ယူဝ်းႁၢၼ်ႇ 3
3
ၸဝ်ႈယေႇသူႉတင်းၼီႉၵေႃးတိၼ်ႇ
1မိူဝ်ႈၼၼ်ႉမီးၽႃႇရီႉသႄးဢၼ်လႆႈၸိုဝ်ႈၼီႉၵေႃးတိၼ်ႇ ဢၼ်ပဵၼ်ၶုၼ်တီႈလုမ်းလူင်ၼႂ်းၵူၼ်းယူႉတႃႉတင်းလၢႆ ၵေႃႉၼိုင်ႈဢေႃႈ။- 2မၼ်းၼၼ်ႉမႃးၵႃႈတီႈယေႇသူႉ ၶိင်ႇၵၢင်ၶိုၼ်းလႄႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၼီႉမိၵ်ႈလၢၵ်ႈၶၼႃႇဢၼ်ၸဝ်ႈႁဝ်းၼႄပျႃးၸိူဝ်းၼႆႉ၊ ပေႃးဢၶႂၢင်ႉၽြႃးပဵၼ်ၸဝ်ႈဢမ်ႇမီးၸိုင်၊ ပိူဝ်ႈဢၼ်ၽူႈလႂ်သေၵေႃႉသေၵူၼ်းဢမ်ႇၼႄပျႃးလႆႈလႄႈ၊ ႁဝ်းၶႃႈႁူႉလွင်ႈဢၼ်ၸဝ်ႈႁဝ်းပဵၼ်သြႃႇ ဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊- 3ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵေႃႉဢၼ်ဢမ်ႇၶၢမ်ႇတၢင်းဢၼ်ၶိုၼ်းၵိူတ်ႇလဵင်ႉၼၼ်ႉၸိုင်၊ဢမ်ႇလႆႈႁၼ်မိူင်းၽြႃးပဵၼ်ၸဝ်ႈ၊ ဝႃႈၼင်ႇၼႆဢေႃႈ။- 4ၼီႉၵေႃးတိၼ်ႇၵေႃႈလဝ်ႊလၢတ်ႈလႄႈဝႃႈ၊ ၵေႃႉဢၼ်ဢသၢၵ်ႈယႂ်ႇယဝ်ႉၼၼ်ႉ တၵ်းၶၢမ်ႇတၢင်းဢၼ်ၶိုၼ်းၵိူတ်ႇလဵင်ႉလႆႈၸိူဝ်ႉၼင်ႇႁိုဝ်ၶႃႈ။ တၵ်းသမ်ႉၶိုၼ်းၶဝ်ႈၵႃႈၼႂ်းတွင်ႉမႄႈမၼ်းၼၼ်ႉလႄႈ ၶၢမ်ႇတၢင်းဢၼ်ၵိူတ်ႇလဵင်ႉလႆႈၶႃႈႁိုဝ်။ ဝႃႈၼင်ႇၼႆဢေႃႈ။
5 ယေႇသူႉၵေႃႈလၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈတီႈမႂ်းၸမ်ႉ၊ ၵေႃႉဢၼ်ဢမ်ႇၶၢမ်ႇတၢင်းဢၼ်ၵိူတ်ႇလဵင်ႉ သေၵႃႈၼႂ်းၼမ်ႉတင်းဝီႉၺိၺ်ႇၸဝ်ႈၼၼ်ႉၸိုင်၊ ဢမ်ႇလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈ၊ ဝႃႈၼင်ႇၼႆဢေႃႈ။- 6ဢၼ်ၶၢမ်ႇတၢင်းဢၼ် ၵိူတ်ႇလဵင်ႉသေၵႃႈၼႂ်းၼိူဝ်ႉလိူတ်ႈၼၼ်ႉ ပဵၼ်ၼိူဝ်ႉလိူတ်ႈဢေႃႈ။ ဢၼ်ၶၢမ်ႇတၢင်းဢၼ်ၵိူတ်ႇလဵင်ႉသေၵႃႈၼႂ်းဝီႉၺိၺ်ႇၸဝ်ႈၼၼ်ႉ ပဵၼ်ဝီႉၺိၺ်ႇဢေႃႈ။- 7ယႃႇပေမီးတၢင်းဢၼ်လီဢၢမ်း လွင်ႈဢၼ်ၵဝ်ႁေႃးလၢတ်ႈလႄႈဝႃႈ၊ တၵ်းလႆႈၶၢမ်ႇတၢင်းဢၼ်ၶိုၼ်းၵိူတ်ႇလဵင်ႉ၊ ဝႃႈၼင်ႇၼႆၼၼ်ႉ။
8လူမ်းၸိုင် ၵႂႃႇမႃးၵႃႈၼင်ႇဢၼ်ဢလူဝ်ႇမၼ်းမီးၼၼ်ႉဢေႃႈ။ ပိၵ်ႉသမ်ႉမႂ်းလႆႈငိၼ်းသဵင်မၼ်းသေၵေႃႈ၊ မႂ်းဢမ်ႇႁူႉလွင်ႈဢၼ်ပဵၼ်မႃးၵႃႈတီႈလႂ်၊ ၵႂႃႇၵႃႈတီႈလႂ်ၼၼ်ႉလႆႈ။ ပိူင်လဵဝ်ၵၼ်၊ ၵေႃႉဢၼ်ၶၢမ်ႇတၢင်းဢၼ်ၵိူတ်ႇလဵင်ႉသေၵႃႈၼႂ်းဝီႉၺိၺ်ႇၸဝ်ႈၼၼ်ႉ ပဵၼ်ၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆဢေႃႈ။
9 ၼီႉၵေႃးတိၼ်ႇၵေႃႈၶိုၼ်းလဝ်ႊထၢမ်လႄႈဝႃႈ၊ လွင်ႈတီႈႁဵင်းၼႆႉတၵ်းပဵၼ်လႆႈၸိူဝ်ႉၼင်ႇႁိုဝ်ၶႃႈ။ မိူဝ်ႈဢၼ်ဝႃႈၼင်ႇၼႆၸိုင်၊- 10ယေႇသူႉၵေႃႈၶိုၼ်းလၢတ်ႈလႄႈဝႃႈ၊ မႂ်းပဵၼ်ထမ်ႇမႃႉသြႃႇၼႂ်းၵူၼ်းဢီႉသရေႇလႃႉတင်းလၢႆယူႇလႄႈဢမ်ႇႁူႉလွင်ႈတီႈႁဵင်းၼႆႉႁိုဝ်။- 11ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ႁဝ်းၼႆႉလၢတ်ႈလွင်ႈတၢင်းဢၼ်တူဝ်ၸဝ်ႈၵဝ်ႇႁူႉဢေႃႈ။ ၶၢမ်ႇသၢၵ်ႈသေႇလွင်ႈတၢင်းဢၼ် တူဝ်ၸဝ်ႈၵဝ်ႇႁၼ်ဢေႃႈ၊ ၼႂ်းဝႃႈၼၼ်သေၵေႃႈ လွင်ႈတၢင်းဢၼ်ႁဝ်းၶၢမ်ႇသၢၵ်ႈသေႇၼၼ်ႉၸိုင် သူဢမ်ႇႁပ်ႉဢမ်ႇဢဝ်။- 12ပေႃးၵဝ်လၢတ်ႈလွင်ႈၶိူင်ႈပိူင်လိၼ်မိူင်းၼႆႉတီႈသူလႄႈ သူယင်းဢမ်ႇယုမ်ႇၸိုင်၊ မိူဝ်ႈဢၼ်ၵဝ်လၢတ်ႈလွင်ႈၶိူင်ႈပိူင်ၵၢင်ႁၢဝ်တီႈသူၼၼ်ႉ၊ သူတၵ်းယုမ်ႇၸိူဝ်ႉၼင်ႇႁိုဝ်။- 13လိူဝ်သေလုၵ်ႈၵူၼ်းဢၼ်လုၵ်ႉသေၵႃႈတီႈမိူင်းၵၢင်ႁၢဝ်မႃးလႄႈ မီးယူႇၵႃႈၼႂ်းမိူင်းၵၢင်ႁၢဝ်ၼၼ်ႉ၊ ၽူႈလႂ်သေၵေႃႉသေၵူၼ်း ဢမ်ႇၶိုၼ်ႈၵႃႈၼိူဝ်မိူင်းၵၢင်ႁၢဝ်ပုၼ်ႉယဝ်ႉ။- 14ၸိူဝ်ႉၼင်ႇဢၼ်မူဝ်းသေႇ ယုၵ်ႉငူးဝႆႉၵႃႈၼႂ်းထိူၼ်ႇၼၼ်ႉ၊ လုၵ်ႈၵူၼ်းတၵ်းလႆႈၶၢမ်ႇတၢင်းဢၼ်ယုၵ်ႉဝႆႉဢေႃႈ။- 15လွင်ႈမၼ်းၸမ်ႉ ၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈလုၵ်ႈၸဝ်ႈတင်းသဵင်ႈတင်းလူင်ၼၼ်ႉတၵ်းဢမ်ႇလႆႈႁွတ်ႈထိုင်တၢင်းလူႉတၢင်းလႅဝ်လႄႈတၵ်းလႆႈဢသၢၵ်ႈထႃႇဝရႃႉၸိုင်၊ ၸင်ႇပဵၼ်ဢေႃႈ။- 16ၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈလုၵ်ႈၽြႃးပဵၼ်ၸဝ်ႈတင်းသဵင်ႈတင်းလူင်ၼၼ်ႉ တၵ်းဢမ်ႇလႆႈႁွတ်ႈထိုင်တၢင်းလူႉတၢင်းလႅဝ်လႄႈတၵ်းလႆႈဢသၢၵ်ႈထႃႇဝရႃႉၸိုင်၊ ၽြႃးပဵၼ်ၸဝ်ႈႁၵ်ႉၵူၼ်းလေႃးၵီႇတင်းလၢႆ တေႃႇထိုင်ႁွတ်ႈထၼ်ႈပေႃးၸုၼ်ႉပႅတ်ႈလုၵ်ႈၸဝ်ႈ ဢၼ်မီးပႃးလဵဝ်ၵူၺ်း တီႈမၼ်းၸဝ်ႈၼၼ်ႉဢေႃႈ။- 17ၽြႃးပဵၼ်ၸဝ်ႈပွႆႇၸႂ်ႉလုၵ်ႈၸဝ်ႈမႃးၼႂ်းလေႃးၵႃႉၼႆႉ ႁႂ်ႈလႆႈၸီႇယၢင်ႇဢပႅတ်ႈတီႈၵူၼ်းလေႃးၵီႇတင်းလၢႆဢမ်ႇၸႂ်ႈ။ ပွႆႇၸႂ်ႉမႃးႁႂ်ႈၶဝ်လႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈမၼ်းၸဝ်ႈဢေႃႈ။- 18ၵေႃႉဢၼ်ယုမ်ႇမၢတ်ႈလုၵ်ႈၸဝ်ႈၼၼ်ႉဢမ်ႇလႆႈၶၢမ်ႇတၢင်းဢၼ်ၸီႇယၢင်ႇဢပႅတ်ႈ၊ ၵေႃႉဢၼ်ဢမ်ႇယုမ်ႇမၢတ်ႈၼၼ်ႉၸမ်ႉ၊ ပိူဝ်ႈဢၼ်ဢမ်ႇယုမ်ႇမၢတ်ႈလုၵ်ႈၸဝ်ႈ ဢၼ်မီးပႃးလဵဝ်ၵူၺ်းတီႈၽြႃးပဵၼ်ၸဝ်ႈလႄႈ ၸႃႉၸဵမ်ၶိင်ႇတေႃႈလဵဝ်ၼႆႉလႄႈ လႆႈၶၢမ်ႇတၢင်းဢၼ်ၸီႇယၢင်ႇဢပႅတ်ႈယူႇဢေႃႈ။- 19လွင်ႈဢၼ်လႆႈၶၢမ်ႇတၢင်းဢၼ်ၸီႇယၢင်ႇဢပႅတ်ႈၼၼ်ႉၸမ်ႉ၊ ဢၼ်လႅင်းၶဝ်ႈမႃးၵႃႈၼႂ်းလေႃးၵႃႉၼႆႉယူႇလႄႈ ၵူၼ်းတင်းလၢႆၵွပ်ႈပိူဝ်ႈဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီလႄႈ ယဵင်ႈၶႅၼ်းၵျိူၵ်ႈဢၼ်လပ်းသိင်ႇၼႃႇသေဢၼ်လႅင်းဢေႃႈ။- 20ၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ႁၢႆႉမိူၵ်ႈတင်းသဵင်ႈတင်းလူင်ၼၼ်ႉ ၶၢၼ်ႉႁၼ်ဢၼ်လႅင်းလႄႈ ၼင်ႇႁိုဝ်တၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇၸိူဝ်းၼၼ်ႉ တၵ်းဢမ်ႇလႆႈပေႃႇလႆႈဢွၵ်ႇၸိုင် ဢမ်ႇသုတ်ႉဢမ်ႇမႃးၵႃႈတီႈဢၼ်လႅင်း၊၊- 21ၵေႃႉဢၼ်ၵမ်ၵျၢင်ႉသမ်ႇမႃႇတြႃးၼၼ်ႉၸမ်ႉ၊ ၼင်ႇႁိုဝ်လွင်ႈဢၼ်တၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇဢၼ်မႅၼ်ႈၵၼ်တင်းဢလူဝ်ႇၽြႃးပဵၼ်ၸဝ်ႈၼၼ်ႉ တၵ်းလႆႈပေႃႇလႆႈဢွၵ်ႇၸိုင်၊ သုတ်ႉမႃးၵႃႈတီႈဢၼ်လႅင်းဢေႃႈ၊ ဝႃႈၼင်ႇၼႆဢေႃႈ။
သြႃႇယူဝ်းႁၢၼ်ႇၶၢမ်ႇသၢၵ်ႈသေႇလွင်ႈၸဝ်ႈယေႇသူႉ
22လိုၼ်းၼၼ်ႉယေႇသူႉ ဢိၵ်ႇတင်းတပႄးၸဝ်ႈတင်းလၢႆ ၵႂႃႇဝၢၼ်ႈၼွၵ်ႈၼႃးပၢင်ႇ မိူင်းယူႉတႃႉယဝ်ႉၸင်ႇ ယူႇလူၺ်ႈၵၼ်တင်းၶဝ်ၵႃႈတီႈၼၼ်ႈလႄႈပၼ်ပပ်ႉတီႉၸမ်ႇဢေႃႈ။- 23ယူဝ်းႁၢၼ်ႇၵေႃႈပၼ်ပပ်ႉတီႉၸမ်ႇၵႃႈတီႈဢေႇၼုၼ်ႇဢၼ်ၸမ်ၵၼ်တင်း ဝဵင်းသႃႇလိမ်းၼၼ်ႉယူႇ ၵွပ်ႈပိူဝ်ႈဢၼ်ၼမ်ႉမီးၼမ်ၼႃႇၵႃႈတီႈၼၼ်ႈဢေႃႈ။ ၵူၼ်းတင်းလၢႆမႃးလႄႈ ၶၢမ်ႇပပ်ႉတီႉၸမ်ႇဢေႃႈ။- 24ယူဝ်းႁၢၼ်ႇဢမ်ႇပႆႇတူၵ်းၵႃႈၼႂ်းထွင်ႇ။
25မိူဝ်ႈၼၼ်ႉတပႄးယူဝ်းႁၢၼ်ႇတင်းလၢႆ မီးတီႈဢၼ်တွင်ႈထၢမ်ထဵင်ၵၼ်တင်းၵူၼ်းယူႉတႃႉတင်းလၢႆ လူၺ်ႈလွင်ႈတၢင်းဢၼ်မူတ်းသႂ်သေယဝ်ႉ၊- 26မႃးၵႃႈတီႈယူဝ်းႁၢၼ်ႇလႄႈ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵေႃႉဢၼ်မီးယူႇလူၺ်ႈၵၼ်တင်းၸဝ်ႈႁဝ်း ၵႃႈတီႈၽၢႆႇပုၼ်ႉၼမ်ႉႁွင်ႈယေႃးတၢၼ်ႇလႄႈ ၸဝ်ႈႁဝ်းပၼ်သၢၵ်ႈသေႇၼၼ်ႉ ပၼ်ပပ်ႉတီႉၸမ်ႇယူႇၶႃႈဢေႃႈ။ ၵူၼ်းတင်းသဵင်ႈတင်းလူင် ႁွတ်ႈမႃးၵႃႈတီႈၵေႃႉၼၼ်ႉၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊- 27ယူဝ်းႁၢၼ်ႇၵေႃႈ ၶိုၼ်းလၢတ်ႈလႄႈဝႃႈ၊ ပေႃးဢမ်ႇၶၢမ်ႇတၢင်းဢၼ်ပၼ်မႃးၵႃႈတီႈမိူင်းၵၢင်ႁၢဝ်ပုၼ်ႉၸိုင်၊ ၵူၼ်းဢမ်ႇၶၢမ်ႇဢဝ်သေၸိူဝ်ႉသေပိူင်လႆႈ။- 28လွင်ႈဢၼ်ၵဝ်လၢတ်ႈလႄႈဝႃႈ၊ ၵဝ်ၼႆႉဢမ်ႇၸႂ်ႈၸဝ်ႈၶရိၸ်ႈ၊ ပဵၼ်ၵေႃႉဢၼ်ၶၢမ်ႇတၢင်းဢၼ်ပွႆႇၸႂ်ႉမႃးဢွၼ်တၢင်းၸဝ်ႈၶရိၸ်ႈဢေႃႈ၊ ဝႃႈၼင်ႇၼႆၼၼ်ႉၸိုင်၊ သူပဵၼ်သၢၵ်ႈသေႇၵဝ်ဢေႃႈ။- 29ၵေႃႉဢၼ်လႆႈလုၵ်ႈယိင်းသၢဝ်ဢၼ်သွင်ႇမင်ႇၵလႃႇၼၼ်ႉ ပဵၼ်ၵေႃႉဢၼ်သွင်ႇမင်ႇၵလႃႇဢေႃႈ။ ၵေႃႉသေႈဢၼ်ယူႇၸမ်ႁိမ်းၵေႃႉဢၼ်သွင်ႇမင်ႇၵလႃႇလႄႈငိၼ်းၵႂၢမ်းမၼ်းၼၼ်ႉ ပိူဝ်ႈဢၼ်လႆႈငိၼ်းၵႂၢမ်းမၼ်းလႄႈ မီးၸႂ်ဢၼ်သိူဝ်းပျေႃႇၼႃႇလူင်လၢင်ဢေႃႈ။ မိူၼ်ၼင်ႇၼၼ် တၢင်းဢၼ်သိူဝ်းပျေႃႇၵဝ်ၼႆႉပျေႉၸုမ်ႇဝႆႉဢေႃႈ။- 30ၸဝ်ႈၼၼ်ႉတၵ်းလႆႈမီးတၢင်းဢၼ်ယႂ်ႇၵႂၢင်ႈမႃးဢေႃႈ။ ၵဝ်ၸမ်ႉ၊တၵ်းလႆႈမီးတၢင်းဢၼ်သုတ်ႉယွမ်းၵႂႃႇဢေႃႈ။
31ၵေႃႉဢၼ်လုၵ်ႉသေၵႃႈတီႈၼိူဝ်မႃးၸိုင်၊ ပဵၼ်ၸိၵ်းပဵၼ်ၸွမ်ပိူၼ်ႈတင်းသဵင်ႈတင်းလူင်ဢေႃႈ။ ၵေႃႉဢၼ်ပဵၼ်မႃးၵႃႈတီႈလိၼ်မိူင်းၼႆႉၸိုင် ၸၢပ်ႈသႅင်ႇၵၼ်တင်းလိၼ်မိူင်းလႄႈ ၸၢင်ႈလၢတ်ႈလွင်ႈတၢင်းလိၼ်မိူင်းဢေႃႈ။ ၵေႃႉဢၼ်လုၵ်ႉသေၵႃႈတီႈၼိူဝ်မိူင်းၵၢင်ႁၢဝ်မႃးၸိုင် ပဵၼ်ၸိၵ်းပဵၼ်ၸွမ်ပိူၼ်ႈတင်းသဵင်ႈတင်းလူင်ဢေႃႈ။- 32ၵႃႈဢၼ်မၼ်းၸဝ်ႈလႆႈႁၼ်၊ ၵႃႈဢၼ်မၼ်းၸဝ်ႈလႆႈငိၼ်းၸိူဝ်းၼၼ်ႉၵေႃႈ မၼ်းၸဝ်ႈၶၢမ်ႇသၢၵ်ႈသေႇဢေႃႈ။ လွင်ႈတၢင်းဢၼ်မၼ်းၸဝ်ႈၶၢမ်ႇသၢၵ်ႈသေႇၼၼ်ႉၸိုင်၊ ၽူႈလႂ်သေၵေႃႉသေၵူၼ်းဢမ်ႇၶၢမ်ႇဢမ်ႇဢဝ်။- 33ၵေႃႉဢၼ်ၶၢမ်ႇဢဝ်လွင်ႈဢၼ်မၼ်းၸဝ်ႈၶၢမ်ႇသၢၵ်ႈသေႇၼၼ်ႉၸမ်ႉ၊ ၽြႃးပဵၼ်ၸဝ်ႈပႂ်ႉသဵတ်ႈၸႃႇဢေႃႈ ဝႃႈၼႆ၊ တွၵ်ႈတၼ်းသိၵ်ႈဢေႃႈ။- 34ၵေႃႉဢၼ်ၽြႃးပဵၼ်ၸဝ်ႈပွႆႇၸႂ်ႉမႃးၼၼ်ႉၸၢင်ႈလၢတ်ႈၸၢင်ႈဝႃႈၵႂၢမ်းၽြႃးပဵၼ်ၸဝ်ႈဢေႃႈ။ လွင်ႈမၼ်းၸမ်ႉ တီႈတႅၵ်ႈတီႈတိူင်းယင်းဢမ်ႇမီးလႄႈ ၽြႃးပဵၼ်ၸဝ်ႈပၼ်ဝီႉၺိၺ်ႇၸဝ်ႈဢေႃႈ။- 35ပေႃႈၸဝ်ႈႁၵ်ႉလုၵ်ႈၸဝ်ႈလႄႈ ဢဝ်ၵႃႈမီးတင်းသဵင်ႈတင်းလူင်ဢၢပ်ႈပၼ်ၼႂ်းမိုဝ်းမၼ်းၸဝ်ႈယဝ်ႉ။- 36ၵေႃႉဢၼ်ယုမ်ႇမၢတ်ႈလုၵ်ႈၸဝ်ႈၼၼ်ႉလႆႈထႃႇဝရႃႉဢသၢၵ်ႈဢေႃႈ။ ၵေႃႉဢၼ်ဢမ်ႇယုမ်ႇမၢတ်ႈလုၵ်ႈၸဝ်ႈၼၼ်ႉၸမ်ႉ၊ ဢမ်ႇလႆႈထူပ်းဢသၢၵ်ႈ။ ၵႃႈၼိူဝ်ၵေႃႉၼၼ်ႉ တၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈတႄႇယူႇဢေႃႈ၊ ဝႃႈၼင်ႇၼႆဢေႃႈ။
Právě zvoleno:
ယူဝ်းႁၢၼ်ႇ 3: CBMS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Copyright © 2021 by OMF International, Shan Baptist Churches Fellowship
