John 18
18
Iesu mai paeape hoa
1Iesu ma oharo karia lei, are i kilea haela ila hareho hoahuka ma hoho rare Kidron elahukape. La ita aru ila, are i kilea haela ila hareho aru arahavape. 2Judas, arero hihila epape la haela kara la ita ore, ehovea Iesu i kilea haela i hareho mehaemehae leia veavelaripe. 3Judas, hevehe hiru i kapena haela i oharo haela i Pharisee haela ila hareho lamepa i hehaa i hahari eharu ila leia auvahaeape.
4Laelave Iesu, ehovea are v'ila kihoreavakila eharu oaria are va ore overa leipe, hoai erero maeaeape, E va leita la haroparo ha? 5Ere kavale maeape, Iesu, Nazareth haela. Iesu erero maeaeape, Ara ma. Judas kara, arero hihila epape la haela, ere i hareho epavape. 6Laelave are erero maeaeape, Ara ma, la hoa ere oaria airekai ai mea ve ekaopape. 7Are erero aeka velavela leipe, E va leita la haroparo? Ere kavale maeape, Iesu, Nazareth haela. 8Iesu erero kavale maeaeape, Ara ero lamaeaila — ara ma. E va araro la haropakilava, ma haela elare oki paparaehaki. 9Ehovea are maeape la oharo iele la horerakilai, A araro aikiarape haela oaria ara haroapo au havoavaila. 10Simon Peter ea ila. Are ea hopa ve hareavi akea oharo haela ve koaraki haela ve avako ore koerapape. La haela ve rare va Malchus. 11Iesu Peter maeape, Ea aroa paraeaki — Oa araro avikiarape la hekako ara le va ka ha?
12Kahara, hevehe haela ve kapena i Jew haela ve akea haela Iesu mai paeai ela hahai. 13Annas ve leia lai aupe, ehovea are Caiaphas, la hitolo ve akea oharo haela, ve oa. 14Iapai, Jew haela maria kileape, Veveke haela haroapo haela oaria v'ila apakilai — Caiaphas va la haela la.
Peter ve hehepo
15Simon Peter Iesu ve aire aupe — kilea haela haroapo ae kara. Akea oharo haela la kilea haela ore, laelave are i Iesu ila hareho akea oharo haela ve ara ureve hoaupe. 16Aka Peter mahokaea ve epavape — laelave la kilea haela ae, akea oharo haela oreleipe la haela, are hoai okiape kiva leivila la mari oharo maeape, kai Peter lai kihoaupe. 17Okiape kiva mari Peter maeape, A va ma haela ve kilea haela ae ha? Are kavale maeape Ara ka. 18Horova haela i hevehe kapena leia a ilila areve oropa ve epavape, ehovea mea vevehere leipe. Ere elare maea a koavape — Peter ere i hareho epavi elare maea a koape.
19Akea oharo haela Iesu areve kilea haela i kilea oharo v'ila velavela leipe. 20Iesu arero kavale maeape, Arave oharo ara meahaiapo ve hihika maeaeape. Ara hare oaria, synagogue oaria i Hehe Uvi eapapo ureve haela oaria korukaiavahaeape la ita arave oharo kileavahaeape. Ara oharo haroapo muruhari au maeaila. 21E va araro apevelavela leive ehovealeve? Arave oharo iapavahaeape la haela oaria velavela leivahaeaki — ara erero leari oharo maeaeape. 22Are ma oharo maeai leia epavi kapena haela ae arero mai koa maria maeape, A va akea oharo haela kavale laria maeaive ha? 23Iesu arero kavale maeape, Ara oharo haeae la maeaki lailava, arave haeae hihika vavavaki. Aka ara oharo ehoe la maeakilava a va araro leve lakoaila? 24Annas arero au hahai akea oharo haela Caiaphas ve leia paraeape.
25Simon Peter elare maea a koavila epavape. Laelave ere arero maeape, A va areve kilea haela ae va ha? Are hehepo lei mariape Ara va ka. 26Akea oharo haela ve horova haela ae, Peter areve avako koerapape la haela ve apavara, arero maeape, Ara a are i hareho aru ve leia laeavila ha? 27Laelave Peter hehepo aeka leipe. Haiapo ka kokora mea hi le ape.
Iesu Pilate, Rome Gavana haela, oropa ve
28Ere Iesu Caiaphas ve leia aiai praetorium aupe. Vevelare iele la. Ere oaria praetorium au pekahavaila ere va maea hirihiri leiki ave, ehovea ere va aire passover eapai larilai. 29Laelave Pilate ereve leia ve mea hoai mari maeaeape, E va ma haela leari oharo hahakilai ha? 30Ere arero kavale maeape, Ma haela mai heaha haela leiki aue la lailava, ela arero ave maia leve lai ekekive. 31Laelave Pilate erero maeaeape, E havahu arero kaivi eve la pupu v'ila heheavakive. Jew haela arero maeape, Ela va arero he va ka, la va ela v'ila pupu ila. 32Laelave Iesu areve aire apakive la maea ve ape la oharo iele le horerape.
33Pilate praetorium ureve pekai Iesu itavi arero mari maeaeape, A va Jew haela ve Amua ha? 34Iesu kavale maeape, A va ma oharo elare iki ve lamaeaila, ha, aka haela ae aro lamaeaila ha? 35Pilate kavale maeape, Ara Jew haela ha? A havahu ve haela i oharo haela ila aro arave oropa ve lai ekepe. A leari leipe ha? 36Iesu maeape, Arave basileia ma meahaiapo v'ila ka. Arave basileia ma meahaiapo v'ila la leikilava, arave horova haela hahari le arilai, Jew haela araro paeaki ave. Arave basileia maia va ka. 37Laelave Pilate arero maeape, A va amua ha? Iesu kavale maeape, A va oharo le ara — ara va amua. Ehovea ma ara va epape, aeva ehovea ma ara meahaiapo ve kihoaupe — oharo iele v'ila vavavakive, O iele, O iele v'ila la haela oaria arave ara iapailula. 38Pilate arero maeape, Oharo Iele va le ha?
Are mari avi mea hoai Jew haela maeaeape, Ara va ma haela la eavi haeae karia. 39Aka, eve hurae mai aeva le aeave Ara ka Passover hoa haela aeva e v'ila ovokake paraeakive. Lehae? E va ikivere ara ma Jew haela ve Amua e v'ila paraeakive ha? 40Ere āra eapapo mari hape, Ma haela ka! Aka Barabbas paraeaki. Barabbas va korea haela.
Právě zvoleno:
John 18: ORO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972
