Yohani 5
5
Uwampungo pidimi lya mu-Betesida
1Pisinda pazinizi pʼahavʼuchaka woka wa vaYuda. Wope nuYesu ahazuva, ahavala mu-Yelusalemu. 2Ilelo mwe mu-Yelusalemu pashikwilo sha ngʼonzi, pe lilipʼidimi, izina lyakwe munjango ya shiHebuli vakuti Betesida. Lili lyali namavanza gasano. 3Mwe valambalayʼavantʼavinji nkani, avavinu navantonko navalemazu nave vakunyanyʼumuvili [vahagulililagʼaminzi ukuyinga. 4Shʼuhavizya ahihaga mumanda mumanda, ahinjila mwidimi, ahaṿwalanganyʼaminzi. Ilelʼuno wengʼatalisilʼukwinjila muminzi lwe ganzitʼukuṿwalangana, wʼahazuzuvuha impungo yonti yengʼali nayo]. 5Ilelo pupo pʼalʼumuntu wʼalinzite nimpungo yakwe amaha amashumi gatatu namahʼumunana pupo. 6UwenʼuYesu ahamwenya shʼalambalaye pupo, ahamanya ukuti adiliye nkani pupo, pʼahamuvuzilizya ahati: Ukasimʼukuzuzuvuha iwe? 7Pʼumuvinu ahamula ahati: Mwene, she nte nawo numʼumuntu uwa kuti ambishe mwidimi lwʼaminzi ganzitʼukuṿwalangana. Apene nyene lwe nkuvala neka, pe nkwagʼuwunji atalisile anchizile. 8PʼuYesu ahati: Vuhaga, sendagʼishilili shaho, ujendaje. 9Pʼumuntʼuno ahazuzuvuha pupo, ahasendʼishilili shakwe, ahajenda. Apene nyene pali pe pisabati umusanya wuyo. 10PʼavaYuda vahamuvuzyʼumuntʼuno wʼazuzuvusile vahati: She pe pisabati shinishi, mwiho ukunyatulʼishilili shaho. 11Uwenʼahavavuzya ahati: Umuntʼula wʼanzuzuvushizizye, wʼambuzizye atili: Sendagʼishilili shaho, ujendaje. 12Avene vahamuvuzilizya vahati: Wʼunanʼumuntu wuyo wʼakuvuzizye atili: Sendaga, ujendaje? 13Uwenʼumuntʼuno wʼazuzuvusile atamumanyile ukuti wʼunanu, shʼuYesu ayefile pe pala, she valʼavantʼimpuga pupo. 14Ulwa pisinda uYesu ahamwaga mwa tempeli, ahamuvuzya ahati: Yenya, uzuzuvusile shinishi, uyandaje lelo, utahavuyizyaje ukutalʼamalandu, zitahakwinzilʼimpiti nakulʼizi. 15Pʼahavalʼumuntʼuno, ahavavuzyʼavaYuda ukuti wʼuYesu wʼamuzuzuvushizizye. 16Mwe mumwo avaYuda vahamuṿwimʼuYesu, shʼavomṿile zinizi pisabati. 17UwenʼuYesu ahavamula ahati: UTata ine avomṿile afisile kushinishi uku. Nane she nkonzizye, nane nkuvomba. 18Lye lilyo vahonjezyʼavaYuda ukuti tumugoje, she vatili: Atatazile uno weka uwa kuvindulʼisabati ndali, ayonjezizye nilya kuti uMulungu we wʼuYise, ilelo mwe munumu kwe kuvʼakuti nkoline nuMulungu ine.
UYesu akulondovola ṿwʼakumusuvilʼuYise
19PʼuYesu ahamula ahavavuzya ahati: Nalyoli lyoli, nkuvavuzyʼine nkuti: UMwana atamanyilʼukuvomba nimʼiyakwe wuyo, yiyo nyene yengʼamuwenyi akuvombʼuYise, ye yiyo akuvomba wope. She yonti yengʼakuvomba wuyo, ye yiyo wope nawe Mwana akuvomba. 20ShʼuYise amukunzitʼuMwana, mwe mumwo akumulanganizya yonti yengʼakuvomba. Havili alimulanganizya nizinjʼimbombo impiti nakulʼizi zye muwenyi, izya kwinzʼukuvasukumizyʼimwe. 21Shʼinza shʼuYise akuzyusyʼavafwe, akuvapʼuvulanzi, shʼahonzizye wope nawe Mwana, akuvapʼuvulanzi vonti vengʼakasimʼukuvapa. 22ShʼuYise atakulonga numʼumuntu ndali, vwontʼuvulonzi amulesheye we Mwana, 23vontʼukuti vamunyilajʼuMwana inza she vakumunyila nawe Yise. Shʼuno wengʼatakunyilʼuMwana, wʼalesile ukumunyila nawe Yise wʼamutumile. 24Nalyoli lyoli nkuvavuzyʼine nkuti: Uno wengʼakwiṿwʼizwi lyanʼine nukumwitiha wuyo wʼantumilʼine, wʼali navwo uvulanzi vwa shimashima, wʼatakufiha pilonjelwi, nkandi apoye muvufwe, ayinjiye muvulanzi. 25Nalyoli lyoli nkuvavuzyʼine nkuti: Hakwinzʼahavalilizyo, hafisile nashinishi, pʼavafwe valiyiṿwʼizwi lya Mwana wa Mulungu, ilelo vonti venga viṿuye valandite. 26Shʼinza shʼuYise muhatavulanzi wuyo, shʼamupiye vovulo wope nuMwana ukuti avanje muhatavulanzi wope. 27Gope namaha ga kulonga amupiye, she Mwanamuntu uwene. 28Zye mutaganduhaje zinizi, she hakwinzʼahenʼahavalilizyo, pe vontʼava ve vali mumbipa valiyiṿwʼizwi lyakwe, 29pe valifuma, avene ve vahavombaga zye nyinza ve valizyushila kuvulanzi, avene nyene ve vahavombaga zye mbivi ve valizyushila kwe kulongwa.
Uvwahome vwa kumuhomeshezyʼu Yesu
30Ine ntamanyilʼukuvomba nahamʼahane nene neka. Lwe nkulongʼamalandu ine, pe nkulonga mumwo mwe niṿuye nane. Mwe munumu nazye nkulonga ngolosu vwelele, she ntakwanza zye nkasime nene ndali, nkwanza zizyo zyʼakasime wuyo wʼantumilʼine.
31Inga nayihomeshezyaga nene neka, pe nkandi uluhomeshezyo lwane lute lwa nalyoli. 32Alipʼuwunji nyene wʼakunkomeshezyʼine, nane manyile ukuti uluhomeshezyo lwakwe lwʼakunkomeshezyʼine lwe lwa nalyoli. 33Imwe mwatumile kwa Yohani, pʼuwene ahahomeshezyʼizya nalyoli. 34Nkandʼine ntakuposhelʼuluhomeshezyo lwa muntu ndali, nkandi nkuvavuzya zinizi ukuti mupone namwe. 35Uwene ali nyale yʼikwaha ikuhozya. Nkandʼimwe mwasungwʼukwizya hamo mululangalilo lwakwe. 36Nkandʼine ndi nalwʼuluhomeshezyʼulupiti nakulwa Yohani: Imbombo zyʼampiyʼuTata zyʼatili uzimalilizyaje. Zye mbombʼizi zye nkuvombʼine, zye zikunkomeshezyʼine, zikunjanga ukuti antumilʼuTata ine. 37Wope nawe Tata wʼantumilʼine, wʼankomeshezizye. Imwe nyene izwi lyakwe mutiṿuye nalumo, nishati shakwe mutawenyi. 38Lyope nizwi lyakwe lye likusyelemetela muhati mumwinyu mute nalyo, shʼuno wʼamutumilʼuwene, we mutakumwitiha. 39Mukwanza muvakalata, she mukuti mwe tukuvwagʼuvulanzi vwa shimashima, she vuvo vakunkomeshezyʼine. 40Havilʼimwe mukusitʼukwinza kukwane ukusendʼuvulanzi. 41Ine ulushindiho ntakuposhela kuvantu. 42Imwe nyene mbamanyilʼine ukuti ishikunzi sha Mulungu mute nasho muhati zyinyu. 43Ine ninzile mwizina lya Tata, nkandi mutakuntangana. Uwunji ingʼakwinza mwizina lyakwe wuyo we mulimutangana. 44Mwe mwitihaje vuli mwe mukushindinkana ulushindiho mwe vuvo vatupu, nkandi ulwenʼulushindiho lwa kwa Mulungu, wuyo wʼali woka mwene, lwe mutakulwanza? 45Mutatinji ingavanga nkuvalonjelela nene kwa Tata ndali; alipʼuwene wʼalivalonjelela, we wʼuMose we mukumusuvila imwe. 46Inga mwamwitihagʼuMose, pe nkandi mukunitiha nane, shʼuwene azisimṿile zye zikunjanga ine. 47Apene nyene inga mutakwitiha nave vakalata vakwe, pe mwati mwitishe vuli amazwi ge nkuyangʼine?
Právě zvoleno:
Yohani 5: NYi1965
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Nyiha New Testament © British and Foreign Bible Society, 1965.
