मत्ति नेॽचिरामि चिनारि
नेॽचिरामि चिनारि
इगो मत्तिडे़ॽ साप्पॽआ सुसमाचारमि नेॽचिरा ले़ये। इगो नेॽचिराडे़ॽ याक्लोएबाङ निवाहाङ्डे़ॽ याॽमिनुङ हेन्ज्रुङ हे़म्बॽआ मुक्तिदाङ्बा चाहिँ येसुनोॽ ले़ये लुनुङ लुन्डुए। उहिलेनोॽ निवाहाङ्डे़ॽ खोमि याॽमि यहुदि जातिजि इक्को मुक्तिदाङ्बा पाङ्बेनिम्ने़ लुनुङ हेन्ज्रुङ हे़म्बॽआ ले़टे़। मो हेन्ज्रुङ चाहिँ निवाहाङ्डे़ॽ येसु इगो मक्खाम्डेमबेॽ पाङ्नुङ पुरा ले़टु। येसु यहुदि जातिबेॽ टोगा। मोबा माहाजिमि रुम्बेॽ वाबुगानुङ हिक्सा। इगो सुसमाचार चाहिँ यहुदि जातिजिमि लागिरेॽ ने़ॽनि हाइखा चोप जातिजिमि लागिसो लिसा।
मत्तिडे़ॽ साप्पॽआ सुसमाचार नुरोॽ खा टोङ्नुङ साप्पॽआ ले़ये। इगो नेॽचिराबेॽ येसु टोक्पॽआ, खो सिबॽआनुङ हिङ्बोक्पॽआ खामि टुम्बेॽ नुरोॽ लुबॽआ ले़ये। इगोबेॽ येसु टोक्पॽआ खा, बप्तिस्मा लाबॽआ, सैतानडे़ॽ जाँच ले़ःॽपॽआ खा खोसे़ॽ गालिलराजि ले़ःॽपॽआ परचार, खोसे़ॽ इःॽपॽआ सिक्छेनुङ खाल खालहा टुक्खुबाजि नुबोक्पॽआ योम्बोकमि टुम्बेॽ इःबॽआ ले़हा। खो यरुसलेम खे़ॽपॽआ, मोबेॽ खो ए़क्साङ्ए साता पेम्बॽआ, काप्सिङ्बेॽ सिबॽआ मोबा खो सुम याकपेॽ हिङ्बोक्पॽआ खा साप्पॽआ ले़हा।
इगो सुसमाचारडे़ॽ येसु यहुदि धारमिक नियमनुङ थाङ्सिरि राज्यमि चोप खा लेघुबा चोप्पा एप्पा गुरु लुनुङ लुबॽआ ले़ये। खोमि बेॽलो सिक्छे इघा मिॽमुहा खामि टुम्बेॽनोॽ टुहा
१. टोक्टोक्मामि अरतिबेॽ थाङ्सिरि राज्यबेॽहा याॽमिजिबेॽ टुमा खे़हा बानि बेहोरानुङ मोमि अधिकारमि टुम्बेॽ लुये। (अध्यय ५–७)
२. बारो जना चोङ्साजि परचार ले़ःॽमामि आग्या पिबॽआ (अध्यय १०)
३. थाङ्सिरि राज्यमि पारलेम (अध्यय १३)
४. चोङ्साबेॽ टुमा खे़ये आनिबानि (अध्यय १८)
५. आयुए युगमि टुम्बेॽनुङ खिरिस्ट फेरि लेङ्इये याकमि टुम्बेॽहा खा (अध्यय २४–२५)
नेॽचिरामि बिसय सुचि
१. येसु खिरिस्टमि बङ्समि टुम्बेॽनुङ खो टोक्पॽआ खा १:१–२:२३
२. बप्तिस्मा पिघुबा युहन्नामि योम्बोक ३:१-१२
३. येसुमि बप्तिस्मानुङ जाँच ३:१३–४:११
४. येसुडे़ॽ गालिलबेॽ ले़ःॽपॽआ योम्बोक ४:१२–१८:३५
५. गालिलबाङ यरुसलेमठोक १९:१–२०:३४
६. यरुसलेमबेॽ येसुमि ए़क्साङ्ए साता २१:१–२७:६६
७. येसु सिबॽआबाङ हिङ्बोक्पॽआनुङ खोमि चोङ्साजिबेॽ खाङ्मुबॽआ २८:१-२०
Právě zvoleno:
मत्ति नेॽचिरामि चिनारि: YAMP
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023, Wycliffe Bible Translators, Inc. and Nepal Bible Society