Tekang Kbuten 49
49
Yóm hol són udél Jakub ebè yó kem ngaen ne yóm oluhen kul
1Timbow deng kudél Jakub ebè Jusif, ominen gotu htaba yó kem ngaen logi, monen mò kul, “Sbung ye e klohoku, eles tulónu kuy yóm angat kmò ye elem hulin kdaw.
2Hloni ye edini, kem Ngau, hnungol ye ou.
Hnungol ye yóm mon mà ye Israél mò kuy.
3Uu Rubén, hol twogu bè yó kem ngau, ngà lemwót bè kgisu, hol tanay ngau bè yóm klomihu tau.
Uu se mò kulu yó kem dumu ngau ne tey kadat le kóm.
4Okóm hol lómón ke uu yóm dunuk là gbek hemseng du.
Là budi lemyu senta yó kem twolihem lemwót bè yóm kugetem yóm sotu libun nmuhu, deng mom henyakem maem.
5Bè kul le Simyun ne Libay, kem tau setwoli skél kmò le.
Mom yó mu le du yóm kul suk, mom nit le mò sidek.
6Là kóe mung du dou yóm kul lifut sentulón, duhen ke wen yó kem gel sensatul le.
Yakà deng le tehe gemhatay tau lemwót bè kebut le.
Ne deng htugô le yó kem safì tudu mò lelen le.
7Dwata he angat tmafak kul lemwót bè yóm kebut le, alì gedlug klóbô le ne alì gulé ksideken yóm gel nmò le.
Gotu senklahu lu bè klamangen tonok Israél.
Gotu hlanahu lu lem blóng yó kem dumu le.
8Ne uu Juda, angat tey kdóyón le kóm yó kem dumuhem setwoli, gotu le mtud bukol bè soluhem.
Ne yó kem hohonem, laen dù gmò le béléem.
9Lómón ke uu yóm sotu liyun lomi lemnok deng hnatayen yóm kenfóen, ominen bud mulék bè yóm gónón gel nô.
Bentolen kwangen ominen hlilil, balù sotu ke wen mlos hmala du.
10Yóm tuged gel nogot yóm tau hol geta mò ilô yóm kfasangen mogot tau, là kóen lana bè kun ból Juda efet kól yóm sotu sfuhen hol mfun du mogot yóm klamangen.
Bè yóm kkólen, gotu nimón yó kem tau bè klamangen benwu.
11Lemwót bè yóm alì kwen yó kem grép hulu Juda, anien he ke féten lemen yóm ngà kudà asnuhen bè yóm alì gónón mabù grépen, là kem hendemen du ke wen gamà du.
Lemwót bè yóm alì keél yóm tifas grépen, anien he ke nfuken lemen nesen, là kem hendemen du ke wen gamà du.
12Yóm ktilob yóm mata Juda, alì hitem senta yóm tifas grépen.
Ne yóm kbukay yóm nihihen, alì bukay senta yóm gatas.
13Bong ke Sibulun kun, angat menwu bè kilil mohin.
Bè yó gónó le tendo gel dmuung yó kem kafal.
Tey lamang yóm tonoken, botong gefet bè syudad Sidon.
14Ne bè Isakar kun, hol skél bè yóm kudà asnu alì kemgis lemulón.
Tódô hegnô lem blóng yó kem gel lulónen.
15Ke deng tonen yóm tey kehyuhen yóm gónón hegnô, ne yóm alì ktilob tebas yóm tonoken,
balù nô kgelen yóm nmoen tódô senflósen mò du, hol lómón kmoen nmò yóm tau hesek.
16Ke bè Dan kun, tau hulung mogot kukum bè yó kem tauhen, hol lómón yó kem dumu tau Israél.
17Yóm kun kmò Dan, lómón ke ulal malas nô bè kilil lan.
Ke wen tau smakay kudà mlan bè yó, nékéten senta kmasing yóm kudà anì htoyò ne tódô megtudà yóm tau smakay tahen.
18Ó Dwata, uu se yóm hol nangatu mò lemwà kum.
19Ne ke bè Gad kun, angat gel nuluk yó kem tau mngayaw, okóm natuen lu ne botong lohen lu.
20Bong ke Asér kun, hono kem hulu mebtes yóm gel tebas yóm kun tonok.
Béléen gónón lemwót yó kem ken knóón bè kem tau hol geta.
21Ne bè Naftali kun, hol lómón ke uhu tagaw laen dù gembek kemfô du ne tey knóón ton yó kem ngà natihen.
22Ne ke Jusif kun, hol lómón kmoen ke ngà kudà asnu lem bnes tô minum bè gónón wen tbul él.
23Okóm hlós gentì yó kem hohonen lemwót bè yóm alì kutó nawa le du.
24Okóm yóm kun boho Jusif, eles tendo btul.
Tendo kemgis gu lem abalen abay se monem lemwót bè kegbek yóm kun Dwata yóm maen Jakub, yóm eles tendo gel semgyok yó kem tau Israél, lelen gel mofin kul.
25Yóm Dwata gel tmóbóng kóm Jusif, yó se kun Dwata maem, yóm Dwata laen dù là gbeken du, du se yóm gel tmóbóng kóm.
Yó tóbóngen kóm, gel hkulónen gu tta gu bè longit ne gel hetbulen yó kem él laan tonok.
Tey kehbólen du yó kem ógófem, dalang se yó kem ngaem.
26Yóm tehe któbóng Dwata dou, hol bong senta yóm tóbóng tehe tonu lemwót bè yó kem bulul legen ne lemwót bè yó kem bulul lemnek deng legen.
Ni kem tóbóng Dwata ni, hol dohò eta Jusif he yóm tau deng htólóng Dwata bè yó kem dumuhen setwoli.
27Bong ke Bindyamin kun, hol lómón ke yóm ohu alì lóbô nô lem bnes.
Tódô ket hlafusen wen hnatayen bè yó kem hohonen ne tódô ket kifuhen mólól yóm deng negefen.”
28Ni se yó kem tau gónó le gu semfu yó kem sfolò lewu but tau bè Israél. Ni se yóm hol són udél tebel mà le bélê le yóm ket kul ne sotu bè yóm koluhen kul.
Katay Jakub ne yóm kebeng le du
29Omin Jakub bud mudél ebè yó kem ngaen, monen, “Ni móyóne lemwót, naw e ktes yó kem tehe gónóhu gu semfu. Ke soke matay, hol lebeng ye ou ditu bè yóm kilib tehe gónó le lembeng ke mà ne témê bè tonok Ifron, yóm tau Hitayt. 30Nô bè Makpila yóm kilib yó, fi dmata kdaw benwu Mamri bè benwu Kanan. Tehe benli témê Abraham bè Ifron yóm kilib ne yóm tonok mò gónó le lembeng. 31Ditu se tehe gónó le lembeng ke témê Abraham ne bé Sara. Ne bud ditu snéen gónó me lembeng ke tehe mau Isak ne yéu Ribika. Ne bud bè tu se tehe gónóhu lembeng yóm sotu yê ye Liya. 32Yóm tonok ne yóm kilib, tehe benli fù ye Abraham bè kem tau Hitayt. Hol lebeng ye ou ditu se dou.” 33Timbow deng kudél Jakub ebè yó kem ngaen, ominen yó hganag bud hlilil ne milot se nawahen.
Právě zvoleno:
Tekang Kbuten 49: tbl
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2007, Wycliffe Bible Translators, Inc. All rights reserved.