मेथा 4
4
येशुगी छो़ता
(मारकु १:१२-१३; लुका ४:१-१३)
1धा धी़कगी येशुला छो़ता लेन्येगी क्षीला, धाम्पे थुक्ङीगी येशुला रीतोङदु ठी जेपालाक। 2धेनी खोङबा ङीन-छेन श्यीपच्यु थुक्पे, ॱङ्युङनेला श्युक्सारती खोङबा टेवालाक। 3धेनी छो़ता लेन्गीनगो होरी, खोङबाला ॱनेवालाक, “खेराङ को़न्क्षोकगी से हीन्ना, दे धोगोङक्या ग्याङगाला ग्युरयेगी का ॱनाङाजे।”
4हीना खोङबागी कालेन ॱनावालाक, “‘मी नी ग्याङगा च्यीगाने मेन्दा, को़न्क्षोकगी श्यालने झ्युङगीन का रे-रेगी सो़न्पो ॱनेलालाक।’#काठीम ८:३ ॱनेरी ढीक हो़तालाक।”
5धेनी धी़कगी खोङबाला धाम्पे ग्याजा येरुसालेमला ठीक्ती, को़न्क्षोकगी क्षो़खाङगी उच्चीरु श्याक्ती, 6खोङबाला ॱनेवालाक, “खेराङ को़न्क्षोकगी से हीन्ना, देने माला क्षोङवा जे घीझ्येरी ॱनाना देरे ढीक हो़तालाक,
‘खोङबागी खेराङगी क्षीला, खोङबाराङगी भाङछेनक्याला का ॱनाङगीलाक,
धेनी खेराङगी श्याप धोगोङ खाला ॱमेफोक्येला, खुङक्याई लाक्पागी खेराङला खुरा जेगीलाक।’”#सुङगुर ९१:११-१२
7येशुगी खोला सुवालाक, “‘ख्यी़ चोवो राङगी को़न्क्षोकला छो़ता माझ्यी।’ ॱनेरीयाः ढीक हो़तालाक।”
8याङदा धी़कगी खोङबाला ॱमीच्यीकी री थोवा च्यीकला ठीक्ती, जाम्बुलीङगी ग्याखाप घीरी धाङ दी शीजे घीरी तो़न्दी, 9खोङबाला ॱनेवालाक, “खेराङगी ङाला क्षाक छाना, दे घीरी ङी खेराङला पुलो।”
10धेनी येशुगी सुवालाक, “सातान, ॱहाला सोङ। घीझ्येरी ॱनाना देरे ढीक हो़तालाक, ‘ख्यी़ चोवो राङगी को़न्क्षोकला क्षाक्क्षो़पा पु धेनी खोङबाला च्यीगा श्याप्ची श्यी़।’”#काठीम ६:१३
11धेनी धी़कगो खोङबागी डुङने सोवालाक धेनी चोवोगी भाङछेनक्या फेप्ती, खोङबागी श्याप्ची श्यी़वालाक।
येशुगी क्षो़ तो़न्ये गो चुक्पा
(मारकु १:१४-१५; लुका ४:१४-१५)
12धेनी योहान्ना आटाला दाक्दुक ॱनेरी सेन्दी, येशु गालीलदु फेप्पालाक। 13नाजारेत भोरती, खोङबा जेबुलुन धाङ नाप्थालीगी युगी छो डामदु हो़गीन, काफारनाहुमदु फेप्ती श्युक्पालाक। 14होझ्येरी ॱङो़नस्येखेन यस्यायाने सुङगीन दे डुप्पालाक,
15“जेबुलुन धाङ नाप्थालीगी यु, छो डामदु योरदान चाङबुगी ॱहाकीनदु,
याहुदापा मेन्गीन मीरीकक्याई गालील यु,
16मी़नाक्पाला धेता मीक्याई हो़ क्षे च्यीक थोदुक,
धेनी छीवे ढीम्जाकगी युला धेगीन मीक्याला,
हो़ च्यीक स्यारदुक।”#यस्याया ९:१,२
17“देने ॱहाला येशुगी, ‘नाम्खे ग्यासी ङ्ये ॱलेप्दुक होझ्येरी खेक्याई धीक्पा पारी सेम ग्युरवा तोङ।’ सुरी क्षो़ तो़न्ये गो चुक्पालाक।”
ङेने धाङस्योकक्या
(मारकु १:१६-२०; लुका ५:१-११)
18धेनी येशु गालीलगी छो डामने फेई घाङला, सीमोन ॱनागीन पेटो धाङ खी़ नो आन्डीरीया ॱनागीन, ङ्यापा ॱङीगी छो नाङदु ङ्यारे ॱयुक्कीनगो शीक्पालाक। 19धेनी खोङबागी खुङक्याला सुवालाक, “ङी स्याबाला स्योक धेनी ङी खेक्याला मीगी ङ्यापा को़लो।” 20खुङ ॱङीउगी लाम्साङ ङ्यारेक्या भोरती, खोङबागी स्याबाला डावालाक।
21धेनी येशु होदेने ॱहाला फेई घाङला, श्येम्मा पी़न ॱङी जेबेदीगी भीजा याकोब धाङ खी़ नो योहान्ना, खोरी आकी जेबेदीमुला डु नाङदु ङ्यारेक्या शोचे ग्याई धेगीनगो शीक्पालाक। धेनी खोङबागी खुङ ॱङीउला भो़वालाक। 22धेनी लाम्साङ खुङ ॱङीउ डु धाङ खोरी आकीला भोरती, खोङबागी स्याबाला डावालाक।
येशुगी नेपाक्याला चो़गा जेपा
(लुका ६:१७-१९)
23धेनी येशु गालीलगी छोक घीरीला फेप्ती, खुङक्याई छोक्खाङक्याला क्षो़ सुरी, नाम्खे ग्यासीगी ताम्शाङ दे सेटाक जेपालाक। धेनी नाजा घीरी धाङ मीमाङला हो़गीन नेको़न घीरी चो़गा जेपालाक। 24खोङबागी ॱङेन्डाक सीरीया यु घीरीला ख्याप्ती, मीक्याई नेपा घीरी, नाजा धाङ शुक छाप्क्षे ॱनाछोकगी दाम्दी श्याक्साक्या धेनी डे जुजा मीक्या, शा फोक्पाक्या धाङ डीप्को़न हो़गीनक्या घीरी, खोङबागी डुङदु ठीक्ती होवालाक धेनी खोङबागी खुङक्याला चो़गा जेपालाक। 25धेनी गालील यु धाङ ग्याजा च्युक्या#४:२५ दे ग्याजा च्युला देकापोलीस ॱनालाक। धाङ येरुसालेम धाङ युदेया धाङ योरदान चाङबुगी ॱहाकीनने, हुङगीन मीछोक क्षे च्यीक खोङबागी स्याबाला डावालाक।
Právě zvoleno:
मेथा 4: LOY
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023, Wycliffe Bible Translators, Inc. and Nepal Bible Society
