Yʉanɨ 3
3
Ɔɔ Yeso ɓʉyakanaka nʉ Nɨkɔdɛmɔ
1Yi꞉nye nʉ mombi mʉngana ino ɓɔ Nɨkɔdɛmɔ mʉngana ʉ ɓangama ɓʉ Ɓayuda, amati ʉ ɨtanda ngia yɨ Ɓafalisayɔ. 2Ɓisi mʉngana nuɓutu, ɛyɔ a꞉ka kʉna Yeso ambumuɓukuo ɓɔ: « Mʉpananakɨa, kakʉmbɨa ɓɔ wa꞉ʉngwa ɔɔ Asʉɓɨɨ nisu kunzo mapanʉ. Jʉ mombi ambʉkɔmʉ ikanzi ngia a꞊kyɨa ɓakɔkɔ ɓɔɔ ɓʉmbangɛ ngiɓa wakʉkyɨa engo ndʉ Asʉɓɨɨ ambukuɓio ɨzɔ nayɔ. » 3Yeso ambumutisio ɓɔ: « Manɔwɛ kusigio tʉkʉ kingono ɓɔ, mombi ngia ambʉkʉnʉtanɨa kʉtɔ, ambʉkʉna Ɓʉngama ɓʉ Asʉɓɨɨ gʉkʉ ɗɛkɛkɛ. » 4Kija Nɨkɔdɛmɔ a꞉ɓukuo Yeso ɓɔ: « Mombi inyeni tiga 'ʉkʉʉ, a꞊nʉtanɨa ɓata ɨkyɨkyɨɓʉmʉ tanɨ? Ajʉ a꞊kumunio akʉ ɓʉa ɓʉ inye kʉtɔ ambʉnʉtanɨa ɓata ɓiɛ? » 5Yeso ambumutisio ɓɔ: « Tʉkʉ kingono manɔwɛ kusigio ɓɔ, ndʉ mombi ambʉkʉnʉtanɨa nʉ mepo nʉ 'Ʉtʉma wɔɔ Tu, ambʉkʉkwanana kukumunio akʉ Ɓʉngama ɓʉ Asʉɓɨɨ gʉkʉ ɗɛkɛkɛ. 6Ɨkyɛmɛ ngia yɨ꞉nʉtanɨa nʉ ndʉtʉ yɨ mombi ya tʉkʉ ndʉtʉ. Yɨnʉtanɨeni akʉ 'Ʉtʉma wɔɔ Tu ya kʉ 'ʉtʉma. 7Yɛɛnambangɨakɔmʉ jʉ mu꞉nasigio ɓɔ inu kʉ ɓuɓomu nʉtanɨeni kʉtɔ. » 8Mahuo waapɨka kʉsa mesu akʉ waakʉnda‑ɛɛ. 'Ungito wɔngɔ waakʉnɨɔ kʉnɨɔ. Ɨkyɛmɨngana, wambʉkʉmbɨa ɓɔ wʉka mesu neni nʉ wakʉsa gbanɨ. Yaakyɨanɨa ɓwanɨ akʉ mombi kʉ nangana nangana ngia aanʉtanɨa nʉ 'Ʉtʉma wɔɔ Tu. 9Nɨkɔdɛmɔ ambumuɓukuo ɓata ɓɔ: « Ikanzi yɨ moni ngikakɛ, ka꞊kyanɨa ɨkyɨkyɨɓʉmʉ tanɨ? » 10Gʉ Yeso ɓɔ: « Ɔwɛ wa mʉpananakɨa wɔɔ ʉja anʉ Ɨsalaɛlɛ aka. Jʉtanɨ wambʉkʉmbɨa ikanzi yɨ moni ngikakɛ? 11Manɔwɛ kusigio tʉkʉ kingono ɓɔ, kaayaka moni ngika kakʉmbɨa engo, nʉ kaaɓɨakɨa akʉ ɓingono tʉkʉ moni ngika ka꞉na nʉ mesu. Ɨkyɛmɨngana, nambʉkɔmʉ kʉbaya moni ngika kakʉɓɨakɨa engo akʉ ɓingono. 12Ndʉ nambʉkɔmʉ‑zʉ kʉbaya moni ngika maninu kʉngakɨa, ika kaakyɨanɨa ya akʉ ɨtaka, na꞊baya tiga moni ngika maninu kʉngakɨa ika kaakyɨanɨa ekoo ʉ ɓisi ɨkyɨkyɨɓʉmʉ tanɨ? 13Mombi gʉkʉ mʉngana ambuɗitokɔmʉ sina ekoo ʉ ɓisi, kisukuo tʉkʉ Mwana ngia ʉ Mombi, iya a꞉ijo kʉʉngwa ekoo ʉ ɓisi. 14Kʉndʉ iya Mʉsa a꞉maiso‑ɔɔ zɨɨ ngia ɓa꞉utuo nʉ uko akʉ 'ʉkakaʉ akʉ 'ukengu, yɨkwanana ɓumaiso Mwana ngia ʉ Mombi ngbanga kʉ ɓwanɨ. 15Aka ekoo ngia ɓɔ mombi kʉ uɓomu ngia amʉbaya, ʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá.
16Jʉ Asʉɓɨɨ a꞉kʉnda ʉɓɨɨ kingono, a꞉nzo Mwana ngiangɔ ɔɔ nangana aka ekoo ngia ɓɔ mombi kʉ uɓomu ngia amʉbaya ɔɔyangaakɔmʉ, ɨkyɛmɨngana ʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. 17Tɔgɔ, Asʉɓɨɨ a꞉tʉmakɔmʉ Mwana angɔ ya akʉ ʉɓiɨ kʉtɨna 'ʉkɔmbɔ wʉ ɓombi ɓʉ ɨtaka, ɨkyɛmɨngana a꞉mʉtʉma tʉkʉ aka ekoo ngia ɓɔ ɓʉnyɨa nʉ ɓʉhɨa 'upi akʉ ɛyɔ. 18Mombi ngia abaya Mwana ngia ʉ Mombi, ɓambʉkʉ mʉnapɨa nʉ 'ʉkɔmbɔ. Ɨkyɛmɨngana, mombi ngia ambʉkɔmʉ nayɔ kʉbaya anʉ 'ʉkɔmbɔ jʉ aɓio ʉyaenɨ kʉbaya Mwana ngia wʉ Asʉɓɨɨ ɔɔ nangana. 19'Ʉkɔmbɔ ngua wʉ Asʉɓɨɨ wa ɓɔ: wanga wa꞉ka ya akʉ ɨtaka, ɨkyɛmɨngana ɓombi ɓa꞉kʉnda umomo kʉɓaa wanga jʉ ɨkyananakɨa ngiindaɓʉ ya ɓɨɓɨ. 20Jʉ mombi ngia aakyɨa ɓʉɓɨɓɨ, ayaa wanga nʉ ambakaka tinene nawɔ, ambʉ ɨkyananakɨa ngiangɔ yɛɛnyɨakɔmʉ akʉ ɓʉmba. 21Ɨkyɨmɨngana, mombi wʉ ingono aaka tinene nʉ wanga, ambʉ ɨkyananakɨa ngiangɔ yɨnyɨa akʉ ɓʉmba, kumbiiso ɓɔ yakʉkpatanakɨa tʉkʉ nʉ ɓʉkʉnda ɓʉ Asʉɓɨɨ. »
Yʉanɨ ngia i꞉nye ɓatiso ɓombi ʉngaka moni ekoo ʉ Yeso
22Mbise ngiinanɨ, Yeso ambʉsa ɨzɔ nʉ ɓakpataka ngiɓangɔ akʉ gɨpa ʉ Yudɛa. I꞉nye tii tʉkʉ nani akʉ makwaa ɗɛkɛkɛ ɨzɔ naɓɔ, inyeni tʉkʉ kuɓatiso ɓombi. 23Yʉanɨ i꞉nye kʉ kuɓatiso ɓombi amati ʉ yapʉʉ yɨ Ainoni tinene nʉ Salimu, jʉ mepo ki꞉nye nani maja. Ɓombi ɓi꞉nye kʉka ɓɔ uɓuɓatiso. 24Ati ngiinanɨ ɓi꞉nye‑zʉ ɓambʉgisenikɔmʉ Yʉanɨ akʉ boloko. 25Mbise ngiinanɨ, ɓakpataka ngiɓʉ Yʉanɨ nʉ 'uyuda mungono ɓɔmʉ ɓambuɓoto wai ekoo ʉ mapanʉ kʉ jaɓanakɨa ngia yɨ Ɓayuda. 26Kija ɓakpataka ɓa꞉ka kʉgbʉka Yʉanɨ, ɓambumusigio ɓɔ: « Mʉpananakɨa! Ajʉ wa ɓata kʉ kutunguo mombi ngia ni꞉nye nayɔ amondu ʉ Yɔlɔdanɨ ɓiɛ, iya wi꞉nye kʉɓiakɨa akʉ ɓingono ɨsaʉ ngiangɔ? Ʉna‑zʉ, ɨtakɨ‑takɨ ngia a tiga kuɓatiso ɓombi, nʉ ɓombi kʉ ɓuɓomu ɓa kʉsa nayɔ kʉgbʉka tii tʉkʉ ɛyɔ. » 27Kija Yʉanɨ a꞉tisio ɓɔ: « Mombi ambʉkʉkwanana kʉnyɨa nʉ ɨkyɛmɛ, yambikinye tʉkʉ iya Asʉɓɨɨ u꞉munzoo. 28Inu ɓambinyɨɓɔngɔ na ɓatɛmʉ ɓʉsɛmɛ aka ma꞉sigo‑ɔɔ ɓɔ: ‹ Ɛmɛ mambʉkɔmʉ Klisito, ɨkyɛmɨngana ɓa꞉natʉma ɛmɛ pɛɛ angɔ. › 29Swaɨ wʉ ɨɓaja ya tʉkʉ gue ngia ɓʉchɨkana nayɔ. Ɨkyɛmɨngana, adii wʉ swaɨ aɓio tʉkʉ anambamba ʉ gue ngiinanɨ, ambuɓio nayɔ kutikio nʉ kʉkwa ɨgyagya ɨja kʉkɔ iyo ngiangɔ. Kʉ ɓwanɨ, ɨgyagya ngiisɛmɛ ya tii amati asɛmɛ tʉkʉ ɓʉ tsɨnɨ tsɨnɨ. 30Yɨkwanana ɓɔ ɨbɨba ngia yɨ Klisito yɨsɨnganaka nɨkʉʉ, iya yɨsɛmɛ yambijo nɨsɨ. »
Mombi ngia a꞉ʉngwa ekoo ʉ ɓisi
31« Mombi ngia a꞉ʉngwa ekoo ɓisi, a ekoo ʉ ɓombi kʉ ɓuɓomu. Mombi ʉ ɨtaka a tʉkʉ wʉ ɨtaka, nʉ aayaka tʉkʉ moni kʉ ɨtaka. Mombi ngia a꞉ʉngwa ekoo ʉ ɓisi a ekoo ʉ moni kʉ ɓuɓomu. 32Ɛyɔ aaɓɨakɨa akʉ ɓingono tʉkʉ moni ngika aa꞉kɔ nʉ aa꞉na nʉ mesu ngikangɔ, ɨkyɛmɨngana yambʉkɔmʉ nʉ mombi gʉkʉ mʉngana iya aamʉbaya. 33Mombi ngia aabaya ɨsaʉ ngiangɔ ɓaaɓɨakɨa akʉ ɓingono, aapimiso tiga ɓɔ Ɨsaʉ yɨ Asʉɓɨɨ ya kingono. 34Jʉ mombi ngia Asʉɓɨɨ a꞉mʉtʉma aayaka tʉkʉ moni kʉ Asʉɓɨɨ, jʉ a꞉muhuiso nʉ 'Ʉtʉma nguangɔ kʉ kpekini. 35Tidoo aakʉnda Mwana angɔ, kija a꞉nzo moni kʉ muɓomu akʉ lɨkɔndɔ langɔ. 36Mombi ngia aabaya Mwana, aanyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. Mombi ngia ambakabaya Mwana ambʉkʉnyɨa nʉ ʉɓɨɨ, ɨkyɨmɨngana ʉnganga ngua wʉ Asʉɓɨɨ wa tiga ekoo angɔ. »
Právě zvoleno:
Yʉanɨ 3: BudKoya
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2021, Wycliffe Bible Translators, Inc.
