ମାତ୍ତିଉ 15
15
ପୁର୍ଖା କୋୱାଃ ନିୟାମ୍ ହାର୍ ପାର୍ମେଶ୍ଵାର୍ ରାଃ ବାଚାନ୍
(ମାର୍କୁ. 7:1-13)
1ଏନ୍ତେ ୟୀରୁଶାଲେମ୍ ସାହାର୍ ଏତେ ଚିମିନାଙ୍ଗ୍ ଫାରିସୀ ହୋଡ଼ୋକୋ ହାର୍ ଆଇନ୍ ଗୁରୁକୋ ୟୀଶୁ ରାଃ ନାଡ଼େଏ ହିଜୁଃକେତେ କାଜିକେଦାକୋ, 2“ଆମାଃ ଚେଲାକୋ ଚିନାଃ ନାଙ୍ଗ୍ ପୁର୍ଖା କୋୱାଃ ନିୟାମ୍ କେ କାକୋ ମାନାତିଙ୍ଗ୍ ତାନା, ହାର୍ ବେଗାର୍ ତିଈ ଆବୁଙ୍ଗ୍ କେତେ ଜୋଜୋମାଃ ଜୋମ୍ ତାନାକୋ?” 3ୟୀଶୁ ଇନ୍କୁକେ କାଜିରୁଆଡ଼୍ କେଃକୋୱାଏ, “ଆପେ ହ ଦୋ ଆପେୟାଃ ନୀତିନିୟାମ୍ ରାଃ ଲେକାତେ ଚିନାଃ ମେନ୍ତେ ପାର୍ମେଶ୍ଵାର୍ ରାଃ ଆନାଚୁ କେ କାପେ ମାନାତିଙ୍ଗ୍ୟା?
4ଚିୟାଃଚି ପାର୍ମେଶ୍ଵାର୍ କାଜିକାଦାଏ, ‘ଆପେୟାଃ ଆପୁ ହାର୍ ଆପେୟାଃ ଏଙ୍ଗା କିନ୍କେ ମାଇନ୍ କୋପେ, ହାର୍ ଅକଏ ଆଜାଃ ଆପୁ ୟାଦୋ ଏଙ୍ଗା କିନ୍କେ ହିଲାଙ୍ଗ୍ କିନାଏ, ଇନିଃ ବିଡ଼ା ଗୋଜୋଃକାଏ।’ 5ମେନ୍ଦୋ ଆପେ କାଜିୟାପେ, ଚି ଆଗାର୍ ଅକଏ ଆଜାଃ ଆପୁ ୟାଦୋ ଏଙ୍ଗା କେ କାଜିୟାଏ, ଅକନାଃ ଅଗି ଆପେକେ ଇଙ୍ଗ୍ଆଃ ତେ ବୁଗିନାଃ ନାନାମ୍ ତାଇକେନା, ଏନା ପାର୍ମେଶ୍ଵାର୍ କେ ଭେଁଟ୍ ରାକାବ୍ ଛାବାକାନା। 6ଦୋ ଇନିଃ ଆଜାଃ ଆପୁ କେ ଆଲୋ ମାଇନ୍ ଚାଏ, ନେଲେକାତେ ଆପେ ଆପେୟାଃ ନୀତିନିୟାମ୍ ରାଃ ଚାଲ୍ତେ ପାର୍ମେଶ୍ଵାର୍ ରାଃ ବାଚାନ୍ କେ କାପେ ମାନାତିଙ୍ଗ୍ ତାନା।
7ହେ ବେଦାହୋଡ଼ୋକୋ, ୟାଶାୟାହ୍ ନାବୀ ଆପେୟାଃ ବିଷାୟ୍ ରେ ନେୟା ଆୟାର୍କାଜି ଠିକ୍ ଗି କାଜିକାଦାଏ,
8‘ନେ ହୋଡ଼ୋକୋ ମୋଚା ତେ ଦୋ ଇଙ୍ଗ୍କେ ଦୁଲାଡ଼୍ ରିକା ୟାକୋ, ମେନ୍ଦୋ ଇନ୍କୁୱାଃ ମୋନ୍ ଇଙ୍ଗ୍ଆଃ ତେ ସାଙ୍ଗିନ୍ ରେ ତାଇନୋଃ ୱା।
9ନିକୁ ସାମାଗୀ ଇଙ୍ଗ୍ଆଃ ସୁସାର୍ ତାନାକୋ, ଚିୟାଃଚି ହୋଡ଼ୋକୋୱାଃ ନୀତିନିୟାମ୍ କୋକେ ଧାରାମ୍ ଆନାଚୁ ବାଇକେତେ ଶିଖାଅ କୋ ତାନାକୋ।’ ”
ହୋଡ଼ କେ ଶିତୃ ବାଇତାନ୍ କାଜିକୋ
(ମାର୍କୁ. 7:14-23)
10ଏନ୍ତେ ୟୀଶୁ ହୋଡ଼ୋକୋକେ ଆଜାଃ ନାଡ଼େଏ କେଡ଼ାକେତେ ଇନ୍କୁକେ କାଜିକେଦାଏ, “ଆୟୁମେପେ, ହାର୍ ବୁଝାଅଃପେ। 11ଅକନାଃ ମୋଚା ରେ ସେନ୍ ତାନା, ଏନା ହୋଡ଼ କେ କାଏ ଶିତୃ ତାନା, ମେନ୍ଦୋ ଅକନାଃ ମୋଚା ଏତେ ଅଡୋଙ୍ଗ୍ ତାନା ଏନାଗି ହୋଡ଼ କେ ଶିତୃ ତାନାଏ।”
12ଏନ୍ତେ ଚେଲାକୋ ହିଜୁଃକେତେ ଇନିଃକେ କାଜିକିଜାକୋ, ଚିନାଃ ଆମ୍ ସାରିତାନାମ୍ ଚି ଫାରିସୀ ହୋଡ଼ୋକୋ ନେ କାଜିକେ ଆୟୁମ୍କେତେ ଦୁକୁ ଜାନାକୋ? 13ୟୀଶୁ କାଜିରୁଆଡ଼୍ କେଃକୋୱାଏ, “ସବେନ୍ ଦାରୁ ଅକନାଃ କେ ଇଙ୍ଗ୍ଆଃ ସିର୍ମାଦିଶୁମ୍ ରେନ୍ ଆପୁ କାଏ ରୋଏ କାଦାଏ, ଏନା ସବେନାଃ ପାଟୁବୋଗା। 14ଇନ୍କୁକେ ସେନ୍ ରିକାକୋପେ, ଇନ୍କୁ ଆନ୍ଧା ଆଗୁୱାକୋ ତାନାକୋ ହାର୍ ଆନ୍ଧା ଆଗାର୍ ଆନ୍ଧା କେ ହୋରା ଉଦୁବେୟାଏ ଏଣ୍ଡେ ବାରାନ୍କିନ୍ ଗାଡା ରେ ଉୟୁଗୋଗାକିନ୍।”
15ନେୟା ଆୟୁମ୍କେତେ ପାତ୍ରାସ୍ ଇନିଃକେ କାଜିକେଦାଏ, “ନେ ଜୋନୋକା ରାଃ ମାନେ ଆଲେକେ ବୁଝାଅ ତାଲେମ୍।” 16ୟୀଶୁ କାଜିକେଦାଏ, “ଚିନାଃ ଆପେ ହଗି ନାଆ ସାନ୍ତେ କାପେ ବୁଝାଅଃ ତାନା?” 17ଚିନାଃ ଆପେ କାପେ ସାରିତାନା ଚି ଅକନାଃ ମୋଚା ରେ ବୋଲୋଃ ୱା ଏନା ଲାହେଃ ରେ ସେନା, ହାର୍ ବାହାର୍ ହୋରାତେ ଅଡୋଙ୍ଗ୍ କେନୋଃ ୱା?
18ମେନ୍ଦୋ ଅକନାଃ ମୋଚା ଏତେ ଅଡୋଙ୍ଗୋଃ ୱା, ଏନା ମୋନ୍ ଏତେ ଅଡୋଙ୍ଗୋଃ ୱା, ହାର୍ ଏନାଗି ହୋଡ଼ କେ ଶିତୃ ୟାଏ। 19ଚିୟାଃଚି ଏତ୍କାନ୍ ପାହୋମ୍, ହୋଡ଼ ଗୋଏଃ, ଏଟାଃ ନିଜାଃ କୁଡ଼ି ଇଦି, ବ୍ୟାଭିଚାର୍, କୁମ୍ଡ଼ୁ, ହିହିଡ଼୍ ଗୋୱା, ହାର୍ ନିନ୍ଦା ମୋନ୍ ଏତେ ଗି ଅଡୋଙ୍ଗୋଃ ୱା। 20ନେୟା କୋଗି ତାନାଃ ଅକନାଃ ହୋଡ଼ କେ ଶିତୃ ତାନାଏ, ମେନ୍ଦୋ ତିଈ ବେଗାର୍ ଆବୁଙ୍ଗ୍ କେତେ ଜୋମେ ତେୟାଃ ହୋଡ଼ କେ କାଏ ଶିତୃ ତାନାଏ।
କାନାନୀ ଜାତି ରେନ୍ କୁଡ଼ି ରାଃ ବିଶ୍ୱାସ୍
(ମାର୍କୁ. 7:24-30)
21ଏନ୍ତେ ୟୀଶୁ ଗାଲିଲୀ ଜିଲ୍ଲା ଏତେ ଅଡୋଙ୍ଗ୍ କେତେ ସୁର୍ ହାର୍ ସିଦୋନ୍ ସାହାର୍ ତେ ସେନୋଃ ଜାନାଏ। 22ଏନ୍ ଜାଗା ଏତେ ମିୟାଃ କାନାନୀ ଜାତି ରେନ୍ କୁଡ଼ି ଅଡୋଙ୍ଗ୍ ଜାନାଏ, ହାର୍ କାଉରି କେତେ କାଜିକେଦାଏ, “ହେ ପ୍ରାଭୁ, ଦାଉଦ୍ ରାଃ ସାନ୍ତାନ୍, ଇଙ୍ଗ୍କେ ଦାୟାଇଙ୍ଗ୍ ମେ, ଇଙ୍ଗ୍ଆଃ ହୋନ୍କୁଡ଼ି କେ ବୋଙ୍ଗାଆତ୍ମା ଥିମ୍ବାଗି ଦୁକୁ ଏମ୍ ତାନାଏ।” 23ମେନ୍ଦୋ ୟୀଶୁ ଇନିଃକେ ଜେତ୍ନାଃ କାଏ କାଜିରୁଆଡ଼୍ କିଜାଏ। ଏନ୍ତେ ଇନିଜାଃ ଚେଲାକୋ ହିଜୁଃକେତେ ଇନିଃକେ ଆର୍ଜି କିଜାକୋ, “ନିଈକେ ବିଦା ତାଇମେ, ଚିୟାଃଚି ନିଈ ଆବୁୱାଃ ଦୋୟା-ଦୋୟା କାଉରିତାନ୍ ଲୋଃ ହିଜୁଃ ତାନାଏ।”
24ମେନ୍ଦୋ ୟୀଶୁ କାଜିରୁଆଡ଼୍ କେଦାଏ, “ଇସ୍ରାଏଲ୍ ଦିଶୁମ୍ ରେନ୍ ଘାରାନା ରେନ୍ ଆଦାକାନ୍ ମିଣ୍ଡୀ କୋକେ ବାଗେ କେତେ ଇଙ୍ଗ୍ ଜେତାଏ କୋୱାଃ ନାଡ଼େଏ କାଇଙ୍ଗ୍ କୁଲାକାନା।” 25ମେନ୍ଦୋ ଏନ୍ କୁଡ଼ି ହିଜୁଃ ଲେନାଏ, ହାର୍ ୟୀଶୁ କେ ଜୋହାର୍ କେତେ କାଜିକେଦାଏ, “ହେ ପ୍ରାଭୁ, ଇଙ୍ଗ୍କେ ଦେଙ୍ଗାଇଙ୍ଗ୍ ମେ।” 26ଇନିଃ କାଜିରୁଆଡ଼୍ କିଜାଏ, “ହୋନ୍ କୋୱାଃ ହୋଲୋଙ୍ଗ୍ ଇଦିକେତେ ସେତା କୋୱାଃ ଆୟୁର୍ ରେ ଦୁଡ଼ିଙ୍ଗ୍ ତେୟାଃ ବୁଗିନ୍ ନାହାଲା।”
27ଇନିଃ କାଜିକେଦାଏ, ସାର୍ତି ତାନାଃ ପ୍ରାଭୁ, ମେନ୍ଦୋ ସେତାକୋ ହଗି ଏନ୍ ସାକ୍ଡ଼ି କୋକେ ଜୋମେୟାକୋ, ଅକନାଃ ଇନ୍କୁୱାଃ ଗୋମ୍କେ କୋୱାଃ ଟେବୁଲ୍ ଏତେ ଉୟୁଗୋଃ ୱା। 28ନେୟା ରେ ୟୀଶୁ ଇନିଃକେ କାଜିରୁଆଡ଼୍ କିଜାଏ, “ହେ କୁଡ଼ି, ଆମାଃ ବିଶ୍ଵାସ୍ ମାରାଙ୍ଗ୍ ମେନାଃ। ଚିଲ୍କା ଆମ୍ ସାନାଙ୍ଗ୍ ତାନାମ୍, ଆମାଃ ଲାଗିନ୍ ଏନ୍ କାଗି ହୋବାଅଃକା।” ହାର୍ ଇନିଜାଃ ହୋନ୍କୁଡ଼ି ଏନ୍ ସାମାୟ୍ ଏତେ ଗି ବେଶ୍ ଜାନାଏ।
ଥିମ୍ବାଗି ହୋଡ଼ୋକୋକେ ୟୀଶୁ ଚାଙ୍ଗାଇ ରିକା
(ୟାଶା. 35:5-6; ଲୁକା. 7:22-23)
29ୟୀଶୁ ଏନ୍ତାଃ ଏତେ ଗାଲିଲୀ ରାଃ ସାମୁଦାର୍ ନାଡ଼େଏ ହିଜୁଃଲେନାଏ, ହାର୍ ବୁରୁ ଚେତାନ୍ ରେ ରାକାବ୍ କେତେ ଦୁବ୍ ଜାନାଏ। 30ଏନ୍ତେ ମିଃଥିମ୍ବା ହୋଡ଼ୋକୋ ଇନିଜାଃ ନାଡ଼େଏ ହିଜୁଃ ଲେନାକୋ ଇନ୍କୁ ଆକୋୱାଃ ଲୋଃ ଲାଙ୍ଗ୍ଡ଼ା, ଆନ୍ଧା, କନ୍ଦା, ଠୁଠା ହାର୍ ଏଟାଃ ଥିମ୍ବାଗି ହୋଡ଼ୋକୋକେ ଇନିଜାଃ ନାଡ଼େଏ ଆଉଲେଃ କୋୱାକୋ, ହାର୍ ଇନ୍କୁକେ ଇନିଜାଃ କାଟା ଶୁବାରେ ମାଣ୍ଡାଅ ତାଃକୋୱାକୋ, ହାର୍ ଇନିଃ ଇନ୍କୁକେ ଚାଙ୍ଗାଇ କେଃକୋୱାଏ। 31ଚିମ୍ତାଙ୍ଗ୍ ହୋଡ଼ୋକୋ ନେଲ୍ କେଦାକୋ ଚି କନ୍ଦାକୋ ବାକାଣ୍ ତାନାକୋ, ହାର୍ ଠୁଠାକୋ ବେଶୋଃ ତାନାକୋ ହାର୍ ଲାଙ୍ଗ୍ଡ଼ାକୋ ସେସେନ୍ ତାନାକୋ ହାର୍ ଆନ୍ଧାକୋ ନେଲ୍ତାନାକୋ ନେୟା ନେଲ୍ କେତେ ହୋଡ଼ୋକୋ ଆକ୍ଦାନ୍ଦା କେତେ ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋ କୋୱା ପାର୍ମେଶ୍ଵାର୍ ରାଃ ମାନାରାଙ୍ଗ୍ କେଦାକୋ।
ୟୀଶୁ ଚାଇର୍ ହାଜାର୍ କୋଡ଼ାକୋକେ ଖିୟାଅ
(ମାର୍କୁ. 8:1-10)
32ୟୀଶୁ ଆଜାଃ ଚେଲାକୋକେ କେଡ଼ା କେଃକୋୱାଏ ହାର୍ କାଜିୟାଃକୋୱାଏ, “ଇଙ୍ଗ୍କେ ନେ ଥିମ୍ବା ହୋଡ଼ୋକୋ ଚେତାନ୍ ରେ ଦାୟା ହିଜୁଃ ତାନା, ଚିୟାଃଚି ଇନ୍କୁ ଆପି ଶିଙ୍ଗି ଏତେ ଇଙ୍ଗ୍ଆଃ ଲୋଃ ମେନାକୋୱା, ହାର୍ ଇନ୍କୁ ତାଃରେ ଜେତ୍ନାଃ ଅଗି ଜୋମେୟାଃ ବାନୋଗା। ଇଙ୍ଗ୍ ଇନ୍କୁକେ ରେଙ୍ଗେଃ ଗି କାଇଙ୍ଗ୍ କୁଲ୍ ସାନାଙ୍ଗ୍ କୋ ତାନା, କାରେଦୋ ଇନ୍କୁ ହୋରା ରେ ବେହୋଶ୍ ଉୟୁଃ କେନୋଗାକୋ।” 33ଚେଲାକୋ ଇନିଃକେ କାଜିକିଜାକୋ, “ଆଲେକେ ନେ ସୁନ୍ସାନ୍ ଜାଗା ରେ ନିମିନାଙ୍ଗ୍ ହୋଲୋଙ୍ଗ୍କୋ କୋତାଃ ଏତେ ନାମୋଗା ଚି ଆଲେ ନିମିନ୍ ମିଃଥିମ୍ବା ହୋଡ଼ୋକୋକେ ବିଇ କୋୱାଲେ?” 34ୟୀଶୁ ଇନ୍କୁକେ କୁଲିକେଃକୋୱାଏ, “ଆପେୟାଃ ତାଃ ଚିମିନାଙ୍ଗ୍ ହୋଲୋଙ୍ଗ୍କୋ ମେନାଃ?” ଇନ୍କୁ କାଜିକେଦାକୋ, “ସାତ୍ଠୁ ହାର୍ ହୁଡିଙ୍ଗ୍ ହାକୁକୋ ମେନାକୋୱା।” 35ଏନ୍ତେ ଇନିଃ ହୋଡ଼ୋକୋକେ ଅତେ ରେ ଦୁବ୍ ଲାଗିନ୍ ଆଚୁ କେଃକୋୱାଏ।
36ହାର୍ ଏନ୍ ସାତ୍ଠୁ ହୋଲୋଙ୍ଗ୍ ହାର୍ ହାକୁ କୋକେ ଇଦିକେଦାଏ, ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କେଚାଃ କେଦାଏ, ହାର୍ ଆଜାଃ ଚେଲାକୋକେ ଏମ୍ ଇଦିକେଦାଏ ହାର୍ ଚେଲାକୋ ହୋଡ଼ୋକୋକେ ଏମାଃକୋୱାକୋ। 37ନେଲେକା ସବେନ୍ କୋ ଜୋମ୍ କେତେ ବିଇ ଜାନାକୋ ହାର୍ ଚେଲାକୋ କେଚାଃ ସାରେଃ କାନ୍ ଖାଣ୍ଡା କୋଏତେ ସାତ୍ ଫେରେଃ ଡାଲି ଉଠାଓ କେଦାକୋ। 38ଜୋମ୍କେନ୍ କୁଡ଼ି କୋକେ ହାର୍ ହୋନ୍ କୋକେ ବାଗେ କେତେ ଚାଇର୍ ହାଜାର୍ କୋଡ଼ାକୋ ତାଇକେନାକୋ। 39ଏନ୍ତେ ୟୀଶୁ ହୋଡ଼ୋକୋକେ ବିଦା କେତେ ଡୋଙ୍ଗା ରେ ରାକାବ୍ ଜାନାଏ, ହାର୍ ମାଗ୍ଦାନ୍ ଜାଗା ରାଃ ସୀମା ପାଡ଼୍ ହିଜୁଃ ଲେନାଏ।
Právě zvoleno:
ମାତ୍ତିଉ 15: UNXNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
