मत्ती 16

एगोट चिन्ह चमत्कार देखाए कर मांग

(मरकुस 8:11-13; लूका 12:54-56)

1एक दिन फरीसी अऊ सदूकी मन, ईसू जग आईन अऊ ओके ला परखे बर ओकर ठे पूछीन, “हमके मन ला सरग ले कोनो चिन्ह चमत्कार देखा।” 2ईसू हर ओमन ला जबाब देहीस, “सांझ होथे, त तुमन कहथा कि मौसम साफ रही, काबरकि अगास हर लाल हवे, 3अऊ बिहाने तुमन कहथा कि आएज गररा आही काबरकि अगास हर लाल हवे अऊ बदरी छाइसे। तुमन अगास ला देख के मौसम कर बारे में बताए देथा, बकिन तुमन समय कर चिन्हा कर बारे में नई बताए सका। 4ए दुस्ट अऊ छिनारी पीढ़ी कर मईनसे मन चिन्हा खोजथें, बकिन योना अगमजानी कर संगे होवल चमत्कार कर छोंएड़, कोनो अऊ चमत्कार ओमन ला नई देहल जाही।” तेकर ईसू हर ओमन ला छोंएड़ के चएल देहीस।

ईसू कर चेतावनी

(मरकुस 8:14-21)

5चेला मन दह कर ओ पार गईन, बकिन चेला मन अपन संगे रोटी लाने बर भुलाए गए रहीन। 6ईसू हर ओमन ला कहीस, “सुना, तुमन फरीसी अऊ सदूकी मन कर खमीर ले सवाचेती रईहा।” 7त ओमन आपस में ए बात कर बिचार करे लागीन, “हमरे रोटी नई लाने हन, एकरे ले ओहर अईसना कहत हवे।” 8ओमन कर बिचार ला जाएन के ईसू हर ओमन ला कहीस, “ए थोरहें बिस्वास करोईया मन, तुमन आपस में ए काबर टूरु-फुसु करत हवा कि तुमन जग रोटी नईए। 9का तुमन अझेर ले नई समझा? पांच हजार मईनसे मन बर पांच ठन रोटी कर बात ला, का तुमन सुरता नई करथा अऊ केतना टुकना भर के उठाए रहा? तेहूच ला सुरता नई करा। 10अऊ फेर ओ चाएर हजार मईनसे मन बर सात ठे रोटी कर बात हर, का तुमन ला सुरता नईए, अऊ केतना टुकनी भर के उठाए रहा? 11तुमन ए काबर नई समझा कि मंए तुमन ला रोटी कर बारे में नई कहथों, बकिन तुमन ला फरीसी अऊ सदूकी मन कर खमीर ले सवाचेती रहे बर कहत हों।”

12तब ओमन समझ गईन कि ईसू हर ओमन ला रोटी कर खमीर कर बारे में नई गोठियात रहीस, बकिन ओहर ओमन ला फरीसी अऊ सदूकी मन कर गलत सिक्छा ले सवाचेती रहे बर कहत रहीस।

पतरस कथे कि ईसू हर “मसीह” लागे

(मरकुस 8:27-30; लूका 9:18-21)

13ईसू हर कैसरिया फिलिप्पी कर इलाका में आईस अऊ अपन चेला मन जग पूछीस, “लोग मन, मंए मईनसे कर बेटा, मोके ला कोन लागे कथें।” 14ओमन कहीन, “तनिक मईनसे मन कहथें कि ओहर यूहन्ना बतिस्मा देवईया लागे अऊ तनिक झेमन एलियाह अगमजानी लागे कथें अऊ तनिक झेमन कथें कि ओहर यिरमियाह अगमजानी चाहे, अगमजानी मन में ले कोनो एक झन लागे कथें।” 15ईसू हर ओमन ला पूछीस, “बकिन तुमन मोके का कहथा?” 16तब समोन पतरस हर जबाब देहीस, “तंही मसीह लागस अऊ जीयत परमेस्वर कर बेटा लागस।” 17ईसू हर ओके कहीस, “ए समोन, योना कर बेटा तंए धन्य हवस, काबरकि ए बात ला कोनो मईनसे हर तोके नई बताईस, बकिन मोर दाऊ जेहर सरग में हवे, ओहर ए बात ला तोर ऊपरे परगट करीसे। 18अऊ मंए तोके कहथों कि तंए पतरस लागस अऊ ए चटाएन ऊपरे मंए अपन कलीसिया बनाहूं अऊ पताल लोक कर अधिकार मन, एकर ऊपरे जय नई पाए सकहीं। 19मंए तोके सरग राएज कर चाभी मन ला देहूं अऊ जे जाएत तंए धरती कर ऊपरे बांधबे, ओहर सरग में बंधाही अऊ जे जाएत तंए धरती कर ऊपरे खोलबे ओहर सरग में खुलही।” 20तेकर ईसू हर अपन चेला मन ला, ए चेतावनी देके कहीस, “ए बात ला तुमन कोनो के झईन बतईहा कि मंहीच मसीह लागों।”

ईसू हर अपन मिरतु अऊ जी उठाई कर बारे में अगमबानी करथे

(मरकुस 8:31-33; लूका 9:22)

21ओ समय ले ईसू हर अपन चेला मन ला बताए लागीस, “ए जरूरी हवे कि मंए यरूसलेम में जाओं अऊ यहूदी मन कर अगुवा मन, मुख याजक मन, अऊ कानहूंन कर सिखोईया मन कर हाथ में ढेरेच दुख भोगों अऊ माएर देहल जाओं अऊ तीसर दिन जी उठों।” 22त पतरस हर ईसू ला अलगे ले गईस, अऊ ओके ए कहिके डांटे लागीस, “ए परभू, परमेस्वर अईसना झईन करे, तोर संगे एकस कभों झईन होए।” 23तब ईसू हर पतरस कती किंदेर के कहीस, “मोर नजेर ले दुरीहां हएट जा सैतान! तंए मोर डगर कर अड़चन लागस, काबरकि तोर मन हर परमेस्वर कर बात कर ऊपरे नई लागीसे, बकिन मईनसे मन कर बात कर उपरे मन लगाए हस।”

ईसू कर चेला बने कर मतलब

(मरकुस 8:34—9:1; लूका 9:23-27)

24तेकर ईसू हर अपन चेला मन ला कहीस, “अगर कोनो मोर चेला बने बर चाहथे, त ओहर अपन खुद कर ईछा ला छोंड़े अऊ अपन कुरूस ला उठाए के मतलब कि मोर चलते दुख उठाए बर तियार रहे, तब मोर पाछू होए ले। 25काबरकि जेमन अपन परान ला बचाए बर चाहथें, ओमन अमर जिनगी ला गंवाहीं, बकिन जे कोनो मोर चलते, अपन जिनगी ला गंवाथें, ओमन अमर जिनगी ला बचाहीं। 26अगर मईनसे हर सब संसार ला पाए जाथे अऊ अमर जिनगी ला गंवाए देथे, त ओके का फयदा होही? आखिर मईनसे अमर जिनगी पाए बर का पलटा देही?

27मंए मईनसे कर बेटा अपन सरगदूत मन कर संगे अपन दाऊ कर महिमा में अवईया हवों अऊ ओ घनी मंए सब झन कर काम कर अनुसार ओमन के इनाम देहुं। 28मंए तुमन ला फूरोंच कहथों कि जेमन एजग ठड़होईन हवें, ओमन में ले तनिक झेमन अईसना हवें कि जब तक ओमन मोके, मईनसे कर बेटा ला ओकर राएज में आवत नई देख लेहीं तब तक ओमन नई मरहीं।”

Právě zvoleno:

मत्ती 16: SGJ

Zvýraznění

Sdílet

Kopírovat