Génesis 44
44
U nu'ucul yukic vino José
1Cu dzo'ocole' Josee' tu ya'alaj ti' u aj cananba'albáa:
Chup u costalo'ob le máaco'ob yéetel je'el buca'aj trigo cu páajtal u bisco'obe', dzáa xan tu chi' u costalo'ob u taakino'ob tu jujun túulilo'ob. 2Dzáa xan in copa tu chi' u costal le j t'uup íidzino' pa'ate' yéetel u taakin iquil tu manjilac u trigo.
Le aj canan ba'albáo' tu beetaj le ba'ax a'ala'ab ti' tumen Joseo'. 3Le ca j jo'op' u tíip'il kiine' Josee' tu cha'aj u binbalo'ob yéetel u burro'ob. 4Ma' jach qui' náachaco'ob ti' le noj caajo', Josee' tu ya'alaj ti' u aj canaan ba'albáa:
Xeen, tzay paacht le máaco'obo', le quéen a chuc pachto'obe' ca wa'alic ti'ob: ¿Ba'ax teen ca beetique'ex kaas wa j beeta'ab te'ex utz? 5¿Ba'ax teen ta wocoltaje'ex le copa cu meyaj ti' in dzuulil u ti'al ukul yéetel u ti'al na'at? ¡Sen ba'al kaas ta beetaje'ex!
6Le ca j kuch le aj cananba'albáa tu yicnalo'obe' tu ya'alaj jach je'el bix a'ala'abic ti'e'. 7Leti'obe' tu núucajo'ob: ¿ba'axten ca t'anico'on beyo'? Mix bikin bíin c beet jun p'éel ba'al beyo'. 8Wa j suunajo'on líikbalo'on tu lu'umil Canaán u ti'al c sut le taakin t nactáantaj ichil c costalo'obe', ¿bix bíin c ocolt oro wa plata tu yotoch a dzuulil? 9¡Quíimic je'el máaxac ichil a palitzilo'ob ti' máax bíin c nactáanta'ac le copao', tuláacalo'on yaan c suut palitzilil!
10Le aj canan ba'albáo' tu ya'alaj:
Bey cu bin beetbil, je'el bix a wa'alique'exo', ba'ale' chéen ti' máax cu bin j nactáantbil le copao', leti' quin in palitzilte. U chucáano'obo' cu páajtal u bino'ob x ma' si'ipilil.
11Tu séeblaquil, tu jujun túulilo'ob tu yéemsajo'ob u cuucho'ob ca tu t'alcuntajo'ob j lu'um, ca tu je'ajo'ob. 12Le aj canan ba'albáo' tu xaklaj tu jujun p'éelil, j chúun yéetel le u ti'al le sucu'untzilo' j dzo'oc yéetel u ti'al le íidzintzilo; tu nactáantaj ichil u costal Benjamín. 13Leti'ob túune' tu jatajo'ob u nooko'ob, u chíiculal u yaj óolalo'ob, cu dzo'ocole' tu jujun túulile' tu kaxajo'ob u cuucho'ob yóokol u burro'ob, ca j suunajo'ob te' j noj caajo'. 14Le ca j kuch Judá yéetel u sucu'uno'ob tu yotoch Josee', leti'e' ti' yaan tu yotoche'. Ca túun j chinlajo'ob tu táan, tac p'áatico'ob, nococbalo'ob, 15ca'aliquile' Josee' tu ya'alaj ti'ob:
¿Ba'ax teen ta beetaje'ex le ba'al beya'. Ma' wa a wojele'exe', jun túul máac je'el bixena' u yojel na'at?
16Judae' tu núucaj:
¿Ba'ax je'el u páajtal c a'alic teche'. Bix je'el u páajtal c e'esic ma' sipilnaja'ano'one'? Kue' tu chucajo'on ich keban. C kubicbáa ta kab; to'one' a palitzilo'on, pa'ate' yéetel ti' máax nactáanta'ab le copao'.
17Ba'ale' Josee' tu ya'alaj: Lelo' ma' tu páajtal. Chéen ti' le máax nactáanta'ab le copao', leti' quin in palitzilte, le u chuca'ano'obo' cu páajtal u suuto'ob x ma' péec óolalil tu yotoch u taataob. Mix máac cu bin a'alic wa ba'ax ti'.
Judae' cu káat óolal tu yo'olal Benjamín
18Judá túune' j náadz tu yicnal José ca tu ya'alaj ti':
In dzuulil quin káat óoltic ti' teech ca a beet teen utz in x mucul t'aan ta wéetel, ma' a p'u'ujul tin wéetel, tu jaajile' teche' beyech faraone'. 19Teche' ta káatchi'itaj ti' to'on wa yaan c taata, wa yaan to'on u láak c íidzin, 20to'one' t núucaj teech yaan to'on jun túul c taata ch'ija'an, yéetel jun túul c íidzin jach paal; jach ch'ija'an in taata ca j síiji, t a'alaj teech xan jach yaabilta'an tumen c taata, tumen le jaaj u j xibil paal dzaca'an ti' jun túulili' maama, tumen u sucu'une' j quíimi. 21Teche' ta wa'alaj to'on ca c taase tumen a káat a kaj óolte. 22To'one' t a'alaj teech, le j xi'ipalo' ma' tu páajtal u p'atic u taata, tumen je'el u quíimil u taatae' wa ca u p'ate. 23Ba'ale' teche' ta wa'alaj to'on, wa ma' tu taal t éetele' ma' ta kamico'on.
24Le ca j suunajo'on tu yotoch in taatae' t tzicbaltaj ti' tuláacal le ba'ax ta wa'alaj to'ono'. 25C taata túune' tu ya'alaj to'on ca suunaco'on c man trigo. 26Ba'ale' to'one' t a'alaj ti': Ma' tu páajtal c bin wa ma' tu bin t éetel c íidzin; tumen wa ma' tu láakintico'one', ma' bíin páatac c ilic le nojoch máaco'. 27C taatae' tu ya'alaj to'on: te'exe' a wojele'ex in watane' tu dzaj teen ca'a túul paalal; 28jun túul ti'obe' tu p'atajen, tac bejela'e' ma' in wila'i' quin tuclique' jach tu jaajil j xe'exe'et'a'ab tumen jun túul j chi'ibal. 29Wa ca bisique'ex xan le u láak in paal náach ti' tene', wa cu yúuchul ba'al kaas ti'e', wa cu quíimil yéetel yaj óolal le nuxiba' ti' te'ex bin yanac u si'ipilil.
30Bey túuna' u cuxtal in taatae' nuupul yéetel u cuxtal le j xi'ipalo', let o'olalo' wa ma' tu suut le j xi'ipal t éetele' le quéen suunaquene' 31c taatae' je'el u quíimil wa ma' tu yilique', beyo' to'on c bin j cuch u si'ipilil u quíimbal ich yaj óolal c ch'ija'an taata. 32Tene' tin wa'alaj ti' in taata: Teen quin in canant le j xi'ipalo', tin wa'alaj ti' xan; wa ma' tin sutic teche' teen bin in cuch u si'ipilil tuláacal u kiinilo'ob in cuxtal. 33Let o'olalo' quin káat óoltic teech ca a cha'a' in p'áatal bey a palitzile' tu yo'olal le j xi'ipalo'. Cha'a u bin yéetel u sucu'uno'ob. 34¿Tumen bix quin j suut tu tzéel in taata, wa ma' tu bin tin wéetel le j xi'ipalo'? Ma' in káat in wil le loob cu bin u mukyajt in taatai'.
Právě zvoleno:
Génesis 44: MAYABI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Texto Maya © Sociedades Bíblicas Unidas, 1992