Mark 7
7
Sivuliighaat Apeghtuusiit
1Pharisees‑etlu ilangillu apeghtughikayuget Liilightuusaneng Jerusalem‑emeng pit, Jesus‑em uvitanganun qerngughutkat. 2Esghaqiit maligsaaghtengan ilangi uughtughpenateng neghelghiit. Uughtullghilnguut Pharisees‑et pisqellghistun. 3(Pharisees‑etlu Jews‑etlu qamaglluteng neghyaghqaanghilnguut wetkuqun sivukluteng uughtughwaaghluteng, qayughllak sivuneghmeng apeghtuusiit atuqngukangit. 4Talwa akilpegaghvigmeng tagineghmeggni neghigalnguut wetku sivukluten ukmangighsaghwaaghaqelghiit. Ilangillu sivuneghmeng apeghtuusalghutangit atuqngukangit. Atuqfagilgamegtiki qayuusiteng, sagneteng, siilut gaaghusiteng sangighqughwaaghaqegkangit.)
5Enkaam Pharisees‑etlu apeghtughikayugetlu Liilightuusaneng aaptekaat Jesus, “Sangameng maligsaaghteten uughtughpenateng neghaqat? Sivunemta apeghtuusiit atuqigatiit.” 6Jesus‑em kiimsiqii, “Elqughllusi Isaiah‑m uuknaliqutkumakangisi piniiyugneghni elpesi. Whaten igaqaaguq, ‘Kiyaghneq piiq,
“Ukut yuget akuzitmegteggun quulvaghaqaatnga,
nakaan ilumegteggun.
7Temngi manigughaqaatnga,
qayughllak apeghtuusaqaqiit liilightuusangllaqateng katam whanga Liilightuusaqepiglleghhiistun.”’
8Enkaam elpesi Kiyaghneghem Liilightuusii pakigluki qaatkaqasi yuget apeghtuusiit.”
9Jesus‑em nagneghutkii, “Pakigillepiguusi Kiyaghneghem Liilightuusiitnun qaatkepigesnaghnaluki elpesi katam apeghtuusasi. 10Una esgha usputaq tawaten pilleghpesinun: Moses‑em aapqaqii Kiyaghneghem Liilightuusii whaten pilghiit, ‘Quulvaghluku atanllu naanllu.’ Whatenllu pikaaguq, ‘Kitum alngunak atanillu naanillu seghlequuqumikek tuqutellengyaghqaaguq.’ 11Iwernga elpesi allanguut apeghtughillesi. Whaten piiqusi, ‘Yugemnguq atani nalighmeng naani whaten piyaghngaaghmigu, “Kayusiitusighqalguunga elpenun iwernga tuunaanghitaqa qayughllak Corban‑nguuq.”’ (Corban whaten pisiiguq, siingenllu Kiyaghneghmun akequsaqumaaqa.) 12Tawaten pilleghpesigun apeghtughaqasi yuget kayusiinneghisaghngaatki atangitlu naangitlu pisqelluki. 13Enkaam pakigaqasi Kiyaghneghem akuzitangi, apeghtuusaqepigesnaghnaluki yugnun elpesi katam akuzitesi. Tamaakut temngi usputaagut, uglaapigtut sangwaat piiqegkesi.”
Seghleghqusiqlu Seghleghqusiinghilnguqlu
14Taagken Jesus‑em yulghutet ellminun tagsinqiglluki pikii, “Qamagtengngwaaghlusi nagallusi liigikiteggu sameng pitka. 15Yuuk neghegkaan nukeggnaghqigataa, seghletun sumeghtaghallghan, sallghanllu nukeggnaghqaqaa. 16Sigutelgukufsi nagatusighqameng, nagatek!”
17Jesus‑em unilluki yulghutet iteghyan maligsaaghtengita aaptekaat ungipaghaan sameng pisiitanga. 18Jesus‑em pikii, “Elpesillu liigikigatsii? Sangwaa alngunak yugem neghaqegkanga nukeggnaghqusighqaanghituq ellnganun, 19qayughllak neghegkii ighsaqghwanun pinaanghitut. Aqsaqghwanun piiqut enkaam yugusiineng aanaqut.” (Tawaten pilleghmikun Jesus‑em aapghwaa neqet qamaglluteng neghyaghqaaniluki.) 20Pikiillu, “Yugem qamaken ilumineng aanestekaan nukeggnaghqestaqaa. 21Qaamken yugem ilunganeng aanaqut: sumeghtaghalleluget, nengughtegpenani kitumeng alngunak atuqilleq, teglegniiq, yugtaq, 22gelgaghniiq, pakigniiq, alngunak seghletun pilleq, puughti, kayngusaghaatelleq, aqina, yulgutmeng iqlengiqutki, qukaayugta, temngitwha. 23Tamaakut qamaglluteng seghleghet yugem ilunganeng aanegkat nukeggnaghqikayuguut.”
Aghnam Ugpeqillgha
24Taagken Jesus aghulaqegkaq Tyre‑m tunganganun, kaalluni mangteghamun iitqaq. Kitumun alngunak nallukesuguyaqanga kaatelleni, iwernga ilangita liisimakegkaat. 25-26Aghnam Gentile‑em, allgeqam Phoenicia‑mi, Syria‑melngughmi nagaquqaa Jesus kaasimaniluku. Paniggaa ilumikun tughneghalek. Enkaam aglaragkiighluni Jesus‑mun segesqughlluni manungakun, maniguutkaq aanestaghtesqelluku tughneghaq panigmineng. 27Iwernga Jesus‑em pikaa, “Taghnughhaat sivukluteng neghesaghqaagut, qayughllak anaggutngaaq taghnughhaat neqngit tuguluki qikminun miluuskumeng.” 28Aghnam kiimsiqaa, “Aa‑a, Ataneq, talwa qikmit tipelem asinganilnguut neghaqut taghnughhaat ifkaghqellghitneng!” 29Enkaam Jesus‑em pikaa, “Naqamqun tawaten kiimsighaghpenga aglaghhaaten, tughneghaq aanumaaq panigpeneng!” 30Aghnaq neminun aglaghyalghiimi paniga ingaghmeteftuq qavaghvigmi, taawa llaaghan tughneghaq aanumalghii paniganeng.
Jesus‑em Naallghuskanga Yuuk Nagaquusigalnguq Talwa Akuziyiilnguq
31Taagken Jesus aghulaqegkaq Tyre‑meng. Sidon‑kunllu, Qula Neghllagteggunllu aagluni Naayvamun Galilee‑mun pikaq. 32Yuget ilangita, yuuk nagaquusigalnguq talwa akuziyiilnguq tagilluku Jesus‑mun nangllegsiitkaat saaftesqelluku. 33Enkaam Jesus‑em awiitutkaa yulghutneng. Sivukluku tekghegni sigutegkenun kanaghllukek, taagken iqillukek qesighluki iiggeni, ulunga saaftekaa. 34Taagken sivuglluni qilagmun aneghpakaghluni yuuk pikaa, “Ephphatha!” (Taana whaten pisiilghii, “Reghightek!”) 35Tawaninginaq yugem sigutkek reghiqak, ulungallu piniightekaq, aga akuzinginaamaghmi pikaq akuziyiilliqegpenani. 36Taagken Jesus‑em ineghtengngwaaqii kitumun alngunak ungipaqefqaan pisqelluku, iwernga ineghtaataghyisteng wata ungipaqegkaat. 37Nagaquullghiit tamaakut elngaatall saghiighayugllakat, pikat, “Uum yugem sallgha qamaglluni piniperewaaghuuq! Talwa nagaquusigalnguut nagaquusagutestii, akuziyiilnguutlu akuziyagutestii!”
Právě zvoleno:
Mark 7: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
