MATEO 3
3
Juan ma ona iñajeanobiajji poani dejjaa sohuihuohuicanequiapoa cuana
(Mc 1.1-8; Lc 3.1-9,15-17; Jn 1.19-28)
1Majoya aje quijje Juan ona iñajeanobiajji poani nequihuapoa. Ohuaya provincia Judea se-ejjama' meshijo nequiya esohui huohuicanequiapoa cuana. 2Jama sohuihuohuime Juanya acanequiapoa cuana ba'a: —Pea jjashahuabaquime quiana oe po'yocue miquianaja mimishijo. Eyacuiñajji, ojjañacuana huoojeapoquiajjitii poani, jjeyahuanei poeje.—
3Yahuajonei Eyacuiñajjiya oja sohuihuohuijji poa dejja Isaías bajjani tehuemeecapoa Juanjo. Yahuajonei oja tehue jaa jama poani Juanjo ba'a:
“Oe dejja se-ejjama' meshijo nequi taaamajamajanequije ojjañacuanaja eshajja-ajjajji.
Jama ponequije ba'a: Jjashahuabaquicue quiana oe Emeshimesenei poejjijo.
Apoa pocue jiquio ecua ejeojji queapojjenee epijajinei chacome acani cuaa pea poejji, jamaya oe pocue ojo queaja'a ejjashahuabaqui'yojji” jamaya tehuecapoa.
4Juanja daqui camelloja ña esipi poa. Oya jjayica'aquiapoa ejeejo. Ohuaya satajje ijjiacapoquiapoa, huini meshidojjojo nequi pea-ai ishicapoquiapoa Juanya. 5Queahuisocuana Jerusalén meshijonei ba'eca, provincia Judea ba'ecacuana, Jordán cueichipineijo ba'ecacuana pea-ai poquicanequiapoa ohua esohui huohuicaje shajja-ajjaa. 6Ma poquicanaje queahuisocuaa oja mimishi ja'anei huohuica'yapoa. Oya jama poajo Juanya iñajeanobiacapoa cuana cuei Jordán bajjani enaojjohuasijje.
7Juanya fariseocuana, saduceocuana pea-ai queahuiso poeje oque jjaiñajeanobiameequiya nisho bamajje nequiñajeameequicapoa cuana. Majotiiya ohuaya jama yajeame acapoa fariseocuana, saduceocuana ba'a: —Miquianaya peyo quease'nee jama. Jjashahuabaquiani quiana jjaiñajeanobiameequimajje Eyacuiñajjija quiana queaneenee epomee'yojji pojjeama poso poani miquianaja mimishijo. Chojja, jama pojjeama. 8Miquianaya ca queaja'anee ba'epoquicue joya ecua dejja e'ejojonei pea jjashahuabaquime po'yani oja mimishijo jama pea-aiya. Majoya quiana e'ejojonei poani bacaje cuaa. 9Miquianaya caca queaquehua jjashahuabaquiani jama ba'a: “Eyacuiñajjija ca se ca queanee epomee'yojji pojjeama poaje jjabaquiani Abrahamja osecuanei poanijjejojoya.” Eyaya quiana pea esohui huohuije. Eyacuiñajjiya jiquiojo ani meicuana Abrahamja osecuacuana epojji pomeeca'yome oya jama sapomajje. 10Eyacuiñajjiya queanee pomeecaje'yo cuana oja mimishijo. Jiquio ecua dejjacuaa acui ebana mijjajjajo jajajeaca'yani quijje edahuajea'yojji jama pea-aiya Eyacuiñajjiya acaje'yo cuana ojjaña joya queamimishitii ba'epoquiani. 11Eyaya e'ejojonei quiana iñajeanobiaña enaojjoneiyasijje ojjaña joya pea jjashahuabaquime po'yanicuana oja mimishijo. Pea dejjaa ma quijje equishishi poeje dejjaa ca quiana ca oe Edojjoshahuapame yamijji pomeecaje, peacuana ca queaneeneetii eponequi'yojji ohuaya huoojeacaje'yo Cuaqui-aiyasijje. Oya ca ma quijje poeje queaca'aneetii jiquio ecua eya nequi quiajja pojjeama. Jamajjeya eya jjabaquiani queapame pojjeama ojo echacochacopoquijji oya queapameneeneejojoya. 12Ohuaya huohuicaje'yo ache queamimishi ache queapame ba'epoquinaje jiquio ecua dejjaa anosoaiso' shajeacani eso' queapame oopana echicha'yojji jama pea-aiya quiana acaje. Anosoaiso' oopana iyachichaca'yani equiyasijje. Eshaa ca dahuajeacani cuaquiyasijje. Jama pea-aiya cuana acaje'yo dejja queamimishi, eponacuana pea-ai. Ohuaya huoojeanobiameequicaje'yo Cuaqui-aiyasijje, ma quijjo'yoajja jaa Cuaqui-aiyasijje queaneetii eponequi'yojji— jama huohuimeya Juanya acanequiapoa cuana janobajjimanei.
Juanya Jesosa iñajeanobiacapoa enaojjohuasijje
(Mc 1.9-11; Lc 3.21-22)
13Majoya aje quijje Jesosa provincia Galilea meshijo nequi poquiapoa Jordán bajjani cuei jaahuasijje Juanque jjaiñajeanobiameequiya. 14Jesosa oque poeje bamajje Juanya o iñajeanobiajjima yajjijo nisho esohui a-ajjacapoa jama ba'a: —¿Yajjajje acuae mi eque poeyanaje jjaiñajeanobiameequiya? Miquea caca oe eya iñajeanobiacajji enaojjohuasijje.—
15Jesosaa oya saja-acapoa jama ba'a: —Jamaya jjeya eya acue eseja Eyacuiñajjija ejjashahuabaquijji queapame eajeyojjijo.—
Ohua ojo esohui jama acajo Juanya oya iñajeanobiacapoa enaojjohuasijje. 16Majoya Jesosaa eiñajeanobia nequisohuaquije'yohua etajahuasijje bajeasohuacapoa eyatahuatahua ejjaca'apejoqui nequi. Eyacuiñajjija Edojjoshahuapame huia' jayojja cuabesaoqueapoa oja yamibiajje aniñaa. 17Majoya esohui Eyajo mimiani jama shajja-ajjacapoa cuaa jama poaje ba'a: —Miya ecue Bacuaejja ecuea queajeanee, eya mijo queabihuinee poani.—
Právě zvoleno:
MATEO 3: ESE
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Copyright Mision Nuevas Tribus, 2006
