ငဝ်ႈၵမ်ႇၽႃႇ 26
26
ဢီႉၸၢၵ်ႈယူႇသဝ်းၵႃႈတီႈဝဵင်းၵေႇရႃႇ
1ၼွၵ်ႈသေတၢင်းဢၼ်ၶဝ်ႈၵႃႈမၢၵ်ႇပႅင်းဢၼ်ယၢမ်ႈပဵၼ်ၼႂ်းပၢၼ်ဢႃႇပြႃႇႁၢမ်ႇၵႃႈတီႈမိူင်းၼၼ်ႉၼၼ်ႉ၊ သမ်ႉၶိုၼ်းပဵၼ်တၢင်းဢၼ် ၶဝ်ႈၵႃႈမၢၵ်ႇပႅင်းထႅင်ႈလႄႈ၊ ဢီႉၸၢၵ်ႈၵႂႃႇၵႃႈတီႈဝဵင်းၵေႇရႃႇ တီႈဢၼ်ဢၽီႉမလႅၵ်ႉ ဢၼ်ပဵၼ်ၶုၼ်လူင်ၵူၼ်းၽီႉလိတ်ႉတီႉၸိူဝ်းၼၼ်ႉယူႇၼၼ်ႉဢေႃႈ။- 2ထႃႇဝရႃႉၽြႃးၵေႃႈ၊ ပေႃႇမႃးတီႈမၼ်းလႄႈဝႃႈ၊ မႂ်းယႃႇပေလူင်းၵႂႃႇၵႃႈတီႈမိူင်းဢေႇၵိပ်ႉတူႉပုၼ်ႉ။ ယူႇၵႃႈတီႈမိူင်းဢၼ်ၵဝ်တၵ်းလၢတ်ႈပၼ်တီႈမႂ်းၼၼ်ႉတႃႉ။- 3သွၼ်ႈပိုင်ႈယူႇၵႃႈၼႂ်းမိူင်းၼႆႉတႃႉ။ ၵဝ်တၵ်းယူႇၽၢႆႇမႂ်းလႄႈ ပၼ်တၢင်းလီတီႈမႂ်းဢေႃႈ။ လွင်ႈမၼ်းၸမ်ႉ ၵဝ်တၵ်းပၼ်မိူင်းၼႆႉတီႈမႂ်း ဢိၵ်ႇတင်းၸိူဝ်ႉၶိူဝ်းမႂ်းဢေႃႈ။ ၵဝ်တၵ်းႁႂ်ႈၵႂၢမ်းဢၼ်ၵဝ်တိူင်ႇဝႃႈဝႆႉတီႈပေႃႈမႂ်းဢႃႇပြႃႇႁၢမ်ႇၼၼ်ႉတႄႇပဵၼ်ဢေႃႈ။- 4ၵဝ်တၵ်းႁႂ်ႈၸိူဝ်ႉၶိူဝ်းမႂ်းယႂ်ႇၽႄႈၼမ်ၵိုၼ်းမႃးမိူၼ်ၸိူဝ်ႉၼင်ႇလၢဝ်ဢၼ်မီးၵႃႈၼိူဝ်ၽႃႉၵၢင်ႁၢဝ်ၼၼ်ႉဢေႃႈ။ ၵဝ်တၵ်းပၼ်မိူင်းၵႃႈမီးတင်းသဵင်ႈတင်းလူင်ၸိူဝ်းၼႆႉ တီႈၸိူဝ်ႉၶိူဝ်းမႂ်းဢေႃႈ။ ၵႃႈၼႂ်းၸိူဝ်ႉၶိူဝ်းမႂ်းၼႆႉ ၵူၼ်းမဵဝ်းတင်းသဵင်ႈတင်းလူင်တၵ်းလႆႈၶၢမ်ႇတၢင်းလီမင်ႇၵလႃႇဢေႃႈ။- 5လွင်ႈမၼ်းၸမ်ႉ ဢႃႇပြႃႇႁၢမ်ႇၼၼ်ႉထွမ်ႇဢဝ်ၵႂၢမ်းၵဝ်လႄႈပႂ်ႉၵမ်ပႂ်ႉၸွမ်းတၢင်းဢၼ်ၵဝ်သင်ႇလၢတ်ႈဝႆႉ၊ ပိင်းၺၢပ်ႈၵဝ်၊ ထုင်းၽိင်ႈၵဝ်၊ တြႃးၵဝ် ၵူႈၸိူဝ်ႉၵူႈပိူင်ၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
6ၼႂ်းမိူဝ်ႈဢၼ် ဢီႉၸၢၵ်ႈယင်းယူႇၵႃႈတီႈဝဵင်းၵေႇရႃႇယူႇၼၼ်ႉၸိုင်၊- 7ၵူၼ်းဝဵင်းၸိူဝ်းၼၼ်ႉတွင်ႈထၢမ်လွင်ႈမေးမၼ်းတီႈမၼ်းလႄႈ၊ မၼ်းၵေႃႈလၢတ်ႈလႄႈဝႃႈ၊ ပဵၼ်ၼွင်ႉယိင်းၵဝ်ဢေႃႈ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ မၼ်းၵူဝ်လႄႈဝႃႈ၊ ၵူၼ်းမိူင်းၼႆႉတၵ်းဢဝ်ၵဝ်တၢႆ ၵွပ်ႈပိူဝ်ႈရေႇပႅၵ်ႉၵႃႉဢေႃႈ၊ ဝႃႈၼင်ႇၼႆလႄႈ ဢမ်ႇႁတ်းလၢတ်ႈ လႄႈဝႃႈ၊ မၼ်းပဵၼ်မေးၵဝ်၊ ဝႃႈၼင်ႇၼႆၵူၺ်း။ လွင်ႈမၼ်းၸမ်ႉ မၼ်းႁၢင်ႈလီၽၢင်လီဢေႃႈ။- 8မိူဝ်ႈဢၼ်မၼ်းၼၼ်ႉ ယူႇၵႃႈတီႈဝဵင်းၼၼ်ႉႁိုင်တၢၼ်ႇတၢၼ်ႇယဝ်ႉၼၼ်ႉၸိုင်၊ ဝၼ်းၼိုင်ႈဢၽီႉမလႅၵ်ႉ ဢၼ်ပဵၼ်ၶုၼ်လူင် ၵူၼ်းၽီႉလိတ်ႉတီႉတင်းလၢႆၼၼ်ႉ ယူႇၵႃႈတီႈႁူးလၢင်းတဵၼ်မုင်ႈႁၼ်ဢီႉၸၢၵ်ႈ ယဝ်ႉယွၵ်ႇၵၼ်တင်းမေးမၼ်းရေႇပႅၵ်ႉၵႃႉၼၼ်ႉ ယူႇၼၼ်ႉသေယဝ်ႉ၊- 9ဢၽီႉမလႅၵ်ႉႁွင်ႉဢဝ်ဢီႉၸၢၵ်ႈလႄႈဝႃႈ၊ တူၺ်းလူး၊ မၼ်းၼၼ်ႉပဵၼ်မေးမႂ်းဢမၢၼ်ႇၶၼ်ပဵၼ်ဢေႃႈ။ ၵူၺ်းၵႃႈ ႁဵတ်းသင်လႄႈမႂ်းလၢတ်ႈလႄႈဝႃႈ၊ မၼ်းပဵၼ်ၼွင်ႉယိင်းၵဝ်ဢေႃႈ၊ ဝႃႈၼင်ႇၼႆၼင်ႇႁိုဝ်၊ မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊ ဢီႉၸၢၵ်ႈလဝ်ႊလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ၵဝ်ၶႃႈဝႃႈ၊ ၵူဝ်ၵဝ်တၵ်းတၢႆၵွပ်ႈပိူဝ်ႈမၼ်းဢေႃႈ၊ ဝႃႈၼင်ႇၼႆၼၼ်ႉလႄႈ ၸင်ႇပဵၼ်ၶႃႈယဝ်ႉ၊ ဝႃႈၼင်ႇၼႆဢေႃႈ။- 10ၶုၼ်ဢၽီႉမလႅၵ်ႉၵေႃႈလၢတ်ႈလႄႈဝႃႈ၊ လွင်ႈတၢင်းဢၼ်မႂ်းႁဵတ်းတီႈႁဝ်းၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ ပေႃးသေၵေႃႉသေၵူၼ်း ဢမ်ႇႁဵတ်းသတီႉလႄႈၵႂႃႇယူႇလူၺ်ႈၼွၼ်းလူၺ်ႈမေးမႂ်းၸိုင်၊ မႂ်းတၵ်းႁႂ်ႈဢပႅတ်ႈႁွတ်ႈထိုင်ၵႃႈၼိူဝ်ႁဝ်းလူင်ပႄႇ၊ ဝႃႈၼင်ႇၼႆသေယဝ်ႉ၊- 11ၶုၼ်ဢၽီႉမလႅၵ်ႉသမ်ႉ သင်ႇလၢတ်ႈတီႈၶႃႈမၼ်းၵူၼ်းမၼ်းတင်းသဵင်ႈတင်းလူင်ဝႆႉလႄႈဝႃႈ၊ ၵေႃႉဢၼ်ၽိတ်းပိူင်ႈသွင်ၶႃၽူဝ်မေးၼၼ်ႉ တၵ်းလႆႈၶၢမ်ႇတၢင်းတၢႆဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။
12 ဢီႉၸၢၵ်ႈဝၢၼ်ႇၸိူဝ်ႉဝၢၼ်ႇၽၼ်းၵႃႈတီႈမိူင်းၼၼ်ႉလႄႈ ပီႊၼိုင်ႈၼၼ်ႉမၼ်းလႆႈသိမ်းဢဝ်မၢၵ်ႇဢဝ်ႁူင်းပၢၵ်ႇပုၼ်ႈဢေႃႈ။ ထႃႇဝရႃႉၽြႃးၵေႃႈ ပၼ်တၢင်းလီတီႈမၼ်းဢေႃႈ။- 13မၼ်းၼၼ်ႉယႂ်ႇၽႄႈၼမ်ၵိုၼ်းမႃးလႄႈ ယႂ်ႇၵႂၢင်ႈတူဝ်းတွၼ်းယူႇတႃႇသေႇ တေႃႇထိုင်ႁွတ်ႈမၼ်းလႆႈပဵၼ်ၵေႃႉဢၼ် ယႂ်ႇၽႄႈၼမ်ၵိုၼ်းမႃးၼႃႇလူင်လၢင်ဢေႃႈ။- 14မၼ်းပျေႉၸုမ်ႇလိူင်ႇၸႂ်မၢၵ်ႈမီး ၽုင်သူဝ်းလႂ်၊ ၽုင်ဝူဝ်းလႂ်၊ ဢိၵ်ႇတင်းၶႃႈၵူၼ်းဢၼ်ၼမ်ၼႃႇလႂ်ဢေႃႈ။ ပိူဝ်ႈၼႆလႄႈ ၵူၼ်းၽီႉလိတ်ႉတီႉတင်းလၢႆ ဢွၼ်ၵၼ်သီႈၵေႉႁေႈတႃမၼ်းဢေႃႈ။- 15ၶဝ်ဢွၼ်ၵၼ်ဢဝ်လိၼ်ထူမ်ဢိုတ်းၼမ်ႉမေႃႇ ဢၼ်ၶႃႈပေႃႈမၼ်းၶုတ်း ၼႂ်းၶိင်ႇပၢၼ်ပေႃႈမၼ်းဢႃႇပြႃႇႁၢမ်ႇၼၼ်ႉ ၵႃႈမီး တင်းသဵင်ႈတင်းလူင်ပႅတ်ႈသေဢေႃႈ။- 16ၶုၼ်ဢၽီႉမလႅၵ်ႉၵေႃႈလၢတ်ႈတီႈဢီႉၸၢၵ်ႈလႄႈဝႃႈ၊ မႂ်းၼႆႉတၼ်းၶူဝ်းယႂ်ႇၼႃႇသေႁဝ်းဢေႃႈ။ ဢွၵ်ႇသေၵႃႈတီႈႁဝ်းၼႆႉၵႂႃႇတႃႉ၊ ပိူဝ်ႈဢၼ်ဝႃႈၼင်ႇၼႆလႄႈ၊- 17ဢီႉၸၢၵ်ႈဢွၵ်ႇသေၵႃႈတီႈဝဵင်းၼၼ်ႉၵႂႃႇသေယဝ်ႉ၊ မုင်းမူဝ်းၵႃႇမၼ်းၵႃႈတီႈပၢင်ႇႁူၺ်ႈၵေႇရႃႇလႄႈယူႇဢေႃႈ။
18မိူဝ်ႈၼၼ်ႉဢီႉၸၢၵ်ႈသမ်ႉ မႄးၶုတ်းၼမ်ႉမေႃႇဢၼ်ၶႃႈပေႃႈမၼ်းဢႃႇပြႃႇႁၢမ်ႇၶုတ်းဝႆႉ ဢၼ်ၵူၼ်းၽီႉလိတ်ႉတီႉတင်းလၢႆ ထူမ်ပႅတ်ႈလိုၼ်းသေပေႃႈမၼ်းတၢႆယဝ်ႉၸိူဝ်းၼၼ်ႉလႄႈ ၶိုၼ်းႁွင်ႉႁဵၵ်ႈၸိုဝ်ႈသဵင်မိူၼ်ၸိူဝ်ႉၼင်ႇဢၼ်ပေႃႈမၼ်းႁွင်ႉႁဵၵ်ႈမိူဝ်ႈဢွၼ်တၢင်းၼၼ်ႉဢေႃႈ။- 19ၶႃႈဢီႉၸၢၵ်ႈတင်းလၢႆၵေႃႈၶုတ်းၵႃႈၼႂ်းပၢင်ႇႁူၺ်ႈၼၼ်ႉလႄႈထူပ်းၼမ်ႉဢွၵ်ႇႁူးဢေႃႈ။- 20ၵူၼ်းလဵင်ႉဝူဝ်းၵူၼ်းမဵဝ်းၵေႇရႃႇတင်းလၢႆ ႁိမ်ၵၼ်တင်းၵူၼ်းလဵင်ႉဝူဝ်းဢီႉၸၢၵ်ႈတင်းလၢႆလႄႈလၢတ်ႈဝႃႈ၊ ၼမ်ႉၼႆႉပဵၼ်ၼမ်ႉႁဝ်းဢေႃႈ၊ ဝႃႈၼင်ႇၼႆဢေႃႈ။ ပိူဝ်ႈဢၼ်ၶဝ်ႁိမ်ၵၼ်ၸိူဝ်ႉၼင်ႇၼၼ်လႄႈ ၼမ်ႉမေႃႇၼၼ်ႉၸိုင်၊ မၼ်းႁွင်ႉႁဵၵ်ႈၸိုဝ်ႈဢေးသိၵ်ႉဢေႃႈ။- 21လိုၼ်းၼၼ်ႉၶဝ်သမ်ႉၶုတ်းၼမ်ႉမေႃႇတၢင်ႇတီႈထႅင်ႈဢေႃႈ။ ၼမ်ႉမေႃႇၼၼ်ႉၵေႃႈ ပိူဝ်ႈဢၼ်သမ်ႉၶိုၼ်းႁိမ်ၵၼ်ထႅင်ႈလႄႈ၊ မၼ်းႁွင်ႉႁဵၵ်ႈၸိုဝ်ႈ သီႉတၼႃႉဢေႃႈ။- 22မၼ်းသမ်ႉၶၢႆႉသေ ၵႃႈတီႈၼၼ်ႈလႄႈသမ်ႉၶုတ်းၼမ်ႉမေႃႇ တၢင်ႇတီႈထႅင်ႈဢေႃႈ။ ၼမ်ႉမေႃႇၼၼ်ႉၸိုင်၊ ၵွပ်ႈပိူဝ်ႈဢၼ်ၽူႈလႂ် ဢမ်ႇႁိမ် ဢမ်ႇဢဝ်လႄႈ၊ မၼ်းႁွင်ႉႁဵၵ်ႈၸိုဝ်ႈရႁေႃးၽုတ်ႉသေလႄႈဝႃႈ၊ ပိူဝ်ႈဢၼ်ထႃႇဝရႃႉၽြႃးပၼ်ဢၶႂၢင်ႉဢၼ် ႁဝ်းလႆႈယူႇတေႃႈလဵဝ်ၼႆႉယဝ်ႉ၊ ႁဝ်းၼႆႉတၵ်းပဵၼ် တိုၼ်းပဵၼ်ႁွၼ်းၼမ်ၼႃႇလူင်လၢင်ၵႃႈတီႈမိူင်းၼႆႉဢေႃႈ၊ ဝႃႈၼင်ႇၼႆဢေႃႈ။
23ၵမ်းၼၼ်ႉ မၼ်းသမ်ႉလုၵ်ႉသေၵႃႈတီႈၼၼ်ႈလႄႈ ၶၢႆႉၵႂႃႇၸူးၵႃႈတီႈပေႇရသေႇၽႃႉဢေႃႈ။- 24ၼႂ်းၶိုၼ်းၼၼ်ႉ၊ ထႃႇဝရႃႉၽြႃးပေႃႇမႃးတီႈမၼ်းလႄႈလၢတ်ႈဝႃႈ၊ ၵဝ်ပဵၼ်ၽြႃးပေႃႈမႂ်းဢႃႇပြႃႇႁၢမ်ႇၼၼ်ႉဢေႃႈ။ ယႃႇပေမႆႈၸႂ်ၵႃႈသင်။ ၵဝ်မီးယူႇၽၢႆႇမႂ်းဢေႃႈ။ ၵဝ်တၵ်းပၼ်တၢင်းလီတီႈမႂ်းဢေႃႈ။ ၵဝ်တၵ်းႁႂ်ႈၸိူဝ်ႉၶိူဝ်းမႂ်းယႂ်ႇၽႄႈၼမ်ၵိုၼ်းမႃး ၵွပ်ႈပိူဝ်ႈၶႃႈၵဝ် ဢႃႇပြႃႇႁၢမ်ႇၼၼ်ႉဢေႃႈ၊ ဝႃႈၼင်ႇၼႆဢေႃႈ။- 25မၼ်းတႄႇႁဵတ်းယိတ်ႈပလၢင်ႇၵႃႈတီႈၼၼ်ႈလႄႈ ႁဵတ်းပထၼႃႇတီႈၼႃႇမႃႉၸိုဝ်ႈသဵင်ထႃႇဝရႃႉၽြႃးဢေႃႈ။ မူဝ်းၵႃႇမၼ်းၵေႃႈ မၼ်းမုင်းလႄႈ ၶႃႈမၼ်းတင်းလၢႆၶုတ်းၼမ်ႉမေႃႇထႅင်ႈဢေႃႈ။
ၶုၼ်ဢၽီႉမလႅၵ်ႉတင်းဢီႉၸၢၵ်ႈဝႆႉၵတီႉတီႈၵၼ်
26မိူဝ်ႈၼၼ်ႉၶုၼ်ဢၽီႉမလႅၵ်ႉ ႁွင်ႉဢဝ်ၵေႃႉသေႈမၼ်းဢႁူႉၸတ်ႉ ဢိၵ်ႇတင်းၵႄႇႁူဝ်သိုၵ်းမၼ်းၽီႉၵေႃးလႃႉလႄႈ လုၵ်ႉသေ ၵႃႈတီႈဝဵင်းၵေႇရႃႇၵႂႃႇၸူး ၵႃႈတီႈမၼ်းဢေႃႈ။- 27ဢီႉၸၢၵ်ႈၵေႃႈထၢမ်လႄႈဝႃႈ၊ သူၸဝ်ႈၶၢၼ်ႉႁၼ်ၵဝ်လႄႈ ႁေႃႈၵဝ်ဢွၵ်ႇသေၵႃႈတီႈသူသေယဝ်ႉ၊ ႁဵတ်းႁိုဝ်လႄႈ မႃးၸူးၵႃႈတီႈၵဝ်ၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 28ၶဝ်ၵေႃႈလၢတ်ႈလႄႈဝႃႈ၊ ပိူဝ်ႈဢၼ်ႁဝ်းႁူႉႁၼ်လွင်ႈဢၼ်ထႃႇဝရႃႉၽြႃးမီးယူႇၵႃႈတီႈၽၢႆႇမႂ်း ဢမၢၼ်ႇၶၼ်ပဵၼ်လႄႈ ႁဝ်းဝႃႈ ႁႂ်ႈသဵတ်ႈၸႃႇၵတီႉမီး ဝူင်ႈၵၢင်ႁဝ်းဢၼ်ဝႃႈ ဝူင်ႈၵၢင်ႁဝ်းတင်းမႂ်းလႄႈႁႂ်ႈႁဝ်းႁဵတ်းပတီႉၺိၺ်ႇလူၺ်ႈၵၼ်တင်းမႂ်း၊- 29လွင်ႈဢၼ်မႂ်းတၵ်းဢမ်ႇႁဵတ်းဢပႅတ်ႈ တီႈႁဝ်းၸွမ်းၵႃႈၼင်ႇဢၼ်ႁဝ်းဢမ်ႇတိူဝ်ႉဢမ်ႇၶိူၵ်ႈမႂ်း၊ ႁဵတ်းၵျေးၸူးၵူၺ်းလႄႈ ပွႆႇမႂ်းၵႂႃႇၼိမ်ၼိမ်လီလီၼၼ်ႉတႃႉႁဝ်း။ တေႃႈလဵဝ်ၼႆႉမႂ်းပဵၼ်ၵေႃႉဢၼ်ထႃႇဝရႃႉၽြႃးပၼ်တၢင်းလီယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 30မၼ်းၵေႃႈႁဵတ်းပွႆးၵိၼ်ပွႆးၶူပ်းပုၼ်ႈၶဝ်လႄႈဢွၼ်ၵၼ်ၵိၼ်ၶူပ်းဢေႃႈ။- 31ၶိင်ႇၵၢင်ၼႂ်ၸဝ်ႉၸဝ်ႉၶဝ်လုၵ်ႉလႄႈၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ႁဵတ်းသဵတ်ႈၸႃႇၵတီႉတီႈၵၼ်သေယဝ်ႉ၊ ဢီႉၸၢၵ်ႈ ပွႆႇၶဝ်လႄႈ၊ ၶဝ်လႆႈမိူဝ်းၵႂႃႇၼိမ်ၼိမ်လီလီဢေႃႈ။- 32ၼႂ်းဝၼ်းၼၼ်ႉၶႃႈဢီႉၸၢၵ်ႈတင်းလၢႆ ဢွၼ်ၵၼ်မႃးလၢတ်ႈလွင်ႈၼမ်ႉမေႃႇဢၼ်ၶဝ်ၶုတ်းၼၼ်ႉတီႈမၼ်းလႄႈဝႃႈ၊ ႁဝ်းၶႃႈလႆႈထူပ်းႁၼ်ၼမ်ႉယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 33မၼ်းႁွင်ႉႁဵၵ်ႈၸိုဝ်ႈၼမ်ႉမေႃႇၼၼ်ႉသေးၽႃႉဢေႃႈ။ ပိူဝ်ႈၼႆလႄႈ ဝဵင်းတီႈၼၼ်ႉၸိုင်လႆႈႁွင်ႉႁဵၵ်ႈၸိုဝ်ႈ ဝဵင်းပေႇရသေႇၽႃႉ ႁၢၼ်ႉတေႃႇဝၼ်းမိူဝ်ႈၼႆႉဢေႃႈ။
34 ဢေးသေႃးၼၼ်ႉမိူဝ်ႈဢၼ်ဢသၢၵ်ႈလႆႈသီႇသိပ်းပီႊၼၼ်ႉၸိုင်၊ ပဵၼ်ႁိူၼ်းပဵၼ်ယေးလူၺ်ႈၵၼ်တင်း ယူႉတိတ်ႉ၊ လုၵ်ႈယိင်းပေႇရီႉ၊ ၵူၼ်းႁိတ်ႉတီႉ၊ ဢိၵ်ႇတင်းပႃႇသမတ်ႉ၊ လုၵ်ႈယိင်းဢေႇလုၼ်ႇ၊ ၵူၼ်းႁိတ်ႉတီႉၸိူဝ်းၼၼ်ႉဢေႃႈ။- 35မႄႈယိင်းၸိူဝ်းၼၼ်ႉပဵၼ်လွင်ႈဢၼ်မႆႈၸႂ်ယၢပ်ႇၸႂ်တီႈဢီႉၸၢၵ်ႈတင်းရေႇပႅၵ်ႉၵႃႉဢေႃႈ။
Právě zvoleno:
ငဝ်ႈၵမ်ႇၽႃႇ 26: CBMS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Copyright © 2021 by OMF International, Shan Baptist Churches Fellowship