Matyu 11
11
Yeso Hu Jwon Mabatisma
1Kamana ndai, takfai tima Yeso mbit taɓak ti fe i ro ames hure mulang apil, unai cu wei ti kofiti hu mba ti findel ta ashwaha i Galili.
2Jwon, ima mata wur i shitam, hal aɗeng ima Kristi ma masi, unai ro fe i ro ames 3ɓa si lulus, “A ha ama yessi, ahun ni kin shit si ɗeng hai ya?”
4Yeso matussi ni, “Ɓu hu lak Jwon aɗeng ima hu hali hu aɗeng ima hu ɗingi. 5Manzyauwau si wis ti ɗing ti kyel, gundungang sima ɗa'at, nggeterai si wis ti sapa, mandu'a' si hali, som ima si mot si muluk fit, si mba ti som i jyel Muro Maɗesi. 6Disyo' masi maɗufal ima mati mulut apil-apil si yin hai kwa.”
7Myan ima fe i ro i Jwon si ka' fisel yus wa ndai, unai Yeso ɓo lak ti ɗufal findel tasi Jwon nyai, “Ami hu wa ɗingi ta ya ya? A ahoor ima se ma vilingi ta ya haa? 8Na andi kwa, ami hu wa ɗingi ta ya ya? A maɗufal ima sok fagin maɗesi haa? Wayou, som ima si sok arom maɗesi si mata wurai i kaya. 9Ami hu rangya ɓa hu ɗingi ya? A mashit haa? Hei, i laksu ndai, a maɗufal ima ɓin mashit. 10Mai a maɗufal ima si worong si yis hai nyai,
“ ‘I wa ro ti mamuro amen u tonga ta wei,
ima ma wa ɗak sa ti fisel ta.’#11:10 Ɗing huni hwak: Mal 3:1.
11“I laksu mwawei, ta saa ti ɗufal shak, ɗeng luk fit ima ɓin Jwon Mabatisma kwa. Shak ta andi, maɗufal ima mii mavaati ta kaitat i kyel fit ɓinus ngye. 12Tasi mukonan i Jwon Mabatisma yes mwashi, kaitat i kyel fit ma cwai ti wei ti njeng, ɗufal sin kinti hai ti njeng, ɓa si mat ya. 13Ɓurti andi, kaciwa' Jwon tuu yes, shak som shit hu anggut i Mosis si kin shit yes myan mai. 14Na hu ɓwet mat ti, Jwon a yis a Iliya ima ai yis wa yes. 15Shak mamwal i hali, u hali.
16“I wa kaan ti waya moti ti amiya? Tima fota fe ima si te amunan ta kyel i woor, sin lai ti myayus i ngingyesh nyai,
17“ ‘Ni fu' njungkulet,
hu lang adori kwa,
ni lak ador i shaat,
hu nggyu i kawa.’
18“Jwon yes, cu kwa, wo kwa, si ni, ‘Mati se.’ 19Al i Maɗufal yes, ma cwai, ma woi, si ni, ‘Ɗing hun ma lok ti cwa, hu ma filal ɓurti woi ani nai, mwes i som i mati cef i wufen hu “som mufwashi.” ’ Shak ta andi, piris ti kof mute i mwawei si musut i ro amet.”
Mwe si Ashwaha ima Si Nggwes i Hatat
20Unai Yeso ɓo mbyar ti ashwaha ima yis mas roha i shok na fo ames ta, ɓurti si nggwes i hatat. 21“Mwe shushi, Korazin! Mwe shushi, Betsaida! Naɗin ɗamam i shok na fo ima si masus na yuti, a sin si masus ta Taya hu Saidon, naɗin ti si hatat shwaiti arom i shaat hu afut ta hihai ti ɓele. 22Shak ta andi i ma lakshush, mwen ti tot ti ɓur, ma wa mute ti mbwesh wa kyel i Taya hu Saidon si shish hai. 23Shish Kapanahum, shima zani si wa zan ti asum ashush ta fit haa? Wayou, si wa ti' shush ta fiyai wi. Naɗin ɗamam i shok na fo ima si masus na yuti, a sin si masus ta Sodom, naɗin yit ɗirina kwai. 24I ma lakshush, mwen ti tot ti ɓur, ma wa mute ti mbwesh wa kyel i Sodom si shish hai.”
Yehun Kyel Amen ɓa Hu Wis Lafos
25Tasi myan ani Yeso ni, “A Dee, Deembai ma fit ta fishai, i palanga. Ha fot ti ɗamam mii ya ta kyel i som piris hu som shangi, ha ɓu fe muyayi ya si ɗingi. 26A Dee, andi, ɗata tasi ɓwi hai.
27“Deen fan shak ɗamam na ra. Ɗeng shang ti Ali kwa, a Deehi je. Andi hwak, ɗeng shang ti Deehi kwa, a Ali je, hu ɗufal ima Ali benus ɓa u koftus.
28“Yehun kyel amen, shak hun ima hu taksan ti kol manggahi, yin i wa fasu lafos. 29Fahun haisu hu far shangi na kyel amen, yin a ma hai maɗyayi, mamurak na mulut. Hu wa wis ti lafos ta mulwat amu. 30Ɓurti aɗeng ima i kofsu ti mat ti shum kwa, kol amen kingga kwa.”
Právě zvoleno:
Matyu 11: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
