aʼbigat egesegei. Edip mesik pam en e, eʼgen 100 egesegei. Edip mesik pam en e, eʼgen 60 egesegei. Ye, edip mesik pam en e, eʼgen 30 egesegei. 9Henesaʼgo oruak holuk e, opsogo hwelit o,” oluk moʼgulentesi.
Yesus en e, “Wene ebam elitsogo moʼgulhentasu legi ai re, ebe ai paget,” oluk moʼgulentesi wene
(Markus 4:10-12; Lukas 8:9-10)
10At Yesus en asogo moʼgulentesimu re, at osi iak wogu legesa aʼge ebano eʼbek wegesarik e, disogo moʼgulegisa,
“Hat en aphwami yema wene di pam yu pam elit hasulat moʼgulentigen ano nopaget,” oluk moʼgulegisema re, 11at Yesus en e,
“Allah en eragam enebasu wene ai, at ogola hisogo welago aʼge, his nak e, henaluk emagoluk, ʼbaksogo moʼgulhonto epesi aʼgeat de, is aphwami muon eba nak de, ʼbaksogo moʼgulonto erlak epesi. 12Ap sa en tenak oruak holuk, Allah en pobuk ebam louksogo wogemma re, at aʼbigat eiye ema o. Ye, ap sa en tenak erlak holuk e, wei nagat welema aʼge eriano, Allah en togolik delogo horluema re, erlagaik ema o. 13Asogo tua ai en e, an wene ebam elitsogo is eba moʼgulentegis o. Is aphwami ai re, enil hogwi aʼgeat de, dokhumsogo hogwi erlak o. Ye, enesaʼgo hologwi aʼgeat de, dokhumsogo hologwi erlagat o. 14Is aphwami enebabut ategenik aʼge ai paget e, at Yesaya en e, disogo egei,
Henesaʼgo hwelak wolorogup aʼgeat de, dokhumsogo pobi togup erlak o.
Ye, henil yetharok wolorogup aʼgeat de, dokhumsogo pobi togup erlagat o.
15Is aphwami yu enil hogulat, enesaʼgo holugulat, enede oborogulat, toluk en,
enepe heberlomma pobuk an en obabenebikno oluk e,
is en enede ʼbuk agalat, enesaʼgo lathogulat, enil hopnik aʼge uagoluk, enepenenat enil hopnik pogulat, tigisa o, (Yesaya 6:9-10)
oluk Allah en egeimu Yesaya en pelal wokho pesi ai hegit emagoluk moʼgulentasu legi o. 16Aʼgeat de, his nak e, henil hogulat, henesaʼgo holugulat, togu legep ai en e, honogola henagai opogu lemis o. 17His henil hogu legep aʼge ai re, is ap Allah iak moʼgulontogu legesa aʼge emin, enebabut hegit aʼge emin, enebe esan en e,
Eige! Nenil holo yo, ogu legesa aʼgeat de, enil hogwi erlagat welegesa. Ye, henesaʼgo hologu legep aʼge ai, is eba en,
Nenesaʼgo hollu o, ogu legesa aʼgeat de, enesaʼgo hwelak erlagat welegesa, oluk demat moʼgulhentegis o,” oluk moʼgulentesi.
At Yesus en, “Ap mesik owi hwik ʼbelabil laga o, oluk moʼgulhentegis ano re, ebe disogo,” oluk moʼgulentesi wene
(Markus 4:13-20; Lukas 8:11-15)
18Asogo moʼgulentesirik, mesik disogo moʼgulentesi,
“Wene ap mesik owi hwik ʼbelabil laga, oluk ebam elitsogo moʼgulhentegis ano, ebe moʼgulhentaik aʼge yu pobi tit o. 19Owi mesik ebela pam ʼbelabegei ai ebe re, is aphwami pema Allah eragam enebasu wene ai enesaʼgo holugularat de, ebe dokhumsogo pobi togwi erlak holuk, at muʼgat ebabut wiak aʼge ano wagarik e, wene enedemu owi yogo aʼge ano henokho horloluk lasu aiat o. 20Ye, owi mesik helep pam ʼbelabegei ai ebe re, is aphwami pema Allah iak ai enesaʼgo holugulat e, onogola enagai opogulat perleneat wogularat de, 21wene ai enedemu emeʼgen yogo erlak en e, weiyat oruakma re, aphwami pema en Allah iak ai paget di eʼgin yu eʼgin enebam pogulat, wiagabonobogulat, tugukhwe re, perleneat enede ʼbuk otluk e, wene ai ʼgoboksogo ukpoluk lebagai aiat o. 22Ye, owi mesik molip salma ʼbelabegei ai ebe re, is aphwami pema Allah iak ai enesaʼgo holugulat enat de, onogola en,
Yogodak ya paget noʼgosogo tik logwe, oluk, wenemennei yat horok eberugulat,
Naʼge aʼge aʼbik wellep e, oluk enede eberak poluk, onuʼgwarek en lalhorlugulat, togwi ai en e, wene ai edip ʼgen-ʼgen agarik e, eʼgen egesiso erlak aiat o. 23Ye, owi mesik ʼgwiang mulimu ʼbelabegei ai ebe re, is aphwami pema Allah iak ai enesaʼgo holugulat e, ebe dokhumsogo pobi togwiam, wene ai eʼgen egesiso yo. Edip mesik pam en e, eʼgen 100 egesiselat, edip mesik pam en e, eʼgen 60 egesiselat, edip mesik pam en e, 30 egesiselat, egesiso aiat o,” oluk moʼgulentesi.
“Owi wiak aʼge emin, op aʼge emin, mesikmu en ʼbaktogwi,” oluk wene ebam elitsogo moʼgulentesi wene
24At Yesus en wene asogo moʼgulentesirik e, wene mesik ebam elitsogo disogo moʼgulentesi,
“Allah en eragam enebasumu ai ebe re, ap mesik owi op aʼge yeregei ai ʼgelaʼgeat o. 25Asogo yeregei aʼgeat de, is aphwami nogo ogukhwe, ap mesik ap owi yeregei aʼge ai eʼbirek il ʼbelak aʼge wagarik e, gandum owi op aʼge yeregeimu ebano eʼgerlakma owi wiak aʼge yogo poluk laga. 26Asogo yogo poluk lagama re, gandum owi ano ʼbaktegeirik e, eʼgen osokhwe, wiak aʼge owi ano ʼbaksogo eʼgela selakma aga. 27Selakma agama re, at ap yabuk eiye aʼge ano enat eragam aʼge ebano eʼbek wegesarik e, disogo moʼgulegisa,
Nue! Hat hiabukmu ebano owi op aʼge yerigen epegi. I a? Erlak no a. Eʼgela wiak aʼge eba ʼga en wagarik ʼbaktegei o, oluk moʼgulegisema re, 28at en e,
Erlak o. Ai, at ap neʼbirek il ʼbelak aʼge ano en yeregeimu hegi o, oluk moʼgulentesimu re, is at eragam aʼge ebano en e,
Holuk e, henokho mesikmu poluk lebikpo epegen a? oluk moʼgulegisema re, 29at en e,
Erlak o. Eʼgela wiak aʼge ai honumu re, gandum op aʼge ai ogo henemano oluk e, heni lagup o. 30Gandum eʼgen owan ʼbalu erlakma re, emin saplisogoat ligaga lemak o. Ye, eʼgen ʼbalu hegit ago holuk e, an en is ap eʼgen ʼbalogwi aʼge moʼgulentasulat e,
Eʼgela wiak aʼge ai odouk narlul en e, ai naduk henokho herle hasogo poluk en, op aʼge ai odoksogo pogumu ebano pemit o, oluk moʼgulontouwa o, oluk eragam aʼge ebano moʼgulentesi,” oluk Yesus en moʼgulentesi.
ʼGebi owi ebam elitsogo moʼgulentesi wene
(Markus 4:30-32; Lukas 13:18-19)
31-32At Yesus en asogo moʼgulentesirik, pobuk wene mesik ebam elitsogo disogo moʼgulentesi,
“At Allah en eragam enebasu ai ebe re, ʼgebi eʼgen owi ʼgelaʼge o. Ap mesik en ʼgebi iabukmu pelegei. Di aʼge yu aʼge owi ai weiyat aʼgeat de, ʼgebi owi ai nak e, modok weiyat o. Aʼge re, sawi emin, wudat emin, agaikhe aʼge emin, ʼbaktiselat e, ebagase weiyat ʼgelaʼge ligago. Aʼgeat de, ʼgebi owi ai nak e, modok logat ligotluk, e ʼgelaʼge agoam e, sue dasogo denago aʼge wotluk e, ʼgebi ano eʼgik petne owi wosu ago ai ʼgelaʼgeat o,” oluk moʼgulentesi.
Soʼboru roti eʼgen periso aʼge pam elitsogo moʼgulentesi wene
(Lukas 13:20-21)
33Asogo moʼgulentesirik e, wene mesik ebam elitsogo moʼgulentesi,
“Allah en eragam enebasumu ai ebe re, eʼgen soʼboru roti aʼge ogola ʼbelabogwiam periso ai ʼgelaʼgeat o. Ye, hwe mesik en gandum sagalak tepung ul ʼgelaʼge 40 kilo luʼgwasogo wik-wok, eʼgen ano aʼge roti poruagoluk ogola ʼbelakpoluk neʼgarlok-heʼgarlok takpesimu re, ebe ʼberlek ano modok peregei ai ʼgelaʼgeat o,” oluk moʼgulentesi.
“At Yesus en nopaget wene ebam elitsogo nak moʼgulentasu laga,” oluk moʼgulentesi wene
(Markus 4:33-34)
34Aphwami esan ebano moʼgulentasulat e, wene mesik ʼbaksogo re, moʼgulentasu laga erlak. We, ebam elit holuk nak moʼgulentasu laga. 35Asogo taga laga ai re, ap mesik Allah iak moʼgulentasu laga aʼge en eselat e,
“An wene moʼgulentasulat e, ebam elitsogo nak moʼgulentasu leik ani o.
Allah en ʼgwiang yu walhesi hwerli en wene hisogo modok welaga aʼge ʼbaksogo moʼgulentaik o,” (Mazmur 78:2)
oluk egei ai hegitsogoat, Yesus en asogo moʼgulentasu laga o.
Owi wiak aʼge ebam elitsogo moʼgulentesi ano, ebe ʼbeliʼgogo moʼgulentesi wene
36Asogo moʼgulontoluk e, aphwami aʼbigat ebano oruakhwe, at Yesus ebe olema ʼgwi lagama re, at osi iak wogu legesa aʼge ebano eʼbek ʼgwi legesarik e, disogo moʼgulegisa,
“Owi wiak aʼge yabukmu ʼbaktegei oluk ebam elitsogo moʼgulentigen ano ebe ʼbeliʼgogo moʼgulnentemen o,” oluk moʼgulegisa. 37Asogo moʼgulegisema, at Yesus en e,
“Ap mesik en owi op aʼge yeregei egi ano ebe re, an abat daklau wegi ano nebe yuat o. 38Ye, yabuk ai ebe re, o ʼgwiangma di owi yu owi ʼberlek aiat o. Ye, owi op aʼge ai ebe re, aphwami Allah eragam welagai aʼge enebe aiat o. Ye, owi wiak aʼge ai ebe re, at muʼgat ebabut modok wiak aʼge eiyagai aiat o. 39At ap yabuk eiye aʼge eʼbirek il ʼbelak welat, owi wiak aʼge yeregei ai ebe re, at Iblis aiat o. Eʼgen ʼbalua hegit ai ebe re, o ologun pam pagerat o. Ye, is ap eʼgen ʼbalogwi aʼge ai ebe re, is malaikat Allah en ʼbogorl pam en yoʼgo ʼbelagonobou ago aʼge aiat o. 40Ye, is aphwami en eʼgela wiak aʼge odoksogo poluk e narlogwi ai ʼgelaʼge, o ologun hwerli pam asogoat tua o. 41An abat daklau wegi ano en nosi malaikat yoʼgo peragenebaikmu, is en e, Allah eragam enebasumu ebano en, di aʼge yu aʼge aphwami en wiak tuagoluk tagonobogwi aʼge ogo, di aphwami yu aphwami wiak togwi aʼge ogo, odoksogo onoboluk, 42ʼberlegat odoukmu peragonoboma welat, eniak ʼgerlit marogulat nge togwi modok welema o. 43Ye, is Allah ogola epasu aʼge hegitsogo togwi aʼge ai nak e, enebe o mo dakhasogo yeriso ai ʼgelaʼge, enaik Allah eragam welema o, oluk henesaʼgo oruak holuk, opsogo hwelit o,” oluk moʼgulentesi.
“Ap mesik en oʼgo aʼbik aʼge hisogo oruakma hwiakhwerlesi o,” oluk ebam elitsogo moʼgulentesi wene
44Asogo moʼgulentesirik e, mesik disogo moʼgulentesi,
“At Allah en eragam enebasu ai ebe re, disogo ʼgelaʼge. Op aʼge oʼgo aʼbik aʼge yabukmu ʼgwiangma hisogo sebelogo oruakma, re, ap mesik en hwiakhorloluk ogola agai holuk togolik ʼgwiangma sebelogo pagathorloluk owi pam lagarik e, at en aʼge di aʼge yu aʼge is muon enebam oʼgo ʼbalogo woluk, op aʼge ano hwerlaigoluk togolik wagarik yabuk ano oʼgo ʼbalegei ai ʼgelaʼgeat o,” oluk moʼgulentesi.
“Ap mesik en mutiara saleʼgen ʼgelaʼge oʼgo aʼbik aʼge hwiakhwerlesi,” oluk ebam elitsogo moʼgulentesi wene
45Asogo moʼgulentesirik, mesik disogo moʼgulentesi,
“At Allah en eragam enebasu ai ebe re, disogo ʼgelaʼge. Ap mesik di aʼge yu aʼge oʼgo ʼbaliso aʼge en mutiara saleʼgen ʼgelaʼge op aʼge heratil neselat e, 46ebe oʼgo lok aʼge mesik hwiakhwerlesirik, owi pam lagarik at aʼge di aʼge yu aʼge is muon enebam oʼgo ʼbalogo woluk e, pobuk mutiara saleʼgen ʼgelaʼge op aʼge wesi ai ʼgelaʼgeat o,” oluk moʼgulentesi.
Sum egeik aʼge pam hiane wogwi aʼge ebam elitsogo moʼgulentesi wene
47Asogo moʼgulentesirik e, mesik disogo moʼgulentesi,
“At Allah en eragam enebasu ai ebe re, disogo ʼgelaʼge. Hiane wouwogoluk sum egeik aʼge ik laut lok ano yeʼgelak ogola ʼbelabogwiam di hiane yu hiane aʼgul onuk loʼbok modok ogola yagarago holuk, 48sum egeik aʼge ai ogola ʼbetesogo emde lorop osoam, ik esaʼgoma liplau wotluk hweriogo welat e, hiane op aʼge holuk degelogo sogoluak ogola yagarogulat, wiak aʼge holuk hwikhabugulat, togwi ai ʼgelaʼge, 49o ologun pam asogoat ema o. Is malaikat Allah en ʼbogorl pam yoʼgo peragonobou wago aʼge ebano wemarik e, aphwami enebabut wiak aʼge ebano is aphwami Allah ogola epasu aʼge hegitsogo nak togwi aʼge enemin mesikmu oruakma eneʼgerlakma en ʼgegilogo lebigonobogulat, 50odouk orloukmu peragonoboma eniak ʼgerlit marogulat nge togwi modok welema o,” oluk moʼgulentesi.
“Ap ʼgain mesik aʼge ʼget aʼge, naduk aʼge, lebikpou wago,” oluk moʼgulentesi wene
51Asogo moʼgulentesirik e, mesik disogo moʼgulentesi,
“Wene ai arat pobi tigep a? Erlak a,” oluk moʼgulentesimu re, is en e,
“I o. Pobi tigeat o,” oluk moʼgulegisa. 52Asogo moʼgulegisema, at Yesus en e,
“Holuk e, is ap Allah iak pelal wogo eiye aʼge ebano en, Allah eragam enebasumu ano wene moʼgulogwi holuk e, ai disogo ʼgelaʼge tu aʼge o. Ap ʼgain mesik aʼge ede hwedik aʼge pagathwerlasulat e, ʼget aʼge lebikpou wagalat, page aʼge lebikpou wagalat, pobuk naduk lebikpou wago ʼgelaʼgeat o,” oluk moʼgulentesi.
Aphwami o Nazaret aʼge en, Yesus onogola en mi-miarak pegesa wene
(Markus 6:1-6; Lukas 4:16-30)
53At Yesus en wene ebam elitsogo arat moʼgulentesirik e, o ebano ukpoluk e, 54at uʼgwarek owi edipmu lagarik e, o aphwami Yahudi aʼge seʼban ogumu ebano ʼgoluk wene moʼgulentasuam, is aphwami enesaʼgo hweligisa aʼge en e, disogo egesa,
“Eige! Nogorlok o. Ap yu ede modok ʼgagalak ai, wene ʼga en moʼgulegeitik waga. Ye, di aʼge yu aʼge elalinat til denago ai, ʼga en moʼgulegeitik til denago. 55Ap yu re, ap o weriso aʼge ano omlogo erlak no? Ye, ia onuk Maria ano erlak no? Ye, osi eʼberlik aʼge re, Yakobus emin, Yusuf emin, Simon emin, Yudas emin, ebano erlak no? 56Ye, at orokhwi nis nenemin ʼberlegat welege yema erlak no? Wene ai ʼga en woluk wagarik oso,” oluk onogola en mi-miarak pegesa. 57Mi-miarak pegesema re, at Yesus en disogo moʼgulentesi,
“Is ap Allah iak moʼgulontogwi aʼge ai re, o di owi yu owi lagaiam e, aphwami muon ebano en e, hau modok doʼgoksogo waronobogwi aʼgeat de, onuʼgwarek onowi pam ebano lagaiam e, onuelak enarilak enemin mesikmu welagai aʼge nak e, hau doʼgoksogo waronobogwi erlak o,” oluk moʼgulentesi. 58Asogo moʼgulentesi ai re, is aphwami o Nazaret aʼge eba en, enede Yesus ebam heʼberik pogwi erlak welat, onogola en mi-miarak pogu legesa ai en e, at o eba welat elalin tu puk aʼge loksogoat tu erlak, we, wei nak tegei ai en o.
Právě zvoleno:
Matius 13: WUL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
