Tekang Kbuten 14
14
Kehewà Abram ke Lat lem tdok yó kem hohonen
1,2Wen fat kem tau hol geta mogot benwu na a mit sgida bè yóm limu kem tau hol geta. Yó boluy yó kem fat tau hol geta yó, Amrafél yóm tau hol geta mogot yóm benwu Babilun, ne Ariyok yóm tau hol geta mogot benwu Ilasar, ne Sidurlamér yóm tau hol geta mogot benwu Ilam, ne Tidal yóm tau hol geta mogot benwu Guyim. Yó nmò le, na le e gnida yó kem limu dumu tau hol geta. Yó boluy le, Bira yóm tau hol geta mogot benwu Sodom, ne Birsa yóm tau hol geta mogot benwu Gomora, ne Sinab yóm tau hol geta mogot benwu Adma, ne Simébér yóm tau hol geta mogot benwu Sibuyim, ne yóm tau hol geta mogot benwu bè Bila, yóm benwu bud bnoluy le Sur.
3Nim limu kem tau hol geta ni, deng ssotu atul le sofin, ne gotu sentifun le lu bè datal Sidim yó kem sendalù le. Yó boluy le du ni kmoen ni yóm datal yó, Mohin Héét. 4Yó gónó le mò gida, abay se deng sfolò lewu halayen ne yóm knô le lem tdok yóm tau hol geta boluyen Sidurlamér. Okóm bè yóm gesfoloen tlu halay, deng mom natù le.
5Bè yóm gesfoloen fat halay, yó nmò yóm tau hol geta natù le yó, gotu nwiten yóm tlu kem tau hol geta dumun sofin ne yó kem sendalù le na le e gmida. Ne matù le bè yó kem tau Rifaim bè benwu Astirot Karnaim ne bè yó kem tau Susim bè benwu Ham ne bè yó kem tau Imim bè Datal Kiriyatim 6ne bè yó kem tau Hurayt bè bulul Idom. Tódô ktes le yó kem tau Hurayt efet kól bè Ilparan, yóm benwu nô bè kilil yóm benwu laen hol wen tauhen. 7Omin le bud semfulék ebè Kadis, yóm benwu bnoluy le Inmispat. Gotu gwa le klamang tonok yó kem tau Amalikayt, ne deng le bud matù bè yó kem tau Amurayt nô bè Hasasun Tamar. 8Duhen yó, bè yóm kungol le du yóm yó, yóm limu kem tau hol geta lemwót bè Sodom ne Gomora ne bè Adma ne Sibuyim ne Bila, yó nmò le gotu sentifun le yó kem sendalù le bè Datal Sidim anì bè yó gónó le semlong 9yóm fat kem tau hol geta lemwót bè Ilam ne bè Guyim ne bè Babilun ne bè Ilasar. Limu le yó kem tau hol geta lemebet yóm fat kem tau hol geta yó. 10Yóm Datal Sidim, tey wen kem sol nelemen, hono hitok alì miket yóm lemen, yóm hitok boluyen aspaltu. Bè yóm kesgida le, là gemmò le yó kem tau hol geta lemwót bè Sodom ne Gomora, gotu le mlóy yó kem sendalù le. Wen se bélê le btang elem yó kem sol yó koni ne fen le mlóy etu lem bulul yó kem dumu. 11Yó nmò yóm fat kem tau hol geta matù yó koni, hlós le ebè Sodom ne Gomora, gotu nuku le kdéen kendengen bè yó kem benwu yó, gomong yó kem gel ken le, omin le bud lemwót. 12Bè yóm kdê deng negef le yó, gomong lemen Lat, yóm ngà twoli Abram nô bè Sodom ne kdê yó kem kimuhen. 13Okóm wen sotu tau lemwót bè yó mlóy etu bè Abram ne gotu tulónen du yóm kdéen. Yóm Abram ni tau Hibru, yóm menwu moni bè yó kem koyu lembang nfun Mamri yóm tau Amurayt. Yóm Mamri ni, wen lewu dumuhen setwoli logi boluy le Iskol ne Anér, hono kem kun dumu sofin Abram.
14Timbow gungol Abram yóm deng kegef le ke Lat, gotu htabahen yó kem kun kwen hulung mit sfatay bè yó bè kamfuen. Yó kwen le, tlu latu bud sfolò wolu. Ne omin le kemtes yóm fat kem tau hol geta megef ke Lat. Ngang le kemtes kul efet le gefet ditu bè benwu Dan. 15Bè yóm kkól le Abram bè yóm benwu yó, nólólen yó kem tauhen. Yó nmò le, nundug le kifu yóm fat kem tau hol geta hohon le ne matù le bélê le. Bud ngang le kemtes kul efet kól bè Huba, yóm benwu sentu Damaskus. 16Ne gotu nwa Abram yóm kdê deng negef yóm fat kem tau hol geta yó. Bud niten mulék Lat snéen, yóm ngà twolihen ne kdê yó kem kimuhen. Gotu bud niten lu mulék se yó kem libun ne yó kem dumu tau negef le.
Kni Mélkésédék ke Abram bè Dwata
17Bè yóm kulék Abram bè yóm katuen bè le Sidurlamér, yó nmò yóm tau hol geta bè Sodom, senlongen Abram bè Datal Syabi. Yó bud boluy le du yóm datal yó, Datal yóm Tau Geta. 18Ne bud semlong se kun ke Mélkésédék, yóm tau hol geta bè Salim. Du se bud gel blóng le ebè yóm Dwata hol geta bè kdéen. Wen mambang slongen ke Abram mung du yóm tifas grép gel ninum le. 19Bè yóm keston le, ominen mni ke Abram bè Dwata, monen,
“Yó hem Dwata hol geta bè kdéen,
yóm Dwata tehe mò longit ne tonok, tendo tmóbóng kóm, Abram.
20Hol megdóyón he yóm Dwata hol geta bè kdéen,
yóm deng hatù kóm bè yó kem hohonem.”
Omin Abram bemlay du ke Mélkésédék yóm gesfolò yó kem kimu deng bud niten mulék, yóm deng negef yóm fat kem tau hol geta.
21Yó monen mò ke Abram yóm tau hol geta bè Sodom semlong du yó koni, “Kóm du ne yó kem kimu deng bud nitem mulék yó, okóm hol hulékem dou yó du kem dou tau.”
22Bnalà Abram se, monen, “Smafae ebè yóm Dwata hol geta bè kdéen, yóm Dwata tehe mò longit ne tonok, 23laen kô dù nwahu du yó kem kimuhem, balù sbalu tnikel duhen ke fét tlumfà. Déke monem elem hulin kdaw, lemwót béléu yóm kdê kendengenem. 24Laen kô dù nwahu du ke mò dou. Són là huléku du ebéléem, són yóm deng ken yó kem dou tau. Okóm nam hol hélék kul le Anér ne Iskol ne Mamri, yó kem tau dumuhu sofin, yóm mò kul ólól.”
Právě zvoleno:
Tekang Kbuten 14: tbl
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2007, Wycliffe Bible Translators, Inc. All rights reserved.