KA BUKE MUA A MOSE, I KAPA ʻIA KINOHI 8
8
MOKUNA VIII.
1 Ka emi ʻana o nā wai. 4 Ili ka hale lana ma ʻArarata. 7 ʻO ke koraka a me ka manu nūnū. 15 Ka haʻalele i ka hale lana. 20 Ke kuahu o Noa a me kāna mōhai. 21 ʻOluʻolu mai ke Akua. 22 ʻAʻole kai a Kahinaliʻi hou.
1¶ Hoʻomanaʻo ihola ʻo Iēhova iā Noa, a me nā mea ola a pau, a me nā holoholona a pau me ia i loko o ka hale lana; hoʻohuaʻi maila ke Akua i ka makani ma luna o ka honua, a emi ihola ka wai.
2Ua papani ʻia aʻela nā pūnāwai o ka hohonu, a me nā puka wai o ka lani, a mālie iho ka ua mai luna mai.
3Hoʻi hou mau akula ka wai mai luna aʻe o ka honua; a ma hope o nā lā he haneri a me kanalima, ua emi ka wai.
4A i ka hiku o ka malama, i ka lā ʻumikumamāhiku o ua malama lā, ili ihola ka hale lana ma nā kuahiwi o ʻArarata.
5Emi mau ihola ka wai, a hiki i ka ʻumi o ka malama; i ka ʻumi o ka malama, i ka lā mua o ua malama lā, ua ʻikea nā wahi kiʻekiʻe o nā kuahiwi.
6¶ A hala nā lā he kanahā, wehe aʻela ʻo Noa i ka puka makani o ka hale lana āna i hana ai.
7Hoʻokuʻu akula ia i kekahi koraka, nāna i lele aku a hoʻi mai ma kēlā wahi a ma kēia wahi, a maloʻo iho ka wai ma ka honua.
8Hoʻokuʻu akula hoʻi ʻo ia i ka manu nūnū e ʻike i ka emi ʻana o ka wai mai ka ʻāina aku.
9Akā, ʻaʻole i loaʻa i ua manu nūnū lā he wahi e maha ai ʻo kona wāwae, a hoʻi hou maila ia i ona lā i loko o ka hale lana; no ka mea, ua uhi ka wai ma luna o ka honua a pau; a laila, ʻō akula kona lima, lālau akula ʻo ia iā ia, a huki maila iā ia i ona lā i loko o ka hale lana.
10Noho ihola ia i nā lā hou aku i ʻehiku; a hoʻokuʻu hou akula i ka manu nūnū i waho o ka hale lana.
11A ahiahi ihola, hoʻi maila ka manu nūnū i ona lā, aia hoʻi, he lau ʻoliva hou ma kona waha. Pēlā ʻo Noa i ʻike ai, ua emi iho ka wai mai luna aku o ka honua.
12Noho ihola ia i nā lā hou aku i ʻehiku; a hoʻokuʻu akula i ka manu nūnū; ʻaʻole nō ia i hoʻi hou mai i ona lā ma ia hope mai.
13¶ I ka makahiki ʻeono haneri a me kumamākahi, i ka malama hoʻokahi, a i ka lā mua o ua malama lā, maloʻo ihola ka wai mai ka honua aku; a wehe aʻela ʻo Noa i ke pani ma luna o ka hale lana, a nānā aʻela, aia hoʻi, ua maloʻo ka ʻāina.
14A i ka lua o ka malama, i ka lā iwakāluakumamāhiku o ua malama lā, ua maloʻo iho ka honua.
15ʻŌlelo maila ke Akua iā Noa, ʻī maila,
16“E hele aku ʻoe i waho o ka hale lana, ʻo ʻoe, me kāu wahine, me āu mau keiki kāne, a me nā wāhine a kāu mau keiki kāne me ʻoe.
17“E lawe pū mai me ʻoe i nā mea ola a pau iā ʻoe: ʻo nā mea ʻiʻo, ʻo nā manu, nā holoholona, a me nā mea kolo a pau e kolo ana ma luna o ka honua; i hānau nui ai lākou ma ka honua, i hua mai, a māhuahua ma luna o ka honua.”
18Hele akula ʻo Noa me kāna mau keiki kāne, a me kāna wahine, a me nā wāhine a kāna mau keiki kāne me ia.
19ʻO nā holoholona hoʻi a pau, ʻo nā mea kolo a pau, me nā manu a pau, a me nā mea a pau e kolo ana ma luna o ka honua, ma ko lākou mau ʻano iho, hele akula lākou i waho o ka hale lana.
20¶ Hana ihola ʻo Noa i kuahu no Iēhova, lālau akula ia i kekahi o nā holoholona maʻemaʻe a pau, a ʻo nā manu maʻemaʻe a pau, a kaumaha akula i nā mōhai kuni ma luna o ke kuahu.
21Honi maila ʻo Iēhova i ke ʻala ʻoluʻolu; ʻī ihola ʻo Iēhova i loko o kona naʻau, “ʻAʻole au e hōʻino hou i ka ʻāina no kānaka; no ka mea, ua hewa nō ka manaʻo ʻana o ko ke kanaka naʻau mai kona wā ʻōpiopio; ʻaʻole hoʻi au e luku hou aku i nā mea ola a pau, me aʻu i hana iho nei.
22“E mau auaneʻi ka wā
E kanu ai a e ʻohi ai; ke anu a me ka wela,
Ke kau a me ka hoʻoilo, ka lā a me ka pō,
A pau nā lā o ka honua.”
Právě zvoleno:
KA BUKE MUA A MOSE, I KAPA ʻIA KINOHI 8: KBH
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ka Baibala Hemolele © Partners Development Foundation, 2018.