Tekang Kbuten 46
46
Kógów Jakub ne yó kem fes lówóhen ebè Idyip
1Bè yóm kewót Jakub ebè Idyip gotu nwiten yóm kdê kimuhen ne nan mlan bè Birsiba. Bè yóm kkólen bè yó, nan demsù ebè Dwata bè yó, yóm Dwata yóm tehe maen Isak. 2Timbow kifu bè yó, mudél ebè Jakub Dwata, monen, “Ó Jakub, Jakub.”
Mon Jakub se, “Hó. Ni ou.”
3Ne yó mon yóm mudél yó koni, “Ou se Dwata yóm Dwata tehe maem. Béi hlikò mógów etu bè Idyip abay se bè yó gónóhu hembaling yó kem bólem sotu but tau alì mbegel. 4Munge kóm etu ne angat bud nitu lu semfulék ebè yóm tonok ni yó kem semfu gu béléem. Okóm kóm du, angati matay bè yó bè Idyip ne bè yóm angat kilot nawahem eles nô klohokem Jusif.”
5Omin Jakub lemwót bè yó bè Birsiba. Wen klitun gónó le hsakay du yó kem ngaen logi, yóm klitun hwiten ebéléen yóm Faro bè Idyip. Ne homong hsakay le béléen yó kem towuhen libun ne ngà le lemnek. 6Gotu nwit le yó kem ógóf le ne yó kem kimu tehe gwa le bè Kanan, mógów le etu bè Idyip. Gotu nwit Jakub lu yó kem fes lówóhen, 7yó kem ngaen logi ne yó kem ngaen libun ne yó kem téméen.
Là gomongen bè nili yóm bérs 8 kól bè bérs 25. Hono boluy yó kem fes lówó Jakub bè yóm kili le ebè Idyip.
26Yó kwen fes lówó Jakub mung du ebè Idyip nem folò nem kdê le, là gomong nsó le kul yó kem yehen yó kem ngaen. 27Ominen temnù yó kem lewu ngà Jusif sut bè Idyip. Yó kwen fes lówó Jakub bè yóm kdaw yó, deng hitu folò kwen le.#46:27 Yó gónón hitu folò kwen le, gomong Jakub ne Jusif ne yó kem lewu ngà Jusif.
Yóm knô Jakub ne yó kem fes lówóhen bè Idyip
28Bè yóm tolo knô Jakub bè lan, yó nmoen, hegnahen Juda ebè Jusif anì senlongen lu bè Gusén. Timbow le kól bè Gusén le Jakub, 29lemwót Jusif tódô hotun ete klisahen nan e senlong maen bè Gusén. Bè yóm keston le, tódô kendel lenagaf lenkef Jusif maen ne ya tey kegen le skik. 30Omin Jakub mon du mò ke Jusif, “Bang katayu ne ni, deng tonu se uu tolo mowil.”
31Omin Jusif mudél ebè yó kem dumuhen setwoli ne bè yó kem dumu fes lówó maen nô bè yó, monen, “Naw na mulék dé ni, naw tulón ke Faro yóm deng kegdek le béléu bè ni gu bè Kanan yó kem dumuhu setwoli ne yó kem dumu fes lówó mà. 32Tulónu du yóm sana kuy gel nmò semgyok ógóf. Bud tulónu du yóm deng gotu kwit ye yó kem ubiha ye ne yó kem dumu ógóf ye ne yóm kdê dumu nfun ye. 33Ke angat tinoken yu yóm Faro ne ke snólóken bélê ye yóm kuy gel nmò, 34hol tulón ye du, semgyok ógóf yóm kuy sana gel nmò lómón yó kem tehe fù ye ekni anì yó, suen yu bè ni bè Gusén.” Yó gónó Jusif mò du yóm yó abay se yó kem tau Idyip gel kenhisik le yó kem tau semgyok ógóf.
Právě zvoleno:
Tekang Kbuten 46: tbl
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2007, Wycliffe Bible Translators, Inc. All rights reserved.