Kufuma 4
4
1Akatalwa Musa akaghamba, Kake teweneniitikijawo, tewenenisikijawa ighon la; amu weneghamba, Mzuri takufumiaye. 2Mzuri akamburra, Niki kioho mkononi hako? Akaghamba, Ni isibo. 3Akateta, Lighushe si. Akalighusha si, likaoka nyoka; akamatuka Musa msongorana wakwe. 4Mzuri akamburra Musa, Ronga mkono wako uigure kitize: akauronga mkono wakwe akaigura, ikaoka isibo mkononi hakwe: 5Nesa wawone kuitikija Mzuri Izuwa wa wawee wawo, Izuwa wa Ibrahimu, Izuwa wa Isaak, na Izuwa wa Yakobo, akufumie.
6Mzuri akamburrawa, Gera mkono mbafuni hako. Akaugera mkono mbafuni: na ekinaung’ole, yoa, mkono wakwe una itaambo ijewa swee. 7Akateta, Hunduiya mkono mbafuni hako. (Akauhunduiya mkono wakwe mbafuni; na ekinaung’ole mbafuni, yoa, wahunduka wedi sa muri wakwe.) 8Ineoka, wasikuitikije, wasisikie ighonda la luwano lwa kuwoka, weneliitikija ighonda la luwano lwa keri. 9Ineoka, wasiitikije maluwano ama meri, nete wasisikie ighonda lako, uuhe mbombe ya mfuro uitishe heomie: nayo mbombe waiuha mfuro ineoka sakame heomie.
10Musa akamburra Mzuri, Mzuri waugu, mi si mteti, nete iwuo nete izana nete too ukinatete na mzoro wako: kake niemee wa itumbu na wa lumi mi. 11Mzuri akamburra, Niani emwarehie mundu itumu? kana niani eareha bubu, kana ming’ani, kana ewona, kana efwie meso? si mi Mzuri? 12Huwo ingeriaha tonga, nineoka mi na itumbu lako, ninekulosha uneviteta. 13Akateta, Ee Mzuri, ingija ingeriaha hena mkono wakwe unemwingija. 14Oro ya Mzuri ikaaka wanga ya Musa, akateta, Siye mundwenyu Harun Mlawi? Natisiwa uu ni mteti. Yoa, ezie kukuzana: akakuwona eneizihirwa ngoro yakwe. 15Nawe uneteta naye, unegera viteto itumbuni hakwe: nami nineoka na itumbu lako na itumbu lakwe, ninemlosha wundu muneketa. 16Naye eneteta handu hako hena wandu: eneoka hako sa itumbu, nawe uneoka hakwe sa Izuwa. 17Na unelitika isibo ili mkononi hako, uneliarehia maluwano.
18Akatonga Musa, akahunduka hena Yethro mkwee, akamburra, Nitonge, nakusemba, nihunduke ha wandwetu ghati ya Misri, ndeyoa wereoho mtano yoo. Yethro akamburra Musa, Tonga na luworo. 19Mzuri akamburra Musa ghati ya Midiani, Tonga, hunduka na Misri: amu wandu wose wekikuenda ngoro wefwie. 20Musa akauha mche wakwe na waana wakwe, akawakweja wanga ya njoe akahunduka kutonga isanga la Misri: Musa akaliuha isibo la Mzuri mkononi hakwe. 21Mzuri akamburra Musa, Ukitonga kuhunduka kutonga Misri, ukuyoe kumaketa maluwano mose mala nimawikie mkononi hako msongorana wa Farao: nami nineosha ngoro yakwe idindie, nete tenewashigha wandu watonge. 22Nawe unemburra Farao, Nihuwo ateta Mzuri, Israeli niye mwana wangu, mbele wangu: 23Nami nakuwurra, Mshighe mwana wangu, anitumikie; nawe wasua kumshigha: yoa, ninemkoma mwana wako, mbele wako. 24Ikaoka wekitonga hena kisowoko, Mzuri akamtorana, akakunda kumkoma. 25Zipora akauha ibwe, akachwa ishimbu la mwana wakwe, akalitagha maghuni hakwe, akateta, Mzuri ngasu wa sakame we hangu. 26Akamshigha. Akateta, Mzuri ngasu niwe wa sakame, amu ya kitawane. 27Mzuri akamburra Harun, Tonga kumzana Musa shighati. Akatonga, akambona ghati ya nduwi ya Izuwa, akamnyonyoza. 28Musa akambonja Harun viteto vyose vya Mzuri amwingijija, na marighio mose amuazeria. 29Akatonga Musa na Harun, wakawunganya waghosi wose wa waana wa Israeli. 30Harun akaviteta viteto vyose Mzuri emburire Musa; akamaareha marighio mesoni ha wandu. 31Wakaitikija wandu; wakasikia ti ewazia Mzuri waana wa Israeli, akajiwona nginyala jawo, wakaimama wakaomba.
Právě zvoleno:
Kufuma 4: TAVETA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.