Tekang Kbuten 41
41
Ktulón Jusif lan kna yóm Faro bè Idyip
1Timbow deng bud lewu halayen bè yó, wen kna yóm Faro bè Idyip. Yó knahen, mdà bè kilil yóm tey él bong boluyen Nayl. 2Tódô tonen wen hitu kem safì mabù tilob klówó le hesut gu lem él na le e mótób te kembu. 3Ominen bud mton hitu kem safì kmangkang tmodol hesut huli gu lem yóm él yó. Gotu le sedà bè yóm hitu kem safì mabù mdà bè yó te kembu. 4Lemwót yó kem safì kmangkang, gotu ken le yó kem safì mabù. Omin Faro btik.
5Ne ominen bud tungô ne bud wen knahen. Yó knahen, wen sotu tinu halay tonen botong hitu kanguyen bede tey mfól bunguhen. 6Ominen bud wen hitu kanguy halay tonen msut huli okóm hono kafa lemwót bè yóm tey lenos kinì gu dmata kdaw. 7Lemwót yóm hitu kanguy halay kafa yó, gotu hlo le yóm hitu kanguy halay alì mfól bunguhen. Omin Faro bud btik ne yó he kehetngónen olo knahen yóm yó.
8Timbow hlafus bè yó, sónmoen tafa nawahen. Yó nmoen, gotu hangayen yóm kdéen tau demwata bè klamangen Idyip ne yó kem tau hulung tmulón lan kna. Gotu tulónen kul yó kem knahen okóm balù sotu bélê le ke gembek tmulón du lan yó kem knahen yó. 9Ominen mudél ebè Faro yóm tau gel mkay ninum béléen, monen, “Ni he kegtulónen bè nawaw yóm tehe salau. 10Tehe lenbutem mi lewu me yóm geta bè yó kem tau gel mò mambang béléem. Tehe heblangguem mi bè gónô yóm kfitan bè yó kem gel mentey kóm. 11Bè yóm sotu kifu, segeng me kemna yóm lewu me ne hono stólóng lanen yóm kna me. 12Bè yó lem gónô blanggù, wen logi Hibru lomi lemnok dumu me geblanggù. Du se hesek yóm kfitan bè yó kem tau gel mentey kóm. Tulón me du yóm kna me, gotu tulónen kum se yó kem lanen. 13Yóm ktulónen du kum yó, tódô uliten du. Ngem sem nim dou, bud hulékem ou bè yóm sana dou nmò ne yóm geta bè yó kem tau gel mò mambang béléem fen heklengem liholen.”
14Bè yóm kungol Faro du yóm yó, tódô kendel hangayen Jusif lem gónô blanggù. Tahu se, kendel heslò hewà le Jusif lem gónô blanggù. Yó nmò Jusif nan gna nki bngeten ne tenlesen nesen, ominen yó mógów ebè Faro. 15Timbow kól béléen Jusif, mon Faro mò du, “Wen knahu, okóm laen dù tau gembek tmulón du dou lanen. Deng wen tmulón du dou gbekem tmulón lan kna kun.”
16Omin Jusif malà du, monen, “Là. Tek són Dwata gembek tmulón du kóm lan yóm knahem anì hol gsengel nawahem.”
17Omin Faro bud mon du, “Yó knahu, mdae bè kilil él Nayl 18ne tódô tonu hitu safì mabù tilob klówó le hesut gu lem él na le e mótób te kembu. 19Ominu bud mton hitu safì kmangkang hesut huli gu lem él. Yóm tey keklangkang yó kem safì yó, là deng hnikót tonu du he bè klamangen Idyip. 20Lemwót yó kem safì kmangkang gotu ken le yó kem safì mabù 21okóm sana keklangkang le, laen kô ili le. Ne ominu btik.
22Ne bude tungô bè yó ne bud wen knahu. Knahu wen sotu tinu halay tonu botong hitu kanguyen bede tey mfól bunguhen. 23Ominu bud mton hitu kanguy halay hesut huli bede hono kafa lemwót bè yóm tey lenos kinì gu dmata kdaw. 24Okóm yóm kanguy halay kafa yó, gotu hlo le yóm kanguy halay alì mfól bunguhen. Deng tulónu yó kem tau demwata ni kem knahu ni okóm laen dù bélê le gembek tmulón du dou lanen.”
25Ne yó mon Jusif mò ke Faro, “Yóm lewu knahem yó, tek sotu tulónen, eles hetngón Dwata kóm yóm angat nmoen. 26Yóm hitu safì mabù tilob klówó knahem, hnigaden hitu halay. Ne senged se yóm hitu kanguy halay tey mfól bunguhen, bud hitu halay snéen hnigaden. Tek sotu tulónen. 27Yóm hitu safì kmangkang hesut huli ne yóm hitu kanguy halay kafa, yó hnigaden hitu halayen kegenen mbel bitil bong. 28Yó se yóm monu mò kóm, eles hetngón Dwata kóm yóm angat nmoen. 29Lenwóten ni, hitu halayen kegenen gengón nuta bè klamangen Idyip. 30Okóm kogolen bè yó, hitu halayen se kegenen mbel bitil bong. Lemwót bè yóm tey ksideken yóm bitil bong yó, botong klifót le yó kem halayen tehe tey bong nuta le. 31Yóm halayen alì bong nuta le, balù udì ke gtulón nawa le, bà mon yóm tey sidek alì kbel bitil. 32Yó gónó Dwata hekna kóm lewu dulék anì tngónem yóm hol kehdohoen du yóm knahem ne là buden legen ne ksuten.
33Ne ni, hyu ke elesi mélék sotu tau hulung hedem ne hulung hemlan mò gónóm smalig du yóm klamangen benwu Idyip. 34Ne budi mélék kem tau, nmoem glal le mò fen semtifun badem bè yó kem nuta tau lem yóm hitu halayen kegenen bong nuta. Yó kmò kbad le kóm yó kem tau, bad limu. 35Gotu hestifunem kul yó kem yó yóm igoen tolo bong nuta, ne benlayem lu kwalis hdà bediga bè ket syudad glem lem nim benwu nogotem ni mò gónó le semtifun du ne mò gónó le mentey du. 36Yóm bad hestifunem kul yó, mò ken yó kem tauhem bè yóm igoen mbel bitil bong lem yóm hitu halay bè ni bè Idyip anì yó, laen dù tau matay lemnus.”
Kbaling Jusif gubérnor bè Idyip
37Tahu se, tey kehyu nawa Faro du ne yó kem genlalen yóm atul Jusif yó. 38Ne yó monen mò yó kem genlalen, “Laen dù dumu tau ton tekuy ke mkél ke Jusif, yóm tau tendo nô béléen Tulus Dwata.” 39Ominen mon du mò ke Jusif yóm Faro, “Deng gotu hetngón Dwata kóm yóm kdéen ni. Yó gónóm mon, laen dù tau ke mkél kóm bè yóm khulungem hedem ne khulungem hemlan. 40Nmou uu mò snaligu bè klamang nim benwu nogotu. Ne kdê yó kem tauhu, gotu nimón le uu ke wen hloloem kul. Yóm glal blayu kóm ni, hol smugung béléu.
41Ne ni, nmou uu gubérnor bè klamangen Idyip.” 42Omin Faro mlus yóm tising bè tdoken, yóm tising gónón nô yóm kun ilô ne lahuhen bè tdok Jusif. Ne wen nes alì tilob heseken du ne bud lahuhen bè lihol Jusif yóm lieg blówón. 43Ominen hsakay du bè yóm klisa gónón gel smakay yóm tau hol smugung béléen ne hyu wen kem sendalù genlal tukô gna du, bede mensag le, mon le, “Gnawang ye lanen dé. Gnawang ye lanen dé.” Yó se kmoen yóm kehbaling Faro ke Jusif gubérnor bè klamangen Idyip. 44Yó bud monen mò ke Jusif yóm Faro, “Ou se yóm Faro. Okóm nbuten ni, laen dù nmò yó kem tau bè klamangen Idyip ke là mlanen béléem.”
45,46Hyu wen boluy tau Idyip boluyen ke Jusif yóm Faro yó. Yó boluyen du, Safinat Paniya. Ne hyehenen du yóm ngà Putifira libun boluyen Asinat. Yó kun gel nmò Putifira, du se sotu tau gel demsù ebè yó kem kul dwata lennged yó kem tau Idyip ne nô bè yóm syudad boluyen Hiliyupulis. Deng tlu folò ne halay Jusif yóm kbut kmoen nmò bè yóm Faro bè Idyip. Lemwót Jusif bè yó bè gónô Faro, gotu nauyen yóm kdéen benwu glem lem Idyip.
47Lem yóm hitu halay alì bong nuta le, ya tey kbungu yóm kdéen hulu. 48Bè ket syudad, sal gel wen hdà Jusif bediga mò gónóhen semtifun yó kem bad yó kem tau mò hulu hmilol kul. 49Tey genged nuta sentifun le, botong là bud gbek Jusif msó kul. Lómón kwenen helek bè kilil mohin.
50Gu laanen là deng mbut mbel bitil bong, deng lewu ne ngà logi Jusif bè Asinat yóm tuha libunen. 51Yó mon Jusif, “Deng heklifót Dwata dou ne yó kem tehe gónóhu glayam ne yóm khahuu bè yó kem fes lówó mà.” Ne yó gónón moluy du Manasi yóm ngaen twogu.#41:51 Yó lanen bè udél Hibru yóm boluy Manasi, “heklifót.”Yó bud monen, “Deng benlay Dwata ou ngà bè nim benwu gónóhu glayam.” Ne yó gónón moluy du Ifraim yóm gewu ngaen. 52Yó bud monen, “Deng benlay Dwata ou ngà bè nim benwu gónóhu glayam.” Ne yó gónón moluy du Ifraim yóm gewu ngaen.#41:52 Yó lanen bè udél Hibru yóm boluy Ifraim, “bemlay ngà.”
53Ngangen ne mfu yóm hitu halay alì kwen nuta bè klamangen Idyip. 54Ominen yó mbut yóm hitu halay kbel bitil bong, tódô uliten du yóm tehe eles kmon Jusif du. Yóm kbel bitil bong yó, botong gomong kdéen tólóng benwu hmilol kul. Okóm bè klamangen Idyip, hanà tolo wen ken le. 55Timbow gefet bè yó kem tau bè Idyip yóm bitil, tek són Faro ne henlóy le. Lemwót yóm Faro, bud dóken lu ebè Jusif, monen mò kul, “Yó se mon Jusif mò kuy, yó se nmò ye.” 56Ngangen ne temnù ksideken yóm bitil bong efet gefet bè klamangen Idyip. Yó nmò Jusif, lenungkaen ne kdéen bediga bè klamangen Idyip ne heblihen ken yó kem tau Idyip. 57Ngangen ne kdéen tau bè klamangen benwu gotu le mógów ebè Idyip na le e bemli ken bè Jusif, abay se deng glumfak bè klamangen benwu yóm tey bitil bong.
Právě zvoleno:
Tekang Kbuten 41: tbl
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2007, Wycliffe Bible Translators, Inc. All rights reserved.