Mark 11
11
Jesus‑em Kaatellgha Jerusalem‑emun
1-2Tughaaghyalghiimeng Jerusalem‑emun, kaatkat Bethphage‑munllu Bethany‑munllu, Mount Olives‑mi. Taagken Jesus‑em kayagtekakek maalghuk maligsaaghtegni nemun pisqellukek. Pikakek, “Kaataghesnaquftek esghaghlleqaghtek donkey‑ghaq petugngalghii kitum alngunak igleghutkumangilkanga. Itemulluku taginnakesek. 3Kitum alngunak aaptekangistek whaten, ‘Sanaqestegnegu?’ ungipaannakesek, ‘Atanghem atuqsugaa. Taaqaghesnaqumigu veghutesnaaghaa.’”
4Enkaam nemun kaallutek tumenilluku esghaqaak donkey‑ghaq petugngalghii mangtegham amigan tungangakun. Itemsimaluku 5yuget nekevghataaghullghiit tawani aaptekagket, “Sangan itemutestegnegu donkey‑ghaq?”
6Kiimsiqiik Jesus‑em apeghtullghatun enkaam yuget nepiighutkagket. 7Jesus‑mun kaatulluku donkey‑ghaq, qaasliit atkuyaatek teghikusam qaayngakun lliyagneki, Jesus uuglluni igleghtekaq. 8Tamaakut yulghutet igleghullghiit tumetgun saaghquqiit qaasliit atkuyaateng, ilangit avayameng ququngalegmeng ikutaqluteng tumet saaghqughvikegkiit. 9Jesus‑em sivunganilnguutlu kingunganilnguutlu akilghuutkat,
“Usuqnaghhalek Kiyaghneq!
Kiyaghneghem quyasligu tagilghii aatghakun Atanghem!
10Kiyaghneghem quyasligu tagilghii ataneghpagullgha sivunemta David‑em!
Usuqnaghhalek Kiyaghneq qulighpigaghmelnguq qilagmi!”
11Jesus kaalluni Jerusalem‑emun, aglaqaq Temple‑mun. Tawani sangwaa qamaglluku yuvghiiqaa. Whanikungulghii, kelqelluki qula maalghuk siipneqluku maligsaaghteni aglaqaq Bethany‑mun.
Jesus‑em Neghviksaghqaananightestekanga Figs‑em Uqfiga
12Unaamingani, Bethany‑meng uteghniitkelluku Jesus iyataqaq. 13Uyavaneng esghaqaa figs‑em uqfiga ququngaghtuqaq, enkaam esghaghyaghtuqaa figs‑elgunayukan. Kaasaqminigu ququngaraaghinaaftuq, qayughllak salin figs‑et piisugniilnguut. 14Jesus‑em uqfik pikaa, “Allamengllu kitum alngunak figs‑etughviknaanghitaaten!” Maligsaaghtengita nagatkaat.
Jesus Temple‑mun Pilghii
15Kaasameng Jerusalem‑emun, Jesus, Temple‑mun pikaq. Tawani aanesquqii tukfightulghiitlu akilpegalghiitlu. Manimeng naveghqughtet tipelngit ulleghquqii, aqumutiitlu qawaagmeng akilpegaghtet. 16Nangaqaghsaghqaananightestekiillu kinkut alngunak sameng tugumiilget Temple‑em manughaakun. 17Taagken apeghtuqii yuget,
“Kiyaghneq pikaaguq Akuzitni Igaqegkani,
‘Mangteghaqa, yughaghviguyaghqaaguq tamaghhaanun yuganun nunam.’
Iwernga elpesi iighaghvigughtaghsi wayaghniightenun!”
18Chief priest‑etlu, apeghtughikayugetlu Liilightuusaneng nagaqughluku tawaten pillgha, akuzimghhutkegkaat naten tuqutelleghqameng, naqam alikumaan. Alikegkaat, qayughllak qamaglluteng yulghuteghllaget saghiighayagutngukangit apeghiillghi.
19Ighivgaghyagu Jesus‑enkut maligsaaghtekullghiit aghulaqegkat Jerusalem‑emeng.
Jesus‑em Apeghtuusaqegkangi Ugpeqilleq, Yughalleq, Seghevutilleq
20Unaanguluku igleghutkelluku esghaqaat figs‑em uqfiga palighwaaghumalghii akughhaghminun kenlanga. 21Peter‑em esghaghluku neqaatkaa Jesus‑em pillgha. Enkaam pikaa, “Apeghtughista, ii‑i, figs‑em uqfiga ineghtengngwaaqan palighwaaghumaaq.”
22Jesus‑em pikii, “Ugpeqiteggu Kiyaghneq. 23Ipa ungipaatamsi, kitum alngunak malghuklillngunani ilumikun, ugpeqegkumikillu akuzitni piyaghqaatangi, una naayghaq whaten pikumigu, ‘Kelliinun aatghi,’ taawa apeghiighyaghqaaguq ellnganun. 24Enkaam ungipaatamsi: sangwaa alngunak aklukegkaghsi yughaatkegkufsigu ugpeqluku allgeghsaghqaqutsi, taawa allgeghlleqaghsi. 25Nekevneghpesini yughaghnalusi, seghevutaqiteki seghletun pistesi, enkaam Atagpesi qilagmelnguum seghevulleqii seghleghqellesi.” 26Iwernga seghevutinghilkufsi, talwa Atagpesi qilagmelnguum seghevunnaanghitii seghleghqellesi.
Aaptekangat Jesus Pilleghqaaneng
27Jesus‑enkut maligsaaghtekullghiit kaanneqigtekat Jerusalem‑emun. Jesus igleghsimaluku Temple‑em manughaani, chief priest‑etlu, apeghtughikayugetlu Liilightuusaneng, Elder‑etlu takuluku 28aaptekaat, “Saam pilleghqaakun aanesqughsiki akilpegaghtet? Kitum qelellghakun tawaten pinguzin?”
29Jesus‑em kiimsiqii, “Ungipaalleqamsi kitum qelelghakun tawaten pikaatka kiimsiqufsinga. 30John‑em paaptaayeghillgha Kiyaghneghmeng pingwaa, nalighmeng yugneng? Ungipaatengnga.”
31Ellmeggneng akuzimghhutkat, “Kiyaghneghmeng piknikumteggu, pilleqiinkut, ‘Sanganꞌngam ugpeqenghisteggu John?’ 32Yugneng piknikumteggu yuget anguyiilleqiinkut.” (Alingegkat yugneng, qayughllak yuget qamaglluteng ugpeqngukangat John uuknaliqistengutanga.) 33Enkaam Jesus kiimsiqaat, “Nallukaghput.” Jesus‑em pikii, “Whangallu ungipaannaanghitamsi kitum qelellghakun tawaten pikaatka.”
Právě zvoleno:
Mark 11: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
