Luk 16
16
Ligan li nwaga mbaba mfom
1Jisɔs atob batɔnanjim abɛ ligan lifa arɛ: “Ɛbɛl ɛfang nɛ wurang yɔ abɛlɔ nɛ yɔ ajɔlɔ babɛ nsɔl ɛyɛ. Ɔteb ɛrirɛ arɛ mbabɛ ɔwɛ afada akpuga ayɛ. 2Fɔyɔ akogɔ wɛ abib, ‘Bɛjom ji mɛ nyoga mbangɛ wa? Kam nfala nsɔl yi wɔ ɔbabɛ, ateb wɔ ɔnim ma kpɛ jɔl mbaba mfom ɔma.’
3“Mbaba mfom ɔfɔ abong atɔg ɛlɛ, ‘Mɛ na lem nan batig? Nsɔjama njo alagam tabɛ litom. Ɛkɔ mam sang ji mal mbim ɛgbɛ, mɛ nkpe ndɔn yi njɔ jɛng nlɛm nsɔl. 4Mɛ nyinyi ji na lem, na ngara yi alɔ fɛngɛ akɔ litom ɛlama anɛ alam kɔ akak na bitɛk abɔ.’
5“Wɛ akog anɛ ba akpenɔ nsɔjɛ njo mbɔ. Agbɔ mba abib ngbɔgamba arɛ, ‘Ba mbɔ yi ɔkpenɔ nsɔjama njo?’
6“Wɛ afanga arɛ, ‘Nsang aku ɔlif atil arɔn.’
“Mbabɛ mfom abong atɔgɛ arɛ, ‘Tab nwɛr a mbɔ ɛya, tore jɔl kakab, wɔ ɔlem ɛjɔl atil abal na woba.’
7“Akpɛ bib ɛtɔna nɛ, ‘Wɔ ɔkpe ba mbɔ?’
“Wɛ afanga arɛ, ‘Ɛkpa nsang ɛgɔr bɛrɔn.’
“Atɔgɛ arɛ, ‘Jɔl ɔlem ɛjɔl ɛgɔr bini.’
8“Nsɔjɛ njo atig nwak mbaba mfom ɔfɔ ateb wɛ arɛ agba waga. Anɛ ba ɛyeng akpe ɔwak bi alema nsɔl yi ɛreanɔ ɛkarɛ abɔ ɛseng anɛ ba liro. 9Mɛ ntɔga wa, kɔ afang ya ɛyeng, wɔ ɔlem atɛm ɔkarɛ ɛla na ngara yi nsɔl kpakpa ɛlɔ mal, Ɔsɔwɔ ala kpera akak na mfom yi anɛ arenɔ na nsinsi.
10“Nɛ awiawi yɔ akpenɔ ɛkagasik na asusuga nsɔl atɔb abɛl ɛkagasik na atakpa nsɔl nɛ awiawi yɔ adɛnɔ bɛl ɛkagasik na asusuga nsɔl anim ma bɛl ɛkagasik na atakpa nsɔl. 11Ɔdɛnɔ bɛl ɛkagasik ɔfele afang ya ɛyeng, ba nɛ yɔ ala karɛ ɛtete afang? 12Ɔdɛnɔ bɛl ɛkagasik na ɛjom ji nɛ, ba nɛ yɔ ala karɛ ɛjom ɛja wɔ mfɔnɛ?
13“Nɛ sang yɔ amal arɔgɛ ndɛjo bibal. Ɔlɔ lem anɔ wurang ala kɔr yɔngɔ araga, ɛdɛnɔ jɔl anɔ wɔ ɔla kponi wurang nɛ yɔngɔ adanga wa. Wɔ ɔnimal jege Ɔsɔwɔ na akpuga.”
Ajigi na Ɔtol Ɔsɔwɔ
Matiyu 11.12-13; 5.31-32; Mak 10.11-12
14Anɛ ba Farasi, ba akpuga akɔra abɔ, naji ayogɔnɔ ɔtɔga bifɔ akuma Jisɔs nyɔla 15Jisɔs abong atɔga abɔ, “Wun ɔlema mɔng wun ɔrenɔ ja na nbri anɛ, Ɔsɔwɔ anyinɔ ntem ɛyina. Nsɔl yi ɛloba anɛ na amir ɛream ɛjom ajiaji na libri Ɔsɔwɔ.
16“Ajing ya Mosis na ɔteb bi ba yɛna amir atetebe tɛtɛ na ngara Jɔn nwura anɛ alib. Bɔm na ngara yifɔ ɛteng ɔteb bi Ɔtol Ɔsɔwɔ agba tebe anɛ kpakpa anɔga arɛ ayɛl. 17Ɛre ndɛra ɛjom arɛ libo na nde ɛlima arɛ na nsusuga lilom li Ɔsɔwɔ ɛtan.
18“Nɛ awiawi yɔ atɛnɔ nkal ɔwɛ aji kɔ nɛ nkal yɔndɛ agba kar na nkal anɛ, nɛnom yɔ akɔlɔ nɛ nkal yɔ alɔ wɛ tɛn agba kar na nkal anɛ.
Ligan li nɛnom afang na Lasarɔs
19“Ɛbɛl ɛfang nɛnom wurang yɔ ajɔl leba ateng a bileba ajɔl li ɛnɔb kpa kpa afo. 20Na libri ɛtɛk ɛjɛ ɛbɛl nɛnom wurang yɔ ajɔlɔ lɛm nsɔl akoga wɛ arɛ Lasarɔs abɛl bilɛm na biji. 21Ajɔl sɛb arɛ afugi nsɔl yi ɛlɔ ɛwuri na ɛkpokoro ɛfang nɛ. Ɛjɔl ɔgɔ ɛjɔl ba ɛlubi wɛ bilɛm.
22“Na nkukura nkpak aba kpɔ nteb ɔteb Ɔsɔwɔ atabɛ aji jɔl alagɛ Ɛbram. Ɛfang nɛ atɔb aba akpɔ arimɛ. 23Ajɔl yɛn ɛriga Na lilol ngon, atab amir ayɛn Ɛbram dagdagɛ na Lasarɔs na nkɛ a ngbanga. 24Fɔyɔ akogɔ, ‘Tata Ɛbram, bɛl ndɔn na nama wɔ ɔtom Lasarɔs ayɔbɛ ɛsi nyigɔbɔ na alib anarɛ mam lirebe, ateb arɛ mɛ nde na ntakpa ɛriga na lilol ngon.’
25“Ɛbram afanga, ‘Mɔn, gbɔ nter arɛ naji ɔjɔlɔ na likpen ɔjɔl bɛl anɔba nsɔl, Lasarɔs ajɔl bɛl abe a nsɔl batig wɛ are na ɛnɔb wɔ ɔre na ɛriga. 26Seng fɔ sa ɛkpe ɛkpok libe ji ɛbangɔ wur nana naji anɛ ba asɛba arɛ akod aba ngɔ anim mal nig nɛ awiawi yɔ asɛba arɛ akod abanga anim mal.’
27“Ɛfang nɛ afanga, ‘Ɛtiti, tata Ɛbram, tom Lasarɔs ɔtu na ɛtɛk nsɔjama.’ 28Ateb mɛ nkpe abɔnyɛn arɔn. Nɔngɛ wɛ aji rigi abɔ naji abɔ ala dɛ ba fa na mfom ɛriga.
29“Ɛbram afanga, ‘Abɔnyɛn aba akpe ajigi ya Mosis na ɔteb bi ba yɛna amir; nɔng abɔ ayog ji abɔ abonga.’
30“Ɛfang nɛ afanga arɛ, ‘Ii, Tata Ɛbram, nkuanɛ alɔ jog aji ngɔ naji abɔ ala gbɔ ndɔn na abeɔfɛm abɔ.’
31“Ɛbram abong arɛ, ‘Adɛgɔ yog alom ya Mosis na ba yɛn amir abonga, ɛjɔl ɔtom nɛ fa yɔ anyimɔ na liku abɔ wɛ anim ma yog.’ ”
Právě zvoleno:
Luk 16: ABM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©️2022 Luke Initiative for Scripture Translation
