Mark 10
10
Jesus‑em Apeghtuusaqegkek Nengughtenkuk Pellghututenkuk
1Taagken Jesus aghulaqegkaq tamaaken nunameng. Aglaghluni nunamun aatqelghiimun Judea‑mun, aghviqakek Kiiwek Jordan‑ek. Yulghutem qerngughfiklaataqaa enkaam apeghtuqii piiqelleghmitun.
2Ilangita Pharisees‑et takuluku anagniilqavigighnaqutkelluku aaptekaat, “Liilightuusamnni itagnaghtaa yugem nuliini pegtekumigu?” 3Jesus‑em kiimsiqii aaptemmeng, “Sangaawami Moses‑em qelghusaa?” 4Kiimsiqaat, “Moses‑em pilleghqalitkaqaa yuuk pegtusim igii imighluki pegtesqelluku nulighha.” 5Jesus‑em pikii, “Tawaten Moses‑em Liilightuusalitkaqiisi pineghllugllagutegpesineng. 6Iwernga nunangllaghyuwhaalleghmeng ‘Kiyaghneghem ulimakaqaak yuuklu aghnaqlu.’ 7Taana apalluqluku yugem unillukek atanillu naanillu nuliighminun lliighwaaghyaghqaaguq. 8Enkaam maalghugunanighllequk, ataasiighllequk. 9Tamaaken apalluqluku Kiyaghneghem qerngughutestekakek yeqay yugem pellghututesneghillikek.”
10Mangteghamun iteghaasameng maligsaaghtet aaptekaat Jesus tamaaken pillghaneng. 11Jesus‑em pikii, “Yugem nuliini peglluku allaneng nulightuqumi, taawa gelgaghniighllequq. 12Tawateghpigaq aghnam ugini peglluku allaneng ugiiqumi, taawa gelgaghniighllequq.”
Jesus‑em Quyastekangi Taghnughhaat
13Ilangita yuget tagitkiit taghnughhaat Jesus‑mun saafluki quyastesqelluki, iwernga maligsaaghtet ineghtekiit tagitilghiit. 14Jesus‑em esghaghluki seghleghyagulluki maligsaaghteni pikii, “Taghnughhaat tagilit whangamnun. Ineghtegpenaki, qayughllak Ataneghpagullgha Kiyaghneghem taghnughhaghestun ayuqelghiit pikaat. 15Ipa ungipaatamsi, kitum alngunak tuguklinghilkumigu Ataneghpagullgha Kiyaghneghem taghnughhaghtun, iteghnaanghituq.” 16Taagken taghnughhaat tugaaqluki, saaftaqluki quyastekii.
Aklungilnguq Yuuk
17Jesus igleghhneqigtaquqlu, yugem ketanqusnaq takuluku manungakun segesqughlluni aaptekaa, “Pinilghii Apeghtughista, naten salunga kenlengilnguq unguvalleq allgeghhnayaghsikun?” 18Jesus‑em aaptekaa, “Sangan pinighnizinga? Kina alngunak pininghituq, Kiyaghneghhiinaaguq pinilghii. 19Liilightuusat liisimakaten: ‘Yugtaghpenang; gelgaghniighpenang; teglegpenang; iqlengiqutkegpenaki yuget; puughtigpenang; quulvaghlukek atanllu naanllu.’” 20Yugem pikaa, “Apeghtughista, ima nukalpigaatemneng qaatkengngwaanka taakut Liilightuusat.” 21Jesus‑em piniqepiglluku qiivluku pikaa, “Ataasiiguq piyaghqan. Akikughyaghtughhu qamaglluku saghyan, enkaam akinga tunqughnaken aklumalghiinun. Tawaten pikuvek aklungillequten qilagmi. Taagken maligsaghtughnakevnga.” 22Tawaten piyatni yuuk nulgiiqaq, iqitkaq iilqepiglluni qayughllak aklungitepiglleghhii.
23Jesus yugsughaluni maligsaaghteni pikii, “Piyaqnapigtuq aklungilngughni itelleghqaa Ataneghpagullgha Kiyaghneghem!” 24Tawaten piyisteng maligsaaghtet saghiighayukat. Jesus‑em pilaataqii, “Taghnughhaghni, piyaqnapigtuq itelleghqaq Ataneghpagullghanun Kiyaghneghem! 25Piyaqniisaghqaaguq camel‑em suflughutelleghqaa sikuum iiyngakun, aklungilnguum yugem itelleghqaaneng Ataneghpagullghanun Kiyaghneghem.” 26Maligsaaghtet wataqaaghaq saghiighayukat, enkaam ellmeggneng aapqughaaghutkat, “Kinangam yugulillengelleqa?” 27Jesus‑em qiivluki pikii, “Yuget piyaghqaqenghilkangit, Kiyaghneghem piyaghqaqii.”
28Taagken Peter‑em pikaa, “Esghaqaghqutqun, sangwaa qamaglluku unilluku maliglleghaatamken.”
29Jesus‑em pikii, “Ipa ungipaatamsi, kitum alngunak uniskumiki mangteghani, anglegutni, naani, atani, avaqutani, nunani apalluqlunga whanga, Pinilghiitlu Ungipat, 30allgeghutaaghaghyaghqaaguq whani kiyaghtaalleghmi. Mangteghaa, anglegutangi, naanga, avaqutii, nunanga, nulaghllagyaghqaagut; tamaakunun maligulluku amyuutkellengyaghqaaguq. Taagken taakwaningani kenlengilngughmeng unguvallengyaghqaaguq. 31Iwernga uglalghiit angelleghpigaat ukaliighsaghqaagut taagani, enkaam uglalghiit ukalighpigaat angelleghpigaaghsaghqaagut.”
Jesus‑em Tuqulleghqani Akuzitkellaataqanga
32Jesus aga sivungitnilnguq igleghanguluki tumetgun Jerusalem‑emun ayuqelghiitgun. Maligsaaghtengi saghiighayukat, yugetlu alingumaghmeng maligtekaat. Jesus‑em qula maalghuk siipneqluku maligsaaghteni aafulluki ungipaallaataqii salleghqamineng. 33Pikii, “Nagatek, Jerusalem‑ennaqukut. Tawani Ighnegha Yugem tuunelleqaat chief priest‑enunllu apeghtughikayugnunllu Liilightuusaneng. Nanqiglluku tuqusaghqaanilleqaat, enkaam tuunelleqaat Gentile‑enun. 34Taakut legasiighwaatkelleqaat, qesiqulleqaat, kagsagmiglleqaat, tuqulleqaatlu. Pingayut aghneghet atughluki unguvaghllequq.”
James‑enkuk John‑enkuk Tungsillghak
35Taagken James‑enkuk John‑enkuk, Zebedee‑m ighneghegkenka takuluku Jesus pikaak, “Apeghtughista, elpenun sameng pisqesugtukung.” 36Jesus‑em aaptekakek, “Sasqesugestek whangamnun?” 37Kiimsiqaak, “Nighughqengngalghiimi Ataneghpagulleghpeni aqumegkuvek aqumelgusighyugamken, nalighpung aghenqigneghpenilluku, nalighpung saghumigneghpenilluku.” 38Jesus‑em pikakek, “Nallukaghtek sameng tungsilleghtek. Meghyaghqamneng qayuusimelngughmeng meghelleqestaak? Paaptaayelleghqamtun paaptaayelleqestaak?” 39Kiimsiqaak, “Piyaghqaagukung.” Jesus‑em pikakek, “Meghyaghqaqa qayuusimelnguq qaywa meghelleqaghtek, paaptaayellequteklu paaptaayelleghqamtun. 40Iwernga whanga nakmiksaghqaqenghitanka kinkut aqumyaghqaatangi aghenqignemkunllu saghumignemkunllu, yataaghqutkat tamaakut aqumyaghqaagut.”
41Taakut qula malighsaaghtet nagaqughlukek James‑enkuk John‑enkuk pillghak, ugumiyagutkagket. 42Enkaam Jesus‑em qerngughlluki pikii, “Liisimakasi Gentile‑et igleghutistengita atanghutaqiit yuteng, aangwaaghughtekatlu yukeghqutaqiit. 43Iwernga tawatesaghqaanghitusi elpesi. Nalighsi aangwaaghuyukumi qepghaghtenguli ilaminun, 44nalighsillu aangelleghpigaayukumi qepghaghtelaaghughlli tamanganun. 45Talwa Ighnegha Yugem tagikaanghituq qepghaatesqelluni, tagikaaguq qepghaatinalunillu tuunalukullu unguvalleni yugulinaluki yulghutet.”
Jesus‑em Naallghuskanga Ayaakaq Bartimaeus
46Taagken Jesus‑enkut maligsaaghtekullghiit, yulghuteghllagetlu Jericho‑mun kaalluteng, aghulaqegkat. Taawaanguq ayaakaq yuuk, aatgha Bartimaeus, ighnegha Timaeus‑em aqumluni tumet saningitgun tungsighraghaqelghii. 47Nagaqughyamigu Jesus Nazareth‑eghmii, tughwaaghniluku akilghuukaq, “Jesus! Ighneghani David‑em! Nangllegyagutaghtinga!”
48Uglalghiim yugem aghyuuqaat nepiighesqelluku iwernga qevuutaghalluni akilghuukaq, “Ighneghani David‑em, nangllegyagutaghtinga!” 49Jesus‑em aghuliighluni pikii, “Tagisqiteggu.” Enkaam tuqlughluku ayaakaq pikaat, “Seghleghhalek, tuqlughaaten nekevi!” 50Qaasliik atkuyaaghegni mataghaghllukek nekefqaghlluni takukaa Jesus. 51Jesus‑em aaptekaa, “Sasqelluten piiqsin?” Ayaakam kiimsiqaa, “Apeghtughista, esghaasagunneqigsugtunga.” 52Jesus‑em pikaa, “Igleghlleghhaaten, ugpeqilleghpek naallghutestaaten.” Tawaninginaq esghaasagutkaq taagken maligtekaa Jesus.
Právě zvoleno:
Mark 10: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
