Luc 1
1
Ebaanihi
1Baari kuna aki ama baana oteende maami ma ayiri o mpanihi e saabe. 2Bo atoosi maami maa ma osuumbu a baari ma amoni ebanihi e mo, bo se aduhi saabe. Bo se ama kiriha adzandzi a Ndziami ma otooso mbari e nde. 3Ŋa kia obila o me se emoni ove, me yiri na osaha, na opisa ndzele ndzele, maami aso ma ayiri ma ebaanihi, me eteende we osaangumu o yemiŋi, nkani Tiofile. 4Me esa vua mo bu mbri, we oyaa mbri maami ma ayisihi we aki asisiele.
Obaandzi atooso ekulihi e Zan Batise
5Ntini Erode akihi nkumu osi o Zide, eki na osi avuoŋi omo, nkuumi e nde Zakari a ndzubu Abia asi ma avuoŋi. Okari a nde Elisabete aki ma ombisa Arone.#1.5 Arone oma kaha osi avuoŋi onini, o ntini e Moyize aki nkumu a Isayele. 6Bo aso vuele aki tele o miisi a Ndziami, ma anyiima angri na esibi e Nkumu eso ndzele ndzele. 7Bo aki baana kali, obila Elisabete aki onguuma, bo aso vuele aki aya ekubu.
8Tsuhu mo, Zakari akihi ma osa dzandza e nde, lempa la avuoŋi ntsa ndzo e Ndziami. Dzia eki tsuhu odzua a ndzubu e nde e dzandza. 9Vua eki otiiri ma asi ma avuoŋi, asuoli nde ma onyunuŋa ntsa nkiina e Nkumu, ma otsuha vuoŋi oyombo. 10Baari a Ndziami kuna aki o ndzi ma ovuono o ntini ma ampihi vuoŋi oyombo. 11O ŋa, obaandzi a Nkumu owasihi o paani e Zakari. Nde akihi mo kuoho olumi o nkiina, mpili ma atsuha eyombo. 12Zakari omono nde, onguo osi nde bla vuoho bo mini. 13Ŋa obaandzi na nde ndi: «We ka mono vuoho ni Zakari, Ndziami omi yalaha evuoniŋi e we. Okari a we Elisabete adze okula muana a balaha, we adze ompa nde nkuumi e Zan. 14We adze omono osuere bo mini. Baari kuna ma adze otsaba me ekulihi e nde. 15O miisi a Nkumu, nde adze oka mvuuru onini. Nde aka adze onyua mali a ba, na mali akimaa nkala ni. Oduduma Santi adze oluula o nde ntsa muo a nguhu a nde. 16Nde adze osa ndi baana a Isayele avuruha na e Ndziami a Nkumu a bo. 17Nde adze oya mva ntuma a Ndziami na oduduma bla mpari Owobi a mbari e Ndziami Eli. Mo oyeese etima ma ataara bla baana. Nde adze okaala etima e baari ma ali i nyiima Ndziami ni. Bo ma adze otsimiŋa mva baari ma ali tele. Nde ayeese baari aka tele o miisi a Nkumu.» 18Zakari okaali na obaandzi ndi: «Me oyaa mbri kari dzaa dzaa buni?» Me okubu, okari a me oya okuuru. 19Obaandzi okaali nde ndi: «Me Ngabriyele, me okaaha bla Ndziami atumi me na aduha we ntsia e mve. 20Ŋa we aka yalaha mbari e me ni, we adze oka nkina tii ngo e maami maa ma adze oto.»
21Baari aso ma adilihi nde, akimi lebihi le Zakari ntsa nkiina. 22Etsuuhi e nde kua, oya i tiha ni, bo ayaa ndi nde omi mono maami a luari ntsa nkiina. Nde oya owobo na bo ma eliemi.
23Zakari omana etsuhu e nde e dzandza ntsa ndzo e Ndziami, ovurihi ndzo e nde. 24Etsuhu ema yira, Elisabete obiri yimi. Osi angondo ataani i tsuuha o ndzi ni. Nde awobo ntsa otima a nde ndi: 25«Ŋa mono dzaa e Nkumu ami sa o me ma antini ma, nde omi sa me dzaa e mve, nde omi tsiese me okru o miisi a baari.»
Obaandzi atooso ekulihi e Zezi
26Yimi Elisabete eto angondo asiami, Ndziami otumi obaandzi a nde Ngabriyele ntsa Nazarete, onguundu o Ngalili, 27mpili ondzambu okaasi a nkuumi Mariya, aki okini onkiina. Ompala Zuzefe, a mo ombisa o nkani Davide. 28Obaandzi owasihi na e nde ndi: «Suere, mpolo e Ndziami eli bla we, na Nkumu oli bla we se.» 29Mariya okimi, otsimiŋi ndi: «Bi ewosihi ema?» 30Obaandzi okaali ndi: «We oka mono vuoho ni Mariya, mpolo e Ndziami eli bla we. 31We adze obira yimi, we okula muana a balaha, we adze oluha nde nkuumi e Zezi. 32Nde adze oka mvuuru onini, ma adze otsuolo nde o Muana Ndziami a Nkara Yulu. Ndziami a Nkumu adze ompa nde onkani mva eki ombisa o nde Davide. 33Nde adze okuuma o yula baari a ndzo e Zakobe#1.33 Ndzo e Zakobe oma kaaha baari a Israyele., onkumu o nde ma oka adze owa ni.» 34Mariya okaali na obaandzi ndi: «Kari edze oyira buni? Me kini onkiina.» 35Obaandzi okaali nde ndi: «Oduduma Santi adze oya o yula we, mpari e Ndziami a Nkara Yulu edze owuha we mva odziiŋi. Kia obila ma adze otsuolo muana a we akula dzua, ma opeende, ma adze otsuolo nde o Muana Ndziami. 36Nkuono e we Elisabete se, ma atsuolihi ma onguuma oya na yimi angondo asiami ntsa okubu, nde adze okula muana a balaha. 37Obila Ndziami okuono kali.» 38Mariya okaali ndi: «Me odzandzi a Nkumu. Ndziami osa ma osuumbu a we aduhi.» Emana obaandzi onyili nde.
Mariya akie Elisabete
39Etsuhu eyiri, Mariya oyeni asisari onguundu o yulu okuri o Zide. 40Nde onyuniŋi ntsa ndzo e Zakari, owoosi Elisabete. 41Ntini Elisabete ayuhi dzuuyi le Mariya, muana ofubi ntsa muo a nde, Oduduma Santi oluuli mo Elisabete. 42Nde wuli nkima nkara yulu ndi: «O yula akaasi aso, Ndziami omi mpa we andosoho, na muana ali ntsa muo a we se. 43Na me ŋa se mvuuru a nguhu a Nkumu abuuna okie? 44Obila we na owooso me ŋa muana ofubi, osueri ntsa muo a me. 45Osuere oka na we, mvuuru ayalihi maami a Nkumu aduhi, ma adze omono mo!»
Luumu le Mariya
46Mariya ndi:
«Oduduma a me akuusa onkani o Nkumu,
47otima a me oli ntsa osuere
obila o Ndziami ovusihi a me!
48Nde se ama yibiha me, odzandzi a nde a mvunu kali.
Ee, ma obaana o tsuhu e lobi, na antini aso, baari a yula ntsie aso ma duha ndi me eli ntsa osuere,
49ma oma, Ndziami a mpari ama asa maami ma ave, nkuumi e nde opeende.
50Nde oli ove antini aso mo baari ma anyiima nde.
51Nde ama laha onkani o nde ntsa mpari: ama tsuura anga etima e kuuna,
52Nde ama buuna ankani ma ambara a bo,
emana okuusi baari ma ali na baani.
53Nde ama mpa anga ndzala biila, otsuuri anga osolo dziala onyaŋa.
54Nde aya na ayamaŋa baari a Isayele, adzandzi a nde:
nde aka limiha olaha ove o nde
55o mbumbu na Abraame bla baana ni, mva e nde alehi ndahi na akuuru a saabe.»
56Mariya oki bla Elisabete angondo mbri atari, emana ovuruhi mpuhu e nde.
Ekulihi e Zan Batise
57Ntini ema to, Elisabete okuli muana a balaha. 58Baari ma aki paani e Elisabete bla nkuono e nde, ayuhi ndi Nkumu omi sa nde ove bo mini, bo se asueri bla nde. 59Amana okula muana etsuhu ntsaami eyiri, o mfuomo asi nde sasi, bo asahi oluha nde nkuumi e taara nde Zakari. 60Ŋa nguhu a nde ndi: «Kali, nkuumi e nde edze oka Zan.» 61Bo na nde ndi: «Nkuono e we nkuumi dzia kali!» 62Alabi eliemi mpili e taara ma opisa nkuumi e nde asaha ompa muana. 63Zakari opisi kiila ma oteende, oteendi ndi: «Nkuumi e nde Zan.» Bo aso aya ntsa lekimi. 64O ŋiŋa Zakari oya avuruha owobo, nde oya avuono Ndziami. 65Baari ma aki o paani e bo amoni vuoho, osi o Zide oso o yulu okuri, oya ewobo lo. 66Aso ma ayuhi maami maa, aya ma tsimiŋa, ma pisa abuha ndi: «Muana yu adze oka buni?» Ŋa mpari e Nkumu eli bla nde.
Luumu le Zakari
67Oduduma Santi oluuli o Zakari a taara a muana, oya awobo ma lengulu le Ndziami ndi:
68«Leve le Nkumu, Ndziami a Isayele
ma obila o nde ayi na ayamaŋa, na levusaha le baari a nde.
69Nde omitusaha saabe ovusihi onini
ntsa ndzo e nkani Davide, odzandzi a nde.
70Nde aki ama biha na otooso na kala, ma enyua ma awobi a mbari e nde ma ali epeende:
71Nde ovusihi atusaha saabe o ntsa dziala ma anga ombangu,
na o mpari e baari ma ali na mbele e saabe.»
72Nde olahi ove o nde na akuuru a saabe,
oyibihi ondihi ma opeende le etini.
73Ndziami olabi okesi na Abraame a taara#1.73 Abraame Azife ma tsuoloho o taara oma kaaha nkaha a bo a kala. Bo otsuoloho ankaha a kala ma ataara. saabe,
74ma otusaha saabe ntsa dziala ma anga ombangu,
mo bu ndi i ma vuono nde bla vuoho ni,
75mo bu ndi, saabe leka tele ntsa opeende o miisi a nde
etsuhu eso ma lebihi le saabe.
76Zakari ovurihi oduhi ndi: «Ŋa we muana me, ma adze otsuolo we ma owobi a mbari e Ndziami a Nkara Yulu.»
We adze otsuomo levusu le Nkumu, ma oselehe nde ndzila.
77Ma oduha se na baari a nde ndi, nde adze ovusaha bo,
na leboloho la ambiini a bo.
78«Ndziami a saabe ama luula ma oduusu, nde se ove:
nde adze olehe saabe oyalala o yulu, mva ebalihi e mui na entsiere,
79ma olaha baari ma ali ntsa lempiibi na odziiŋi a leku, oyalala,
ma obira saabe o ndzila oduusu.»
80Muana akula, na oduduma nde se abaha mpari. Nde aki okaha ntsa ebiri e kayi, tii ngo tsuhu e nde ayi o miisi a baari a Isayele.
Právě zvoleno:
Luc 1: MDT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
