Mark 6
6
Jesus Tuguklinghilkangat Nazareth‑mi
1Taagken Jesus aghulaqegkaq Capernaum‑emeng, aglaqaq neminun Nazareth‑mun, maligsaaghtengitallu maligtekaat. 2Sabbath‑ngughsagu synagogue‑mi apeghtughikaq. Yulghutet nagalluku saghiighayagutkaat. Aapqughaaghutkat ellmeggneng, “Naken liitaki? Kitum peghqinghughtestagu? Saghiighayugnaghllaguut allaaghlluwhaghtillghi! 3Naten tawaten pii? Kaapentangunghitaa, Mary‑m ighnegha? James‑enkut, Joses‑enkut, Judas‑enkut, Simon‑enkut anglegutkenghitakii? Nayagillulli maantaat?” Enkaam tugukliimangilkangat. 4Jesus‑em pikii, “Kitum alngunak uuknaliqista siivakaqaa, iwerngaqun nunalgutangitallu nalleqliitallu nengllugutangitallu pingigataat.” 5Enkaam tamaani allaaghlluwhaghtipagningitkaq, iwerngaqun qafsinkuuraghhaat saafluki naallghutkii. 6Enkaam Jesus saghiighayugllakaq, qayughllak ugpeqenghilkangat.
Jesus‑em Ungipaqiyaghtiisqegkangi Qula Maalghuk Siipneqluku Malighsaaghteni
Taagken Jesus Nazareth‑em uvitanganilngughnun nenun piiqluni apeghtuqii yuget. 7Tagsighluki qula maalghuk siipneqluku maligsaaghteni, kayaggnaqnikii malghukaghtiita ungipaqisqellukillu naallghuqiisqellukillu. Aghulaqfagilgata aghtughyaghqaanghilleliquqii yugneng aanesqiisqelluki tughneghaat. 8Liilightuqiillu, “Igleghalleghpesini sameng alngunak kelqegpenasi iwerngaqun ayaviighmeng. Neqekrangllangunasi, aqeftaghaangunasi, maningunasi pilghaasi. 9Iwernga kameglusi, simiitkaghqameng ggaatmeng kelqegpenasi.” 10Whatenllu pikii, “Nani alngunak tukughpesi upughaskangisi tawanlleghhaasi kenlanga aghulaqelleghpesinun. 11Nenun kaaskufsi upughatingigalngughnun, nalighmeng nagasugigalngughnun, uninnakesi taana nuna itegasi pagulangiimiita. Tawaten pikufsi kelengasaaghlleqasi Kiyaghneghem aghyuulleghqaaneng!” 12Enkaam maligsaaghtet aghulaqluteng ungipaqikat yugnun avuteghqelluki seghleghqennaniisqelluki. 13Tughneghalghutet aanesquqiit yugneng, mesiighqaqlukillu qinuyulghutet naallghuquqiit.
Tuqutellgha John‑em Paaptaayestem
14Umiilgem Herod‑em nagaquqaa qamaglluku Jesus‑em tawaten pillgha, qayughllak tamaghhaani aapqangit Jesus‑em allaaghlluwhaghtillghi. Ilangi yuget pikat, “John‑nguuq Paaptaayesta, unguvaamaaq enkaam esgha aghtughyaghqaanghillelek allaaghlluwhaghtilleghmun.” 15Iwernga ilangit yuget pikat, “Elijah‑nguuq.” Ilangit pikat, “Uuknaliqistenguuq, neghighluku uuknaliqistestun ayuquq.”
16Herod‑em nagaqughluku pikaq, “John‑nguuq Paaptaayesta, naasqwightestekaqa iwernga unguvaamaaq!” 17,18Qavnganghhaq Herod‑em kayagutkaqegkanga John tuguluku, asighqesluku anusimingllaghtestekaa. Tawaten pistekaa, qayughllak John‑em piighaataqaa Herod whaten, “Liilightuusamnni anaggusimaaten tugulleghpegun anglegutegpek Philip‑em nulighha Herodias.” 19Enkaam Herodias‑em ugumiyaguteghllakaqegkanga John repall tuqutesupigtekaqsaqanga. Iwernga pipagningitkaa qayughllak Herod‑em tawaten pistepagningitkaa. 20Herod‑em alikegkaqegkanga John liisimakutmineng yuuk pinilghii, Kiyaghneghmun qaatkutngaghllalghii. Enkaam kelengakestengngwaaqaa sanayukatgu. Herod‑em nagasugaqegkanga John qaywa seghleghyugaqeghngaaghmi naganneghminigu.
21Taagken Herodias qenwatlu pilleghqangegkaq. Herod‑em allgeghvini aghneq kaasan neqenghaghqestimalghii kavemem umiilwaaghitnun, pilluwaghtet umiilwaaghitnun, igleghutistengitnunllu Galilee‑ghmiit. 22Taagken paniga Herodias‑em iteghluni neghuullghiinun tukalegaqaq. Herod‑enkut aqelqaqullghiit elngaatall efquqegkaat. Enkaam umiilgem pikaa aghnaghaq, “Sameng alngunak tungsighvikegkuvnga tuunelleqamken.” 23Akeqegkaallu whaten, “Ipapestaaq tuunelleqamken sameng alngunak tungsiquvek, talwa umiilgutimalleghma aklungingan avellgha!”
24Taagken aghnaghaq aanluni naani aapsaghtuqaa, “Sameng tungsighnaqsinga?” Naangan pikaa, “John‑em Paaptaayestem naasqwa tungsighhu.” 25Aghnaghaq agliighwaghlluni umiilegmun tungsighvikegkaa, “Whaa maaten, John‑em Paaptaayestem naasqwa piyugaqa qayuutaghraagkun lliluku!” 26Umiilek elngaatall qivghughllakaq iwernga saluku ighlekligu, qayughllak akeqngwaaqaqegkanga aqelqalghutni nagatestekluki. 27Enkaam tawaninginaq umiilgem kayagtekaa kelengakista tagitesqesluku John‑em naasqwa. Kelengakista aanluni anusimingllaghvigmun aglaqaq John‑em naasqwa kepnaluku. 28Naasquq qayuutaghraagkun lliluku aglaalluku aghnaghaghmun tuunegkaa. Enkaam aghnaghaam naaminun tuunegkaa. 29John‑em maligsaaghtengita nagaqughluku, yugusii aqfaluku lliifqaat.
Jesus‑em Neghestillgha 5,000‑neng Siipngalghiineng Yugneng
30Apostle‑et uteghnightuulluteng Jesus‑mun aapqiit apeghtughilleteng, naallghuqulleghteng, tughneghaghnengllu aanesqulleghteng yugneng. 31Yugllagulghii tagimaghmengllu aghulaqumaghmengllu pilghiit repall Jesus‑enkut maligsaaghtekullghiit neghepagningiitkat. Enkaam maligsaaghteni pikii, “Natmun aghulaqelta paaghqillghanun, elpesiqun meghnaaliightesqellusi.” 32Enkaam angyakun paaghqillghanun aghulaqegkat ellnginaghhaaghhnaluteng, 33iwernga yulghutem esghaqiit aghulaqelghiit. Liisimakluki navek pinaqutangit, ketanqusnaq naayvam esnengakun maligtekiit. Nenun nallangiinneghata legan yuget maligtaqegkangit. Kaatkat takukameggnun ingyaghaghlluki Jesus‑enkut. 34Jesus‑em angyameng uuglluni quutmun yulghutet esghaghluki nangllegyagutkii, qayughllak penniighestun penniighniightengilngughestun ayuqelghiit. Enkaam allaaghhiinaghmeng apeghtughtaakii.
35-36Whanikupigsagu maligsaaghtengita takuluku Jesus pikaat, “Maana paaghqituq, whanikughllagaallu. Yuget aglaghtuutesqiki piitesighaghtenunllu, nengiighhaghnunllu. Ellmeggneng neqengyaghtughlit neqhyaghqameng.” 37Iwernga Jesus‑em pikii, “Elpesi neghyaghqaliteki.” Aaptekaat, “Tukfighiyaghtughtesugsikuut 200 denarii‑m akinganeng neqekrangllameng neghesqelluki?”
38Jesus‑em aaptekii, “Naten uglaghqakaan neqekrangllalgutsi? Enta ivaghiightek.” Naalkusameng ungipaatkaat, “Taawa tallimat neqekrangllat, maalghuklu iqallugek.”
39Taagken Jesus‑em maligsaaghteminun qafsinkaghtiita aqumestesqegkii vegaaghqun. 40Enkaam aqumuutkat 100‑ngwaaqluteng 50‑ngwaaqluteng. 41Jesus‑em tuguluki tallimat neqekrangllat, maalghuklu iqallugek, quulmun sivuglluni iqamsiqayugvikegkaa Kiyaghneq. Taagken neqekrangllat iiggmineng aavgughluki maligsaaghteminun tunquqii uyegtesqelluki. Iqallugeklu iigmineng aavgughlukek tunqughtestekii. 42Qamagtengngwaaghluni neghuutkaq kepsuulluni. 43Taagken maligsaaghtet tugulaqiit qula maalghuk siipneqluku pasketet esleqngalghiit kagimleghughtekaneng neqekrangllaneng, iqallugnengllu. 44Yuget neghuutkat 5,000‑nguftut, kesutkegpenaki aghnatlu taghnughhaatlu.
Jesus Meghqun Piyulghii
45Legan taaqut Jesus‑em maligsaaghteni qelqii angyakun igleghtekestiisqelluki Bethsaida‑mun, naayvam inglunganilngughmun. Taagken ellngan yulghutet aglaghtuutestekii nengitnun. 46Aglaghtuutesamiki yughaghyaghtuqaq qemimun. 47Unugmi taakwani angyat naayvamelluki Jesus ellnginaghhaakaq quutmi. 48Esghaqii malighsaaghteni aygughnaqutkelghiit yaavuqumeng, qayughllak anuqliiskangi. Akulegkeni three‑kellaagenkuk six‑ekellaagenkuk unaanguluku, takukii meghem qaayngakun piyugmeng. Naghughhnaqaqiillu 49esghaqaat meghqun piyulghii. Sumeghmeggni taghneghaaniluku araghllakat. 50Qamaglluteng alingruughutkat. Tawaninginaq Jesus‑em pikii, “Ilutughtek! Whanganguunga, alingegpenasi.” 51Legan angyamun uugtuq ellmaaragllugughtekaq. Maligsaaghtet saghiighayugllakat, 52qayughllak paninang liigikigalkangat Jesus kinangutanga, qaywa esghapagngaaghmegteggu neqekrangllat nulastekangi. Tawatetkaalghiit qayughllak salin umyugiit reghiigalnguut.
Jesus Naallghuqulghii Gennesaret‑mi
53Taagken nagneqat naayvam inglunganun enkaam Gennesaret‑kun tamlagluteng angyaghteng petukaat. 54Legan angyaghteng unitaat yuget liisuqnginaamaan Jesus pikaat. 55Enkaam kelkaghtaarragkiiqat Jesus kaasimaniluku. Jesus navek piyaghngaan qinuyuget aglaataqegkangit allighiitgun ellnganun. 56Jesus kaanneghmini neghllagnunllu, nenunllu, eslamelngughnun akilpegaghvignun aglaghaqelghii. Enkaam yuget tagitaqegkangit qinuyuget akilpegaghvignun Jesus‑mun naallghutesqelluki. Jesus‑mun maniguututkiit qinuyugnun waran saaftesqelluku kenii, enkaam qamaglluteng saaftilghiit naallghutkat.
Právě zvoleno:
Mark 6: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
