Horova 4
4
Peter i John ila Amua haela oropa ve
1Ere haela oaria oharo maeaeape la hoa, oharo haela i Hehe Uvi ve kapena haela i Sadducee haela ila ereve leia ekevahaeape. 2Ere va ikihairihairi leivahaeape ehovea ere haela oaria Iesu v'ila api kai urouki oharo kileavahaeape. 3Ere erealilara mai papaehai uvi muru oroa ve paparaehape, ehovea mea hailaea iele. 4Lae vi va oharo iapavahaeape haela oaria iki kelavape: la haela oaria 5,000 hovea. 5Iapai, la opoa hare ereve amua haela i haela hoaha i pupu haealula haela, 6Annas, akea oharo haela, i Caiaphas, i John i Alexander i akea oharo haela ve apavara oaria ila hareho Jerusalem korukaiavahaeape. 7Ere erealilara aru hihi aipevahaeai velavela mari leivahaeape, E va le aheke v'ila kai le rare v'ila ma horova laleila ha? 8Ove Veveke Peter ve iki heloekoape. Are erero mari maeaeape E amua haela i Israel haela ve haela hoaha: 9E va elalilara la heheavakilava, ela va ma maea heaha haela laleila horova veveke v'ila, are maea mekaka learia laleila: 10E oaria ore leivahaeaki — Israel haela oaria kara, Aualari apape hoa lei urapape la Iesu Keriso Nazareth haela ve rare v'ila, kaire, are havahu v'ila, ma haela eve oropa ve maea aheke ila epavave. 11E uvi kupe haela hahaure leipe la have ma, are va uvi ve ihau aheke le leipe. 12Ae va haela ae ovokake avara va ka: ehovea kaia ve ihau ve elaviilave ovokake leiki rare aeva karia.
13Ere Peter i John ila ve aheke ovohae eavi ore leivahaeape erealila va iki ore eapapo haela ka, laelave ere va ikihorahora eapapo leivahaeai ore lei, erealila Iesu i hareho veavelaripe. 14Ere kara maea veveke leipe la haela ere i hareho epavila eavape, laelave ereve oharo kari le leipe. 15Ere erero council ve mahokaea ve paparaehai elarelare oharo hukavape: 16Elaviila ma haela leari leivahaeakilai ha? Ehovea erealila laleila la horova Jerusalem apealula haela oaria ore laleila. Elaviila la oharo kokaukakive hovea ka. 17Aka haela oaria la horova ore leiki ave, elaviila erero aihukamaeakive — ere aireaki haela ae ma rare v'ila kilea va arekaea. 18Ere erealilara itavi ape karava maeaeape erealila Iesu ve rare v'ila oharo kahukavalue, kai iroro kailue. 19Aka Peter i John ila erero kavale maeaeape, E havahu heheavaki — Aualari ve oropa ve leari ehoe — eve oharo iapakive, aka Aualari ve oharo iapakive ha? 20Ehovea elalila ovohae eavape kai iapape la eharu elalila hihika maeaeakilai. 21Ere erealilara kai aihukamaeai paparaehape, ehovea ere va erealilave kavale leikive haeae au koaraila, ehovea ere karikara haela oaria oaoka leivahaeape, ehovea haela oaria erealila leipe la horova v'ila Aualari morapaeape. 22Ehovea la maea veveke leipe haela va hitolo 40 aeva kepea.
Peter i John ila elare apavara leia hoahukape
23Erealilara paparaehape la hoa erealila apavara ve leia auvahaeai oharo haela i haela hoaha ila maeaeape la oharo kileavahaeape. 24Ere oaria la oharo iapai ere hareho Aualari ve rare morapaeape maria, Amua a va Aualari, kaia i meahaiapo i ahea ma i ereve eharu oaria ila hareho karikivahaeape Aualari. 25A va ave horova haela David ve ape v'ila maeape:
Ita lahua haela hihiri leivahaelula ehovea leve,
Kai haela oaria iki naoae naoae kelavalula.
26Meahaiapo ve amua urahukape
Amua haela oaria hareho Amua i areve Keriso ve hahari leikive Korukaiavahaeape.
27O iele, Herod i Pontius Pilate i ita lahua haela i Israel haela oaria ila hareho a hariripe la hehe akore Iesu hahari arive korukaiavahaeape. 28Ehovea a oropa kekelape la horova ere leivahaeape. 29Amua e, ereve hihiri oharo a iapaki. Ave horova haela ave aheke avaraki, ehovea ave oharo karava arive. 30Ave mai avihorapai haela lei makukurikive. Ave hehe akore Iesu ve rare v'ila, horova eapapo veveke hela leiki. 31Ere ivaiva lei hareho korukaiape la ita lalaeapape. Ove Veveke erero oaria iki heloekoavape. Ere kara Aualari ve oharo ape aheke v'ila hukavavahaeape.
Eharu oaria herehere
32Iki kelavape haela oaria iki ove ila haroapo hovea leivahaeae. Ere elare eharu oharo au maeaila — ere va eharu oaria herehere leivahaeape. 33Apostolo haela aheke havahu leivahaeai Amua Iesu apai kai uroupe la oharo vavavahaeape: ere oaria ikihuru eapapo ila apearoape. 34Ere oaria eharu kari v'ila heraho au leila, ehovea kekele i uvi ila la haela la eharu ilaea leivahaeai, la eharu ve kavale aikepe, 35Aposetolo haela ve loa ipi ve aipevahaeape. Ere haela oaria mae a hovea hamuri aiarape. 36Joses, aposetolo haela rare itavape rare Barnabas (La rare ve iele ‘Ikihuru ve Akore’), Levite haela i Cyprus hiru ve ekepe haela, 37areve kekele ilaea lei moni aviki aposetolo haela ve loa ipi ve aipepe.
Právě zvoleno:
Horova 4: ORO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Published by the British and Foreign Bible Society 1963-1972