मत्ती 16

फरीसी त सदूकी यीशु केआं स्वर्गे यक निशाणी मगीण

मरकुस 8:11-13; लूका 12:54-56

1फरीसी त सदूकी दले मेह्‍णु यीशु केईं आए त तेस परखुण जे तेस जे बोलु, “असी स्वर्गे कोई निशाणी हराल।”#मत्ती 12:38; लूका 11:16 2पर यीशु तेन्हि जे जवाब दिता, “ब्यादि तुस बोते मौसम ठीक भुन्ता, किस कि अम्बर लाल असा। 3होर भ्यागे बोते ‘आज तुफान एन्ता, किस कि अम्बर लाल त बदेआ असा।’ तुस अम्बर हेर कइ त तसे भेद पता लाई सकते। पर इस जुगे निशाणे भेद किस न बताई सकते। 4सद बुरे त कुकर्मी मेह्‍णु निशाण तोपते, पर योने भविष्य वक्ते निशाण छड़ दी कइ होर कोई निशाण न हरालीन्‍ता।” तोउं से तेन्हि छड़ दी कइ घेई गा।#मत्ती 12:39-40; लूका 11:29

फरीसी त सदूकी शिक्षाई केआं सावधान

मरकुस 8:14-21

5जपल चेले तथे पार पूज गे, तोउं तेन्हि पता लगा कि से रौठि अण्हण बिसरी गो असे। 6तोउं यीशु तेन्हि जे बोलु, “हेरे, फरीसी त सदूकी टकेणे केआं बच कइ बिशे।”#लूका 12:1 7त चेले अपफ बुच बोक करण लगे, “असी रौठि न अण्ही, तोउं कि से असी जे ईं बोलुण लगो असा ना?” 8तेन्के मने पता लाई कइ यीशु तेन्हि जे बोलु, “ए कमजोर विश्वासीओ! तुस अपफ बुच की बोक करण लगो असे, कि असी केईं रौठि नेईं? 9तुसी अपल तकर बि समझ न आई ना? मेईं पन्ज रौठि बइ पन्ज हजार मेह्‍णु खिलाण केईआं पता तुसी कत चाउं टुकुड़ भरो थिए, से याद नेईं ना?#मत्ती 14:17-21 10होर सत रौठि बइ चोउर हजार मेह्‍णु रज्जाणि कइ कत चाउं टुकुड़ भरो थिए, से बि याद नेईं ना?#मत्ती 15:34-38 11तुस किस न समझते कि मेईं तुसी जे रौठि के बारे नेईं बोलो, पर ईं कि तुसी फरीसी त सदूकी के शिक्षाई केआं बच कइ बिशुण। किस कि तेन्के शिक्षा टकेणे ईं असी।” 12तोउं तेन्हि समझ एई गई कि तेन टकेणे बारे नेईं, बल्कि फरीसी त सदूकी के शिक्षाई केआं बच कइ बिशणे बोलो थिउ।

पतरस यीशु सुसुर पिछाणण

मरकुस 8:27-30; लूका 9:18-21

13तोउं जपल यीशु अपु चेली जुए साते कैसरिया फिलिप्पी शेहर आ, त तेन अपु चेली केआं पुछु, “केस जे मेह्‍णु मनखे कुआ बोते?” 14तेन्हि बोलु, “कुछ मेह्‍णु चुसुणे बाड़े यूहन्ना जे, कुछ मेह्‍णु एलिय्याह भविष्य वक्ते जे, त होर कुछ मेह्‍णु यिर्मयाह भविष्य वक्ते या होरे भविष्य वक्ती अन्तर कोउं यक जेईं जे ‘मनखे कुआ भो’ बोते।”#मत्ती 14:1,2; मरकुस 6:14,15; लूका 9:7,8 15त यीशु तेन्हि जे बोलु, “पर तुस में बारे की बोते?” 16शमौन पतरसे जवाब दिता, “तु जीन्ते परमेश्वरे कुआ ‘मसीह’ भो।”#यूहन्ना 6:68,69 17त यीशु तेस जे बोलु, “ए शमौना, योने कोईया! तु धन्य असा; किस कि तोउ अपफ इसे पता नेईं लगो, पर में बोउ, जे स्वर्ग अन्तर असा, ई बोक तोउ पुठ हराली। 18होर शुण पतरसा! अउं तोउ जे बोता, तें नओएं मतलब पलण असा। अउं इस पलण पुठ अपु सतसंग बणान्ता, होर मौत बि तस हराई ना बटती। 19अउं तेन्धे स्वर्गे राज्ये कुंजुड़ देन्ता, त जे कुछ तु धरती पुठ बन्हियाल, से स्वर्ग अन्तर बि बन्हिन्‍तु; त जे कुछ तु धरती पुठ खोलियाल से स्वर्ग अन्तर बि खोलिन्तु।”#मत्ती 18:18; यूहन्ना 20:23

20तोउं तेन चेली जे सक्ति कइ बोलु “केसे पता न लौता लगो कि अउं मसीह भो।”

यीशु मसीहे बारे नियको बोक त तसे सच्चाई

(मत्ती 16:21—20:34)

अपु मरणे बारे यीशु भविष्य वाणि

मरकुस 8:31-33; लूका 9:22

21तेस टेम केआं खड़ यीशु अपु चेली जे बोलुण लगा, “में यरुशलेम शेहर घेण जरूरी असु। तठि घेई कइ टजे स्याणे, मुख्य पुजारे, त धर्मशास्त्री मोउं दुख त ती कष्ट देन्ते। तठि अउं मरता त फिर टेके रोजे दुबारी जी घेन्ता।” 22ई शुण कइ पतरस तेस बखरे घिन गा त तेस जड़काण लगा, “ए प्रभु, ई ना बोले। परमेश्वर तुसी जोई कदी ईं भुण न देन्ता।” 23त तेन पतरस जे बोलु, “ए शैताना, में सामणि केआं दूर भोई गा! तु में कम रोकुण लगो असा, किस कि तु परमेश्वरे बोकी पुठ न, बल्कि मेह्‍णु के बोकी पुठ मन लान्ता।”

यीशु चेला बणणे मतलब

मरकुस 8:34—9:1; लूका 9:23-27

24तोउं यीशु अपु चेली जे बोलु, “जे कोउं में पता एण चहन्ता, से अपु मने मुताविक जीण छड़ दिए, त अपु दुख त मरुण सेहणे लिए तेयार भोई कइ में पता एईए।#16:24 मूल भाषा अन्तर इठि “क्रूस” लिखो असु, जेसे मतलब “थम” असा।#मत्ती 10:38; लूका 14:27 25किस कि जे कोउं अपु प्राण बचाण चहन्ता, से तेस गड़ाई छता; होर जे कोउं में लिए अपु प्राण देन्ता, से तस मेता।#मत्ती 10:39; लूका 17:33; यूहन्ना 12:25 26अगर मेह्‍णु पूरु मतोक बि मेई घियेल, पर अपु प्राण न बचाई सकियाल, त की फायदा? फिर मेह्‍णु अपु प्राणे बदले की देन्ता? कुछ ना!”

27“अउं ई सोब तोउं बोता किस कि मनखे कुआ स्वर्गेदूती साते अपु बोउए महिमा जोई झट एणे बाड़ा असा। तेस टेम से हर यक मेह्‍णु तेन्के कमे फल देन्ता।#मत्ती 25:31 28अउं तुसी जे बोता कि जे इठि मोउं जुए असे, अन्हि अन्तरा कुछ मेह्‍णु ईं असे कि जपल तकर मनखे कुआ राज करण जे एन्ता न काएल, तपल तकर न मरते।”

Právě zvoleno:

मत्ती 16: pgg

Zvýraznění

Sdílet

Kopírovat