युहन्न 7
7
येसुतेङ् थेङ्की अलेमा
1हुजु लीप्चे येसुचे गालील् प्रदेस् कोर्जेत्ज्यी। थेङ्चे यहुदीया प्रदेस्री स्येःबे थुः अल, तलेपङ्सम् यहुदी अगुवामाचे थेङ्त सेत्परी म्हइटीबल मुबल। 2हुजु बेलोरी यहुदीमाचे गोररी टीज्यीम् म्हन्दीबे पर्ब खय्हम्बल मुबल। 3ओसेम् येसुइ अलेमाचे थेङ्त पङ्ज्यी, “थेङ् गालील् प्रदेस् पीत्ज्यीम् यहुदीया प्रदेस्री स्येःजेतो, ओसेम् थेङ्चे स्य्हेङ्जेत्टीबे लक्मा थेङ्की डबमाचेएनो हुजुरीएनो म्रङ्खइ। 4र्हङ्की मीन् चल्तीखइ म्हेन्बलचे, म्हीमाचे अम्रङ्नले लक् अस्य्हेङ्। थेङ्चे तेःङेन्की लक्मा स्य्हेङ्जेत्टीब होत्तज्यीम् चु लक्मा जम्मचेनो जम्बुलीङ्री स्येःनलजेतो।” 5(थेङ्की अलेमाचेएनो थेङ्त बीस्वास् अलबल तज्यीम् चोले सुङ्बल मुबल।)
6ओसेम् येसुचे थेङ्यीमात सुङ्ज्यी, “ङइ लागीरी दवम् ठीक् बेलो खबल अरे। एङ्यीमाकी लागीरीम् खजु बेलो पङ्लेनो ठीक् मुब। 7जम्बुलीङ्की म्हीमाचे एङ्यीमात अखोब अखम्, तर ङतमी अखो, तलेपङ्सम् थेङ्यीमाचे स्य्हेङ्टीबे लक्मात ङचे दुस्ट य्हीन्ब पङ्ब। 8एङ्यीमा पर्ब म्हन्दीबरी ङ्यीउ, ङ चु पर्बरी देरे अङ्य्ही, तलेपङ्सम् दवम् ङइ लागीरी ठीक् बेलो खज्यीन्बल अरे।” 9चोते सुङ्ब बीसेम् थेङ् गालील्रीनो स्य्हुःजेत्ज्यी।
गोर स्य्हेङ्ज्यीम् म्हन्दीबे पर्ब
10तर येसुइ अलेमा पर्बरी य्हर्ब बीसेम् थेङ्एनो म्हीमाचे अस्येःनले खुसुक्ले यरुस्लेम्री स्येःजेत्ज्यी। 11पर्बरी यहुदी अगुवामाचे थेङ्त म्हइटीब मुबल, ओसेम्, “येसु खन मुब?” बी ङ्योत्टीब मुबल। 12हुजुरी य्हक्को म्हीमान्हङ् येसुइ बारेरी तम् तटीब मुबल। डेत्चेम्, “थे ज्यबे म्ही मुब” ओसेम् ल्हो-ल्हो डेत्चेम्, “अय्हीन्, थेचे म्हीमात भ्युकीनो पङ्ब” बी पङ्टीब मुबल। 13तर खल्चेएनो थेङ्की बारेरी म्हीमाचे थ्येःनले तम् लअखम्, तलेपङ्सम् थेङ्यीमा यहुदीमाकी अगुवामातेङ् लोङ्बल मुबल।
14पर्ब डेत् तयम्ब बीसेम् येसु पर्मेस्वर्की दीम्री स्येःज्यीम् लोप्प तीप्जेत्ज्यी। 15थेङ्चे लोप्जेत्पल थ्येःब बीसेम् यहुदी अगुवामा तेःङेन् तज्यीम्, “चु म्हीचे धर्म लोप्पोन् ग्यम्से खेमेएनो धर्म छ्येः अलोप्मेएनो खले चोत्तेले तम् स्येःज्यी?” बी ङ्योत्ज्यी। 16येसुचे थेङ्यीमात जोहप् न्हङ्ज्यी, “ङचे एङ्यीमात लोप्पे तम् ङल अय्हीन्, तर ङत पीत्युजेत्पे पर्मेस्वर् ग्यम्से य्हीन्ब। 17खलपङ्लेनो पर्मेस्वर्की थुः अनुसार् लक् स्य्हेङ्ब म्हइबलचेम् ङचे लोप्पे तम् पर्मेस्वर् ग्यम्से वुइ ङ ग्यम्से बी स्येःस्ये मुब। 18खल्चे र्हङ् ग्यम्से तम् पङ्ब थेचे र्हङ्की लागीरी स्य्हेस म्हइब, तर खल्चे र्हङ्त पीत्युजेत्पलइ लागीरी स्य्हेस म्हइब थेचे देमेन्कीनो पङ्ब, थेचे भ्यु अपङ्। 19मोसाचे एङ्यीमात पर्मेस्वर्की नीयम् पीन्बल अय्हीनो स्यीम्? तर एङ्यीमा खल्चेएनो पर्मेस्वर्की हुजु नीयम् अङ्य्हेन्। तले एङ्यीमाचे ङत सेत्प म्हइबल?”
20य्हक्को म्हीमाचे पङ्ज्यी, “एत म्हङ् स्यप्नेम्, एत खल्चे सेत्प म्हइटीब?” 21येसुचे थेङ्यीमात सुङ्ज्यी, “ङचे तेःङेन्की लक् गी स्य्हेङ्ज्यी, ओसेम् एङ्यीमा जम्मनो तेःङेन् तज्यी। 22मोसाचे एङ्यीमात खतना स्य्हेङ्थोब पङ्ज्यीम् कुल्बल मुब।#७:२२मोसाचे ब्रीबे पर्मेस्वर्की नीयम्चे पङ्ब, यहुदी अपकोल न्हज्यीम् दीन् ब्रेत् कुनो खतना स्य्हेङ्थोब। थेङ्यीमाचे चु लक् दुःब न्हबे दीन् तलेएनो स्य्हेङ्ब मुबल। (य्हीन्बरीम् चु लक् मोसाचे तीप्पल अय्हीन्, तर ङ्य्हङ्की म्हेम्हेमाचे तीप्पल य्हीन्ब।) होत्तज्यीम् एङ्यीमाचे दुःब न्हबे दीन्री खतना स्य्हेङ्बे लक् स्य्हेङ्ब। 23एङ्यीमाचे मोसाचे पीन्बे पर्मेस्वर्की नीयम् अन्होङ्खइ बी दुःब न्हबे दीन्री खतना स्य्हेङ्ब पङ्सम्, दुःब न्हबे दीन्री ङचे म्ही गीत ज्येन्ले फेन्नलमम् एङ्यीमा ङतेङ् तले बोमो लबल? 24लीः च्याज्यीम् न्याय थस्य्हेङो, तर देमेन्की न्याय स्य्हेङो।”
येसु मुक्ती न्हङ्बे ख्रीस्ट्
25ओसेम् यरुस्लेम्की डेत्-डेत् म्हीमाचे पङ्ज्यी, “यहुदी अगुवामाचे सेत्प म्हइटीबे म्ही चुनो अय्हीनो स्यीम्? 26थेम् चुरी जम्मइ ङ्होन्सङ्नो तम् लटीब, तर खल्चेएनो थेइ बीरुद्दरी तेएनो अपङ्। ङ्य्हङ्की सासक्माचे देमेन्नो थेनो मुक्ती न्हङ्बे ख्रीस्ट् य्हीन्ब बी म्हेन्बवा स्यीम्? 27तर चु म्ही खनचे खबल बी ङ्य्हङ्मा जम्मचेनो स्येःबल मुब। तर मुक्ती न्हङ्बे ख्रीस्ट् ब्योन्खबतेङ् थेङ् खनचे ब्योन्खब बी खल्चेएनो स्येःस्ये अरे।”
28ओसेम् येसुचे पर्मेस्वर्की दीम्री लोप्जेत्टीबे बेलोरी केत् ङ्हच्छ्यङ् तेत्जेत्ज्यीम् सुङ्ज्यी, “एङ्यीमाचे ङत स्येःब, ओसेम् ङ खनचे खबल बीएनो स्येःब। तर ङ र्हङ्नो खबल अय्हीन्, खल्चे ङत पीत्युजेत्ज्यी थेङ् देमेन् य्हीन्ब। एङ्यीमाचे थेङ्त स्येःबल अरे, 29तर ङचे थेङ्त स्येःब, तलेपङ्सम् ङ थेङ् ग्यम्से युबल य्हीन्ब, ओसेम् थेङ्चे ङत पीत्युजेत्पल य्हीन्ब।”
30हुजु लीप्चे थेङ्यीमाचे थेङ्त चुङ्ब म्हइज्यी, तर खल्चेएनो थेङ्त चुङ्बरी या जङ् अखम्, तलेपङ्सम् दवम् थेङ्की बेलो खज्यीन्बल अरेबल। 31तर य्हक्को म्हीमान्हङ्की य्हक्को म्हीमाचे थेङ्त बीस्वास् स्य्हेङ्ज्यी। ओसेम् थेङ्यीमाचे पङ्ज्यी, “मुक्ती न्हङ्बे ख्रीस्ट् ब्योन्युबे बेलोरी थेङ्चे चु म्हीचे स्य्हेङ्बे तेःङेन्की लक्मा बीमम् य्हक्को तेःङेन्की लक्मा ङोन्ल स्यीम्?”
येसुत चुङ्ब म्हइबल
32य्हक्को म्हीमाचे थेङ्की बारेरी चोतेबे तम्म स्युप्तम् लटीबल फरीसीमाचे थ्येःज्यी। होत्तज्यीम् फरीसीमातेङ् ङ्हच्छ्यङ् लम्बुमाचे तम् डीःज्यीम् येसुत चुङ्बरी पर्मेस्वर्की दीम् रुङ्बे स्यीपाइमात पीत्ज्यी।
33ओसेम् येसुचे सुङ्जेत्ज्यी, “य्हम्बगीकीनो ङ एङ्यीमातेङ् तस्ये मुब, हुजु लीप्चे ङ ङत पीत्युजेत्पलज दोःज्यीम् य्हर्स्ये मुब। 34ओसेम् एङ्यीमाचे ङत म्हइस्ये मुब, तर यङ्स्ये अरे, ओसेम् ङ मुबे ग्लारी एङ्यीमा खब खम्स्ये अरे।”
35चु थ्येःब बीसेम् यहुदीमाचे र्हङ्न्हङ् चोले पङ्ज्यी, “चु म्ही ङ्य्हङ्माचे खतु लब अखम्नले खन ङ्यीब म्हइटीब? चु म्ही ग्रीक् म्हीमाकी गुङ्री छर्छुर् तज्यीम् टीबे यहुदीमाज ङ्यीब वुइ ता, ओसेम् ग्रीक् म्हीमात लोप्प म्हइबल वुइ ता? 36थेचे, ‘एङ्यीमाचे ङत म्हइस्ये मुब, तर ङत यङ्स्ये अरे, ओसेम् ङ ङ्यीस्येकी ग्लारी एङ्यीमा खब खम्स्ये अरे’ बी पङ्बल ता य्हीन्ब?”
जीवन् पीन्बे यी
37पर्बइ ज्युःकी ङ्हच्छ्यङ् दीन्री येसुचे रप्जेत्ज्यीम् केत् ङ्हच्छ्यङ्ले सुङ्जेत्ज्यी, “एङ्यीमान्हङ्री खलपङ्लेनो फीःबल मुसम् ङइज खज्यीम् थुङो। 38धर्म छ्येःचे पङ्ब र्हङ्लेनो खल्चे ङत बीस्वास् स्य्हेङ्ब ‘थेइ सेम् न्हङ्स्ये जीवन् पीन्बे यीइ स्योङ्मा डोङ्स्ये मुब।’#लेबी २३:३६” 39येसुचे चु तम् र्हङ्त बीस्वास् स्य्हेङ्बे म्हीमाचे यङ्स्येकी पबीत्र आत्माइ बारेरी सुङ्जेत्टीब मुबल। तर हुजु बेलोसम्म पबीत्र आत्मा पीन्बल अरेबल, तलेपङ्सम् देरेसम्म येसु स्वर्गरी थेङ्की महीमारी दोःजेत्पल अरेबल।
म्हीमा अथुन्बल
40येसुचे सुङ्बे चु तम् थ्येःब बीसेम् य्हक्को म्हीमान्हङ्की डेत्-डेत् म्हीमाचे, “चु म्ही देमेन्नो ङ्य्हङ्माचे ब्रेन्टीबे अगम्बक्त य्हीन्ब टीम्” बी पङ्ज्यी। 41ओसेम् ल्हो-ल्होमाचे पङ्ज्यी, “थेङ् मुक्ती न्हङ्बे ख्रीस्ट् य्हीन्ब टीम्।”
तर डेत्-डेत्चेम्, “मुक्ती न्हङ्बे ख्रीस्ट् गालील्चे खबो स्यीम्? 42मुक्ती न्हङ्बे ख्रीस्ट्मी दाउद्की सन्तान ग्यम्से, ओसेम् दाउद्की नम्स बेथ्लेहेम् ग्यम्सेनो ब्योन्खस्ये मुब बी धर्म छ्येःरी ब्रीबल अरेओ स्यीम्?”#२ सामुएल् ७:१२; मीका ५:२ बी पङ्ज्यी। 43चोले येसुइ बारेरी तम् अथुन्ज्यीम् म्हीमा थीज्यी। 44ओसेम् डेत्-डेत्चेम् थेङ्त चुङ्ब म्हइज्यी, तर खल्चेएनो थेङ्त या अजङ्।
यहुदी अगुवामाकी अबीस्वास्
45हुजु लीप्चे पर्मेस्वर्की दीम् रुङ्बे स्यीपाइमा ङ्हच्छ्यङ् लम्बुमातेङ् फरीसीमाज दोःज्यीम् खज्यी। ओसेम् थेङ्यीमाचे स्यीपाइमात, “एङ्यीमाचे येसुत चुङ्ज्यीम् तले चुरी अबबल?” बी ङ्योत्ज्यी। 46स्यीपाइमाचे जोहप् पीन्ज्यी, “ङ्यीमाचे खेमेएनो चु म्हीचे पङ्ब र्हङ्बे तम् खल्चेएनो पङ्बल थ्येःबल अरे!” 47ओसेम् फरीसीमाचे पङ्ज्यी, “थेचे एङ्यीमातेएनो लुज्यीवा स्यीम्? 48ङ्य्हङ्की अगुवामातेङ् फरीसीमान्हङ्री खल्चेए थेत बीस्वास् स्य्हेङ्बल मुब? 49चु य्हक्को म्हीमाचे मोसाचे ब्रीबे पर्मेस्वर्की नीयम् अस्ये, होत्तज्यीम् थेङ्यीमात पर्मेस्वर्की केम्लङ् फोःबल मुब।”
50हुजुरी मुबे फरीसीमान्हङ्री गी ङोन्ग्यम्नो येसुत खतु लबरी ङ्यीबे नीकोदेमस्चे पङ्ज्यी, 51“ङ्य्हङ्की नीयम् अनुसार् ङोन्ग्यम् म्हीइ तम् अङ्येन्ननो, ओसेम् थेचे ता स्य्हेङ्ज्यी बी अस्येःननो थेत दोस् पीन्ब तबो स्यीम्?” 52ओसेम् थेङ्यीमाचे जोहप् पीन्ज्यी, “एएनो गालील् थेन् य्हीन्ज्यीवा स्यीम्? धर्म छ्येः ज्यनले खेतो, ओसेम् एचे गालील् ग्यम्से अगम्बक्त खस्ये अरे पङ्बे तम् एचे म्रङ्स्ये मुब।”
53[हुजु लीप्चे जम्मनो म्हीमा र्हङ्-र्हङ्की दीम्री य्हर्ज्यी।
Právě zvoleno:
युहन्न 7: WTDG
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 by Mother Tongue Translators Society, Nepal Bible Society
and Wycliffe Bible Translators, Inc.
