MAT 15
15
Al'ada kǝ mǝn cina gǝmi
1Gip untuwo ar ni mǝn Parise na mǝn kulci doka kǝ Musa jen ɗǝl tor Urshalima wu ri kar Yesu wu tambe ti, wu wule, 2<<Unun kem mir mǝn kulci kar ki ba pi argon tu kiri gǝmi wule dǝ pi da wu? Wu ho am gǝzǝn, kan wu'i ci fingal da'a!>>
3Ar ni Yesu nǝmi wur tǝ wule, <<Kǝno, unun kem kǝ cen doka kǝ Yamka den bi al'ada ginu? 4Domici Yam wule, <Kǝ bi nartǝn bǝba, na nǝna gi> kano, <Kup muntu zage bas ko naso, ar nǝm dǝ ri ti eka.> 5Ama kǝ kulci mbarǝm'e, <gon gin ni wul bas ko nas'e, <<Argon tu ndari a bi ino, a tare a bi Yam kawi,>> 6ar nǝm tǝ bi nartǝn mǝn gǝri gǝs da'a ituwi. Den bi kǝ al'ada gino, kǝ pali shirǝm kǝ Yamka wop ituwi. 7Kǝn mǝn setǝne! Kor ni ar ra nan mǝn yari shirǝm kǝ Yam Ishaya yari den kǝn gwa'e. 8<<Mbarǝm juwo na bi ni katl wu ɗǝɗa'ǝmi, ama mbatl gǝnzǝno ar dlyam ka na mǝni. 9Katl ni wu bote mi. Doka kǝ mbarǝm ni wu kulci jen den bi shirǝm kǝ Yami.>>
Argon tu ba li mbaruǝm ka cina dǝ Yam gwa
10Yesu la bi domtǝn kǝ mbarǝmi ɗir kar ti, tǝ wul wur'e, <<Kum ni kǝ mom ni argon tu ar kǝ yari in gwa. 11Ba'e argon tu mbarǝm ba ci gwa ni ba li ti da'a, ama argon tu ba ɗǝl ter bi da ti gwa ni ba li ti.>>
12Ar ni mir mǝn kulci kar ti ɗir wu tambe ti wu wule,<< O kǝ mom'e lo ci jen gip mǝn Parise ju den argon tu kǝ yari gwaya?>>
13Yesu nǝmi wur tǝ wule, <<Badǝr tu kup kan yetl muntu kan Ban kǝ to yamka ni ngani dawo, baa tuska na gǝsi. 14Za wur ni, ga tabi ni'e mǝn nǝmi dlo ezǝn tabi. Ngapo tabi ni ba nǝmi esi tabi dlowo, kup gǝzǝn wi nda shuka.>>
15Ar ni Bitǝrus wul ti'e, <<Yari mi kanda kǝ shirǝm tu.>>
16Yesu tambe wur tǝ wule <<Har kǝkǝn gam gin i'ni su tat kaya?>> 17<<Kǝ mom ni den'e, argon tu kǝ ci te bikawo, tu ni ba su kan ar'i ɗǝl kaari da'aya? 18Ama argon tu ba ɗǝl ter biwo, tor mbatl ni ba ɗǝli, eso ar ni ba li mbarǝm cina dǝ Yami. 19Domici tor gip mbatl ni damtǝn kǝ wani pitǝn ba ɗǝli, wule ga ri mbarǝm eka, muri na gǝr ko kos kǝ goni, muri na jen kan ndari da gwa, pi mure, seda kǝ lare na lii mbarǝm gami. 20Munju ni ba li mbarǝme, ba'e ho'i am kan dǝ'i nde ci fingal ni da'a.
Ngǝshtǝn den yam kǝ na gǝr goni
21Kan Yesu ba za lasi, tǝ ndara kǝti atl kǝ Taya na Sidon. 22Lasi ni nagǝr gon mǝn Kan'ana tli yar yam tǝ wule, <<Babomi, Nya Dawuda, shin guna gǝni! Dun itǝr ne den kumi nya gǝn nye mǝtli dli hoyi.>> 23Ama Yesu wul ti'e argon da'a. Ar ni mir mǝn kulci kar ti ɗir kar ti wu lir ti wu wule, <<Kar nagǝr tu tǝ ndara ngapi, domici tǝ ghun mi na kulu wi.>>
24Yesu nǝm tǝ wule, <<Amo kar tǝm kǝ Isra'ila kan jilka gwa ni katl karǝmi.>>
25Ama nagǝri ngus cina dǝ Yesu tǝ wule, <<Babomi, nem am ra.>>
26Yesu bali ti tǝ wule, <<Ar ndari dǝ pǝn fingal kǝ mimir dǝ bi yer da'a.>>
27Nagǝri wule, <<Untu ni ar ra Babomi, ama yer ma wuci roɓǝs fingal ju kan ba ro sur den tebǝl kǝ Babom gǝzǝn gwa.>>
28Kan Yesu ba wul nagǝri'e, <<Ngǝshtǝn gi den Yamo ar naari! Nǝmi'i lirtǝn gi wi. Ar ni nya gǝs warke gip wokociyi.
Yesu warke mbarǝm na womti
29Ar ni Yesu za lasi, tǝ su kop bi bar ɓula kǝ Galili. Kan tǝ to den tlǝndǝr tǝ dǝm toka. 30Kan mbarǝm na womti ba ɗir kar ti, wu ɗiri ti munju itǝr tle wur kagwa, na ga tabi, ga kurki, na munju shirǝm gǝzǝn ba ɗil dagwa, na nami mǝn kumi dli na womti, wu ne wur cina da ti kan tǝ pǝni wur kumi dli gǝzǝnka. 31Ar ni mbarǝm kan ra lasi gwa nǝm bi na ame nan wu shin munju kan shirǝm gǝzǝn ba ɗǝl da'a den shirǝmi, munju itǝr tle wurka pal lauwi, kurki den desi, na munju kan tabi ni den shiniwi. Ar ni wu ɗǝɗa Yam kǝ Isra'ila.
Yesu bi fingal mbarǝm zangu wupse
32Ar ni Yesu la bi mir mǝn kulci kar ti tǝ wul wur'e, <<Guna ba cim den mbarǝm ju, domici muri myakan ikǝnwi wu ra namǝni, wura na fingal da'a. A ndu'e wu ndara na guzum da'a, bǝse wu ɗatka den tǝpe.>>
33Ar ni mir mǝn kulci kar ti wul ti'e, <<Ako ni mii zam fingal tu kan baa kǝm mbarǝm na womti ju gip lǝp kǝnu?>>
34Yesu tambe mir mǝn kulci kar ti tǝ wule, <<Bǝredi mǝne ni kǝn ra nari?>> Wu wul ti'e, <<Nyingi, na mir kos jeni.>>
35Yesu wul domtǝn kǝ mbarǝmi'e, wu dǝm atli. 36Kan tǝ pǝn bǝredi nyingi ju na kosi, nan tǝ goode Yamo, kan tǝ cecceni tǝ bi mir mǝn kulci kar ti, wu bi mbarǝmi. 37Domtǝn kǝ mbarǝmi kup ci wu la'i tu gǝzǝni. Den kariwo, mir mǝn kulci kar ti ba dom roɓǝs bǝredi na kosi ba laa'i shar nyingi. 38Womtitǝn kǝ mbarǝm ju ciwo ar pi moni zangu wupse (4,000), bat na mǝtli na mimiri. 39Nan Yesu wul mbarǝmi wu ndara bomo, ar ni tǝ to gip kungǝlǝn jikat male, kan tǝ ndara kǝti atl kǝ Magadan.
Právě zvoleno:
MAT 15: PLJ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2023 Seed Company in collaboration with Language Developers and Bible Translators Association
