MATIYUT 10
10
Aap 12 nappiyareegerak wone
(Mrk 3:13-19, Luk 6:12-16)
1Yorage nagagirik, Yetut nen at oone waganggwi 12 nogo at owagam woraawak nduk, wiiragagerak wogo mbareegwa, kugi ogole warak aakumi inikime nen nggiginogo wumbiigwi, ndi, aakumi yi kugi ndi kugi andi kunik mendek inom, ineebe we andi-pandi aago inom, obeelom eeginakwi, eeginabit nawak nduk, at awone kiliriragagerak. 2It aap 12 nappiyareegerak nogo inendage ti, aa'nduk Timon endage ambi Peterut toonak nogo awot Andereyat imbirak inom, Tebereyut aput Yakobut awot Yaya imbirak inom, 3Piliput Mbarotolomeyut imbirak inom, Tomat at Matiyut pemerintah inake kuwak eeke nagagerak nogo imbirak inom, Alepeyut aput Yakobut Tareyut imbirak inom, 4Timon aap Kanani mendek, Yurat Ikariyot Yetut onggo mbaneegerak nogo imbirak inom, nappiyareegerak.
It aap 12 nogo nonggop eeko logorak yoragagerak wone
(Mrk 6:7-13, Luk 9:1-6)
5At Yetut nen it aap 12 nogo nappiyaakit nduk, inaruk wake logonet, ”It aakumi endekem konenggulik mendek wonogwe me, tu ti paga nogwe, ndi, it aakumi Tamariya iname unggwogwe, eerugup o. 6Kit nen it aakumi Iterali mendek ndomba kobak ogogwaarak pogom wonogwe nogo mban iya nanip o. 7Iya nogo logomonggotik, At mbogut paga mendek abu'me pinagarak nogo panggo yi wagaarak o, yinuk, yorogo logonip o. 8It andi wonage kenok, obeelom eeginakwi, kanggwi iinok, ineenik agago mippiigwi, inawin aaga'ne kunik wonogwe iinok, obeelom eeginakwi, kugi inikime lik yereegwaarak kenok, nggiginogo wumbiigwi, eerit nugu logonip o. Kit onggo lek we aret kologogutak me, onggo lek we aret eeginabit nugu logonip o. 9It aap yabu eeppiigwi onggo ti, inambi wogorogo menggaarak aret me, it nen wokkiraawak nduk, kit kinamendek wu mbuti emas inom, mbuti perak inom, mbuti tembaga inom, nggerenogo punuk, wonok nogwe, 10ndi, wokkirogwe iinok, yonggoliyak yum inom, kinambogoyum mberendak inom, kiniyogogut yum inom, kinowaanggun inom, wonok nogwe, eerugup o.
11Ndi, kit aap o tini mbuuluk me, nggwok me, unggwogo logomonggotik, o time aap ambi obaabut obeelom kero, liippogo logomonggotik, ambime awo naga'lek logonet, aap ti, kinom logonuk, wundi nanu o. 12Aap iname time unggunuk, keyage warogo kinale'nggen inoba piigo logonu o. 13Ndi, it aap time inobaabut obeelom nen liirogon wokkinakwi iinok, kinale'nggen mondok inoba aret logogin o. Ndi, inobaabut maluk iinok perak, wundi nogo logonet, kinale'nggen inoba piyamonggotak nogo ko'nok wundi namunggup o. 14Wokkinaka'lek logonet, kinoone inaruk konengga'lek iinok perak, iname time nen wundi nogo logonet, kiniyok paga liirubu aa'ngga eerogo mbo piinok, wundi nanu o. 15Peebi inowak looniyak eyom paga it aakumi o Torom inom, Nggomora inom, wonogogwaarak nogo mbuuluk aret inoorigin kwe, it aap o tini time mendek ti, abu nggwok togon inoorigin aret o, yinuk, abet aret yokkiragi o,” yoragagerak.
”Peebi piyak-payak eekkinako logogun o,” yoragagerak wone
(Mrk 13:9-13, Luk 21:12-17)
16Wone ambinom yorage logonet, ”An nen kit ndomba kokwak yi, aakumi nggeewo endekem mendek pogom wonogwe me, inowagam nappinagage agarik o. Nappinagaminggirak inenggela'me logonet, waalo yimela-nimela nege menggerak pogom nugu logonet, towe puume enegen owaanggo pogom nugu logonip o. 17Aakumi nen it wone amburu mbanggo menggam pikkiren nogwe, tamban eeko menggam time nen ya'mbiran nggora eerogo kinookwi, eekkinabugun me, liippunuk, kiniki tum wako logonip o. 18Kit nen it aap iyo'nggok inom, aap inendagembogut inom, aap endekem mendek inom, an eeke neegotak paganogo yoraabagip nduk, alom an paga inowagam wokkiren nagun o. 19Ndi, wokkiren nogwe iinok, Ala nen kit wone yoroorak nogo ti eyom paga koonogo yokkiraagin me, kit nen, Wone ngge yoraamun? yinuk, kiniki piirik noobok o. 20Wone yoroorak ti, kit kinoone lek o. Ata, kinogoba Aberiniki nen wone kinikime yokkirage kagak, yoraamunggup o.
21Ore ambi waruwak nduk, ore ambi nen eenggi pigogo wogorage, apuluk waruwak nduk, ogoba nen eenggi pigogo wogorage, inaaganapurilogwe nen inagalomini-inogobamini inom ogooppunuk, inooruwak nduk, yorogwe, eerugun o. 22Aakumi abok aret alom an paga ineebi lombok kinombarumenggaarak kwe, kiniki kwi'ndak nu'lek wonogwe kiigak, o age yobok ari wage paga kinagap ndarigin o. 23O tini ambime nen piyak-payak eekkinakwi iinok, kole mbaganit o tini ambime namunggup o. Kole mbaganit aap Iterali iname ando awo naga'lek kiigak, an aap aret nda'nagagirak nogo woraagin aret o, yinuk, abet aret yokkiragi o.
24At wone mamunirage menggerak nogo tebenak kagak, waganggo menggaarak tiyanak menggaarak lek o. Ndi, ogoba tebenak kagak, ayeloman tiyanak menggerak ti kunduk lek mban kwe, 25at wone wagangge menggerak ambi nen at wone mamunege menggerak nogo imbirak ndak-ndak age kenok perak, op aret o. Ndi, ayeloman nogo nen ogoba nogo imbirak ndak-ndak age kenok ti, op mban o. Aap inowe o unde endage, Mbeletebut o, yogwi iinok, at awuri ti, abunuk yorogo logogun o,” yinuk, yoragagerak.
Ala ninagabiti mbako logorak wone
(Luk 12:2-7)
26Wone ambinom yorage logonet, ”Ti kenok, yi mendek ndi mendek nobarak kenok ti, tena'me aret age, ndi, kumaarak kenok ti, pagak ari, eerigin me, it aap ti kinagabiti inombarugup o. 27An nen oonikiya negen kote kumaarogo yokkirage nogo ti, kit nggwok paga o eya paga yorogo logonu o. Ndi, yagakop wone paga yogwe konenggwi nogo ti, o kirin paga laganuk, kuum-keek paga paganogo yorogo logonu o. 28It aakumi nen kinogoma inom mondok lek eerogo kinoorugun lek me, kinagabolo mban kinooko menggaarak nogo ti, kinagabiti inombarugup o. Ata, at nen kinagabolo-kinogoma inom kani omoonuk wunuk mban ari minggim time lek eerogo pinagarak unde nogo perak, mondok kinagabiti mbako logonip o. 29Rupiah mbuuluk ambit nogo paga towe yiluwe mbere lambuk togon kunggo monggotak nogo lek a? Kunggo monggotak aret kwe, kinogoba, E, mbaka'lek kagak, ambi nggween paga wambigin mondok lek o. 30Ala nen kineeruwak abok aret eenggi lingginik wonage o. 31Towe mbuulogwe apit-apat ti, iniki kundugu lek negen, ndi, kit perak, iniki kundugu nggwok lombok kinombake me, kinagabiti mbarugup o,” yinuk, yoragagerak.
”Yetut ninowe aret o,” yinuk, paganggo logorak wone
(Luk 12:8-9)
32”Kit nen aakumi inenggaanom paga, Yetut ti, ninowe aret o, yinuk, paganggwi kiinok, an kunduk, an nogoba mbogut paga mendek enggaanom paga, It aap yi, an nawuri aret o, yinuk paganigin kwe, 33kit nen aakumi inenggaanom paga, Yetut ti, nineenggo'lek aret o, yogwe kiinok perak, an kunduk nogoba mbogut paga mendek enggaanom paga, It aap yi, an neenggo'lek aret, yigin o,” yinuk, yoragagerak.
Ogoorogo piyaakit nduk, wagagerak wone
(Luk 12:51-53, 14:26-27)
34-35Wone ambinom yorage logonet, ”An nen kit aakumi nggween paga mendek lambumbinagakit nduk wagagirak mbarugup o. An nen lambumbinagakit nduk, woroolik o. Ata, aap ogoba inom, kwe agalo inom, enggelo imbirak inom, ogoorogo piige neenok, wim nggaganuwak nduk, aret wagagirak o.” 36It aap wim nggaganggwi nogo ti, inawi ambit me mendek nen aret eekwi iyaamunggup o.
37An kineebi negen nombako logonet, kinagalo a, kinogoba a, kiniki kunik eekwi kiinok ti, an ninom logorak meek aret o. Ndi, an kineebi negen nombako logonet, kinapuluk wulaga a, kolaga a, kiniki kunik eekwi kiinok kunduk, an ninom logorak meek mban aret o. 38Kit kinagayo karo-karo nabembinagarak nogo ko'nok ninom noorak mbaka'lek kiinok ti, an ninom logorak meek aret o. 39Kineebe kinili eekkolamonggotak kenok, kineebe kobak aret arumunggup o. Ndi, an nendage nggwok aruwak nduk, kineebe wondet eerogo patit namonggotak kenok, kinili aago aret logomunggup o,” yoragagerak.
Onggo koloorak yoragagerak wone
(Mrk 9:41)
40”It aakumi nen kit wakkinakwi iinok ti, an aret wa'nakwi, ndi, an wa'nakwi iinok ti, at nappani wagagerak nogo aret waganggwi, eeko menggaarak. 41Kit nen, Aap yi Ala wone yo'nirage menggerak me, yinuk, aap Ala wone yokkirage menggerak ambi waganggwi kiinok ti, it aap Ala wone yorogo menggaarak onggo waagun nogo ndak-ndak aret kolaamunggup o. Ndi, Aap yi, iniki koonak mendek me, yinuk, aap iniki koonak mendek ambi waganggwi kiinok ti, it iniki koonak mendek onggo waagun nogo ndak-ndak aret kolaamunggup o. 42Ndi, kit nen, Yetut oone waganggwi me, yinuk, wologwe mbuulogwe yi mendek ambi, niyo miin toologo wogogwi kiinok ti, onggo kolaamunggup lek ti lek o. Kolaamunggup aret o, yinuk, abet aret yokkiragi o,” yoragagerak.
Právě zvoleno:
MATIYUT 10: WNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
