Matyu 7
7
Ka Hu Tot Ɗeng Ɓur Kwa
1“Ka hu tot ɗeng ɓur hai kwa, ka si totu huni hwak. 2Ɓurti angga' ima hu tot ɗufal ɓur ta, andi si wa totsui. Ti ɓeleng tima hu mba ti, ayit si wa mbasui ti.
3“A ɓurti mi ha ɗing ti al ture ta shit i nusa, ha nggwya i tirim si mbai i kunggul ima mata shit yati ya? 4Atini ha wa lak ti nusa nyai, ‘Hona i re'a al turei ya ta shit ama,’ ɗak ha mati mbai i kunggul ta shit yati ya? 5Ha ma gbaf, tonga re' ti kunggul ya ta shit yati tawe, ɗak ha wis ɗing ti kyel ndere ha re' al ture ya ta shit i nusa.
6“Ka hu fa kyara ɗama i sapa kwa, ka hu hwiti nggish ugbwirik mujuwi kwa. Na hu masi andi, si wa tindaki ya, si hatat si gwyaku ya.
Fwal, Far, Kunggwak
7“Fwal hun si wa fasu, far hun hu wa wisi, kunggwak hun si wa ɓwaisu fo i kyel ya. 8Shak maɗufal ima fwal ma wa mati, ima far ma wa wisi, ima kunggwak si wa ɓwaisusi ya.
9“Awe na saa yuti, na al ames fwalus folok, u fas afung ya? 10Ahun na si fwalus gushe, u fas ɗamafwashi ya? 11Hun ima hu mii mufwashi, hu shang fati fe amu mal i ɗamam muɗesi. Ɗak a Deemu i kyel fit haa, ma wa fati ɗamam muɗesi wa kyel i ɗufal ima si fwalus fo! 12Shak ɗama ima hu ma ɓweti ɓa ɗufal si masui, hun hwak mas hun yusi. A masi andi mii hya ti Anggut hu laki i Som Shit.
Kwap Munzweti hu Mubangi
13“Lang hun ta kwap munzweti. Kwap ti wa kyel i mufot ti mii mubangi, fisel asut ti ti faala i musa. Som ima si wa mulang ta fiseli sima hyang. 14Kwap ti wa kyel i mupwet ti mii munzweti, fisel ti mupwet a munzweti, a ɗufal ndyong je si saata.
Yit hu Ma Al Amet
15“Kam huni loo ti som i shit i fyarat. Si yes kyel amu ti fukut i tutwai, ɗak ta wii si yus i ambalal ima hwem cu ya. 16Hu wa shangsus ti musut i roha ames. Si taang manggɓu' ta si yit ti aren hai waak? Ahun si taang makambong ta si yit ti mburuk hai waak? 17Angga'i nai yit muɗesi ti al fe muɗesi, yit mufwashi ti al fe mufwashi. 18Yit muɗesi ti al fe mufwashi kwa fweng, andi hwak yit mufwashi ti al fe muɗesi kwa fweng. 19Shak yit tima wa' ti al fe muɗesi, si wa telsut ya si hwiti ta man wi. 20Ɓurti andi, a ti musut i roha ames hu wa shangsus.
21“A shak ma nyaisun, ‘A Deembai, A Deembai’ ma wa mulang ta kaitat i kyel fit kwa. A maɗufal ima mas aɗeng ima Deen ima mata fit ma ɓweti je, ma wa mulang ta. 22Mwen andi, hyang si wa nyaisun, ‘Deembai, Deembai, ka nyai, ai ni lak findel i som shit ti asum ama hoo? Ka nyai, a ti asum ama hwak, ni ngga rin mafwashi ya, hu masti ɗamam i shok na fo hoo?’ 23Yin i wa laksus i ni, ‘I shangu kwa gbum. Her huna ya nati, hun som i masti mafwashi.’
Ta' ti Ta' i Som Shingat hu i Halyang
24“Ɓurti andi, shak maɗufal ima hal findel amen mai, masti ro, ma fota maɗufal mashingat ima wa ta' wur ames ta si kambar hai. 25Foon shu, ɗaran si hyaha si rangya, se manjengi luk fit pa wuri. Shak ta andi, wuri nggul kwa, ɓurti si ta' tasi kambar hai. 26Shak maɗufal ima hal findel amen ɗak masti ro kwa, ma fota haling i maɗufal ima ta' wur ames ta si njor hai. 27Foon shu, ɗaran si hyaha si rangya, se manjengi luk fit fa wuri, wuri nggwalus fweng!”
28Myan ima Yeso pun lak ti findelal mii shak, unai suɓut i ɗufal si shok na fwai ti musut i kofiti ames, 29Ma fota som kofiti si Anggut hai kwa, kofti ti andok.
Právě zvoleno:
Matyu 7: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
