Tekang Kbuten 42
42
Kebli le ken bè Idyip yó kem twogu Jusif
1Hók, na a tngón Jakub bè yóm kun benwu bè Kanan yóm kwen ken bè Idyip, yó gónón mon du bè yó kem ngaen, “Moen de ke beyen ye setngel? 2Deng gungolu wen ken bè Idyip. Mógów ye kut etu dé na ye e bemli ken anì là lemnus tekuy.” 3Tahu se, lemwót yóm sfolò kem twogu Jusif na le e bemli ken bè Idyip. 4Okóm là móyô Jakub ke mung kul Bindyamin, yóm hol kun dumu sulil lem Jusif, likò déke wen gfaen. 5Yó kem ngà Jakub yó, mung le bè yó kem dumu tau na le e bemli ken bè Idyip, abay se deng glumfak bè kul benwu bè Kanan yóm bitil bong.
6Lemwót bè yóm deng kbaling Jusif gubérnor bè Idyip, yó nmoen, gel hembalù ken bè yó kem tau bè klamangen benwu. Ngangen ne gefet béléen yó kem twoguhen, gotu le mtud bukol bè soluhen ne hegdufok le ebè tonok.
7Bè yóm kton Jusif kul, tódô henmung dilóen lu okóm yóm kmoen ebélê le, hol lómón ke là tngónen kul. Henskongen lu yóm ksólóken kul, monen, “Gónó ye gu lemwót de?”
Mon le se, “Lemwót me bè Kanan, Sér, na me e bemli ken.”
8Balù yóm deng kdilô Jusif yó kem twoguhen okóm kul, là kô dilô le ke Jusif. 9Gtulón bè nawa Jusif yóm tehe keknahen kul, ominen mon du mò kul, “Kem tau ye hemkana nim yu. Tô henkana ye ke wen gónón là mbegel yóm kum benwu.”
10Mon le se, “Là, Sér. Hono me kem tau hesekem na me e tô bemli ken. 11Hono me setwoli nim kdê me, Sér. Là kô me tau hemkana ne là kô me tau mò kéng se kum.”
12Bud mon Jusif mò kul, “Là. Kaem yó nógów ye edini ni na ye e hnénég yóm gónón là mbegel benwu me.”
13Yó bud mon le mò ke Jusif, mon le, “Là, Sér. Tehe me sfolò lewu yóm kdê me setwoli. Tek sotu mà me nô bè Kanan. Deng lana yóm sotu twoli me ne yóm són imot bélê me tebel bè mà.”
14Bud mon Jusif se, monen, “Tahu se yóm monu, tau ye hemkana. 15Hnénég te kun ke tahu yóm mon ye yó. Ke tahu, hol nit ye edini yóm mon ye són twoli bélê ye. Smafae mlan bè boluy yóm Faro bélê me, là kô huléku kuy ke là nit ye du edini yóm twoli ye. 16Okóm sotu bélê ye bud mulék anì nan e nangay. Lemwót yó kem dumu ye, fen suu lu lem gónô blanggù efet tonu ktahuhen yóm deng mon ye. Ke là tahuhen, tahu yóm monu hemkana ye.”
17Timbow deng kmonen du yóm yó koni, ominen bmanggù kul tlu kdaw. 18Bè yóm getluhen kdaw, yó mon Jusif mò kul, “Mlan bè yóm klikou ke Dwata, hlowilu yu syan ke hol nmò ye yóm hmou kuy. 19Ni ilóu du ke tahu yóm mon ye. Sotu bélê ye fen tebel lem yóm gónô blanggù gónó ye nô ne fen le mit ken mulék yó kem dumu ye. Wen yó kem fes lówó ye, kô lemnus le. 20Omin ye mit du ebéléu yóm són twoli bélê ye mò ilóu du ke tahu yóm deng tulón ye dou. Ke tahu, là kô hnatayu kuy.” Tahu se, móyô le.
21Ne yó nmò le, stulón le, mon le, “Ni se deng kton kuy du ulék yóm tehe nmò kuy bè yóm twoli tekuy. Igò tekuy se mton du yóm tey ksidek kegnómen du ne yóm tey kehkoduhen bélê tekuy anì wen tmóbóng du, okóm là dog kenmón tekuy du. Ni se gónó kuy gemfà du nim ni.”
22Mon Rubén se, monen, “Deng tehe monu mò kuy se, bê ye abay hensidek yóm ngà okóm là kô ye dog hmungol. Ne ni se kbayad tekuy du yóm katayen.”
23Tódô tngón Jusif yóm sentulón le okóm kul, là kô tngón le du ke tngón Jusif yóm kul kestulón abay se bè yóm kudél le ebéléen, wen fen tmugod du. 24Tódô tnagak Jusif lu nan e mkik tek sotuhen. Deng kkiken, ominen bud mulék ebélê le ne néléken Simyun mò tebel ne hféten lem blóng le.
Kulék le ebè Kanan yó kem twogu Jusif
25Gu laan le là deng lemwót mulék yó kem twogu Jusif, wen tau dóken. Yó hmoen du, gotu hennok nlemen halay yó kem sakù yó kem twoguhen ne bud huléken elem sakù le yó kem filak tô bli le ne wen hebnotuhen kul mò ken le bè lan. Tahu se, tódô nmò yóm tau dók Jusif yóm hmoen du yó. 26Gotu lulón yó kem twogu Jusif bè kudà asnu le yó kem halay benli le, omin le yó lemwót.
27Timbow le kól bè yóm sotu benwu gónó le kól kifu bè yóm kulék le yó, lemwót yóm sotu bélê le ntóhen yóm kun sakù anì henkenen yóm kudaen ne tódô tonen yóm filak tehe blihen nô bè bak sakuen. Ominen tmaba yó kem dumuhen setwoli, monen, 28“Deng hulék le yóm dou filak tehe bli, ni dé nô bè bak sakuu.” Ya tey ktafa nawa le lel yóm tey klikò le, gotu le ssólók, mon le, “Tedu nim deng hegfà Dwata tekuy ni?” 29Timbow le gefet bè Jakub, yóm mà le nô bè Kanan, gotu tulón le du yó kem gfà le,
30mon le, “Yóm tau gubérnor bè Idyip, tey sidek keheskongen kum. Yó delemen kum, tau me hemkana bè benwuhen kun. 31Yó balà me du, mon me, ‘Là kô me na a tau hemkana ne là kô me tau mò kéng se kum. 32Tehe me sfolò lewu yóm kdê me setwoli ne tek sotu mà me. Deng lana yóm sotu bélê me ne yóm hol són imot bélê me, tebel bè mà ditu bè Kanan.’
33Yó bud balaen kum yóm tau tu, monen, ‘Yó ilóu du ke tau ye là mò kéng, sotu bélê ye fen tebel bè ni, fen le mit ken mulék yó du kem dumu ye, wen yó kem fes lówó ye kô lemnus le. 34Okóm hol nit ye ebéléu yóm són imot bélê ye. Ke yó se nmò ye, bè yó gónóhu temngón du là tau ye hemkana, ne là mò ye kéng béléu. Bud hewau ebélê ye yóm dumu ye setwoli blanggù ne gbek ye ne mò udél swa dini bélê me.’ ” 35Timbow gotu kok le yó kem nô lem sakù le tey ketnga le yóm kdê le, gotu bud ton le yó kem filak tehe bli le. Bè yóm bud kton le du yó kem filak le yó, gotu le likò dalang se mà le. 36Yó mon mà le mò kul, “Kóyô ye kô ke gotu lana béléu kem ngau? Là bud tonu ke Jusif, là bud tonu ke Simyun ne ni bud tô nwit ye hlayuk béléu Bindyamin. Ten-geed ye hmayam hlangag dou.”
37Bnalà Rubén, monen, “Ó Mà, ke là bud nitu du mulék ebéléem Bindyamin, tódô hnatayem yó kem lewu ngau logi. Tódô bayaem dou ne Bindyamin ne là kô gbeku du ke là bud nitu du mulék ebéléem.”
38Okóm yó mon Jakub, monen, “Là kô naw e bayà hmung du kuy Bindyamin. Deng matay yóm twoguhen ne tek sónen du dù tebel. Mò kmoen ke wen tódô du bè lan? Tódô hatayu klangagu bè nim tey ktuhahu ni.”
Právě zvoleno:
Tekang Kbuten 42: tbl
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2007, Wycliffe Bible Translators, Inc. All rights reserved.