MAWOOKIONYI 15
15
Mkundana fo Ruwa na Abramu
1Isho shose shameida, idedo lya Mndumii-Ruwa likachea Abramu ndodonyi, lyehamba, “Manya kulaowuo Abramu! Inyi nyi ngawo yapfo na njechikuinenga mboṟa ing'anyi mnu.” 2Abramu kahamba, “Ewo, Mndumii RUWA, ki ochinjiinenga, na inyi njikeri ikuhendya ndawode ma mana, na ichu echiitoṟia mba ii yako na Elieseri chu Mdamasko?” 3Abramu kahamba, “Ambuya ulennenga luwapfo, na isinga lyi lyilefeeo kunu kanyi koko nyio mokyooṟa oko.”
4Nalyo idedo lya Mndumii-Ruwa lyikamchea lyehamba, “Ichu echikuoṟapfo, kya indi msa echiwuka kitsinyi kyapfo nyio echiduo kyooṟa kyapfo.” 5 Kamwiitsa na nja, kahamba, “Keambuya ipfo ruwehu wulalu, keitala nyenyeri, kokoya kochiidima itsiitala. Kammbia nyi wudo oshari lopfo lochipfumbuka.” 6 Abramu kaidikia Mndumii-Ruwa, na Mndumii-Ruwa kamtana nyi o wusumhanyi. 7Nahongu kambia, “Inyi nyi Mndumii, njilekuende wokia Uri ya Wakaldayo njikuinenge orukalu luwe kyooṟa kyapfo.”
8Abramu kahamba, “Ewo Mndumii-Ruwa, njechimanya njida ke iki nyi kyooṟa kyako?” 9Mndumii-Ruwa kambia, “Njiendie taho ya maaka iṟaṟu na suwana ya maaka iṟaṟu, na suwa ya maaka iṟaṟu, na mbeta, na ialea lya mbuna.” 10Nao kamwendie isho shose, kashipaṟa njora tsiwi kashileṟia orio kipeṟengu kikaambuyana na kingi, indi shilehe shilya nalashipaṟe. 11Na lilya mandi mbeṟo tsilelaa huya mnying'a iya Abramu katsifuna. 12 Na lilya mnengeṟi fuleolokya Abramu kawado nyi mado ha mnengerile kawado nyi wuowu kipfa kya mema fung'anyi. 13 Mndumii kawia Abramu, “Nomanye lohi ke oshari lopfo wechiwa wahenu orukenyi lulai lowo, wechisingia wandu wo, nawo wechiwalisa wukiwa maaka mahana haana (400). 14 Na mkambofo, wechiwasingia, njechiwaanduya numa, wechiwukapfo na masaa hafoi. 15Kyaindi iyo nochihenda ko wandee wapfo na nakipuo, nochiṟiko kuwode wuku wucha. 16Na njukuna tsapfo wechiwuya na iya kyamba wunyamaṟi wo Waamori womeawukiapfo.”
17Naalyo lilyamandi mnengeṟi fuleolokia kukaho meema, ambuya, tuṟukumbi ya mtsu, na olewo lo modo lukaida kiidi kya shipeṟengu shilya sha nyama.
18 Mkonu fulya Mndumii kawika mkundana na Abramu, kambia, “Oshari lopfo ngaluinenga orukalu, wokia meda fo Misri tane medafo fung'anyi, meda fo Frati. 19Mkeni, Mkenazi, Mkadimoni, 20Mhiti na Mperizi na Mrefai, 21na Mwamori, na Mkanaani, na Mgirgashi, na Myebusi.”
Právě zvoleno:
MAWOOKIONYI 15: KIM2
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kimochi Bible © Bible Society of Tanzania, 2016.