Lucas 2
2
Ku Jesús kye'exy
1Nit ku y'ijjty Augusto yëkkuttüky jäm Roma, jä'äts ojts tpawa'any jäts nitukkë'yë jaa'y yëkjaymyuktë't mapaat kyuttujjkë'n jya'aty. 2Ku najj muttu'kyaajjë jaa'y yëkjaymyujjky, Quirinio y'ijjty yëkkuttujkp jäm Siria. 3Najjts kuwanë nitukkë'yë jaa'y ojts pyaatyë jäts nyajyaypyättëtë't kyajjpkëjxm.
4Jakëjxts José tsyoo'jny mëët María jäm Nazaret, Galilea y'itjotm, jäts nyijkxy Belén, Judea y'itjotm, maj kye'ejxy yëkkuttujkpë David, jä'ku David jä' nyaskä'äxë José. 5Jämnë'ts y'ijjty María una'ajnk tnikkëjxmë ku ojts nyakjyaypyetyëtë. 6Jäm y'ijjtytë Belén, ku María y'uu'nk pyo'paajty. 7Jämts kyoop'uu'nk kye'ejxy, jäts María txaa'jtsy nits t'atsää'jn'ëëy kaaj jyëë'kx'ëënyjyötypy jä'ku kä'ä y'ijjty maj tëjjk y'ok'awa'ats'eenyë jäts myaakta'ntë't.
Worrekë ijxpëttëjjk mëët Yës Teety tyumpëttëjjk mati' jäm tsapjotm
8Jäm Belén kyajjp'am y'ijjty ni'ey jaa'y wyorrekë twintsunaxtë. 9Ku atsu'ujky t'ijxpat'të tu'uk Yës Teety tyumpë mati' jäm tsapjotm mimp, nits Yës Teety myëj'ajjt nyijajjëtë nyittëë'kxëtë; jäts mëjk atsë'ëjk'ajjtëtë. 10Jäts Yës Teety tyumpë nyëë'mxëtë: «Katij mtsë'ëkëtë, oy myatya'aky ëjts ixyam nyëkmimpy, mati' nitukkë'yë naajx kajjp tyaxonta'aktë'p: 11Tëj ixyam kye'exy tu'uk yëknitsokpë jäm David kyajjpjotm, jä' Cristo, niwintsën. 12Najj jä' una'ajnk x'ijxkaptë't, xaatsy jä' xpaat'të't y'atsään'ätyë kaaj jyëë'kx'ëë'nyjyötypy.»
13Nits jyak'kä'äxjë'ktë, jawäänë nimay Yës Teety tyumpë mati' jäm tsapjotm, jäts najj y'ijjty Yës Teety twin'ëwtë:
14«¡Mëjjkexy Yës Teety jäm tsapjotm!
¡Jotkujjk'ajjt jyakyäjptë'p naxwiinë't jaa'y pënjäty taxontë'p Yës Teety
pyuttëjjk'ëë'ny!»
15Ku Yës Teety tyumpë wyimpijtkëjxnëtë jäm tsapjotm, nits worrekë ijxpëttëjjk nyawyan'axajjëtë tu'uk janitu'uk:
—Wä'nts tjaa'myë'n t'ijxyë'n titëj tyünyë jäm Belén, mati' tëj Yës Teety tyumpë xwaajnjaa'yë'n.
16Nits jottakkoy nyëjkxtë Belén, jämts tpat'të María mëët José jäts maaxy'uu'nk y'atsään'ätyë kaaj jyëë'kx'ëë'nyjyötypy. 17Kuts najj t'ijxtë, nits tmatyak'axajjtë tukkë'yë ntsoj Yës Teety tyumpë tëj maaxy'uu'nk tnikkäjpxy tnimatya'aky. 18Jäts nitukkë'yë jaa'y pënjäty tmatootë attëy'ajat ttattantë ntsoj y'ijjty worrekë ijxpëttëjjk myatya'aktë. 19Jäts María y'am jyotm jä' tukkë'yë tpëjjkjë'ëky jäts tjaa'myetsy tijjäty y'ijjty tëj tyünyë. 20Nits worrekë ijxpëttëjjk wyimpijtkëjxnëtë oy jotkujjk jäts Yës Teety t'ëëjëtë ttaxonta'aktë, ku t'ijxtë jäts tëj kyuytyünyë naa'xkë'n y'ijjty tëj yyëknëëjmëtë.
Jesús, Yës Teety yyëktakkë'tëkkë tsaptijkypy
21Kyutuktujjk xëëw una'ajnk ttsujktë naa'xkë'n jä' tkajjpëtë, jäts txëëwmoytyë Jesús, naa'xk María ojts nyee'mxyë Yës Teety tyumpë mati' jäm tsapjotm mimp ku kä'änë'm y'ijjty y'uu'nkpaaty.
22Ku pyuujky wixtekxy xyëëw jäts nyakwya'atsëtë't naa'xkë'n Moisés pyawaa'n yä'äny, nits y'uu'nk tmunëjkxtë Jerusalén jäts Yës Teety ttakkë'tëkkëtë't. 23Jakëjxts jä' najj ttuntë jä'ku najj jaywyety myiny Yës Teety pyawaa'nkejxypy, maj yä'äny: «Tukkë'yë mijxy'uu'nk mati' jawyiin kä'äxp, Yës Teety jä' yëktakkë'tëkkë'p.» 24Nits nyëjkxtë jäts twintsë'ëkëtë't Yës Teety naa'xk jä' pyawaa'nkejxypy yä'äny: mäjtsk mujkxkuuk ok mäjtsk maaxyjyon'uu'nk.
25Nit'ämpy, jäm y'ijjty tu'uk yaa'ytyëjjk jyükyë Jerusalén mati' txëëw Simeón. Oyjyaa'y nits tëy wa'ats Yës Teety tmuttüny, jä'äts y'ijjty y'a'ijxypy jäts Israelë'tjaa'y nitsoojkë'n tpaatt. Jämts y'ijjty Simeón tjakyepy Yës Teety jyaa'wë'n, 26jä'äts y'ijjty tëj tyanijaw'ätyë nits kä'ä y'ookt kunë'm t'ijxt yëknitsokpë, mati' Yës Teety pyakkäxp. 27Jä' xëëw Simeón Yës Teety jyaa'wë'n pyakkäjjxë tsaptëjkm; Kuts Jesús tyeety tyaak myunëjkxë jäm tsaptëjkm, jäts tkuytyu'ntë't naa'xkë'n pawaa'n jaywyety myiny. 28Nits Simeón tsee'jny una'ajnk jäts ttaxontaajky Yës Teety, nits wyaany:
29«Wintsën, tëj xkuytyüny mwanta'aky:
ixyam oy jotkujjk mtumpë y'oo'jkë'n t'a'ijxnë't.
30Jä'ku tëj ëjts n'ijxy nitsoojkë'n
31mati' tëj xtun'axajjy
ijxnë kä'xnë jä' tukkë'yë naajx kajjp wyinkujjky,
32jä' ajajjk mati' tyuu'wawë'p tukkë'yë naxwiinë'tjaa'y
jä'äts nijkxy mkajjp Israel ttamëjjke'exy.»
33Attëy'ajat tyantë José mëët María ku tmatootë ntsoj Simeón una'ajnk tnikkäjpxy tnimatya'aky. 34Nits Simeón kyunuu'kxëtë, jäts María yyëknëëjmjaay:
—Tëj Yës Teety ya'at una'ajnk tkexy, yë' këjxm Israelë'tjaa'y nimay nitsoojkë'n tpaat'të't ok y'ayoo'npaat'të't. Yë'ëts jä' tu'uk ijxpäjjtë'p mati' nijkxy nimay jaa'y tkattëyjyawëtë, 35najjts yyëknijawë't yëkxon ntsoj tu'uk janitu'uk jaa'y wyinmaytyë. Jäts mijts María najj nijkxy m'ayoy naa'xk tu'uk tsujjx tëj m'am mjotm mtanäxyë.
36Jäm y'ijjty mëët tu'uk yëk'ayuujknajxpë to'oxytyëjjk, mati' txëëw Ana, Penuel nyëëx, Aser nyaskä'äxë. Majaa'ynyë jä' y'ijjty. Namyutsk jä' y'amäjtsk'ajjty, jäts wixtujjk jumëjjt jä'yë y'amäjtsktsënaay; 37Majktaxk'ii'px jamajktaxk jumëjjt y'ijjty maj kyu'oo'jkë. Jäjp jä' y'ijjty tsaptijkypy kyapitsemy, jaxëëjny jakkoots jä' nyuu'kxta'aky, y'ayuujjë najjts Yës Teety tmuttüny. 38Niyam y'ijjty Simeón tmëëtnakyäjpxyë José mëët María, ku Ana Yës Teety ttaxontak'axajjy nits tnikkäjpxy tnimatyaajky pën jä' una'ajnk, jäts jaa'y ttawinjaa'wëkyëjjxy pënjäty y'ijjty t'a'ijxtë'p nits Jerusalénkë'tkajjp nitsoojkë'n tpaat'të't.
Ku wyimpijtnëtë Nazaret
39Kuts tukkë'yë tkuytyunkëjxtë ntsoj Yës Teety pyawaa'n jaywyety myiny, nits wyimpijtnëtë Galilea, kyajjpjötypy mati' txëëw Nazaret. 40Najjts y'ijjty una'ajnk yeeky mëjk majaaw, nits këjx'am nijaa'w'ëë'ny tjakyepy jäts mëët y'ijjty ttaxöny Yës Teety pyuttëjjk'ëë'ny.
Mijxy'uu'nk Jesús yyëkpaaty tsaptijkypy
41Jäts Jesús tyeety tyaak ijtp jä' y'ijjty nyëjkxtë winjumëjjt Jerusalén, Pascua xëëw'it. 42Ku Jesús y'appejjty majkmäjtsk jumëjjt, jämts nitukkë'yë nyëjkxtë naa'xk jä' ijtp ttuntë winjumëjjt ku jä' xëëw tpaaty. 43Kuts xëëw kyukkëjjx'ëëy, nits wyimpijtnëtë tyëjkëntüjpy, jäts Jesús tyaany jäm Jerusalén nikkä' tyeety tyaak tkumaytyë. 44Najj jä' y'ijjty wyinmaytyë jäts jämjä' jaa'y'akujkm tyuu'yo'oy. Tëj y'ijjty tu'kxëëw tyuu'yo'ynyëtë; nits tjo'kyëktëënëtë pyamyuku'uktëjjk jäts mëët jaa'y pënjäty myëëtnamyaajyëtë'p, 45nikkä' jä' tpat'të. Jakëjxts wyimpijt'të Jerusalén jäts jäm t'ijxta'atë't.
46Kyutuwëëk xëëw ojts tpaat'të tsaptijkypy, jäjp tmëëttsëënë pawaa'n yëk'ixpëjkpëttëjjk, y'ixpëjjkë'n tmatoojjë, jäts tyëktëy tyëktu'mtsë tukkë'yë tijjäty y'ijjty kyawinjaa'w'eepy. 47Jäts nitukkë'yë pënjäty mmatoojjë'p attëy'ajat ttattantë ntsoj y'ijjty una'ajnk winjaa'w'ajjt tjakyepy jäts ntsoj mëët y'ijjty y'atsoowimpity. 48Kuts tyeety tyaak y'ijxpaajtë, attëy'ajat mëët tyantë; nits tyaak nyëë'mxë:
—Uu'nkënaj, ¿tikëjxts najj m'atë'ëtsy? Jamay jattaj ëëts mijts n'ijxtay'ooky.
49Nits Jesús y'atsooy:
—¿Tits ku ëjts miits x'ijxta'ay? ¿Kä'ämts xnijawëtë jäts nteety tyijkypy ëjts jyeexyë njää'jë?
50Kä'ä jä' twinjaa'w'eetyë puttij jä' najj tyijjpy.
51Nits wyimpijnëtë Nazaret, jämts yyee'jky Jesús jäts ijtp y'ijjty tyeety tyaak tmumatoy ntsoj jä' pyawa'anyëtë. Jäts tyaak y'am jyotm y'ijjty tkoojnjë'ëky tukkë'yë tijjäty y'uu'nk tyümpy. 52Najjts Jesús yyee'jky wijy kejy, nits tyaxömpy jä' y'ijjty Yës Teety pyuttëjjk'ëë'ny mëët nitukkë'yë jaa'y pyuttëjjk'ëë'ny.
Právě zvoleno:
Lucas 2: LUKMya
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
