Tekang Kbuten 9
9
Yóm fasad Dwata ke Nuwa
1Yó olu Dwata ke Nuwa ne yó kem ngaen logi, monen, “Hol ye bud mból anì bud wen tau talak tonok. 2Hogotu kuy kentihen ógóf ne kentihen onuk koyu ne kentihen utón él. Nbuten ni ne, yóm kdê le yó, wen klikò le kuy. 3Ne gbek ye mken kul lenwóten bè yóm kdaw ni mò tnù yó kem hulu gel ken ye. Gotu blayu kuy yóm kdéen mò ken ye. 4Són olo là hkenu du kuy, són yóm utón tolo nô lem lówóhen litóen abay se bè yóm litóen gónón nô lowilen. 5Ke wen tau hnatayen ke dumun, hatay snéen tafaku du. Senged se bè ógóf ke wen tau ghatayen, yó tafaku du hatay. 6Abay se bè yóm kmou tau heskélu béléu. Yó gónóm mon, ke wen tau bnonoken ke dumun, yó se bud kun des bnonok. 7Hol ye mból anì bud wen tau talak tonok.”
8,9Ne yó bud mon Dwata mò ke Nuwa ne yó kem ngaen logi, “Ni wen fasadu bélê ye dalang se yó kem angat bud lugod ye 10ne senged se ebè yóm kentihen mowil talak tonok, yó kem onuk koyu ne yó kem ógóf, ne yóm kentihen mung kuy hewà gu lem yóm kafal. 11Ni se yóm hol fasadu kuy, laen kô bud dunuk ne gemlà yóm kentihen mowil talak tonok. Là kô bud hdunuku du ne talak tonok. 12Nim fasadu kuy ni dalang se bè yóm kentihen mowil talak tonok, hol fasad laen kô dù tul sónen. Ni hol ilóen yóm fasadu kuy ni, 13wen léwés suu bè yó kem lobun te kmawang. Yó se ilô yóm deng fasadu ebè yóm kentihen mowil te tonok, hol fasad laen kô dù tul sónen. 14Ke gel hlobunu te kmawang, ne ke gfan bè yó yóm léwés, 15yó se mò gónóhu hemtulón du nawa yóm deng fasadu kuy dalang se ebè yóm kdéen ógóf. Hentulónu nawa yóm là bud keheglumfaku du bè kdê yó kem mowil talak tonok yóm dunuk. 16Ke sok gel gfan bè lobun yóm léwés, tonu se dou ne yó mò gónóhu hemtulón du nawa yóm deng fasadu ebè yóm kdéen mowil talak tonok, yóm fasad laen dù sónen. 17Yó se ilô yóm fasad nmou ebè kdéen mowil talak tonok.”
Nuwa ne yó kem ngaen logi
18Bè yóm kehewà Nuwa gu lem yóm kafal, ni se boluy yó kem ngaen logi mung du, Sém ne Ham ne Jafit. Yóm Ham, du se mà Kanan.#9:18 Yóm Ham ngà Nuwa, béléen se gónó le gu semfu yóm kdéen tau bè benwu Kanan.Ni kem tlu ngà Nuwa logi ni, bélê le gónó le gu semfu yóm kdéen tau talak tonok. 19Ni kem tlu ngà Nuwa logi ni, bélê le gónó le gu semfu yóm kdéen tau talak tonok.
20Yó kun nmò Nuwa, gel mò nmò bè tonok. Du se yóm hol tanay tau mulu grép. 21Bè yóm kinumen yóm tifas yóm grép huluhen, deng mom lengel du, ne tódô hlilil bè gónóen laen dù nesen. 22Timbow ton Ham yóm mà Kanan, yóm klaen dù nes maen, tódô lemwót ne tulónen yó kem lewu dumuhen sulil-lem logi. 23Lemwót le Sém ne Jafit, wen kumù nwa le. Yó kmò le du, senbalà nogot le sfatà kililen, hloyol le te kwang le, nogot le bè seblà abal le. Tódô le mógów hudul elem yóm gónô mà le, ne lenimun le igò le binguy anì là ton le du yóm klaen dù nes mà le. 24Timbow deng lembó klengel Nuwa ne tngónen yóm nmò Ham béléen, yóm ngaen twoli, 25yó gónón mon du,
“Dwata he hol tmafak ke Kanan.
Du angat ghesek bè yó kem twoguhen.
26Hol dóyón kuy Dwata, yóm gónón mogot Sém.
Kanan se angat heseken.
27Dwata he hol hból ke Jafit.
Yó kem kun ból, angat le slomong menwu yó kem kun ból Sém.
Bong ke Kanan kun, mò angat ghesek bè Jafit.”
28Kogol yóm kehdunuk Dwata te tonok, botong 350 halay bud tnù halay Nuwa. 29Song matay, deng 950 halayen.
Právě zvoleno:
Tekang Kbuten 9: tbl
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2007, Wycliffe Bible Translators, Inc. All rights reserved.