मत्ती 19
19
खित कै बारै मुंजी यीशु कै शिक्षा
(मर 10:1-12)
1जोबै यीशुए ऐजी बातौ बौल़ै पैई थी, तौ गलील जिले पौरैशा हौटै गौआ; औरौ यहूदिया प्रदेश दै यरदन नोंदी कै पाइली ढौबौ ओऊवा। 2औरौ बैजाए भीड़ तैसकै पाछैदै हौए गौए, औरौ तैणै तिनुखै तिथै ठीक कौरे। 3तोबै फरीसी लोग तैसकै धोरे आयौ तैसकै परीक्षा कौरणौ कारिए बौलदै लागै, “का कोसी ऐक बौजैह शै ऐक मर्द आपणी घोरवाल़ी खै मूसा कै कानून कै हिसाब शै खित दैय सौकौ?” 4यीशुए जोवाब दिया, “का तुऐं पवित्र शास्त्र दो पौड़ै ना रैई, की जैणै तिनुखै बाणै राखै, तैणै दुनिया कै शुरुआत शै मर्द औरौ बैटमाणिश बाणैयौ बौल़ौ। 5‘इयौं बौजैह शै आदमी आपणै माँ बापू शै जौई हौयौ आपणै घोरवाल़ी कै साथै रौंदा औरौ सै दुईनै ऐक तन हौंदै?’ 6इथकारिए मियांबीबी ऐबै दो लोग कै जैशणै ना आथी पौरौ ऐकी आदमी कै जैशणै औसौ। इथकारिए जिनुकै पौरमेशवरे जोड़े राए, तिनु कुणिए आदमी जौई ना कौरौ।” 7तिनुऐ यीशु खै बौल़ौ, “तोबै मूसा कै कानून कै किताब दो ऐजौ किथुखै बौल़ै राए, ऐक आदमी आपणी घोरवाल़ी कै खित दैयौखै तियौंखै छोड़े सौकौ?” 8तैणै तिनुखै बौल़ौ, “तुऐं ओढ़ेयौंदे औसौ, इथकारिए मूसाए तुऔं खै आपणी-आपणी घोरवाल़ी खै छोड़े दैणौ कै रजामंदी दैय राए, पौरौ शुरु सै ऐशैखै ना थी। 9औरौ हांव तुऔं खै बुलू, कै जू कुणिए गौलत सौमबंध कै सिवाए कोसी ओकी बौजैह शै आपणी घोरवाल़ी खै छोड़ेयौ ओकी बैटमाणिशौ आरी बैयाव बाणल़ा, तौ सै गौलत सौमबंध बौणांव औरौ जू तियौं छोड़ेयौंदी आरी बैयाव बाणल़ा, सैजा बै गौलत सौमबंध बौणांव।”
10चैलै तैसीखै बौल़ौ, “जै ऐकी मौरदो का बेटमाणिशी आरी ऐशणा सौमबंध औसौ, तौ जाजड़ा बाणणा ठीक नै आथी।” 11तैणै तिनुखै बौल़ौ, “सौबवे ऐजा वचन अपनाए ना सौकौ, सिरफ सैजैई जिनुखै ऐजा दान पौरमेशवर कै ढौबौशा दैय राए। 12जिथुखै कुणजैई हिजड़ै ऐशणै औसौ जू माँ कै पेटो पोरदै ही ऐशणै जन्मे रौवै; औरौ कुणजैई ऐशणै हिजड़ै औसौ, जिनुखै आदमीए हिजड़ै बाणै राए। औरौ कुणजैई ऐशणै हिजड़ै औसौ, जिनुवै स्वर्ग कै राज्य कारिए आपी खै हिजड़ै बाणै राए, जू इथुखै सौमझणौ कै लायक औसौ, सै सौमझै जांव।”
नानड़िया कै आर्शीवाद
(मर 10:13-16; लूका 18:15-17)
13तोबै लोगै नानड़िया खै यीशु कै धोरे लोऊवे, कै सै तिनु पांदी हाथ राखौ औरौ प्रार्थना कौरौ; पौरौ चैलै लोगौ कै झिड़कै। 14यीशुए बौल़ौ, “नानड़िया खै मैरै धोरे आणौ दैव औरौ इनुखै मोना नी कौरौ, जू कुणिए नानड़िया कै जैशणा भोरोशा कौरौ सैजैई लोग स्वर्ग कै राज्य दै रोन्दै।” 15औरौ तिनु पांदी हाथ राखैयौ हौटै गौआ।
सैठ नोजवान का जौरुरी सवाल
(मर 10:17-31; लूका 18:18-30)
16औरौ ऐकी आदमीए तैसकै धोरे आयौ बौल़ौ, “ओए रै गुरुजी, हांव ऐशणा कुणजा भला काम कौरु कै सौदा कै जिन्दगी पोऊँ?” 17तैणै तैसीखै बौल़ौ, “तू मुं कैईंदु आछै कै बारै दो किथुकै पूछै? आछा तौ ऐकैई औसौ; पौरौ जै तू सौदा कै जिन्दगी दो जाणौ चांए, तौ आज्ञा खै मानैया कौर।” 18तैणै तैसीखै बौल़ौ, “कुणजै आज्ञा?” यीशुए बौल़ौ, “ऐजै की हत्या नै कौरेया, गौलत सौमबंध नै बौणाया, चोरे नै कौरेया, झूठी गवाही नै दैया। 19आपणै बापू औरौ आपणै माँ का आदर कौरेया, औरौ आपणै पड़ोसी आरी तैशणा प्यार कौर जैशणा आपिआरी कौरे।” 20तैसी जवाने यीशु खै बौल़ौ, “इनु सौबी आज्ञा खै तौ हांव मानुए; ऐबै मुं दै कियों बातौ कै कमी औसौ?” 21यीशुए तैसीखै बौल़ौ, “जै तू सिध्द हौणौ चांए; तौ जा, औरौ सौब ठुँ बिकैयो आपणा धन गोरीबो कै बांडै दै, तौ ताखै स्वर्गो दा धन भैटला, औरौ आयौ मैरा चैला बौणै जा।” 22पौरौ सैजा जवान ऐजै बात शोणेयो उदास हौआ औरौ तिथैदा आगु हौटा, जिथु सै बैजाए सैठ थिया। 23तोबै यीशुए आपणै चैलै खै बौल़ौ, “हांव तुऔं खै साचौ बुलू, कि सैठ लोगौ कै स्वर्ग कै राज्य दो जाणौ बौहितु मुशकिल औसौ। 24हांव तुऔं कै हौजौ बुलू, ऊँट कै सिओणी कै पाशी पौरैशौ निकल़णौ आसान हौए सौकौ, पौरौ सैठ लोगौ कै पौरमेशवर कै राज्य दो जाणौ बैजाए ही चैईथु औसौ।” 25ऐजौ शोणेयो, चैलै बैजाए हैरान हौयौ बौलदै लागै, “तौ इथका मतलब औसौ कै कुणिए बै आपणै पापौ कै सौजा भैटणौ शै ना बौचै सौकौ औरौ ना ही सै पौरमेशवर कै राज्य दै जाए सौकौ।” 26यीशुए तिनकै ढौबौ दैखैयो बौल़ौ, “ऐजौ आदमियों शै तौ ना हौए सौकौ; पौरौ पौरमेशवर शै सौब ठुँ हौए सौकौ।” 27इथपांदी पतरसे तैसीखै बौल़ौ, “दैख आमै तौ सौबै ठुँ तांव कारिए छोड़े दियु कै तैरै चैलै बौणु। तौ आमुखै का भैटदौ?” 28यीशुए तिनुखै बौल़ौ, “हांव तुऔं खै साचौ बुलू, की नोऐं दुनिया दा जोबै आदमी का बैटा आपणै महिमा कै सिंहासन पांदी बोठला, तौ तुऐं बै जू मैरै चैलै औसौ, बारौ सिंहासन पांदी बोठेयो इस्राएल देश कै बारौ गोत्रो का न्याय कौरदै। 29औरौ जैसी कोसीए घोरो या भाईयों या माँ-बापू या नानड़िया या बागड़ी खै मैरै नांव कारिए छोड़े राए, तिनुखै शौ गुणा भेटदो: औरौ सै सौदा कै जिन्दगी का औधिकारी हौंदा। 30पौरौ तुऔं लोगौ मुंजी जू इबी आपी खै खास सौमझौ, सै बाद मै खास ना सौमझै जांदै, औरौ जू आपी खै खास ना सौमझौ सै खास सौमझै जांदै।”
Právě zvoleno:
मत्ती 19: SRXNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
