Luka 18
18
Umulonzi umuvivi
1Pʼahavavuzya nishiholanyo ukuti umuntu pakuti aputaje shima shisitakuhatampa. 2Ahati: Alipo wokʼumulonzi munkaya yoka, wʼatahamunyilaga nuMulungu, wʼatali ninsoni nakuvantu. 3Ilelo munkaya mumwo mwʼali wope numwantandʼumuzishe, wʼahasusuntaga kukwakwe, ahati: Undonjelʼumulandu wane kulʼula wʼakundanduzya shima. 4Isutʼuwene ahasitʼukumulonjela. Ulwa pisinda nyene pʼahayivuzya weka ahati: Pope nashengʼuMulungu ntakumunyilʼine nakuvantu nte ninsoni, 5popʼumwantandʼumuzishʼuno nkumulonjelʼumulandu wakwe shʼakundisya, ulwa pisinda ayinze nukunzumila lwʼakumpepeshela. 6Pʼuwenʼahati: Simwiṿwe zyʼakuyangʼumulonzi umwalanganʼuno. 7UwenʼuMulungu lelo pʼatinjʼasitaje ukugoloshezyʼamalandu ga vasavulwa vakwe ve vakuvilishila kukwakwe nashamusanya nashavusiku, wʼakwolovela shisitamulaha kuli vuvo? 8Muleshe mbavuzyʼine: Atalihavʼuwene ukugoloshezyʼamalandu gavo. Apene nyene lwengʼayinzilʼuMwanamuntu, amwe pʼaliyagʼulwitiho munsʼumu?
UmuFalisayi numusonkolamusonko
9Vamo nyene ve vahayiyangaga veka ukuva ve vagolosu, ve vahasufwʼavamwavo, vʼahavavuzyʼishiholanyʼishi. 10Avantu vavili vahazuva ukuvala mwa tempeli ukuputa. Woka ali muFalisayi, woka ali musonkolamusonko. 11PʼumuFalisayi ahimilila pupo, ahayiyanjila weka lwʼakuputa, ahati: We Mulungu, nkugwʼulupi kukwaho she nte fwe vanjʼavantu, navapumaṿintu navasheṿwʼavamwavo navavembu. Wope numusonkolamusonko wununo ntaholine nawo. 12Niṿintu nkufunga havilʼumulungu woka. Vwonti naṿwenga nkulonkʼine, ṿwe nkufumwa iṿwa pishumi. 13Uwenʼumusonkolamusonko wʼahimililʼukutali, ahanyilʼukwinulʼisheni kumwanya, ahayihoma pashifuva, ahati: We Mulungu, umfwilʼuvwila ne mutalamalandu. 14Leshi mbavuzyʼine: Uno wʼavweleye kuhaya muvugolosu amulusizyʼuwamwavo. She vonti venga vakuyimwamiha veka, ve vakwishilwa, vonti nyene venga vakuyisya veka, ve vakwimishilwa.
UYesu akulota avana avansi
15-17: Mat. 19,13-15. Mal. 10,13-16.
15Pe vahaleta navanʼavazelu kukwakwe ukuti avapalamansye. Avenʼavasundikwa nyene lwe vavawenyi, pe vahavapilila. 16UwenʼuYesu ahavita ahati: Simuleshʼavana vinze kukwane, mutavadinde. Shʼishinamwene sha Mulungu sha vuvo venga vali fwe vuvo. 17Nalyoli nkuvavuzyʼine nkuti: Uno wengʼishinamwene sha Mulungu atakushiposhela fwe mwana, wʼatalivalʼukwinjila nalumo.
Uvulanzi vwa shimashima nipunulo lya nsavo
18-30: Mat. 19,16-29. Mal. 10,17-30.
18Pe wokʼumuhombe ahamuvuzilizya ahati: Musambilizi umwinza, mbombe shonʼine isha kupwanʼuvulanzi vwa shimashima? 19UwenʼuYesu ahati: Ukuyanga shonʼuvwinza? Atalipo numo we mwinza, nkandʼuMulungu weka. 20Inkomelezyo uzimanyile: Utahavembuhaje, Utahagoje, utahivaje, utahamuhomeshezyaje shahʼuwamwinyu, umushindishe uso nuvinyu. 21Uwenʼahati: Zye nzilandite zyonti zinizi, mfumile nazyo kwe kuvunsi. 22Ilelo lwʼayiṿuye linilʼuYesu, pʼahamuvuzya ahati: Halipo hoka he hasyayʼiwe. Kazyaga nishuma shaho shonti, uvagavanyʼavapina, pʼuliva nishuma kumwanya. Inga pʼuyinzʼukundandatʼine. 23Uwene lwʼayiṿuye linili, pʼahaswimililwa nkani, shʼali wʼudumbwe nkani. 24UwenʼuYesu lwʼamuwenyi, pʼahati: Uvugomu te vugomu avahataṿwuma ukwinjila mushinamwene sha Mulungu! 25She ningamila ukutuha mwilyinso lya nsindano nudumbwe ukwinjila mushinamwene sha Mulungu—kupupusu ukutuhʼingamila mwilyinso lya nsindano. 26Avene ve viṿuye lwʼakuyanga, pe vahati: Pʼunanu akupona lelo? 27Uwenʼahavavuzya ahati: Nazye zivapositʼavantu, uwenʼuMulungu zitamuposite. 28PʼuPeteli ahati: Yenya, iswe tuṿilesile ṿwontʼiṿwitu, tukulandite wenewe. 29Uwenʼahamula ahati: Nalyoli nkuvavuzyʼine nkuti: Atalipʼumuntu numo wengʼalesile inyumba, numushi, navaninʼavanaṿuli, navapafi, navana pashinamwene sha Mulungu, 30wʼatakuvazilwa ukuposhela nakushinishi amashumʼishumi pali hoka hʼahalesile, mwope namula munsʼila yʼikwinza nuvulanzi vwa shimashima.
UYesu akukuvwa ulwa vutatu izya vufwe vwakwe
31-34: Mat. 20,17-19. Mal. 10,32-34.
31Pʼahasavuha navo avishumi navavili, ahavavuzya ahati: Yenyi, tukuzuva tukuvala ku-Yelusalemu, mwe zilisililishila zyonti zizyo zye vamusimbiye pakalata uMwanamuntu avakuvwi. 32ShʼuMwanamuntu aliyambililwa kuvakunzi, ve valimusamula, valimwizizya, valimuswila namati, 33valimusyempa, ilelo pe valimugoga. Pʼisiku lya vutatu nyene pʼalizyuhʼuwene. 34Avene vahapotwʼukuzimanyinsanya nazimo, nizwʼili lihava fwe ngati lizyihime kuli vuvo. Vahapotwa nukuzisinkamizya zyʼakuyanga.
UYesu akumupozya uwantonko
35-43: Mat. 20,29-34. Mal. 10,46-52.
35Avene lelo lwe vapalamiye ku-Yeliho, pʼumuntʼuwantonko atendime kwidala kuluvazu akulava iṿwa kulava. 36Wʼahi-ṿwʼumuligimbo wa vantu ve vahatuhaga, pʼahavavuzilizya ahati: Shintu vuli? 37Vahamuvuzya vahati: WʼuYesu wa mu-Nazaleti akutuha. 38Pʼuwenʼahavilishila ahati: Yesu, Mwana-Davidi, umpepelezyaje. 39Pʼavantu ve valongoleye kwilongolela vahamupilila ukuti apumaje. Uwene nyenʼahonjezyʼukuvilishila ahati: Mwana-Davidi, umpepelezyaje. 40PʼuYesu ahimilila ahalajizya ukuti aletwe kukwakwe. Ilelo lwʼapalamila pʼahamuvuzilizya ahati: 41Watinji ntuvuli nawe? Uwenʼahati: Mwene, inga nenyagʼaminso. 42PʼuYesu ahati: Yenyaga lelo. Lukuzuzuvushizizye lwe lwitiho lwaho. 43Pʼahenyʼapashezi. PʼahamutinihʼuMulungu, ahamulandatʼuYesu. Vonti navantu ve vahenyaga vahamushindihʼuMulungu.
Právě zvoleno:
Luka 18: NYi1965
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Nyiha New Testament © British and Foreign Bible Society, 1965.
