ZAWHÂNA 3
3
Pipathina
1Phârisaih chyhsa pakha a moh Nikadima ama tahpa y ta, ano cha Zuzy ryureituhpa a châ. 2Cha chyhsa cha zâ ta Zisu lâ a vy ta, a hnohta, “Râbai, Khazohpa tawhta pachutuhpa â vypa na châ tahpa eima pahno. Khazohpa a chô liata a y leipa khiahta la, he hmonoâhpa na taopa hawhpazy he ahy hmahta tao thei aw veih ei,” tah ta. 3Zisu ta a chhy ta, a hnohta, “Hmeiseihta ta, hmeiseihta ta ei cha chho, ahy rai chô lâ tawhta a pihpathi leipa khiahta la, Khazohpa khinarâh a ngia thei aw vei,” tah ta. 4Nikadima ta a hnohta, “Chyhsapa cha a pitloh tawhta kheihta a pih heih thei aw? A nô chhi liata a ngia chaneipa ta a pih heih thei aw ma?” tah ta. 5Zisu ta a chhy ta, “Hmeiseihta ta, hmeiseihta ta ei cha chho, ahy rai ti nata Thlahpa ta a pih leipa khiahta la, Khazohpa khinarâh a ngia thei aw vei. 6Sapa ta a pihpa cha sapa châ ta, Thlahpa ta a pihpa cha thlahpa a châ. 7‘Na pihpathi awpa a châ,’ ei cha tahpa he na noâh khah sy. 8Thlih cha a khona lâ maih a pathli tyh. A pyu thei chi ta, châhrasala khataih tawhta a vypa ma, khataih lâ ma a sie aw tahpa pahno va chi. Ahy rai Thlahpa ta a pihpa cha, cha hawhta ama y,” tah ta.
9Nikadima ta a chhy ta, “Cha hmo cha kheihta a y thei aw?” tah ta. 10Zisu ta a chhy ta, “Izarei pachutuhpa châ chi ta, chazy chhao cha pahno thai va chi ma? 11Hmeiseihta ta, hmeiseihta ta ei cha chho, keimo ta la eima pahnopa reih pi ta, eima hmôpa eima pahnosa tyh. Châhrasala eima bie pahnopa cha zo veih ei chi. 12Khizaw hmo ei cha chhopa ei hmahta nama zo vei khiahta cha, vârâh hmozy cha chho hraw ei sah la, kheihta nama zo aw? 13Vârâh tawhta za chôpa Chyhsa Sawchapawpa dei leipa ta cha, vârâh lâ ahy hmah kiah beih veih ei. 14#Maluh 21.9Mawsi ta râhchawhpa liata parih a chaluahpa hawhna khata, Chyhsa Sawchapawpa he chaluahpa a châ aw, 15ahy rai ano a ngiapâpa maih leidia leipa ta chhâzaw hrona ama hnei nawpa ta.
Khazohpa ta khizaw kyh a pachâ
16 “Khazohpa ta khizaw kyh pachâ ngaita ta, chatanachata a Sawchapaw matlupa pie ta, ahy rai ano a ngiapâpa maih cha leidia leipa ta, chhâzaw hrona tlao ama hnei aw. 17Khizaw thailei pachâsa awpa ta Khazohpa ta a Sawchapawpa khizaw lâ a tuapa châ vei, ano vâta khizaw pachhapa ta a y thei nawpa ta a tuapa tlao a châ. 18Ahy rai ano a ngiapâpa cha thailei pachâsapa ta y aw vei. Ahy rai a ngiapâ leipa deikua cha, Khazohpa Sawchapaw matlupa moh â ngiapâ leipa vâta, tahmâ bawlawh ta thailei pachâsapa ta a y haw. 19He he thailei pachâsana cha a châ: Khaihpa khizaw lâ a zu ta, châhrasala chyhsazy ta khaihpa hlâta zohna ama khoh via, ama hmotaopazy a moleipa vâta. 20Hmo moleipa a taopa ta khaihpa â hao tyh. A hmotaopazy â lâ awpa vâta, khaihpa lâ a vy khoh vei. 21Â dopa ta hmo a taopa deikua cha, a hmotaopazy Khazohpa vâta taopa a châpa â lâ thei nawpa ta, khaihpa lâ â vy tyh,” tah ta.
Zawhâna ta Zisu a palyupalih
22Cha khai tawhta Zisu nata a pachupazy cha Zudia râh lâ sie ei ta. Zisu chhao cha liata ama hnohta y hra ta, chyhsazy bâti pachâsa ta. 23Zawhâna chhao ta Sâli khih kiapâh ta a ypa Ainaw khih liata bâti pachâsa hra ta. Cha liata ti a hluhpa vâta, zawpizy ano lâ a vy ei ta, bâti a pachâsa lymâ ei. 24#Mat 14.3; Mka 6.17; Lka 3.19,20Cha daihti liata Zawhâna cha patâhna o liata khôpa châ mâh vei.
25Zawhâna pachupa thokha nata Zu chyhsa pakha ta apathaisana kyh liata aeichhiana hnei ei ta. 26Zawhâna lâ a vy ei ta, a hnohta, “Râbai, Zawdâh haosâ liata na hnohta a ypa, ano a pahnotuhpa na châpa nâ duakheipa kha, moh tua, chyhsazy bâti pachâsa ta, chyhsa zydua ta ano cha ama pangai lymâ,” tah ei ta. 27Zawhâna ta a chhy ta, “Vârâh tawhta piepa a châ vei khiahta la, chyhsapa ta khâpa hmah hnei thei vei. 28#Zhn 1.20‘Kei he Mesia châ va na, a hmia lâta tuapa ei châ,’ ei tahpa kha, nâmo tlai he nâ pahnokheituhpazy nama châ. 29Myuh a hneipa cha myuhneituhpa a châ. Myuhneituhpa viasa, myuhneituhpa pahnokhei awpa ta a duahpa cha, myuhneituhpa ao a theipa ta a palysa ngaita. Chavâta tahmâ ei lyna pakipa a châ haw. 30Ano cha a rônah via rili awpa châ ta, kei deikua cha a nawh via lymâ awpa ei châ,” tah ta.
Vârâh tawhta a zupa
31Chô lâ tawhta a zupa cha chyhsa zydua hlâta chônô chaipa a châ. Alei liata a pihpa cha lei chyhsa châ ta, lei hmozy a reih tyh. Vârâh tawhta a zupa deikua cha, chyhsa zydua hlâta chônô chaipa a châ. 32A hmôpa nata a theipazy a pahnopa châ ta, châhrasala ahy hmahta a bie pahnopa cha a pyh veih ei. 33A bie pahnopa a pyhpa cha, Khazohpa cha adopa a châ tahpa ta a moh a chahnao pa-i. 34Khazohpa tuapa ta Khazohpa bie reih tyh ta, ano cha bitaipa y leipa ta Thlahpa a pietuhpa a châ. 35#Mat 11.27; Lka 10.22Paw ta Sawchapawpa kyh pachâ ta, ato zydua a ku liata a pie khai haw. 36Ahy rai Sawchapawpa a ngiapâpa cha chhâzaw hrona a hnei haw. Ahy rai Sawchapawpa bie a zyh leipa cha, hrona hmô aw vei, Khazohpa hiehâhna a chô liata tlao a y.
Právě zvoleno:
ZAWHÂNA 3: MARVBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The Bible Society of India
© 2023, Used by permission. All rights reserved.
